Ap 10 - Porciones del Nuevo Testamento en el idioma Letuama

Ángel ᵽaᵽera buᵽeka rikaekakire imaekarõꞌõ

^1-2 Iꞌsuᵽaka simamaka ñiaraᵽaka beꞌrõ, ĩꞌrĩka ángel jãjika ũmakakaᵽi butekaki, maboꞌikakuriᵽi ruiraꞌamaka ñiaraᵽe. Kiruᵽukoꞌa boꞌi neꞌeᵽurea imaraᵽaka. Kiᵽema aiyaka uᵽaka yaarĩkaiki imatiirã kiñika ᵽeka jũꞌrẽika uᵽaka kimaraᵽe. Ikijioka kũᵽajĩka ᵽaᵽera buᵽeka wietika rikaraᵽaki. Kiũꞌᵽua ritaᵽẽꞌrõto riaᵽakiakarã rĩꞌkakoꞌomakaja, aᵽeᵽẽꞌrõtoᵽi ᵽuri kaꞌiarã kirĩꞌkaraᵽe.

³ Suᵽabaatirã yaia león akaika uᵽaka jãjirokaᵽi kiakaseremaka, ĩꞌᵽotẽñarirakakuri wĩᵽoa kire yiꞌrikoraᵽaka.

⁴ Wĩᵽoa jaikoraᵽaka uᵽaka yoꞌoerã baamaka, maboꞌikakuriᵽi ikuᵽaka yire sãrĩkoraᵽe: —Wĩᵽoa jairaᵽaka aᵽerãre mibojaꞌsi. Suᵽabaatirã samioꞌoaꞌsi,==yire sãrĩkoraᵽe.

^5-7 Torãjĩrã ate ĩꞌrãᵽẽꞌrõto kiũꞌᵽua riaᵽakiakarã rĩkamarĩtirã aᵽeᵽẽꞌrõto kaꞌiarã rĩkamañuka ritaᵽẽꞌrõto kiᵽitaka ĩmirã miꞌmatatirã, ikuᵽaka kẽrãᵽe: —Tuᵽarã õñia imajiᵽaki wejeᵽema, kaꞌia, riaᵽakiaka suᵽabaatirã ritaja sareka ima ᵽoꞌijiaekaki. Iꞌsuᵽaka simamaka, rita sime kĩaika wãjitãji ikuᵽaka ñañua: Koᵽakaja iꞌtojĩrãja sime mae, dakoa mataꞌarũkia imabeyua aᵽea. Ᵽiyika ángelre tromᵽeta ᵽuᵽurãka ᵽoto, “Ikuᵽaka yibaarãñu”, kẽrĩka uᵽakaja Tuᵽarãre baarãñu. Bikija ᵽuri ritaja ᵽoꞌimajare sakibojaberika ruᵽu. Imakoꞌomakaja kiroꞌsi bojaĩjirimajare takaja sakibojaeka. Suᵽa imarĩ nare kibojaeka uᵽakaja simarãñu,==kẽrãᵽe.

⁸ Toᵽi ate ĩmiᵽi ikuᵽaka yire sãrĩkoraᵽe: —Ángel, ĩꞌrãᵽẽꞌrõto kiũꞌᵽua riaᵽakiakarã rĩkamarĩtirã, aᵽeᵽẽꞌrõto kaꞌiarã rĩkamañuka ᵽõꞌirã meꞌᵽe. Kiᵽõꞌirã aꞌritirã ᵽaᵽera buᵽeka kirikaikajĩka meꞌebe,==yire sãrĩkoraᵽaka ñaꞌmitiraᵽe.

⁹ Toᵽiji kiᵽõꞌirã yaꞌraᵽe. Kiᵽõꞌirã eyatirã ᵽaᵽera buᵽeka kire yijẽñeraᵽe. Iꞌki ikuᵽaka yire ãrãᵽaki: —Ãjaꞌa, samibaꞌabe. Samibaꞌarãka ᵽoto mumioko uᵽaka mirijokoᵽearã sajarikoꞌomakaja miñeꞌmearã sabitamarĩrãñu.==

¹⁰ Iꞌsuᵽaka kẽᵽakãꞌã, seꞌetirã, sayibaꞌaraᵽe. Sayibaꞌaraᵽaka beꞌrõ mumiokoa mukuika uᵽaka yirijokoᵽearã sajaraᵽe. Imakoꞌomakaja sayibaꞌaraᵽaka beꞌrõ yiñeꞌmeã yire yiꞌaraᵽaka.

¹¹ Toᵽi ikuᵽaka yire kẽrãᵽe ate: —Ᵽoꞌimatata imauᵽatiji, nakaꞌiareka noka jaibaraka imarã uᵽatiroꞌsi, suᵽabaatirã ritaja ĩᵽarimarãroꞌsi, “Ikuᵽaka simaerã baayu”, Tuᵽarãroꞌsi bojaĩjirika ima mire ate,==yire kẽrãᵽe ángel.