2 Co 13 - Porciones del Nuevo Testamento en el idioma Letuama

Ika ᵽaᵽeraᵽi ᵽiyia jia Ᵽablore nare okajããeka

¹ Ika yaꞌrirã baaikaᵽi maekarakakuri mija ᵽõꞌirã yeyarãñu. Torã yeyarãka Tuᵽarã majaroᵽũñu oꞌoekarã ãñu uᵽakaja yibaarãñu. Mia jeꞌe: “Ĩꞌrĩkare baꞌiaja baamaka ĩaekarã ‘Rita sime, iꞌsuᵽakajaoka kibaaraᵽe’, ãñurã ĩꞌᵽarã, maekarakamarã imajĩkareka, okajierika sime kika”, ãrĩwaꞌri sabojayu.

² Bikija ĩꞌᵽakuri mija ᵽõꞌirã yituraᵽakareka, baꞌiaja baairãre jia yokajããraᵽe, “Baꞌiaja nabaaika najaꞌatarũ”, ãrĩwaꞌri. Mae mija ᵽõꞌirã imaberikoꞌomakaja ᵽaᵽeraᵽi, “Baꞌiaja mija baaika mija jaꞌatabe”, ñañu baꞌiaja baarijayurãre. Aᵽerãᵽitiyika baꞌiaja baabaraka nimamaka ñiaeyarãkareka, baꞌiaja nabaaika waᵽa tĩmarĩji nare yibaarãñu.

³ “ ‘Rita Cristore õñuaᵽi mibojarijayu’, yija ãrĩwãrũokoroꞌsi, Cristorika yijare mibeabe”, mija ãñua sime. Iꞌsuᵽaka simamaka, kirikaᵽi tĩmarĩji nare yibaamaka ĩawaꞌri, “Cristore jãꞌmeika uᵽakaja jairijayuka Ᵽablore ime”, yireka mija ãrĩrãñu jeꞌe. Mijaka okajãjimarĩa imabeyuka Cristo. Baꞌiaja baairãre jiamarĩa jũaokoroꞌsi kirika baabearimaji kime.

⁴ Muᵽaka ᵽoꞌiki imakoꞌomakaja, yaᵽua tetaekarã kire naᵽatakĩaeka simamaka, okajãjimarĩki uᵽaka Cristore reyaeka mija õñu. Iꞌsuᵽaka kire nabaakoꞌomakaja, Tuᵽarãrikaᵽi ãrĩwaꞌri õñia kime mae. Cristorirã imarĩ, kiuᵽakaja okajãjimarĩrã yija ime ᵽoꞌimajare yijare ĩamaka. Suᵽa simakoꞌomakaja kirirã imarĩ, Tuᵽarãrikaᵽi ãrĩwaꞌri kiyaᵽaika uᵽakaja yija baarijayu. Saᵽi ãrĩwaꞌri mija ᵽõꞌirã baꞌiaja baairãre tĩmarĩ yija baarãñu, jia nayiꞌrirũ ãrĩwaꞌri.

^5-6 Jia mija õᵽe. Cristore mija yiꞌyua ᵽuᵽajoatirã, “¿Yaje rita Jesucristore yiꞌyurã maime?”, mija ãrĩᵽuᵽajoabe. “¿Mija ᵽuᵽakareka Cristore ñaꞌrĩjãikarã mija ima õrĩbeyurã bai jeꞌe mija?” “Jesúre maᵽuᵽakarã ñaꞌrĩjãiberikarã maime”, ãñurã ᵽuri kire yiꞌribeyurã nime. Imakoᵽekoꞌomakaja, “ ‘Cristore yija yiꞌyu’, mija ãrĩrãñu”, ñarĩᵽuᵽajoayu. Suᵽa imarĩ mamarĩtaka kirika bojariroka mijare yija bojaraᵽaka ãꞌmitiritirã jia kire mija yiꞌraᵽaka simamaka, “Rita, Cristore nare õrĩrũjeikaᵽi Ᵽablorãkare yijare bojarijayu”, ãrĩwãrũirã mija ime.

⁷ Baꞌiaja baabaraka mija ima yija ĩaeyarãkareka, Cristore yijare jãꞌmetika imarĩ, jiamarĩa mijare yija jũarũjerãñu. Iꞌsuᵽaka mijare yija baarãkareka, “Cristore nare jãꞌmeikaᵽi suᵽa Ᵽablorãkare mare baayu”, mija ãrĩwãrũrãñu. Jiamarĩa mijare baariyaᵽaberiwaꞌri baꞌia mija baakoreka Tuᵽarãre mijaroꞌsi yija jẽñeĩjirijayu. Suᵽa imarĩ Tuᵽarãre yaᵽaika uᵽakaja mija baarãkareka ᵽuri, baꞌiaja mijare yija baabesarãñu. Suᵽa mijare yija baabeᵽakãꞌã ĩatirã, “Yaje ruku Cristore jãꞌmeikaᵽi tĩmarĩji yijare nabaajĩñu”, yijareka mija ãrĩkoᵽejĩkaoka, marã imabeyua. Iꞌsuᵽaka simakoꞌomakaja kiyaᵽaika uᵽaka oyiaja mija baarikatakaja yija yaᵽayu.

⁸ Suᵽa imarĩ mija ᵽõꞌirã yija eyarũki ruᵽu kiyaᵽaika uᵽakaja baatiirã mija imarãkareka ᵽuri kijãꞌmeikaᵽi baꞌiaja mijare yija jũarũjebesarãñu. Kiyaᵽaika uᵽakaja Cristore yijare jãꞌmetika imarĩ, baꞌi uᵽakaja mijare baabekaja mijare jeyobaarimaja yija ime.

⁹ Suᵽa imarĩ mija ᵽõꞌirã eyatirã, jia Cristore yiꞌyurã mija ima ĩawãrũtirã okajãjiaᵽi mijare yijaibesarãñu. “Okajãjimarĩrã imarĩ, Cristorikaᵽi Ᵽablorãkare beabeyu”, yijareka mija ãrĩkoᵽejĩka, marã imabeyua yijaroꞌsi. Jia mija yiꞌᵽakãꞌã ĩawaꞌriji, jia jĩjimaka imarũkirãja yija ime. Suᵽabaatirã, “Mire ãꞌmitiriᵽẽawaꞌri miyaᵽaika uᵽaka oyiaja nabaarũ”, ãrĩwaꞌri, Tuᵽarãre mijaroꞌsi yija jẽñerijayu.

¹⁰ Iꞌsuᵽaka simamaka mija ᵽõꞌirã eyatirã, okajãjiaᵽi mijare yijairiyaᵽabeyu. Suᵽa imarĩ yaꞌrirã baaika ruᵽu, ika ᵽaᵽera mijare yiᵽũatayu jiibaji Jesúre yiꞌᵽaraka mija imaokoroꞌsi. Iꞌsuᵽaka mijare baarimaji ñimaokoroꞌsi Maĩᵽamakire yire jãꞌmeka. Suᵽa imarĩ kire mija yiꞌyua bitatarikoᵽakaja jiibaji kire mija yiꞌririjayaokoroꞌsi mijare yijeyobaarijayu.

¹¹ Õꞌõjĩrãja mijaroꞌsi yoꞌoyu yijeyomarã. Jesúre yaᵽaika uᵽaka oyiaja baabaraka jia mija imabe. Ritaja ika ᵽaᵽeraᵽi mijare yibojaika jia ãꞌmitiriᵽẽabaraka mija imabe. Ĩꞌrĩka uᵽakaja ᵽuᵽajoabaraka, oka baꞌia imarijarirãkaoka jiaᵽi sajiebaraka mija imabe. Iꞌsuᵽaka mija baamaka, Tuᵽarã, mare wayuĩarimajire, mijaka imajiᵽarãñu. Suᵽabaatirã jĩjimaka mare imarũjeiki kime.

¹² Jesúre ãꞌmitiriᵽẽairã imarĩ, mija rẽrĩrijayu ᵽoto jia jĩjimakaᵽi jẽñebuꞌabaraka mija imarijaᵽe.

¹³ Õꞌõkarã Jesúre ãꞌmitiriᵽẽairã, “Jia nimarũ”, ãrĩwaꞌri oka mijaroꞌsi ᵽũatairã.

¹⁴ “Jia nare mibaabe”, ãrĩwaꞌri maĩᵽamaki Jesucristore mijaroꞌsi yijẽñeyu. “Suᵽabaatirã Tuᵽarãre mijare wayuĩaika jia õñurã mija imaokoroꞌsi, Esᵽíritu Santore jia mijaka imajiᵽarijarĩrũ”, ãrĩwaꞌrioka ritaja mijaroꞌsi yijẽñeĩjirijayu yijeyomarã. Iꞌtojĩrãja sime ruᵽu.