2 Co 2 - Porciones del Nuevo Testamento en el idioma Letuama

¹ Bikija mija ᵽõꞌirã eyatirã, mija ᵽuᵽaᵽeꞌrirã okajãjiaᵽi mijare yijaimaka baꞌiaja mija ᵽuᵽaraᵽe. Imakoꞌomakaja, “Tuᵽarãre yaᵽaika uᵽaka baabeyurãre ᵽuri yokajããrãñu jeꞌe ruᵽu”, ñarĩᵽuᵽajoaraᵽe. “Baꞌiaja naᵽuᵽariaꞌsi ate”, ãrĩwaꞌri mija ᵽõꞌirã turirĩ yaꞌribeyukaji ruᵽu.

² Jĩjimaka yire baairã mija ime. Suᵽa imarĩ okajãjiaᵽi mijare yijaijĩka baꞌiaja mija ᵽuᵽarijĩñu, suᵽa imarĩ aᵽerã jĩjimaka yire baairã imaberijĩñurã.

³ “Baꞌiaja naᵽuᵽarijĩñu”, ãrĩwãrũtirã baꞌiaja mija ᵽuᵽaririka yaᵽaberiwaꞌri mija ᵽõꞌirã yaꞌribeyu ruᵽu. Mija ᵽõꞌirã yeyarũki ruᵽu mijaka okajierika yaᵽawaꞌri, “Ikuᵽaka mija baabe”, ãᵽaraka ᵽaᵽera takaja mija ᵽõꞌirã yiᵽũataraᵽe. Okajietirã baꞌiaja ᵽuᵽaᵽekaja jĩjimaka yire ᵽuᵽarirũjerũkirã mija imaokoroꞌsi mijare sayiᵽũataraᵽe. Suᵽa imarĩ, “Naᵽõꞌirã yeyarãka ᵽoto jia simamaka ĩatirã jĩjimaka nimarãñu jeꞌe ĩꞌrãoka”, ñarĩᵽuᵽajoayu.

⁴ Iꞌsia ᵽaᵽera mijaroꞌsi yoꞌoraᵽaka ᵽoto jimarĩ baꞌiaja yiᵽuᵽaraᵽe rĩõmaka yire ñiꞌaraᵽaka rõꞌõjĩrã. Suᵽa simakoꞌomakaja sĩatirã baꞌiaja mija ᵽuᵽayaokaroꞌsimarĩa ᵽaᵽera mijare yiᵽũataraᵽe. “Jia mare wayuĩaiki kime Ᵽablo”, mija ãrĩwãrũokaroꞌsi.

Baꞌiaja mare baakoᵽeraᵽakiteoka mija wayuĩabe, Ᵽablore ãrĩka

⁵ Baꞌiaja mija watoᵽekarã baaraᵽakire jia imarika yaᵽawaꞌri jãjia kire mija baaraᵽakakaka mijaroꞌsi yoꞌoerã baayu mae. Baꞌiaja kibaaraᵽaka ãꞌmitiritirã, baꞌiaja yiᵽuᵽaraᵽaka simamaka saᵽemawaꞌribaji mija imaraᵽe jeꞌe, mijaoka. Suᵽa simakoꞌomakaja, “Baꞌitakaja mijare ᵽuᵽarirũjetiyaberaᵽaki kimaraᵽe jeꞌe”, ñañu baꞌitakaja kijũarika yaᵽaberiwaꞌri.

⁶ Baꞌiaja kibaaraᵽaka simamaka mija rẽrãᵽaka ᵽoto, “Ikuᵽaka kire mabaayeꞌe kiᵽuᵽaᵽeꞌyaokaroꞌsi”, ãrĩtirã mija ima uᵽatiᵽañakaja suᵽa kire mija baaraᵽe. Suᵽa simamaka maekaka ᵽuri ᵽuᵽaᵽeꞌyuka kijayua simamaka koᵽakaja samija jaꞌatabe.

⁷ Suᵽa kire baabekaja, baꞌiaja kibaaeka yeꞌkariritirã jia kire mija jeyoaᵽe ate. Kikaja mija imabe, tẽrĩritakaja baꞌiaja ᵽuᵽariwaꞌri, “Marãkãꞌã baatirã jia naka imawãrũbeyuka yiꞌi”, kẽrĩᵽuᵽajoakoreka.

⁸ Kika mija jeyoaᵽakãꞌã, “Rita yire nawayuĩayu ate”, kẽñaokaroꞌsi kikaja mija imarika yiyaᵽayu.

⁹ Kire yibaarũjeraᵽaka uᵽakaja mija yiꞌrirã ᵽaᵽera mijare yiᵽũataraᵽaka imarĩ, “Maekakaoka nare ñañu uᵽakaja baairã nime”, mijareka ñarĩᵽuᵽajoayu.

¹⁰ Suᵽa imarĩ baꞌiaja baakoᵽekakire baꞌiaja baaeka mija yeꞌkaririrãkareka iꞌsuᵽakajaoka simarãñu yiroꞌsioka. Yire baꞌiaja kibaakoᵽejĩka sareka kire yiwayuĩajĩñu. Ĩꞌrĩka uᵽakaja jĩjimaka mija imarika yaᵽawaꞌri suᵽa yibaayu Cristore ĩaika wãjitãji.

¹¹ Kire mawayuĩayeꞌe, baꞌiaja ᵽuᵽariwaꞌri Satanáre yaᵽaika uᵽaka kibaaꞌsi. Maroꞌsioka iꞌsuᵽaka simaꞌsi, majeyomakire mawayuĩajĩñu. Satanáre mare ᵽakiriyaᵽaikakaka moñu.

Corintokarã majaroka Ᵽablore ãꞌmitiririyaᵽaeka

¹² Troade wãmeika wejearã yeyaraᵽaka ᵽoto Maĩᵽamakire yire jeyobaaikaᵽi ãrĩwaꞌri imatikaja ᵽoꞌimajare imaraᵽe yire ãꞌmitiyaokaroꞌsi. Suᵽa imarĩ Jesúrika bojariroka nare yiwãrõmaka, jĩjimakaᵽi tokarãre yire ãꞌmitiraᵽe.

¹³ Iꞌsuᵽaka simakoꞌomakaja Troade wejearã majeyomaki Titore imabeᵽakãꞌã baꞌiaja yiᵽuᵽaraᵽe. Torãjĩrã mae, tokarãre yimajaroka bojaweatirã Macedoniakaꞌiarã yaꞌraᵽe kire moꞌarĩ.

¹⁴ Baꞌiaja yiᵽuᵽarikoꞌomakaja Cristorirã yija imamaka dakoa imabeyua yijare tẽrĩrũkia mae. Suᵽa imarĩ, “Jiitaka mibaayu Tuᵽarã”, ãrĩka jia yija ᵽuᵽarijayu. Suᵽabaatirã Cristorika bojariroka bojataᵽarimaja yija imaokaroꞌsi Tuᵽarãre yijare ᵽũataeka ritaja ᵽoꞌimajare sõñaokaroꞌsi. Ikuᵽaka simamaka ĩꞌrãkõꞌrĩmato jariwaꞌririmarĩa sayija bojataᵽa ãꞌmitiritirã, Cristore nayiꞌyu. Ikuᵽaka sime: Maᵽaõmea oika ᵽoto ritaja sajĩsia ᵽibika ritaja ᵽoꞌimajare wĩꞌĩka uᵽaka simarijayu.

¹⁵ Cristorika bojariroka yija bojaᵽibaika ĩawaꞌri jĩjimaka Tuᵽarãre yijaka ime. Kirika yija wãrõtaᵽa; Tuᵽarã ᵽõꞌirã aꞌrirũkirã, baꞌiaja imarika tiyibeyurõꞌõrã aꞌrirũkirã ᵽariji sãꞌmitiririjayurã.

¹⁶ Cristore yiꞌriberirika ᵽuri, “Baꞌiaja imarika tiyibeyurõꞌõrã aꞌririwaᵽaka”, ãrĩwaꞌri nare yija bojamaka nayiꞌribeyu Cristorika yija wãrõika ãꞌmitiririyaᵽabeyurã. Tuᵽarã ᵽõꞌirã aꞌrirũkirã ᵽuri nare yija wãrõika yiꞌyurã õñia imajiᵽarũkiroka simamaka. Tuᵽarãre yijare jeyobaaberirikareka, marãkãꞌã baatirã wãjia sayija bojawãrũberijããeka, imatiyaika ᵽoꞌimajaroꞌsi Cristorika yija wãrõrijayua.

¹⁷ Suᵽa ñañua simakoꞌomakaja, rĩkimarãja, niñerũ tõᵽoriyaᵽawaꞌri Cristorika bojariroka wãrõtaᵽarã. Nuᵽaka baariyaᵽabeyurã yija ᵽuri. Jesúrirã imarĩ, kirika bojariroka ᵽakirimarĩaja ᵽoꞌimajare wãrõerã Tuᵽarãre yijare ᵽũataeka. Suᵽa imarĩ kĩaika wãjitãji wãjirokaᵽi yija wãrõrijayu.