2 Ts 1 - Porciones del Nuevo Testamento en el idioma Letuama

Jesucristore yiꞌyurã Tesalónicakarãroꞌsi Ᵽablote ᵽaᵽera ᵽũataeka ate

¹ Tesalónicawejeakarã Jesucristore yiꞌyurã, Jia toᵽi mija imabe. Yiꞌi Ᵽablo, suᵽabaatirã Silvano, Timoteoᵽitiyika ika ᵽaᵽera mijaroꞌsi yija oꞌoyu, Maᵽaki Tuᵽarãrirã, suᵽabaatirã maĩᵽamaki Jesucristorirã mija imamaka.

² “Tesalónicawejeakarãre jia mija baabe”, ãrĩwaꞌri Maᵽaki Tuᵽarãte, suᵽabaatirã maĩᵽamaki Jesucristoreoka mijaroꞌsi yija jẽñerijayu. Jia dako okamirãmarĩaja mijare nimarũjeokaroꞌsi.

³ Maĩᵽamaki Jesucristore, kiᵽaki Tuᵽarã ᵽitiyika nare yiꞌriwaꞌri, mija wayuĩabuꞌaika simamaka, iꞌsirokaja mija rikatuyua imarĩ, “Jia yijare mibaayu”, Tuᵽarã yija ãrĩrijayu.

⁴ Mija tuyurã rõꞌõrã, aᵽerã Jesúre yiꞌyurãte mija imakaka jĩjimakaᵽi yija bojarijayu. “Tesalónicawejeakarã jia Tuᵽarãte yiꞌyurã, kire yiꞌririjaꞌatabeyurã. Wayuᵽiꞌribekaja, okajãjia ᵽuᵽajoairã nime, aᵽerãte baꞌiaja nare baakoꞌomakaja, sanarakajeᵽããrijayu”, ãrĩwaꞌri nare yija bojarijayu.

⁵ Tuᵽarãte yiꞌyurã mija imamaka, aᵽerãte baꞌiaja mijare baaika simakoꞌomakaja, “Kẽrĩka uᵽakaja Tuᵽarãte baarãñu”, ãñurã imarĩ kire mija yiꞌririjaꞌatabeyu. “Baꞌiaja nare imabeyua”, mijareka ãrĩwaꞌri ritajare kijãꞌmerãka ᵽoto kika mijare kimarũjerãñu. Tuᵽarãte baarũkia õrĩwaꞌri, “Rita, jia oyiaja baaiki kime”, ãrĩwãrũirã maime.

⁶ Kireje jiyuika uᵽaka baaiki imarĩ, baꞌiaja mijare baairãte baꞌiaja kibaarãñu.

⁷ Maekaka baꞌiaja mija jũaika uᵽaka jũajiᵽarũkimarĩrã mija ime. Suᵽabaatirã mija uᵽaka yija jũaika rekaoka ĩꞌrãrĩmi maroꞌsi sakitiyetarãñu. Suᵽa kibaarãñu maboꞌikakuriᵽi maĩᵽamaki Jesús, suᵽabaatirã kiángelrãka tẽrĩrirã ᵽitiyika jãjia jũꞌrẽika watoᵽekaᵽi ketarãka ᵽoto.

⁸ Torãjite Tuᵽarãte õrĩriyaᵽaberiwaꞌri, Jesúrika bojarirokaoka ãꞌmitiriᵽeꞌyoirãte baꞌiaja kibaarãñu.

⁹ Baꞌiaja jũajiᵽarũkirã nimamaka, Maĩᵽamakire imarõꞌõ táꞌteka oyiaja naroꞌsi imajiᵽarãka. Tẽrĩwaꞌribaji kirikaᵽi jiitaka kiyaaboaika ĩarũkimarĩrãroꞌsi nimarãñu.

¹⁰ Iꞌsuᵽaka kibaarãñu Jesúre ate etarãñurĩmi. Suᵽa imarĩ jĩjimakaᵽi kirirãte kire eꞌetorirãñu. Kire ĩatirã, “Jiitaki kime. Tẽrĩwaꞌribaji jia mare baaiki kime”, ãrĩwaꞌri kire najiyiᵽuᵽayeerãñu. Mijare yija wãrõraᵽaka yiꞌyurã imarĩ, naka mija imarãñu mijaoka.

¹¹ Ikuᵽaka ᵽuᵽajoawaꞌri Tuᵽarãte mijaroꞌsi yija jẽñejiᵽarijayu. Kiyaᵽaika uᵽakaja baairã mija imaokaroꞌsi mijare kiakaeka. Suᵽa imarĩ, kiyaᵽaika uᵽaka mija baamaka ĩawaꞌri, “Nare yakaikaᵽi ãrĩwaꞌri yirirã najayua jia sime mae”, kẽñaokaroꞌsi, kire yija jẽñerijayu. Suᵽabaatirã, “Simauᵽatiji jia baarika nayaᵽaika nabaawãrũokaroꞌsi nare mijeyobaabe. Suᵽabaatirã mire yiꞌriwaꞌri nabaarijayua jia saweiokaroꞌsi mirikaᵽi nare mijeyobaabe”, ãᵽaraka kire yija jẽñerijayu.

¹² Iꞌsuᵽaka ᵽoꞌimajare ĩarãka wãjitãji jia mija baamaka ĩawaꞌri maĩᵽamaki Jesucristore najiyiᵽuᵽayeerãñu. Kirirã mija ima simamaka, iꞌsuᵽakajaoka mijare kibaarãñu. Tuᵽarã, maĩᵽamaki Jesucristoᵽitiyika jia mijare nabaamaka iꞌsuᵽaka mijaroꞌsi simarãñu.