Ap 1 - Porciones del Nuevo Testamento en el idioma Letuama

Makãrãrũñuroka uᵽakaᵽi Jesucristore Juanre bojaeka

¹ Ika ᵽaᵽerareka oꞌoeka ikuᵽarõꞌõᵽiji imarũkiakaka bojaika. Kiyaᵽaika uᵽaka baarijayurãre sõñaokoroꞌsi Kimaki Jesucristore sakijaꞌataeka Tuᵽarã, nare sakibojaokoroꞌsi. Suᵽa imarĩ ángelre yiᵽõꞌirã kiᵽũataeka yire sakiõrĩrũjewãrũokoroꞌsi. Juan, kiyaᵽaika uᵽaka baaiki ñime.

² Yiꞌi Juan ᵽõꞌirã ᵽemakotowiritirã ángelre ritaja yire bearaᵽakarõꞌõjĩrãja yibojayu, saᵽemawaꞌribaji ᵽakibekaja. Tuᵽarãrika bojariroka Jesucristore yire õrĩrũjemaka.

³ Ika yibojaika koyiaja simamaka ikuᵽaka mijare ñañu mae. Ika ñañua bojarimaja, suᵽabaatirã sayiꞌrirãñurãoka jia jĩjimaka imarijarirãñurã.

Ĩꞌᵽotẽñarirakaweje Jesúre yiꞌyurã imaekarãroꞌsi Juanre oꞌoeka

^4-5 Mae, ĩꞌᵽotẽñarirakaweje Asia kaꞌiareka Jesúre yiꞌririjaᵽaraka imarãroꞌsi ika yoꞌoyu yiꞌi, Juan. Suᵽa imarĩ Tuᵽarã, Jesucristo, Esᵽíritu Santoka maekarakamarã jia mijare najeyobaarũ, jia naka mija imaerã. Bikija imaraꞌaekaki imakoꞌomakaja maekakaoka imarijayuka Tuᵽarã. Ñamajĩoka imajiᵽarãki kime. Tuᵽarãre jãꞌmeruᵽa wãjitãji imarã ĩꞌᵽotẽñarirakamarã. Esᵽíritu Santo ritaja õrĩᵽataiki, ritaja baaiki kime ãrĩrikoᵽakaja kiwãjitãji nimarijayu. Suᵽabaatirã Jesucristo kime Kiᵽakire ãñu uᵽakaja bojarimaji. Suᵽa imarĩ, reyakoꞌomakaja õñia kijariᵽeꞌrika ate. Iꞌsuᵽaka kibaaũꞌmuekaᵽi ãrĩwaꞌri reyakoꞌomakaja rĩkimarãja sabeꞌerõꞌõ õñia jariᵽeꞌrirãñurã ate. Suᵽa imarĩ ritatojo weje ĩᵽamarãre jãꞌmeiki kime. Iꞌsuᵽakajaoka mare wãtawaꞌri maroꞌsi riwejurubaraka kireyaekaᵽi baꞌiaja mabaaika kiwaᵽakoyika.

⁶ Iꞌsuᵽaka mare kibaaeka simamaka, kijãꞌmerũkirãroꞌsiji maime. Suᵽabaatirã kurarãka uᵽaka Kiᵽaki Tuᵽarãre yaᵽaika uᵽakaja baarimaja maime. Suᵽa imarĩ, “Ritaja ĩᵽamaki imarĩ dika jariwaꞌririmarĩa jãꞌmeᵽataiki kime. Aᵽea ᵽemawaꞌribaji jiitakaja jiyiᵽuᵽaka morĩrũkika kime”, ãrĩwaꞌri jĩjimaka kika maimarijarirãñu. Iꞌsuᵽaka oyiaja imarũkia simarũ.

⁷ Ikuᵽaka imarũkia jia mija õrĩrijaᵽe: Mia oko ũmaka watoᵽekaᵽi Cristore iꞌtarãñu. Ritatojo wejeareka imarã, suᵽabaatirã kire jããekarã ᵽariji sĩarãñurã suᵽa simarãka. “Baꞌiaja yijare kijũarũjerãñu”, ãrĩwaꞌri norirãñu. Iꞌsuᵽaka simarũ.

⁸ Ikuᵽaka kibojayu: “Alfa, Omega ñime. Alfa ñime ñañu ritaja ᵽoꞌijiaekaki imarĩ. Suᵽabaatirã Omega ñañua ‘Ñamajĩ wejea tiyirũjerũkika imarĩ’. Ritaja ima tẽrĩwaꞌribaji imaki ñime. Bikija imaraꞌaekaki imakoꞌomakaja maekakaoka imaki ñime. Suᵽabaatirã yiꞌijioka ñime imajiᵽarũkika”, ãrĩwaꞌri Tuᵽarãre bojayu.

Juan, makãrãrũñuroka uᵽakaᵽi Cristore kĩaeka

⁹ Yiꞌi Juan, mija jeyomaki, Jesucristore yiꞌyuka ñime. Mija uᵽakaja Tuᵽarãre yire jãꞌmeokoroꞌsi ñime. Suᵽa imarĩ, mija uᵽakajaoka ᵽoꞌimajare yire baꞌiaja jũarũjerijayu, Maĩᵽamakirirã uᵽatiji iꞌsuᵽaka oyiaja jũarũkirã maima simamaka. Baꞌiaja jũakoꞌomakaja Jesucristore ãꞌmitiriᵽẽaiki imarĩ, sayirakajeᵽããyu. Suᵽa imarĩ Ᵽatmos wãmeirõꞌõ jũmurikarã yire nataaraᵽe Tuᵽarãrika bojariroka yibojari ᵽareaja wẽkomaka ñimaokoroꞌsi.

¹⁰ Domingorĩmi Tuᵽarãre jiyiᵽuᵽayeebaraka Esᵽíritu Santorikaᵽi ñaꞌajããekaki ñimaraᵽaka ᵽoto, ikuᵽarõꞌõᵽiji makãrãrũñuroka uᵽakaᵽi yire kĩarũjeraᵽe. Suᵽa ñimaraᵽaka ᵽoto yiᵽẽterõꞌõᵽi tromᵽeta naᵽuᵽuika jãjia okaayurõꞌõjĩrã jãjirokaᵽi ĩꞌrĩkare jaimaka ñaꞌmitiraᵽe.

¹¹ Toᵽi mae ikuᵽaka yire kẽrãᵽe: —Maekaka mire yibeaika ᵽaᵽerarã samioꞌobe. Suᵽabaatirã Asiakaꞌiarã Jesúre yiꞌyurã ĩꞌᵽotẽñarirakawejearã imarãroꞌsi samiᵽũatabe. Ikuᵽaka wãmeika sime wejea samiᵽũatarũkirõꞌõ: Éfeso, Esmirna, Ᵽérgamo, Tiatira, Sardes, Filadelfia, suᵽabaatirã Laodicea==kẽrĩkoraᵽe.

¹² Torãjĩrã mae, “¿Maki torã yire jaiki?”, ãrĩwaꞌri jorowaꞌri yiyoiraᵽe jairaᵽakire ĩariyaᵽawaꞌri. Yoirã baakõrĩ ĩꞌᵽotẽñarirakabi orokaka baaeka ᵽeritẽrĩa yaaboaika imamaka ñiaraᵽe.

¹³ Suᵽabaatirã sawatoᵽekarã ĩꞌrĩka ᵽoꞌimaji uᵽaka ĩoikire imaraᵽe. Kijariroaka saya uᵽaka baaeka kiũᵽusikarõꞌõjĩrã ñoaka jããiki, suᵽabaatirã orokaka baaeka kikãrĩmaki wãjitãji jããᵽiaekaki kimaraᵽe.

¹⁴ Suᵽabaatirã kiruᵽukoꞌa ruᵽua boitaka sõiraᵽe. Kiñakoa ᵽuri ᵽeka jũꞌrẽika uᵽaka õiraᵽaka.

¹⁵ Kiũꞌᵽua bronce najoeika ᵽoto yaꞌtaika uᵽaka õiraᵽaka. Kijaika ãta jãjia weꞌrirĩkaika uᵽaka okaaraᵽaka.

¹⁶ Kiᵽitaka ritaᵽẽꞌrõtoᵽi ĩꞌᵽotẽñarirakamaki tãꞌᵽia kirikaraᵽe. Kirijokoᵽeaᵽi ĩꞌᵽaᵽẽꞌrõtowãꞌtaja oᵽijieka sara wararaᵽaka. Kiᵽema jiitakaja aiyare yaaika uᵽaka õiraᵽaka.

¹⁷ Torãjĩrã mae kire ĩakoᵽekaja kiwãjitãji ñaꞌrĩtirã, jaiberijĩka, rĩꞌmeberijĩka yijaraᵽe. Suᵽa yibaamaka kiᵽitaka ritaᵽẽꞌrõtoᵽi yire rabetirã, ikuᵽaka yire kẽrãᵽe: —Mikĩkiaꞌsi. Ritaja ᵽoꞌijiaekaki yiꞌi, suᵽabaatirã ñamajĩ wejea tiyirũjerũkika.

¹⁸ Õñia imajiᵽarũkika, reyakoꞌomakaja õñia yijariᵽeꞌrika beꞌerõꞌõ aᵽekurioka reyarũkimarĩka ñime. Iꞌsuᵽaka ñima imarĩ, nareyaikareka ᵽoꞌimajare eꞌetorirũkika ñime õñia nimajiᵽaokoroꞌsi. Suᵽabaatirã toᵽi nare jaꞌajiyerũkimarĩka ñime. Suᵽa imarĩ reyaeka mirãrãre imarõꞌõ koᵽereka wierimajiji ñime,==yire kẽrãᵽe yiᵽõꞌirã ᵽemakotowiritirã.

¹⁹ Suᵽa yire ãrĩweatirã ikuᵽaka yire kẽrãᵽe ate: —Maekaka ima, ñamajĩ imarũkia miaika simamaka ika samiaika uᵽakaja samioꞌobe.

²⁰ Mia, ritaᵽẽꞌrõto ĩꞌᵽotẽñarirakamaki tãꞌᵽia yirikaika ĩakoꞌomakaja, “Iꞌsiaroꞌsi simekãꞌã”, ãrĩwãrũbeyuka miꞌi. Ikuᵽakaroꞌsi sime: Ĩꞌᵽotẽñarirakamarã tãꞌᵽia miaika ĩꞌᵽotẽñarirakawejekarã yire ãꞌmitiriᵽẽarimajare imaruᵽutarimaja ãrĩrika sime. Iꞌsuᵽakajaoka sime ᵽeritẽrĩa yaaboaika miaika. Ĩꞌᵽotẽñarirakawejerã yire yiꞌyurãre ime ãrĩrikoᵽakaja sime,==yire kẽrãᵽe.