2 Ts 2 - Porciones del Nuevo Testamento en el idioma Letuama

Ikuᵽaka simarãñu Jesucristore etaerã baarãka ruᵽu

¹ Mija ãꞌmitiᵽe yija jeyomarã. Maĩᵽamaki Jesucristore etarãñu ate kika maimaokaroꞌsi mare rẽarĩ. Iꞌsuᵽaka simarãka simamaka ketarũkirĩmikaka mijare yiwãrõerã baayu mae.

² Ikuᵽarõꞌõᵽiji, “Koᵽakaja Jesúre etarijẽꞌraka seyatiyu”, ãrĩwaꞌri ĩꞌrãrimarãre mijare bojaᵽakimaka ãꞌmitiritirã, õrĩᵽũabeyurã uᵽakataka rukubaka mija ᵽuᵽajoaꞌsi. Suᵽabaatirã, “Rita mijare ñañu. Esᵽíritu Santo yijare bojaraᵽaki”, narĩᵽakikoᵽemakaoka nare mija yiꞌriaꞌsi. Iꞌsuᵽakajaoka, “Ᵽaᵽeraᵽi Ᵽablote yijare sabojayu”, naᵽakãꞌã nare mija ãꞌmitiriᵽẽaꞌsi.

³ Iꞌsuᵽaka mijare ãrĩkoᵽeirãte mija bojaᵽakirũjeaꞌsi. Ketaerã baarũki ruᵽu ikuᵽaka simarãñu: Tuᵽarãte jaꞌatatirã, “Kimajamarã yija ime”, ãrĩwaꞌri ᵽoꞌimajare kire yiꞌribesarãñu. Iꞌtojĩte Baꞌiaja baarimijikaka jãꞌmeikite etarãñu. Ikiji kime, “Baꞌiaja imarika tiyibeyurõꞌõrã yiᵽũatarũkika”, bikijarãja Tuᵽarãte ãrĩkaki.

⁴ Ikuᵽaka Baꞌiaja baarimijikaka jãꞌmerimajite baarãñu: Ritaja jiyiᵽuᵽaka ᵽoꞌimajare õrĩrijayua imakoᵽeika nareka kijãjibaarãñu. Tuᵽarã majamaki kima imarĩ, “Tẽrĩrikiji ñime, yire takaja mija ãꞌmitiriᵽẽabe”, ᵽoꞌimajare kẽrĩrãñu. Iꞌsuᵽaka kiᵽuᵽaka ima simamaka Tuᵽarãte jiyiᵽuᵽaka õrĩriwiꞌiarã kãkatirã imatiyairõꞌõrã eyaruᵽaritirã, “Tuᵽarãja yiꞌi”, kẽrĩᵽakirãñu.

⁵ Mijaka ñimaraᵽaka ᵽoto iꞌsuᵽaka imarũkiakaka mijare yibojawãrõtiraᵽe. “Yeꞌkariribeyurã nimarijiyu”, mijareka ñarĩᵽuᵽajoayu.

⁶ Baꞌiaja baarimijikaka jãꞌmeiki iꞌtawãrũbeyukajika maekaka. “Ikuᵽaka simamaka kiꞌtawãrũbeyu ruᵽu. Ketarũkirĩmi ruᵽubajirãja ketakoreka kire satáꞌteyu ruᵽu”, ãrĩwaꞌri mijare yibojaraᵽaka õñurã mija ime.

^7-8 Suᵽa simakoꞌomakaja, ᵽoꞌimajare õrĩwãrũbeyuaᵽi, baꞌiaja wejeareka Satanáre baaũꞌmutiyu. Iꞌsuᵽaka baariᵽotojo, wããrõꞌõrãja etarũkikate etawãrũbeyu ruᵽu. Kire táꞌteikite kire ĩaᵽẽabesarãka ᵽoto ᵽuri ritaja ᵽoꞌimaja wãjitãji Baꞌiaja baarimijikaka jãꞌmeikite etarãñu. Iꞌsuᵽaka kima imakoꞌomakaja maĩᵽamaki Jesúre kire tẽrĩrãñu. Ketarãñurĩmi tẽrĩwaꞌribaji kibaawãrũika beawaꞌri, kiᵽuritarãkaᵽiji kire kiriatarãñu.

⁹ Ika yibojaika ruᵽubajirã, ikuᵽaka simarãñu: Satanárikaᵽi ãrĩwaꞌri Baꞌiaja baarimijikaka jãꞌmeiki ritaja maikoribeyua ᵽoꞌimajare beaᵽakirĩ etarãki.

¹⁰ Ritaja baꞌiaja baawãrũiki imarĩ, baꞌiaja imarika tiyibeyurõꞌõrã aꞌrirũkirãte kiᵽakirãñu. Tuᵽarãrika bojariroka yiꞌririyaᵽaberiwaꞌri, baꞌiaja imarika tiyibeyurõꞌõrã naꞌrirãñu. Tuᵽarãrika bojariroka nayiꞌrirãkareka, saᵽi natãrĩrũkia simajĩñu.

¹¹ Nayiꞌribeyu imarĩ, rukubaka Tuᵽarãte nare ᵽuᵽajoarũjerãñu Baꞌiaja baarimijikaka jãꞌmerimajirika ᵽakirimajaroka nayiꞌyaokaroꞌsi.

¹² Tuᵽarãrika bojariroka ãꞌmitiriᵽẽabekaja, baꞌiaja baarikareka najĩjimaari ᵽareareka baꞌiaja imarika tiyibeyurõꞌõrã naꞌyaokaroꞌsi iꞌsuᵽaka kibaarãñu.

Ikuᵽaka Jesucristore yiꞌyurãte ime

¹³ Mija ãꞌmitiᵽe yija jeyomarã, Maĩᵽamaki jia mijare wayuĩaiki. Wejea kiᵽoꞌijiaeka ᵽoto kitããrũkirãroꞌsi kiwãꞌmatikarã mija ime. Suᵽa imarĩ, Esᵽíritu Santore mijare jeyobaaikaᵽi baꞌiaja baarika jaꞌatatirã, kirika bojariroka yiꞌriwaꞌri õñia mija imajiᵽarãñu. Iꞌsuᵽaka mijaroꞌsi kibaaeka ᵽuᵽajoawaꞌri, “Jia mibaayu Tuᵽarã”, mijaroꞌsi yija ãrĩjiᵽarijayu.

¹⁴ Jesucristorika bojariroka mijare yija wãrõraᵽakaᵽi ãrĩwaꞌri Tuᵽarãte mijare wãꞌmaeka. Suᵽa imarĩ, maboꞌikakurirã maeyarãka ᵽoto tẽrĩritaki kimakaka maĩᵽamaki Jesucristore bearãñu. Yija bojamaka mija ãꞌmitiriᵽearaᵽaka simamaka torã yijaka mija imarãñu.

¹⁵ Yijeyomarã, suᵽa imarĩ, Jesucristore mija yiꞌyua jaꞌatarimarĩa mija imabe. Wãjirokakaka mijare yija wãrõraᵽaka, aᵽea oꞌotirã ᵽaᵽeraᵽi mijare yija ᵽũataraᵽakaoka jia mija ãꞌmitiriᵽẽarijaᵽe.

^16-17 Maᵽaki Tuᵽarã jia mare baaiki, mare wayuĩaiki imarĩ, jĩjimaka ᵽuᵽajoabaraka maimaerã mare kijeyobaaeka. Suᵽa imarĩ, “Kika õñia maimajiᵽarãñu”, ãrĩwaꞌri sataꞌabaraka jia jĩjimaka mare ᵽuᵽarirũjeiki kime. Mijare najeyobaarũ maĩᵽamaki Jesucristoᵽitiyika jia oyiaja baabaraka, baꞌiaja jaibuꞌabekaja mija imaokaroꞌsi.