Ap 11 - Porciones del Nuevo Testamento en el idioma Letuama

Ĩꞌᵽarã rita ima jaiwaᵽuꞌataĩjirimaja

¹ Iꞌsia beꞌrõ jẽrãbaarũkia ángelre yire ĩjiraᵽe. Yire sĩjitirã ikuᵽaka Tuᵽarãre ãñua ángelre yire ãrãᵽe: —Ikaᵽi yire jiyiᵽuᵽaka õrĩriwiꞌia mijẽrãbaaᵽe, suᵽabaatirãoka sarã ima joeĩjiritẽrĩa mijẽrãbaabe. Suᵽabaatirã yiwiꞌiarã dikarakamarã yire jiyiᵽuᵽayeerimajare imarika mijoabe.

² Yiwiꞌiᵽẽte ĩꞌrãkõꞌrĩmato ᵽuri mijẽrãbaaꞌsi, yire yiꞌribeyurãre imarũkirõꞌõ simarũ ãrĩwaꞌri nare ñijikarõꞌõ simamaka. Ĩꞌrã imarã maekarakakuri wejejẽꞌrãka aᵽejẽꞌrã ñeꞌmetãjirã Jerusalénwejeakarãre baꞌiaja baataᵽarijarirãñurã.

³ Suᵽa simakoꞌomakaja ĩꞌᵽarã yiroꞌsi jaiwaᵽuꞌataĩjirimajare yiᵽũatarãñu. Jariromajaka kĩkeka najããmaka ĩatirã, “Baꞌiaja yija baaikareka yija ᵽuᵽaᵽeꞌriri imakoᵽeyu”, ᵽoꞌimajare ãrĩrũ ãrĩwaꞌri. Maekarakakuri wejejẽꞌrãka aᵽejẽꞌrã ñeꞌmetãjirõꞌõjĩrã nare ñorĩrũjeika ᵽoꞌimajare bojabaraka nimarãñu,==Tuᵽarãre ãñu ángelre yire ãrãᵽe.

⁴ Ika ĩꞌᵽabaꞌi uᵽaka imarã nime Tuᵽarãroꞌsi jaiwaᵽuꞌataĩjirimaja, õrĩkõrĩ: Wejeĩᵽamaki Tuᵽarã wãjitãji olivo ĩꞌᵽajũki uᵽaka, suᵽabaatirã ĩᵽabijioka ᵽeritẽrĩa yaaboaika uᵽaka nime.

⁵ Suᵽa imarĩ namajamarãre baꞌiaja nare baariyaᵽakoᵽerãka, narijokoᵽeaᵽi jũꞌrẽᵽoyua nare joeriataᵽatarãka.

⁶ Suᵽabaatirã okoa najarirũjebeᵽakãꞌã, jaribesarãka. Suᵽa imarĩ, “Tuᵽarãroꞌsi jaibaraka yija imarãka wejejẽꞌrãrõꞌõjĩrã okoa jaribesarãka”, nañu. Iꞌsuᵽakajaoka okoa riwearoꞌsi jarirãka, suᵽabaatirã ika wejeareka imarãre baꞌiaja najũaerã nayaᵽaika uᵽakaja baarimaja nime.

⁷ Torãjĩrã mae, Tuᵽarãroꞌsi jaiwaᵽuꞌataĩjibaraka nima ᵽuyarirãka ᵽoto werikaᵽakiaki koᵽea tiyibeyurõꞌokaki naka jĩrĩrĩ mirĩetaraki. Suᵽa baatirã, nare kijããrãñu.

⁸ Suᵽa nare baatirã, bikija yaᵽua tetaekarã niᵽamakire naᵽatakĩaeka weje maꞌa ñeꞌmetãjirã nare kiᵽããjiyerãñu. Torã imatiyaika wejea Sodomareka imaekarã, Egiᵽtoreka imarã baꞌiaja baaroyika uᵽaka baairã nimaeka. Suᵽa imarĩ Jerusalén nawãmeyeeyu Sodoma, Egiᵽto.

⁹ Maekarakarĩmi imaeka aᵽerĩmi wãjitãji aiyarõꞌõjĩrã namajaka torã imarãka. Torãjĩrã ritaja ᵽoꞌimatatarãre namajaka ĩarãñu. Namajaka ĩakoꞌomakaja nare ãꞌmijĩaekarã imarĩ, nare nayayerũjebesarãñu.

¹⁰ Torãjĩrã ᵽuri, jaiwaᵽuꞌatarimajare reyamaka, rĩkimarãja ᵽoꞌimajare jĩjimaka jarirãñu. Suᵽa imawaꞌri, “Koᵽakaja ĩꞌᵽarã baꞌiaja mare baataꞌarimajare riyu”, ãrĩwaꞌri rẽrĩtirã jĩjimakaᵽi baꞌirĩjia ᵽibabuꞌabaraka nimarãñu.

¹¹ Jĩjimaka nimaraᵽaka ᵽoto maekarakarĩmi beꞌerõꞌõ aᵽerĩmi ĩmi ñeꞌmetãjirõꞌõjĩrã, ate õñia Tuᵽarãre nare jarirũjeraᵽe. Namiꞌmirĩkaraᵽaka ĩatirã, jimarĩ ᵽoꞌimajare nare kĩkiraᵽe.

¹² Toᵽiji maboꞌikakuriᵽi, —Õꞌõrã mija iꞌtabe,==jãjirokaᵽi nare sãrĩkoraᵽe. Sãꞌmitiritirã, nare ãꞌmijĩarimaja ñakoarekaja, oko ũmaka watoᵽekaᵽi naꞌraᵽe.

¹³ Maboꞌikakurirã naꞌraᵽakarõꞌõjĩte jimarĩ jãjia kaꞌia iyiraᵽaka. Iꞌsuᵽaka sabaamaka 1000rakawiꞌi imaraᵽakakaka 100rakawiꞌi sakuyuᵽateraᵽe. Suᵽa baawaꞌri siete mil rakamarã ᵽoꞌimajare sariataraᵽe. Õñia jariwaꞌraᵽarã ᵽuri sĩatirã ᵽuᵽatawaꞌri, “Tẽrĩritakaji maboꞌikakurirã imakire ime”, narãᵽe Tuᵽarãreka.

¹⁴ Mamarĩrokajĩtekaka baꞌiaja jũarũkia koᵽakaja yibojaweayu. Sabeꞌerõꞌõjĩte noꞌojĩrãmarĩaja baꞌiaja jũarika jariwaꞌraᵽaka.

Ᵽiyika ángelre tromᵽeta ᵽuᵽueka

¹⁵ Jimarĩ jãjia kaꞌia iyiraᵽaka beꞌerõꞌõ, ᵽiyika ángelre tromᵽeta ᵽuᵽuraᵽe. Sakiᵽuᵽuraᵽaka ᵽoto maboꞌikakuriᵽi rĩkimarãja jãjirokaᵽi ikuᵽaka narĩkoraᵽe: —Ritatojo wejeareka imarã jãꞌmeika Tuᵽarãre tiyetayu mae. Maĩᵽamaki Tuᵽarã, suᵽabaatirã Cristoᵽitiyika, ᵽoꞌimaja ĩᵽamarã najayu. Suᵽa imarĩ ritatojo wejeareka imarãre jãꞌmejiᵽarimaji kimarãñu Tuᵽarã,==narĩkoraᵽe.

^16-17 Iꞌsuᵽaka simekãꞌãja veinticuatro rakamarã ᵽakiarimarã ruᵽataraᵽarã Tuᵽarã wãjitãji ĩᵽarimarãre ruᵽarũkiareka. Saᵽi miꞌmitirã kaꞌiareka namoꞌiᵽãñawaꞌraᵽe, Tuᵽarãre jiyiᵽuᵽayeewaꞌri. Toᵽi ikuᵽaka narãᵽe: —Yija ĩᵽamaki Tuᵽarã, ritaja ima ᵽemawaꞌribaji imaki mime. Suᵽa imarĩ bikija imaraꞌaekaki imakoꞌomakaja, maekakaoka imaki mime. Jia mibaayu yija ĩᵽamaki, tẽrĩriki imarĩ, maekaka ritatojo wejeareka imarã ᵽoꞌimajare jãꞌmerimaji mijayu.

¹⁸ Mia, nimauᵽatiji ᵽoꞌimatata mire yiꞌribeyurã boebariwaꞌri mire naᵽeꞌyorijarika. Sĩatirã, nare miboebaritiyaeka. Suᵽa imarĩ reyaeka mirãrã baꞌiaja nabaaeka ᵽareareka nare baꞌiaja mibaarũkirĩmi koᵽakaja seyayu mae. Imakoꞌomakaja mire yiꞌyurãre ikuᵽaka mibaarãñu: Miroꞌsi bojawaᵽuꞌataĩjirimaja, ĩᵽarimarã, suᵽabaatirã imatiyabeyurãoka, mire yiꞌriwaꞌri jia nabaaeka mirãka simamaka sawaᵽa jia nare mibaarãñu mae. Ika wejeareka ᵽoꞌimajare riatarijayurãre ᵽuri, miriatarãrĩmi seyayu mae,==narãᵽe.

¹⁹ Iꞌsia beꞌerõꞌõ maboꞌikakurirã Tuᵽarãre jiyiᵽuᵽaka õrĩriwiꞌia wieka ñiaraᵽe. Imatiyaikoto imaraᵽaka satõsiarã. Iꞌsikoto tõsiarã simaraᵽe, “Ikuᵽaka yire yiꞌyurãroꞌsi yibaarãñu”, ãñua oꞌoeka. Sañiaraᵽaka ᵽoto ikuᵽarõꞌõᵽiji jãjia wĩᵽoa ᵽaaraᵽe. Torãjite kaꞌiaoka iyiraᵽaka. Suᵽabaatirã werikitaka okojiyia jũjiraᵽaka.