Ap 12 - Porciones del Nuevo Testamento en el idioma Letuama

Rõmo ᵽõꞌirã kajuyaiᵽakiaka uᵽaka ĩoika eyaeka

^1-2 Sabeꞌerõꞌõ maboꞌikakurirã imatiyaika ᵽemakotowiᵽakãꞌã ñiaraᵽe. Ĩꞌrãko rõmo aiyare yaaika uᵽaka saya jããekako. Ñamikaki aiyarã rĩkamañuko, kobuꞌyareka ĩꞌᵽoũꞌᵽuarãeꞌearirakamaki tãꞌᵽia imaraᵽaka. Yataarikako imarĩ sarikarika ᵽakataᵽaraka baꞌiaja kojũaraᵽe.

³ Beꞌerõꞌõjĩte ate ñiaraᵽe: Kowãꞌtarã kajuyaiᵽakiaka uᵽaka ĩoka jũꞌaᵽakiaka, ĩꞌᵽotẽñarirakao buꞌya ĩᵽarimarãrikakaka tuaeka ruᵽukoꞌaika simaraᵽe. Suᵽabaatirãoka ĩꞌᵽaᵽitarakabi sawaka imaraᵽaka.

⁴ Ñeꞌmetãji rokajĩrã tãꞌᵽia kiᵽañaꞌruiraᵽe kiᵽĩkoaᵽi. Suᵽabaatirã rõmo wãꞌtarã keyarĩkaraᵽe, komakarãka ᵽoꞌijiᵽakãꞌã baꞌaokoroꞌsi.

⁵ Torã kirĩkamekãꞌãja ritaja ᵽoꞌimaja ĩᵽamaki imarũkikare korikaraᵽe. Tuᵽarãre ᵽũataekaki imarĩ, jia jãꞌmewãrũrũkika kimaraᵽe. Kajuyaiᵽakiaka uᵽaka ĩoka kire baꞌariyaᵽamaka kire korikaraᵽaka beꞌerõꞌõ Tuᵽarãre ruᵽarõꞌõrã kire kijaꞌaᵽearaᵽe, kika jãꞌmerimaji kimaokoroꞌsi.

⁶ Iꞌsuᵽaka kibaaraᵽaka ᵽotojo ᵽoꞌimajamatorã kiᵽako mirãkore ruꞌraᵽe. “Õꞌõrã jia kore ñiarĩrĩrãñu”, Tuᵽarãre ãrĩtikarõꞌõrã koꞌraᵽe. Torã koimaraᵽaka ᵽoto maekarakakuri wejejẽꞌrã aᵽejẽꞌrã ñeꞌmetãjirõꞌõjĩrã kore ĩarĩᵽaraka Tuᵽarãre imaraᵽe.

⁷ Sabeꞌerõꞌõ maboꞌikakurirã ᵽitãꞌmuareka imarãre ñiaraᵽe. Miguelrirã ángelrãka jĩrãᵽarã, kajuyaiᵽakiaka uᵽaka ĩoikirirãka.

⁸ Imakoꞌomakaja Miguelrĩrã ángelrãkare natẽrĩwãrũberaᵽe kajuyaiᵽakiaka uᵽaka ĩokirĩrã. Suᵽa imarĩ maboꞌikakuriᵽi Tuᵽarãre imarõꞌõᵽi nare kiᵽoataraᵽe torã imarũkimarĩrã najaraᵽe mae.

⁹ Kajuyaiᵽakiaka uᵽaka ĩokire kirirãᵽitiyika Tuᵽarãre ᵽoataraᵽe ika kaꞌiarã takaja nimaokoroꞌsi. Tuᵽarãre ᵽoataraᵽakiji kime Satanás wãmeiki. Ikijioka kime bikija ãñakarã ñaꞌrĩjãikaki. Suᵽabaatirã ritatojo wejeareka imarãre ᵽakirimaji imarĩ Diablo wãmeika kime baꞌiaja jaitaꞌarimaji imarĩ.

¹⁰ Torãjĩrã mae jãjirokaᵽi ikuᵽaka sãrĩkoraᵽe: —Tuᵽarãre yiꞌririjaᵽaraka imarã ᵽoꞌimajare tããrũkirĩmi koᵽakaja seyayu. Suᵽabaatirã ritaja ima tẽrĩwaꞌribaji imaki imarĩ, ritaja wejeareka ᵽoꞌimajare kijãꞌmeũꞌmuyu. Suᵽabaatirã, “Ritaja wejeareka imarãre yiroꞌsi mijãꞌmebe”, Tuᵽarãre kire ãñua simamaka, nare jãꞌmerimaji Cristore ime. Satanáre ᵽoataekaki imarĩ suᵽa kime Tuᵽarã. Kiᵽoataekakiji kime Jesúre yiꞌyurãre baꞌiaja baataꞌarimaji. Ĩmi, ñami ᵽariji Tuᵽarãre ĩaika wãjitãji muᵽaka Cristore yiꞌyurãre jaitaꞌruibaraka, “Baꞌirã nime”, Tuᵽarãre ãrĩkoᵽeiki.

¹¹ Suᵽa kijaiᵽakikoꞌomakaja, Oveja weiwaꞌyua uᵽaka imakire reyaeka riweaᵽi baꞌiaja nabaaika kijũjemaka, Satanáre tẽrĩkarã majeyomarã. “ ‘Jesúrika bojariroka mawãrõmaka õrĩwãrũbeyurãre mare jããrãñu jeꞌe’, marĩkoꞌomakaja okajãjia rakajebekaja maimayeꞌe. Suᵽa imarĩ samabojajaꞌataꞌsi”, narĩᵽuᵽajoaeka. Suᵽa baawaꞌri baꞌikare natẽrĩka.

¹² Õꞌõrã Satanáre imawãrũbeᵽakãꞌã, jia jĩjimaka maime mae. Mija kaꞌiareka imarãre, suᵽabaatirã waᵽuruᵽi riaᵽakiakareka imarãreoka baꞌiaja sabaarãñu. Iꞌsuᵽaka mijaroꞌsi simarãñu mija ᵽõꞌirã Satanáre ruiwaꞌyua simamaka. “Noꞌojĩrãmarĩa sajariwaꞌyu Tuᵽarãre wẽkomaka yire baarũkia”, ãrĩwaꞌri jimarĩa kiboebayu mae. Suᵽa imarĩ baꞌiaja mijare jũarũjebaraka kimarijayu,==sãrĩkoraᵽe.

¹³ “Maboꞌikakurirã ñimakoᵽeikareka koᵽakaja Tuᵽarãre yire ᵽoatayu”, ãrĩwaꞌri makarããraᵽako mirãkore sarĩrãᵽe kajuyaiᵽakiaka uᵽaka ĩoka.

¹⁴ Kore kirĩrĩkoꞌomakaja awaᵽakikajea ĩꞌᵽato joꞌbarito Tuᵽarãre kore ĩjiraᵽe kowiyaokoroꞌsi. Suᵽa imarĩ ᵽoꞌimajamatorã eyaerã kajuyaiᵽakiaka uᵽaka ĩoka kowiritaᵽawaꞌraᵽe. Torã maekarakakuri wejejẽꞌrã aᵽejẽꞌrã ñeꞌmetãjirã baꞌarika kore jiꞌabaraka Tuᵽarãre kore ĩarĩrãᵽe.

¹⁵ Koruꞌᵽakãꞌã ĩatirã, kore jããrika kiriꞌkakoᵽeraᵽe. Suᵽa imarĩ kirijokoᵽeaᵽi rĩkimakaja okoa kiᵽoataraᵽe kore ñaꞌmetariyaᵽakoᵽewaꞌri.

¹⁶ Iꞌsuᵽaka kibaakoꞌomakaja Tuᵽarãre kore jeyobaamaka, kaꞌia ruꞌritaraᵽarõꞌõrã sariraᵽe okoa kiᵽoatakoᵽeraᵽaka.

¹⁷ Sĩatirã, jimarĩ rõmore kiboebaraᵽe. Suᵽa imarĩ kore jããwãrũberiwaꞌri koriᵽarãmerãka jĩrĩrĩ keꞌraᵽe. Ĩꞌrã imaraᵽarã, Tuᵽarãre jãꞌmeika yiꞌyurã, suᵽabaatirã ritaja Jesucristore nare bojaekakaka jaꞌatabeyurã.

¹⁸ Toᵽi mae riaᵽakirijerã kajuyaiᵽakiaka uᵽaka ĩokire tuirĩkaraᵽe.