2 Co 6 - Porciones del Nuevo Testamento en el idioma Letuama

¹ Tuᵽarãre yijare jeyobaamaka kimajaroka wãrõrimaja imarĩ, ikuᵽaka mijare yija ãñu: “Mijare wayuĩabaraka, jia Tuᵽarãre mijare baaika simamaka jia kire ãꞌmitiriᵽẽarijaᵽaraka mija imabe. Kire mija yiꞌriᵽakiwãꞌimarĩaꞌsi”.

² Mija ĩabe, kimajaroka oꞌoeka imaᵽi ikuᵽaka kẽrĩka: “Mijare yijeyobaarũkirĩmi seyaeka ᵽoto, mija jẽñerijayua ãꞌmitiritirã jia mijare yijeyobaaeka baꞌiaja mija jũaekareka mija waᵽuꞌyaokoroꞌsi”, ãrĩwaꞌri sabojayu. Mija ãꞌmitiᵽe yija jeyomarã. Maekaka ᵽuri ᵽoꞌimajare ãꞌmitiritikaja, suᵽabaatirã baꞌiaja nabaaikareka nare tããerã imatikakiji Tuᵽarãre imarijayu. Suᵽa imarĩ maekaka ᵽuri, kire najẽñerãka uᵽakaja kibaarãñu.

³ Kirika bojariroka wãrõtaᵽabaraka baꞌiaja yija baabeyu, “Ᵽakirimajaroka nawãrõyu jeꞌe”, ᵽoꞌimajare yijareka ãrĩaꞌsi ãrĩwaꞌri.

⁴ Suᵽa imarĩ, “Rita sime, wãjia Tuᵽarãroꞌsi baꞌirabeĩjirimaja nime”, ᵽoꞌimajare ãñaokoroꞌsi Tuᵽarãre yaᵽaika uᵽakaja baabaraka yija imarijayu. Suᵽa imarĩ ĩꞌrãkurimarĩa baꞌiaja aᵽerãre yijare baakoꞌomakaja nare yija ruᵽuwaᵽaeꞌebeyu. Iꞌsuᵽakajaoka baꞌiaja yija jũarijayu ᵽoto, sarã ᵽuᵽajoabekaja Tuᵽarãre yaᵽaika uᵽakaja baabaraka yija ime. Õrĩkõrĩ, ikuᵽaka sime baꞌiaja yija jũarijayua:

⁵ Yijare naᵽajerijayua, wẽkomaka imariwiꞌiarãoka ĩꞌrãkurimarĩa yijare nataatikoᵽeyu. Aᵽerikuri boebarã oyiaja rẽrĩtirã, okajãjiaᵽi, “Nare majããerã”, ãrĩka nakasererijayu. Suᵽabaatirã rĩkimakaja baꞌiraberika yijaroꞌsi imamaka, jimarĩa yija rũrĩrijayu aᵽerikuri. Iꞌsuᵽakajaoka ñamiareka kãᵽekaja yija imarijayu, aᵽerikuri baꞌarika imabeyu ᵽoto yija kẽsirabarijayu.

⁶ Ritaja yija rakajeᵽããrijayua ĩawaꞌri, “Rita sime Tuᵽarãre yaᵽaika uᵽakaja Ᵽablorãkare baarijayua”, ᵽoꞌimajare yijareka ãñu. Suᵽa imarĩ, jiiᵽuᵽarã imarĩ, jiirokaᵽi yija imarijayu. Iꞌsuᵽakajaoka jia Tuᵽarãrika bojariroka õñurã yija ime. Suᵽabaatirã yija yaᵽabeyua ᵽoꞌimajare yijare baakoꞌomakaja sayija rakajeᵽããrijayu. Tuᵽarãre yaᵽaika uᵽakaja baairã imarĩ, jia ᵽoꞌimajare wayuĩawaꞌri, nare yija jeyobaayu. Esᵽíritu Santore yijareka ñaꞌrĩjãika imarĩ, kirikaᵽi jia yijare kijeyobaarijayu. Iꞌsuᵽakajaoka ᵽakirimarĩa, ᵽoꞌimajare wayuĩairã imarĩ, jia nare yija jeyobaayu.

⁷ Tuᵽarãre yijare jeyobaaikaᵽi kimajaroka bojaika uᵽakaja sayija wãrõrijayu kiyaᵽaika uᵽakaja simaokoroꞌsi. Iꞌsuᵽaka kirika bojariroka yija wãrõrijayu ᵽoto, jia yija imamaka ĩawaꞌri, “Jiiᵽuᵽarã imarĩ, rita yijare nabojayu”, narĩrãñu.

⁸ Ĩꞌrãrimarã imarã yijare jiyiᵽuᵽayeeirã, aᵽerimarã ᵽuri jẽnoꞌo. Iꞌsuᵽakajaoka ĩꞌrãrimarã, “Jia baarijayurã nime”, ãñurã imakoꞌomakaja, aᵽerã ᵽuri iꞌsuᵽaka ãrĩbeyurã. Tuᵽarãre ᵽũataekarã yija imakoꞌomakaja, “Waᵽuju ᵽakirimaja nime”, ĩꞌrãrimarãre yijareka ãrĩkoᵽeyu.

⁹ Rĩkimarãjaoka nime yijare õrĩkoꞌomakaja, “Baꞌiratarã nime”, yijareka ãñurã. “Reyarũkirãja nime”, yijareka narĩkoꞌomakaja, õñia yija ime ruᵽu. Iꞌsuᵽakajaoka jimarĩa baꞌiaja yijare nabaaika simakoꞌomakaja reyabeyukajirã yija ruᵽu.

¹⁰ Iꞌsuᵽaka simamaka aᵽerikuri jimarĩa baꞌiaja ᵽuᵽarikoꞌomakaja Maĩᵽamakire jia yijare baarijayua ᵽuᵽajoawaꞌri jĩjimaka yija imarijayu. Wayuoka baairã imakoꞌomakaja Tuᵽarãrika bojariroka yija wãrõikaᵽi ãrĩwaꞌri rĩkimarãre jia Tuᵽarãre baarũkiakaka natõᵽoyu. Maekaka dakomarĩrã yija imakoꞌomakaja, Jesúrirã yija imamaka, ritaja jia oyiaja kirika Tuᵽarãre yijare jaꞌatayu.

¹¹ Mija ãꞌmitiᵽe yija jeyomarã, Corintowejeakarã. Ritaja yija ᵽuᵽajoaika yaꞌerimarĩaja mijare yija bojayu, mijare wayuĩairã imarĩ.

¹² Iꞌsuᵽaka mijaka yija imakoꞌomakaja mija ᵽuri rakajerimakiji mija ime yijaka.

¹³ Ĩꞌrĩka kimakarãre wãtawaꞌri naka kijaika uᵽaka mijare yija bojarijayu. Suᵽa imarĩ baꞌiaja imabekaja mijare yija wayuĩaika uᵽakaja yijare mija wayuĩabe mijaoka.

¹⁴ Ĩꞌrĩka uᵽakaja Cristore yiꞌribeyurãka jeyoaᵽaraka mija imaꞌsi. Tuᵽarãre yaᵽaika uᵽaka baairã, baꞌiaja baarijayurãᵽitiyika ĩꞌrãtiji ᵽuᵽajoabaraka imawãrũberijĩrã. Mia jeꞌe, iꞌsiroka morĩwãrũokoroꞌsi sime neirõꞌõ boirõꞌõka rukubaka imaberijĩka ãñua.

¹⁵ Iꞌsuᵽakajaoka, Cristo majamaki imarĩ, kika ĩꞌrãtiji ᵽuᵽajoawãrũbeyuka kime Satanás. Suᵽa Cristore yiꞌyurã kire yiꞌribeyurãka ĩꞌrãtiji ᵽuᵽajoabaraka imawãrũbeyurã.

¹⁶ Naᵽuᵽaka nare ãñu uᵽakaja ᵽuᵽajoatirã waᵽuju ima jẽrãka nabaaeka jiyiᵽuᵽaka noñua Tuᵽarãre jiyiᵽuᵽaka õrĩriwiꞌiarã imaberiri imakoᵽeika. Iꞌsuᵽakajaoka sime maroꞌsi. Tuᵽarã õñia imajiᵽaki maᵽuᵽakarã ñaꞌrĩjãitikarã imarĩ, waᵽuju ima jiyiᵽuᵽayeeirãka jeyoaritiyabekaja maimayeꞌe. Tuᵽarãja ikuᵽaka bojaekaki kimajaroᵽũñurã: “Yire yiꞌyurã ᵽuᵽakareka ñimajiᵽarãñu. Nimarõꞌõrãja naka ñimarijarirãñu. Suᵽa imarĩ najiyiᵽuᵽayeerũkika ñimarãñu. Iꞌsuᵽakajaoka yirirã nimarãñu”, ãrĩwaꞌri sabojayu kimajaroᵽũñurã.

¹⁷ Ikuᵽaka kẽñu aᵽea: “Yirika yiꞌribeyurãka ĩꞌrãtiji ᵽuᵽakirã mija imaꞌsi. Suᵽabaatirã nare mija jeyoaritiyaꞌsi, yiyaᵽabeyu uᵽaka naka mija baakoreka. Ñañu uᵽakaja mija baarãkareka, yirirã mija imamaka, jĩjimaka mijaka ñimarãñu”, mare kẽñu.

¹⁸ “Mijaᵽaki uᵽaka imawaꞌri, jia mijare yibaamaka yimakarã mija imarãñu”, ãrĩwaꞌri kibojayu Maĩᵽamaki ritaja tẽrĩwaꞌribaji imatiyaiki.