1 Ts 5 - Porciones del Nuevo Testamento en el idioma Letuama

Jesúre ᵽeꞌrietarũkia taꞌatikaja maimarijariyeꞌe

¹ Yijeyomarã, “Iꞌsirĩmi Maĩᵽamakire etarãñu. Iꞌsijẽꞌrãreka simarãñu”, ãrĩwaꞌri mijaroꞌsi oꞌobeyuka yiꞌi.

² Iꞌsuᵽaka ñañu, “Iꞌsirĩmi Jesucristore etarãñu jeꞌe”, marĩwãrũbeyua sime mija õñua. “Iꞌtojĩte karebaꞌarimajire wiꞌiarã kareeꞌerĩ etarãñu”, marĩwãrũbeyu uᵽaka sime Maĩᵽamakire etarũkia.

³ “Koᵽakaja dakoa jũarimarĩa maime”, ãrĩᵽuᵽajoabaraka ᵽoꞌimajare imarãka rõꞌõjite, ikuᵽarõꞌõᵽiji baꞌitakaja naroꞌsi simarãñu. Iꞌsuᵽaka najũarãka ᵽoto, marãkãꞌã baatirã ĩꞌrĩkaoka nakaki tãrĩbesarãki. Ikuᵽaka simarãñu: Ikuᵽarõꞌõᵽiji makarãrirã rõmore ᵽakatayu uᵽaka simarãñu. Makioka táꞌteberijĩka.

^4-5 Yijeyomarã mija ᵽuri, ĩꞌrãrĩmi ikuᵽarõꞌõᵽiji ketarũkia õrĩtiirã imarĩ, ketarãka ᵽoto ᵽuᵽatabesarãñurã. Jesúre yiꞌribeyurãroꞌsi ᵽuri ikuᵽaka simarãñu: ñami morĩbeyu ᵽoto, karebaꞌarimajire etaika uᵽaka simarãñu. Nuᵽakamarĩa imarã imarĩ, ketarũkia taꞌairã mija ᵽuri.

⁶ Suᵽa imarĩ Maĩᵽamakire etarũkia taꞌatikaja maimayeꞌe. Suᵽabaatirã Tuᵽarãte yaᵽabeyuakaka mabaakoreka rakajekaja maimayeꞌe. Tuᵽarãte õrĩbeyurã ᵽuri kãrĩtika uᵽakaja nime ketarũkia õrĩberiwaꞌri.

⁷ Ñami makãñu ᵽoto morĩbeyu uᵽaka nime. Iꞌsuᵽakajaoka ñami ukuwejabiyurãte rakajebekaja ima uᵽaka nime.

⁸ Tuᵽarãte yiꞌyurã ᵽuri, ĩmi simamaka ritaja jia oyiaja yoiirã, nuᵽaka maime. Suᵽa imarĩ, kiyaᵽabeyua mabaakoreka rakajekaja, jia oyiaja baabaraka maimayeꞌe. “Kẽñu uᵽakaja baaiki Jesús”, jia kire mayiꞌrirã. Suᵽabaatirãoka jia mawayuĩabuꞌayeꞌe. “Jesúre yiꞌyurã maimamaka baꞌiaja mabaakoꞌomakaja Tuᵽarãte mare waᵽajaibesarãñu”, ãrĩwaꞌri ᵽuᵽajoaweitikaja maimarãñu. Iꞌsiroka oyiaja ᵽuᵽajoabaraka maimarijariyeꞌe Satanáre baꞌiaja mare baakoꞌomakaja.

⁹ “Baꞌiaja nabaaika waᵽa baꞌiaja nare yibaarãñu”, ãrĩwaꞌrimarĩa Tuᵽarãte mare wãꞌmaeka. Maĩᵽamaki Jesucristore reyaekaᵽi ãrĩwaꞌri mare kiwaᵽajaibesarãñu.

¹⁰ Jia mare baawaꞌri kireyaeka kika maimajiᵽaokaroꞌsi. Suᵽa imarĩ, kiᵽeꞌrietarãñurĩmi õñia imarãte, reyaekarãreoka keꞌewaꞌrirãñu kika maimajiᵽaokaroꞌsi.

¹¹ Iꞌsiakaka õñurã imarĩ, jĩjimaka jaibuꞌabaraka, jeyobaabuꞌabaraka, rikitubaka mija imarijaᵽe.

Ᵽiyiroka Ᵽablote nare okajããeka

^12-13 Mija ãꞌmitiᵽe yijeyomarã. Torã imaruᵽutarimajare mija yiꞌᵽe. “Jesucristore yaᵽaika uᵽaka mabaarijariyeꞌe”, ãrĩwaꞌri mijare nokajããrijayu uᵽaka. Jia mijare nimaruᵽutaika simamaka jiyiᵽuᵽaka nare mija õrĩrika yiyaᵽayu. Nare mija wayuĩarijaᵽe. Suᵽabaatirã ritaja ᵽoꞌimajaka jia mija imabe.

¹⁴ Yijeyomarã, mija ᵽõꞌirã baꞌirabebekaja imarãte, okajãjiᵽañakaᵽi, “Mija baꞌirabebe” mija ãᵽe. Suᵽabaatirã baꞌiaja ᵽuᵽabaraka imarãte, jia rikitubaka naᵽuᵽajoaokaroꞌsi mija jeyobaabe. Iꞌsuᵽakajaoka Tuᵽarãte yaᵽaika koaᵽibeyurãte, suᵽabaatirã jia kire yiꞌribeyukajirãteoka mija jeyobaabe. Jajumarĩa jia jĩjimaka ritajaka mija imabe. Iꞌsuᵽaka mija baarika yija yaᵽayu.

¹⁵ Jia ᵽuᵽajoabaraka aᵽerãte baꞌiaja mijare baakoᵽekoꞌomakaja mija ruᵽuwaᵽaeꞌeaꞌsi. Iꞌsuᵽaka baabekaja jia oyiaja mija imabuꞌabe. Ritaja wejeareka imabayurãkaoka iꞌsuᵽakaja mija imabe.

^16-18 Tuᵽarãte ᵽuᵽajoabaraka jĩjimaka mija imarijaᵽe. Kika mija jairijayuaoka mija jaꞌataꞌasi. Jia simarãka, jiamarĩa simarãkaoka, “Jia mibaayu Tuᵽarã”, mija ãrĩrijaᵽe. Jesucristorirã mija imamaka, suᵽa mija baarika Tuᵽarãte yaᵽayu.

^19-20 Mija watoᵽekarã Esᵽíritu Santore jeyobaarãkaᵽi jairãkire mija ãꞌmitiriᵽeꞌyoaꞌsi. Ikuᵽaka baarika sime. Okoaᵽi ᵽekaõꞌtoa yataika uᵽaka baarika sime. “Ikuᵽaka Esᵽíritu Santore yire õrĩrũjeyu”, ãrĩwaꞌri Tuᵽarãroꞌsi bojaĩjirimajare bojaika ãꞌmitiriᵽeꞌyobekaja mija imabe.

^21-22 Sãꞌmitiriᵽeꞌyobekaja, “¿Yaje rita Tuᵽarãrikataka najaiyu? Noñu uᵽakaja ᵽuᵽajoatirã najaiyu jeꞌe aᵽeyari”, ãrĩwaꞌri jia mija ãꞌmitiᵽe ruᵽu. “Rita Tuᵽarãrika najaiyu”, mija ãrĩwãrũrãkarõꞌõjĩrã ᵽuri nare mija yiꞌᵽe. Ritaja Tuᵽarãte yaᵽabeyua mija ãꞌmitiriᵽẽaꞌsi.

²³ Tuᵽarã kime jia ñaꞌrĩyaarĩji maimaokaroꞌsi mare jeyobaarimaji. Iꞌsuᵽaka simamaka ikuᵽaka mijaroꞌsi kire yija jẽñerijayu: “Baꞌiaja baabekaja jia oyiaja baabaraka nimarũ, nare mijeyobaabe”, kire yija ãñu. “Suᵽa imarĩ, mire takaja ãꞌmitiriᵽẽabaraka nare mimarũjebe”, kire yija ãrĩrijayu. Iꞌsuᵽakajaoka, “Jia oyiaja baabaraka Jesúre naꞌmitiriᵽẽarũ, kiyaᵽaika uᵽakaja ᵽuᵽajoabaraka nimarũ”, ãrĩwaꞌri Tuᵽarãte yija jẽñeĩjirijayu. Suᵽa imarĩ, maĩᵽamaki Jesucristore ᵽeꞌrietarãñurĩmi baꞌiaja baabeyurã mija imarika yija yaᵽayu.

²⁴ “Yire takaja mija ãꞌmitiriᵽẽabe”, Tuᵽarãte ãrĩka. Mare jãꞌmeiki imarĩ, kiyaᵽaika uᵽakaja mabaawãrũerã jia mare jeyobaarijarirũkika kime.

“Õꞌõjĩrãja sime, jia nimarũ”, Ᵽablote ãrĩka

^25-26 Yijeyomarã, yijaroꞌsioka Tuᵽarãte mija jẽñeĩjibe. Mija rẽrĩrãka ᵽoto jĩjimaka mija jẽñabuꞌabe, Jesúrirã imarĩ.

²⁷ Tokarã Jesúre ãꞌmitiriᵽẽairã nimauᵽatikarã rẽrĩtirã, ika ᵽaᵽera nare mija jaibojabe. Ritaja sãꞌmitiririka Maĩᵽamakire yaᵽaika simamaka ikuᵽaka mijare yijãꞌmeyu.

²⁸ “Maĩᵽamaki Jesucristore jia mijare baarũ”. Iꞌtojĩrãja sime.