2 Co 3 - Porciones del Nuevo Testamento en el idioma Letuama

“Mamarĩ imaraꞌaekakukukaka beꞌerõꞌõ mamakukukaka majaroka mayiꞌririjarirũkia ikuᵽaka sime”, Ᵽablore ãrĩka

¹ Ikuᵽaka yoꞌokoꞌomakaja, “Yija imarã imatiyairã”, ãrĩwaꞌrimarĩa mijare yija bojayu. Aᵽerã wãrõrimaja ᵽuri, “Imatiyairã yija ime”, ãrĩkoᵽeirã. Mija ᵽõꞌirã netarijayu ᵽoto ᵽaᵽera naroꞌsi aᵽerãre oꞌoeka mijare nabearijayu. Ᵽaᵽera mijare nabeaika, “Jia wãrõirã nime”, ãrĩwaꞌri wãrõirõꞌõkarãre noꞌorũjerijayua sime. Iꞌsuᵽakajaoka aᵽerõꞌõrã naꞌyu ᵽoto mijare nawãrõikakaka ᵽaᵽera noꞌorũjerijayu. Yija ᵽuri, suᵽa baabeyurã.

² Mijatarãja imarã, “Jia wãrõirã yija ime”, ãrĩka ᵽaᵽera yija bearũkirã uᵽaka yijaroꞌsi imarã. Yija wãrõika yiꞌriwaꞌri baꞌiaja mija baaika jaꞌatatirã aᵽeuᵽaka mija oꞌamaka ĩatirã, “Jia Cristorika bojariroka Ᵽablorãkare nare wãrõyu”, ritaja ᵽoꞌimajare ãrĩᵽuᵽajoarijayu. Suᵽa mija baaika yija ᵽuᵽakarã sayija õñu.

³ Cristo ᵽaᵽera maika uᵽaka imarã mija ime. Kirika bojariroka yija wãrõikaᵽi ãrĩwaꞌri Cristore mija ᵽuᵽaka jia oꞌaika ritaja ᵽoꞌimajare ĩawãrũᵽatayu. Aᵽerã wãrõrimaja ᵽaᵽera oꞌoeka narikaika uᵽakamarĩa mija ime. Tuᵽarã, õñia imajiᵽarimaji Esᵽíritu Santore mija ᵽuᵽakarã kiñaꞌajããeka simamaka suᵽa sime. Moisés imaekakiroꞌsi ãtaᵽãiarã Tuᵽarãre oꞌoeka uᵽakamarĩa sime mae. Esᵽíritu Santojo oꞌarijayuka maᵽuᵽaka.

⁴ Jia mijare yija wãrõerã Cristore yijare jeyobaayu. Suᵽa simamaka, “Nare yija wãrõikaᵽi ãrĩwaꞌri Cristore yaᵽaika uᵽaka baairã nime”, Tuᵽarãre ĩaika wãjitãji yija ãrĩwãrũyu.

⁵ Jĩjimaka yija ãñua simakoꞌomakaja yija ᵽuᵽayariji yija õñuaᵽi ãrĩwaꞌrimarĩa jia yija wãrõyu. Tuᵽarãre yijare jeyobaaikaᵽi ãrĩwaꞌri ritaja yija baawãrũyu.

⁶ Tuᵽarãjaoka kime kimajaroka mamakukukaka bojaĩjirimaja yija imaokaroꞌsi yijare jeyobaaiki. Suᵽa imarĩ, “Yimakire ãꞌmitiriᵽẽairãre yitããrãñu”, Tuᵽarãre ãñua bojaika sime mamakukukaka majaroka. Suᵽa imarĩ bikija Moisés imaekakire oꞌoeka ãrĩka uᵽakamarĩa sayija wãrõyu mae. Esᵽíritu Santoᵽi ãrĩwaꞌri maᵽuᵽaka oꞌamaka kire mayiꞌrirũkiakaka sabojayu mamakukukaka majaroka. Bikija Tuᵽarãre jãꞌmeka oꞌoeka yiꞌrikoᵽeirã ᵽuri nareyarãka beꞌerõꞌõ kika imajiᵽabesarãñurã. Iꞌsuᵽakamarĩa sime mamakukukaka majaroka yiꞌyurãroꞌsi ᵽuri. Esᵽíritu Santore nare ñaꞌrĩjãimaka Tuᵽarãka õñia nimajiᵽarãñu ãrĩwaꞌri sabojayu.

^7-8 Kijãꞌmeika ãta ᵽãiarã oꞌotirã, Moisés imaekakire mamarĩ sakijaꞌataeka Tuᵽarã. Kire sakijaꞌataekarĩmi Tuᵽarãre kĩaeka beꞌrõ jimarĩ jãjia Moisés ᵽema yaaboaeka. Suᵽa simamaka marãkãꞌã baatirã sarakajeᵽããberiwaꞌri Israeltatarã ᵽuri kiᵽema niariyaᵽaberika. Bikija Tuᵽarãre jãꞌmeka jiitaka simaeka. Suᵽa simakoꞌomakaja ĩꞌrãrĩmi uᵽakaja kiᵽema yaboaika riririjarika. Bikija Tuᵽarãre jãꞌmeka oꞌoeka jãjia yaaboaikaᵽitiyika ᵽoꞌimajaroꞌsi kire sakijaꞌataeka simakoꞌomakaja sayiꞌriwãrũberiwaꞌri, Tuᵽarã ᵽõꞌirã ᵽoꞌimajare aꞌriberika ãrĩwaꞌri sabojayu. Mamarĩ kijãꞌmeka yaaboaikaᵽitiyika sakijaꞌataeka simakoꞌomakaja satẽrĩwaꞌribaji jia sime ika mamakukukaka majaroka. Suᵽa imarĩ õñia imajiᵽarũkiakaka Esᵽíritu Santore maroꞌsi eꞌeraꞌaeka. Suᵽa imarĩ, aᵽerikurioka ᵽurirũkimarĩa sime.

⁹ Bikija Moisés imaekakire kijãꞌmerũkia Tuᵽarãre kire ĩjikakaka ᵽuri sayiꞌriberiwaꞌri, “Tuᵽarãre yaᵽaika uᵽaka ᵽoꞌimajare baabeᵽakãꞌã baꞌiaja nare kimarũjerãñu”, sãñu. Imakoꞌomakaja jãjia yaaboaikaᵽi setaeka. Ika mamakukukaka majaroka ᵽuri Tuᵽarãre ĩaika wãjitãji wãjia ᵽoꞌimajare imarũjerikakaka bojaika. Suᵽa imarĩ bikijakaka jãjia yaaboaikaᵽi setakoꞌomakaja mamakukukaka ᵽuri tẽrĩwaꞌribaji imatiyaika majaroka sime.

¹⁰ Jia simaeka mamarĩ Moisére jãꞌmeka. Suᵽa simakoꞌomakaja satẽrĩwaꞌribaji imatiyaika sime ika mamakukukaka majaroka. Iꞌsuᵽaka maᵽuᵽajoaika simamaka, “Mamarĩ imaraꞌaeka majaroka imatiyabeyua sime mae”, marĩᵽuᵽajoayu.

¹¹ Ñoaka imarũkimarĩa imakoꞌomakaja Moisére jãꞌmeka jãjia yaaboaika watoᵽekaᵽi etaeka. Suᵽa simamaka, ika mamakukukaka majaroka Tuᵽarãre mare jaꞌataeka ᵽuri imajiᵽarũkia imarĩ, tẽrĩwaꞌribaji imatiyaika sime.

¹² “Imajiᵽarũkia sime”, jia õrĩwãrũirã imarĩ, kĩkirimarĩaja ᵽoꞌimajare sayija wãrõrijayu.

¹³ Imajiᵽarũkia simamaka, Moisés uᵽaka yija imabeyu. Kiᵽema jãjia yaaboaeka yaririjarika Israelkarãre ĩakoreka sayaᵽãiaᵽi kiᵽema kirãrĩtaꞌaeka. Kiᵽema jãjia yaaboaeka yaririjarika ãrĩrikoᵽakaja mamarĩ Moisére jãꞌmeroyika tiyirijayua.

¹⁴ Iꞌsuᵽaka simakoꞌomakaja Israelkarã ᵽuri satiyirijayua ãꞌmitiriᵽẽaberikarã imarĩ, maekakaoka iꞌsuᵽakaja nimañuju ruᵽu. Moisére jãꞌmeka niaika ᵽoto, “Koᵽakaja Tuᵽarãre satiyetaeka”, ãrĩwãrũbeyurã nime. Suᵽa baabekaja, Cristore takaja yiꞌyurã nimajĩkareka ᵽuri jia sanorĩwãrũjĩñu.

¹⁵ Suᵽa simakoꞌomakaja maekaka ᵽariji Moisére oꞌoeka wãrũkoꞌomakaja sanorĩwãrũbeyukaji ruᵽu.

¹⁶ Suᵽa simakoꞌomakaja Maĩᵽamakire ĩꞌrãrimarã yiꞌriũꞌmumaka ĩatirã nare kijeyobaayu, “Saniawãrũrũ”, ãrĩwaꞌri.

¹⁷ Esᵽíritu Santoᵽi ãrĩwaꞌri Maĩᵽamakire mare jeyobaayu. Mare jeyobaabaraka maka kimarijayua simamaka, Moisére jãꞌmeka mayiꞌrikoᵽeka jaꞌatatirã, Cristore yaᵽaika uᵽakaja baawãrũirã maime mae.

¹⁸ Koᵽakaja jia sõrĩwaᵽuꞌatairã jariwaꞌri, Maĩᵽamakire ᵽuᵽajoarijaᵽaraka, tẽrĩwaꞌribaji kima morĩwãrũrijayu mae. Iꞌsuᵽaka maimaᵽi ĩꞌrãrĩmi uᵽakaja jiibaji Maĩᵽamaki uᵽakaja maimarijarirã Esᵽíritu Santore maᵽuᵽaka mare oꞌarijayu.