2 Co 1 - Porciones del Nuevo Testamento en el idioma Letuama

Ate Corintowejeakarãroꞌsi Ᵽablore ᵽaᵽera ᵽũataeka

¹ ¿Yaje mija ime yijeyomarã? Yiꞌi Ᵽablo, yijeyomaki Timoteoka ĩᵽarã, “Jia mija imabe”, mijareka yija ãñu. Tuᵽarãre yire jãꞌmeikaᵽi ãrĩwaꞌri Jesucristorika bojariroka bojataᵽarimaji ñime. Corintowejearã, suᵽabaatirã Acayakaꞌiarã Tuᵽarãre jiyiᵽuᵽayeerĩ rẽrĩrijayurãroꞌsi ika ᵽaᵽera yiᵽũatayu.

² Maᵽaki Tuᵽarã, maĩᵽamaki Jesucristo ᵽitiyika ĩꞌᵽarã jia mijare nabaarũ. Jia ᵽuᵽaᵽaraka mija imaokoroꞌsi mijare najeyobaarũ.

Ᵽablore baꞌiaja jũakoꞌomakaja Tuᵽarãre kire jeyobaaeka

³ Maĩᵽamaki Jesucristo Ᵽakika jĩjimaka imawaꞌri, “Jia mibaayu Tuᵽarã”, kire yija ãrĩrijayu. Maᵽaki imarĩ, mare kiwayuĩayu. Suᵽabaatirã baꞌiaja maᵽuᵽajoaika ᵽoto mare jeyobaaokoroꞌsi makaja kime Tuᵽarã.

⁴ Ritaja kaꞌwisika yijaroꞌsi simakoꞌomakaja baꞌiaja yija ᵽuᵽarikoreka yijare jeyobaaerã Tuᵽarãre yijaka imajiᵽe. Suᵽa imarĩ yijare kijeyobaaika uᵽakaja aᵽerã kaꞌwisika jũairãre baꞌiaja naᵽuᵽarikoreka nare yija jeyobaawãrũyu.

⁵ Cristore yiꞌyurã imarĩ, baꞌiaja kijũaeka uᵽakaja yija jũayu yijaoka. Imakoꞌomakaja Cristorirã yija imamaka, baꞌiaja yija ᵽuᵽarikoreka Tuᵽarãre yijare jeyobaayu.

⁶ Jesucristorika bojariroka yija bojariᵽareaja baꞌiaja yija jũarijayu. Imakoꞌomakaja, sayija rakajeᵽããrijayu jia mijare jeyobaaokoroꞌsi. Cristore mija yiꞌyua jaꞌatabeyurã mija imarãñu. Baꞌiaja yija jũaika ᵽoto Tuᵽarãre yijare jeyobaayu. Sõñurã imarĩ, baꞌiaja jũakoꞌomakaja okajãjia imawaꞌri samija rakajeᵽããyu mijaoka.

⁷ Yija uᵽakaja Cristore yiꞌyurã imarĩ, baꞌiaja jũairã mija ime. Suᵽa imarĩ, “Yijare kijeyobaaika uᵽakaja Tuᵽarãre nare jeyobaarãñu, jia kire nayiꞌyaokoroꞌsi”, mijareka ãrĩᵽuᵽajoairã imarĩ, baꞌiaja yija ᵽuᵽaribeyu.

⁸ Mija ãꞌmitiᵽe yija jeyomarã. Asia kaꞌiarã turitaᵽabaraka jimarĩa baꞌiaja yija jũaraᵽaka mija õrĩrika yija yaᵽayu. Jimarĩtaka baꞌiaja jũawaꞌri, okajãjimarĩa rakajeᵽããwãrũbeyurã rõꞌõjĩrã yija jaraᵽe. Suᵽa imarĩ, “Reyarũkirã yija ime jeꞌe mae”, ãrĩᵽuᵽajoabaraka baꞌiaja yija ᵽuᵽaraᵽe.

⁹ Suᵽabaatirã, “Najããrũkirãja yija ime”, yija ãrĩᵽuᵽajoaraᵽe. Yija ᵽuᵽayariji; yija ᵽoꞌia ĩarĩrĩwãrũbeyurã yija. Suᵽa simakoꞌomakaja, “Reyaekarãre ᵽariji ᵽuᵽatõrõiki imarĩ, Tuᵽarã ĩꞌrĩkaja kime yijare ĩarĩrĩwãrũiki”, yija ãrĩwãrũerã suᵽa yijaroꞌsi simaraᵽe.

¹⁰ “Yija reyaerã baayu”, yija ãrĩtiraᵽakarã werikareka Tuᵽarãre yijare tããraᵽe. Suᵽa imarĩ, “Ñamajĩoka werikareka Tuᵽarãre yijare tããjiᵽarãñu”, ãrĩᵽuᵽajoawaꞌri baꞌiaja yija ᵽuᵽaritiyabeyu.

¹¹ Tuᵽarãre mija jẽñeĩjikaᵽi ãrĩwaꞌri yijare kijeyobaayu. Jia Tuᵽarãre yijare jeyobaaika ĩawaꞌri, “Jia mibaayu Tuᵽarã. Mire yija jẽñeika uᵽakaja mibaayu Ᵽablorãkaroꞌsi”, rĩkimarãja ᵽoꞌimajare kire ãrĩrãñu.

Ikuᵽaka simamaka Corintowejearã Ᵽablore aꞌriberika

¹² Ikuᵽaka aᵽea ᵽuᵽajoawaꞌri jĩjimaka yija ime. “Tuᵽarãre yaᵽaika uᵽakaja wããrõꞌõrãja ᵽoꞌimajare jia yija baarijayu, nare ᵽakibekaja”, yija ãrĩᵽuᵽajoayu. Ika wejeareka imarã waᵽuju ᵽuᵽajoatirã nawãrõika uᵽaka mijaka yija imawãrũbeyu. Tuᵽarãre yijare jeyobaamaka jia mijaka yija imawãrũrijayu.

¹³ Rukubaka mija ᵽuᵽajoaokoroꞌsimarĩa ᵽaᵽera oꞌotirã mijaroꞌsi yija ᵽũatarijayu. Yija wãrõika jia mija õñaokaroꞌsi sayija oꞌoyu.

¹⁴ Ika mijare yibojaika, “Ᵽablo kijeyomarãᵽitiyika rita bojairã nime”, jia ãrĩwãrũbeyukajĩrã ĩꞌrãrimarãre ime ruᵽu. Ĩꞌrãrĩmi jia yijare õrĩtirã, “Ĩꞌrã ᵽuri jiitaka yijare wãrõekarã”, nimauᵽatiji yijareka narĩrika yija yaᵽayu. Iꞌsuᵽakajaoka maĩᵽamaki Jesucristore ᵽeꞌrietarãrĩmi, “Jia yijare ãꞌmitiriwaꞌri mire nayiꞌrika”, jĩjimakaᵽi kire yija ãrĩrãñu.

¹⁵ “Jia yika nime jeꞌe. Suᵽa imarĩ Macedonia kaꞌiarã yaꞌrirãka ᵽoto naᵽõꞌiᵽi yoꞌrirãñu mamarĩ”, ñarĩᵽuᵽajoakoᵽeraᵽe. Toᵽi yoꞌririkareka ate mija ᵽõꞌirã eyawaꞌri jiibaji mijare yiwãrõjĩñu imakoᵽeyu.

¹⁶ “Macedonia kaꞌiarã yaꞌrirãka ᵽoto naᵽõꞌi ñimatawaꞌrirãñu, suᵽabaatirã yiᵽeꞌrirãka ᵽotooka iꞌsuᵽakajaoka yibaarãñu ate”, ñarĩᵽuᵽajoakoᵽeraᵽe. “Judeakaꞌiarã yeyawãrũokoroꞌsi Corintowejeakarã yire jeyobaarãñurã”, ñarĩᵽuᵽajoaraᵽe.

¹⁷ “¿Jia ᵽuᵽajoarimarĩaja iꞌsuᵽaka yijare kẽrãᵽe bai”, yireka mija ãrĩᵽuᵽajoayu jeꞌe? Tuᵽarãre õrĩbeyurã ᵽuri nañu uᵽaka baabeyurã imarĩ, “Ãꞌã, iꞌsuᵽaka yibaarãñu”, ãrĩkoꞌomakaja ñamajĩ ate, “Jẽnoꞌo, aᵽe uᵽaka yibaarãñu”, nañu. Iꞌsuᵽaka ãrĩbeyuka ñime yiꞌi ᵽuri.

¹⁸ Kẽñu uᵽakaja baaiki kime Tuᵽarã. Iꞌsuᵽakajaoka, “Ikuᵽaka yibaarãñu”, ñañu ᵽoto aᵽe uᵽaka baabeyuka ñime.

¹⁹ Kẽñu uᵽakaja kibaayu Tuᵽarã Maki Jesucristo. Suᵽa imarĩ, “Ãꞌã ikuᵽaka yibaarãñu”, ãrĩkoꞌomakaja, aᵽe uᵽaka baabeyuka kime. Kirika bojariroka mijare yija wãrõrijayu, yiꞌi Ᵽablo, suᵽabaatirã Silvano, Timoteo. Suᵽa imarĩ, “Ikuᵽaka yija baarãñu”, ãrĩkoꞌomakaja aᵽe uᵽaka yija baabeyu.

²⁰ “Ikuᵽaka jia yibaarãñu yirirãre”, kẽrĩka uᵽakaja ritaja Tuᵽarãre baaeka Kimaki Jesucristoᵽi ãrĩwaꞌri. Mare kibaarijayua õñurã imarĩ, “Rita, kẽrĩka uᵽakaja baaiki kime”, ãrĩwaꞌri Tuᵽarãre majiyiᵽuᵽayeerijayu.

^21-22 Jesucristore mayiꞌyua majaꞌatakoreka Tuᵽarãre mare jeyobaayu. Suᵽabaatirã ikijioka kime Jesucristorirã maimaokoroꞌsi mare wãꞌmaekaki. Kirirã maima beaokoroꞌsi Esᵽíritu Santore maᵽuᵽakarã kiñaꞌajããeka. Iꞌsuᵽaka kibaamaka, “ ‘Jia yirirãre yibaarãñu’, kẽrĩka uᵽakaja Tuᵽarãre mare baarãñu”, marĩᵽuᵽajoayu.

²³ “Mija ᵽõꞌirã yaꞌrirãñu”, ñarãᵽaka mijare ᵽakiberaᵽaki yiꞌi. Okajãjiaᵽi mijare okajããriyaᵽaberiwaꞌri mija ᵽõꞌirã yaꞌriberaᵽe ruᵽu. Tuᵽarãre ĩaika wãjitãji ikuᵽaka mijare ñañua rita sime.

²⁴ Mijare okajããtikarã imakoꞌomakaja, “Ikuᵽaka mija baabe, ikuᵽaka ᵽuri mija baaꞌsi”, ãrĩwaꞌri mijare jãꞌmeriyaᵽabeyurã yija. Cristore yiꞌritikarã mija imamaka, jĩjimaka mija imaokoroꞌsi wãrõbaraka mijare jeyobaarika yija yaᵽayu.