2 Co 12 - Porciones del Nuevo Testamento en el idioma Letuama

Makãrãrũñuroka uᵽakaᵽi Tuᵽarãre imarõꞌõ Ᵽablore kĩarũjeraᵽe

¹ Naᵽuᵽayariji ᵽuᵽajoatirã ᵽakirimajaroka wãrõrimajare mijare bojarika yiyaᵽabeyu. Imakoꞌomakaja, “Tuᵽarãre ᵽũataekaki Ᵽablore ime”, yireka ãñurã mija jariberikoꞌomakaja makãrãrũñuroka uᵽakaᵽi Maĩᵽamakire yire beaeka mirãkakaka mijare yibojaerã baayu mae.

^2-3 Maboꞌikakuri ᵽiyikuku kimarõꞌõrã Tuᵽarãre yire eꞌeeyaraᵽaka beꞌerõꞌõ botarakaoũꞌᵽuarãeꞌearirakakuri wejejẽꞌrãka seyawaꞌyu mae. Torã yire keꞌeeyaeka beꞌrõ, “Ikuᵽaka baatirã yire keꞌeeyaeka”, ãrĩwãrũbeyuka yiꞌi. ¿Yaje rita, ritikataka yire keꞌewaꞌraᵽe jee, yiᵽuᵽakatakaja keꞌewaꞌraᵽe jeꞌe aᵽeyari? Tuᵽarã ĩꞌrĩkaja sõñuka. Rita sime, “Iꞌsuᵽaka baatirã yire keꞌeeyaeka”, ãrĩwãrũberikoꞌomakaja, “Jiirõꞌõrã Tuᵽarãre yire eꞌeeyaeka”, ñañu ate.

⁴ Torã yeyaraᵽaka ᵽoto okaᵽi mabojawãrũbeyua ñaꞌmitiraᵽe. Torã ñaꞌmitirika mirãka, yire bojarũjebeyuka Tuᵽarã.

⁵ Iꞌsuᵽaka yiroꞌsi simaraᵽakaᵽi, “Õrĩᵽũatiyaiki ñime”, ãrĩjĩka uᵽaki imakoᵽekoꞌomakaja suᵽa ñarĩbeyu. Yiᵽuᵽayariji ᵽoꞌimajare yijaika ᵽoto tẽrĩrimarĩka ñima nare yijairijayu.

⁶ “Ikuᵽaka yiroꞌsi simaraᵽe”, ãrĩka jĩjimakaᵽi ᵽoꞌimajare yibojataᵽarikareka, ᵽakirimaji uᵽakamarĩa ñimajããeka ᵽakirimajaromarĩa bojaiki imarĩ. Iꞌsuᵽaka simakoꞌomakaja, “Ikuᵽaka yiroꞌsi simaraᵽe”, ãrĩwaꞌri tẽrĩritaki uᵽaka jĩjimakaᵽi ᵽoꞌimajare sabojataᵽabeyuka yiꞌi, “Aᵽerã ᵽemawaꞌribaji õrĩᵽũatiyaiki Ᵽablore ime”, yireka narĩrika yaᵽaberiwaꞌri. Iꞌsuᵽaka ñimaberikoꞌomakaja jia yibaarijayua ĩatirã, yiwãrõrijayua ãꞌmitiritirã, yire norĩrika ᵽuri yiyaᵽayu.

⁷ Makãrãrũñuroka uᵽakaᵽi Tuᵽarãre yire bearaᵽaka tẽrĩrikaja imatiyaikakaka simaraᵽe. Iꞌsuᵽaka beakoꞌomakaja, “Aᵽerãre tẽrĩwaꞌribaji imatiyaiki ñime”, ñarĩrika yaᵽaberiwaꞌri Satanárikakaka risirika yire rĩkaraᵽakareka Tuᵽarãre yire ĩarĩrĩberaᵽe. Suᵽa imarĩ ᵽota mare ᵽaaika beꞌerõꞌõ makaꞌwisijũarijayu uᵽaka yire simarijayu.

⁸ “Risirika yire mibayabe”, ãrĩwaꞌri maekarakakuri Maĩᵽamakire yijẽñekoᵽeraᵽe.

⁹ Iꞌsuᵽaka kire ñaᵽakãꞌã, ikuᵽaka yire kiyiꞌraᵽe: “Jẽnoꞌo, mire yibayaberikoꞌomakaja, mire yiwayuĩaikaᵽi ãrĩwaꞌri yijeyobaarika takaja miyaᵽayu. Mia, marãkãꞌã baaberijĩka mima ᵽoto jiibaji mika imawaꞌri mire jeyobaarimajiroꞌsiji ñime”, kẽrãᵽe. Suᵽa imarĩ ñimakaka jĩjimakaᵽi yijairijayu. Imakoꞌomakaja, “Cristore kire jaꞌataikaᵽi jia kiroꞌsi Ᵽablore baꞌiraberijayu”, ᵽoꞌimajare yireka ãrĩwãrũyu mae.

¹⁰ Iꞌsuᵽaka simamaka Cristoriki imarĩ, marãkãꞌã baaberijĩki imakoꞌomakaja yiᵽuᵽaka ᵽuri jia ima. Ĩꞌrãkurimarĩa baꞌiaja ᵽoꞌimajare yire jaiwãꞌimarãᵽe, “Kiꞌyoᵽiꞌrirũ”, ãrĩka. Suᵽabaatirãoka yiyaᵽaika imaberiroyiraᵽaka yiroꞌsi. Iꞌsuᵽakajaoka ĩꞌrãkurimarĩa jajua ᵽoꞌimajare yire baataꞌaraᵽe. Suᵽabaatirã Jesúrika bojariroka yiwãrõmaka, ĩꞌrãkurimarĩa kaꞌwisika yijũaraᵽe. Imakoꞌomakaja jĩjimaka ñime ãrĩᵽuᵽajoabaraka, “Marãkãꞌã baawãrũberiwaꞌri iamarĩa imarãka Cristore jeyoariyaᵽatiyayu”. Suᵽa simamaka rikitubamarĩa ñimakoᵽeikareka jia Cristore yire jeyobaayu.

¹¹ Koᵽakaja õrĩᵽũabeyuka uᵽaka yimajãrobojaweayu. “Yija ᵽõꞌirã Tuᵽarãre ᵽũataekaki imarĩ, mare wãrõrimaji Ᵽablore ime”, mija ãrĩbeyua simamaka ñoñu uᵽakaja suᵽa mijare ñañu. “Waᵽamarĩki Ᵽablore ime”, Tuᵽarãrika wãrõkoᵽeirãre yireka ãñu uᵽakaja ñimajããeka Tuᵽarãre yire jeyobaaberirikareka. Suᵽa simakoꞌomakaja, “Jiitaka wãrõrimaja nime”, mija ãrĩkoᵽeirã ᵽuri yire ᵽemawaꞌribajimarĩrã nime. Suᵽa imarĩ, “Tuᵽarãre kire jeyobaamaka jia Ᵽablore mare wãrõyu”, mija ãrĩri imakoᵽeraᵽe.

¹² Mia, aᵽóstol imarĩ, mija ᵽõꞌirã ñimaraᵽaka ᵽoto maikoribeyu uᵽaka ima mijare yibearijaraᵽe. Ĩꞌrãkurimarĩa samija ĩaeka simamaka, “Rita oka, Tuᵽarãre ᵽũataekaki Ᵽablore ime”, yireka mija ãrĩri imakoᵽeraᵽe.

¹³ “Aᵽerã Jesucristore ãꞌmitiriᵽẽairãre jiyiᵽuᵽayeekoꞌomakaja, mare ᵽuri Ᵽablore jiyiᵽuᵽayeebeyu”, mija ãñua ¿rita sime bai jeꞌe? “Yire mija jeyobaabe jia ñimaerã”, aᵽerãre ñarãᵽaka uᵽaka mijare ãrĩberaᵽaki imakoꞌomakaja ĩꞌrãtiji oyiaja jiyiᵽuᵽaka mijare ñoñu. Iꞌsuᵽaka simakoꞌomakaja, “Aᵽerãre kijẽñeraᵽaka uᵽakaja, yijare kijẽñeri imakoᵽeraᵽe”, ãrĩwaꞌri yireka mija jairijayu. ¿Yaje rita baꞌiaja mijare yibaaraᵽe jeꞌe? Baꞌiaja mijare baaberaᵽaki imarĩ, marãkãꞌã baatirã, “Jiamarĩa yibaaraᵽakareka yire mija wayuĩabe”, mijare ñarĩwãrũbeyu.

¹⁴ Ĩꞌᵽakuri mija ᵽõꞌirã yituritika. Suᵽa imarĩ maekarakakuri mija ᵽõꞌirã turirĩ aꞌyaokoroꞌsi mae ᵽuritaka yiᵽuᵽajoaũꞌmuyu ate. Õrĩkõrĩ: Makarãirã ᵽuri namakarãre yaᵽaika tõᵽoerã niñerũ jierijayurã. Meꞌrãrĩjaka ᵽuri naᵽakiarãroꞌsi iꞌsuᵽaka baabeyua. Saᵽi ãrĩwaꞌri yimakarã uᵽaka yiroꞌsi mija imamaka, mija ᵽõꞌirã ñimarãka ᵽoto niñerũ mijare jẽñebesarãki yiꞌi. Mijare ᵽuri jia yika mija imarika yiyaᵽarãñu, jia mijare yiwãrõmirĩrĩkawaꞌyaokoroꞌsi.

¹⁵ Mijare wayuĩawaꞌri mijare yijeyobaariyaᵽayu. “Jesúre naꞌmitiriᵽẽarũ”, ãrĩwaꞌri ritaja yibaawãrũika uᵽakaja yirũrĩtiyaika rõꞌõjĩrã mijare yijeyobaarijarirãñu. Jia mijare wayuĩaiki ñimamaka yire mija wayuĩabesarãkareka, baꞌiaja yiᵽuᵽarirãñu.

¹⁶ Mijaka ñimaraᵽaka ᵽoto dakoa mijare yijẽñeberaᵽaka õñurã mija ime. Imakoꞌomakaja, “Ritaja ᵽakirika jia õñuka imarĩ, Ᵽablore mijare ᵽakiyu mijareka niñerũ kareeꞌeokoroꞌsi”, ĩꞌrãrimarãre yireka ãñu jeꞌe.

¹⁷ “Maᵽõꞌirã kiᵽũataraᵽarãᵽioka Ᵽablore mare ᵽakiraᵽe”, ¿mija ãrĩᵽuᵽajoayu bai jeꞌe? Jẽnoꞌo mijare ᵽakiberaᵽaki yiꞌi.

¹⁸ Aᵽika Jesúre ãꞌmitiriᵽẽaikiᵽitiyika Titore mija ᵽõꞌirã yiᵽũataraᵽe niñerũ mija rẽawearika najeyobaaokoroꞌsi. ¿Yaje Titore mijare ᵽakiraᵽe jeꞌe? Jẽnoꞌo mijare ᵽakiberaᵽaki kime. Yuᵽakaja jia ᵽuᵽajoaiki imarĩ, mijare jeyobaariyaᵽawaꞌri jia Tuᵽarãrika bojariroka mijare kiwãrõraᵽe, niñerũ mijare jẽñebekaja.

¹⁹ “Baꞌiaja baabeyurã nime”, yijareka ãrĩwaꞌri jĩjimaka yijaka mija imaokoroꞌsi takamarĩa, suᵽa mijare ñañu. Ikuᵽaka simatiyayu, õrĩkõrĩ: Jesúrirã imarĩ, kiyaᵽaika uᵽakaja mijare yija jairijayu Tuᵽarãre ĩaika wãjitãji. Mija ãꞌmitiᵽe yija jeyomarã. Ritaja mijare yija bojarijayua, “Jiibaji Jesúre naꞌmitiriᵽẽarijarirũ”, ãrĩwaꞌri mijare sayija bojayu.

²⁰ Mijareka ᵽuᵽajoabaraka baꞌiaja yiᵽuᵽarijayu. “Mija ᵽõꞌirã yeyarãka ᵽoto baꞌiaja baabaraka mija imarãka ñiaeyarãñu jeꞌe aᵽeyari”, mijareka ñarĩᵽuᵽajoarijayu. Waᵽabuꞌabaraka, aᵽerãre oakiᵽaraka mija imarãka ñiaeyarãñu jeꞌe. Iꞌsuᵽakajaoka boebaᵽaraka, suᵽabaatirã rakakaja naᵽuᵽajoaika uᵽakaja baawaꞌri jia jeyoaribekaja mija imaoka ñiarãñu jeꞌe. Okabaabuꞌabaraka, waᵽuju jaijairika baabaraka mija imarãka ñiarãñu jeꞌe. Aᵽerãre tẽrĩwaꞌribaji ᵽuᵽajoairã uᵽaka baabaraka, rakakaja ᵽuᵽajoawaꞌri rukubaka jaibaraka mija rẽñua ñiaeyarãñu jeꞌe aᵽeyari. Suᵽabaatirã, “Jesúre yaᵽaika uᵽakaja baabekaja nimarãñu jeꞌe”, ñarĩᵽuᵽajoaika uᵽaka mija imamaka ĩatirã mijaka yiboebarirãñu. Iꞌsuᵽakajaoka jĩjimaka yika mija imabesarãñu jeꞌe mijaoka.

²¹ Ate mija ᵽõꞌirã yeyarãka ᵽoto baꞌiaja baabaraka mija ima ñiaeyarãkareka, “Nare yiwãrõraᵽaka uᵽaka yiꞌribeyurã nime”, ãrĩwaꞌri Tuᵽarã wãjitãji yiꞌyoᵽiꞌrirãñu. Suᵽabaatirã, “Bikija rĩkimarãja baꞌiaja nabaaeka sajaꞌatabekaja dajaka nabaarijayu jeꞌe aᵽeyari. Suᵽabaatirã baꞌiaja rõmijãre nabaariwãꞌimarĩrijayu. Naᵽuᵽajoarijayu uᵽakaja wããrõꞌõ baꞌiaja nabaarijayu ruᵽu”, ãrĩwaꞌri ñiaeyarãka, baꞌitakaja yiᵽuᵽarirãñu.