1 Ts 4 - Porciones del Nuevo Testamento en el idioma Letuama

Tuᵽarãte jia ĩajiyuikakaka

¹ Yija jeyomarã, aᵽeroka mijaroꞌsi yoꞌoerã baayu ate. “Ikuᵽaka mija imarãkareka, jĩjimaka Tuᵽarãte mijaka imarãñu”, ãrĩwaꞌri mijare yija wãrõraᵽe. “Iꞌsuᵽakaja nime ruᵽu”, mijareka yija ãñu. Kiyaᵽaika uᵽakaja, jia oyiaja mija baarijaririka yija yaᵽayu. Ãrĩwaꞌri mijare yija okajããrijayu Maĩᵽamakirirã maima imarĩ.

² Maĩᵽamaki Jesúre yijare jãꞌmeka uᵽakaja yija wãrõraᵽaka õrĩtikarã mija ime.

³ Suᵽa imarĩ bikirimaja rõmimarĩrã, tĩmiamarĩrã, suᵽabaatirã ᵽakiarã rõmiki, tĩmiaiko, baꞌiaja baabuꞌarika imabeyua. Tuᵽarãrirã mija ima simamaka, kiyaᵽaika uᵽaka oyiaja mija baarika kiyaᵽayu.

^4-5 Tuᵽarãte yiꞌribeyurã ᵽuri, baꞌiuᵽakaja baariwãꞌimarĩrijayurã. Nuᵽaka baabekaja mija imabe, rakajeᵽããrika õrĩwãrũbaraka Tuᵽarãte yaᵽaika uᵽakaja baairã mija imarãkareka ᵽoꞌimajare jiyiᵽuᵽaka õñurã mija imarãñu.

⁶ Suᵽa imarĩ, baꞌiaja mija baawãꞌimarĩaꞌsi, mija jeyomaki Jesúre yiꞌyukare baꞌiaja mija baakoreka. “Baꞌiaja baairãte, baꞌiajaoka Tuᵽarãte baarãñu”, ãrĩwaꞌri mijare yija bojatiraᵽe.

⁷ Baꞌiaja mabaaerãmarĩa Tuᵽarãte mare wãꞌmaeka. Kirirã maimamaka, kiyaᵽaika uᵽaka oyiaja baabaraka maimarika kiyaᵽarijayu.

⁸ Tuᵽarãte yiꞌyurã imakoꞌomakaja, yija wãrõika yaᵽabeyurã ᵽuri, yijare takamarĩa ĩariᵽeꞌyoirã. Tuᵽarãte yiꞌribeyurã nime. Tuᵽarã Esᵽíritu Santore mijare ñaꞌajããekaki, baꞌiaja nabaaika najaꞌatarũ ãrĩwaꞌri.

⁹ Mija wayuĩabuꞌaokaroꞌsi Tuᵽarãte mijare wãrõtika simamaka yija ᵽuri, dakoa ãrĩwaꞌri sakaka mijaroꞌsi oꞌobeyurã.

¹⁰ Rita sime, jia wayuĩabuꞌairã mija ime. Nimauᵽatiji Macedonia kaꞌiareka Jesúre yiꞌyurãte jia mija wayuĩayu. Suᵽa imarĩ jiibaji nare mija wayuĩarikaturirika yija yaᵽayu.

¹¹ Dakoa okamirãmarĩaja, mija ᵽuᵽayariji mija imabe. Suᵽabaatirãoka baꞌirabebaraka imarãte baꞌiaja baataꞌabekaja mija imabe. Jia imaerã mija ᵽuᵽayariji baꞌirabebaraka mija imabe mijare yija bojaraᵽaka uᵽakaja.

¹² Wayuoka baaberiwaꞌri aᵽerãte baꞌiaja baataꞌabekaja mija imarãñu. Iꞌsuᵽaka mija baamaka ĩatirã Jesúre yiꞌribeyurã ᵽariji jiyiᵽuᵽaka mijare õrĩrãñurã.

Ikuᵽaka sime Maĩᵽamakire ᵽeꞌrietarũkia

¹³ Yija jeyomarã. Jesucristore yiꞌrika mirãrãte reyaekakaka mijare yija bojaerã baayu, baꞌiaja mija ᵽuᵽarikoreka. “Reyairã ᵽuri ᵽuᵽatũrũbesarãñurã ate”, ãrĩwaꞌri jĩjimakaᵽi naruᵽurõꞌõ ᵽuᵽajoabekaja nime Tuᵽarãte yiꞌribeyurã ᵽuri. Suᵽa imarĩ wayuᵽiꞌritiyairãja nime. Nuᵽaka mija imarika yija yaᵽabeyu. “Jesúre yiꞌrika mirãrã imarĩ reyaekarã ᵽuᵽatũrũirã Tuᵽarã ᵽõꞌirã aꞌrirãñurã”, mija ãrĩᵽuᵽajoabe.

¹⁴ “Jesúre reyaeka beꞌerõꞌõ Tuᵽarãte kire ᵽuᵽatõrõeka”, ãrĩwãrũirã imarĩ, “Jesúre yiꞌrika mirãrãteoka Tuᵽarãte ᵽuᵽatõrõrãñu. Suᵽabaatirã maboꞌikakuriᵽi Jesúre iꞌtarãka ᵽoto, kika nare keꞌewaꞌrirãñu”, ãrĩwãrũirã maime.

¹⁵ Maĩᵽamakite yire õrĩrũjekakaka sime ika majaroka mijare yibojaika. Maĩᵽamakire ᵽeꞌrietarãrĩmi kire yiꞌrika mirãrã reyaekarã ᵽuᵽatũrũtirã, kiᵽõꞌirã aꞌrirãñurã. Õꞌõrã imañujurãoka naka kiᵽõꞌirã aꞌrirãñurã.

¹⁶ Ikuᵽaka simarãñu: Maĩᵽamakire jãꞌmemaka wejeᵽema jãjia okaarirãka. Suᵽabaatirã ángelrãka ĩᵽamaki jãjirokaᵽi jairãki, iꞌsuᵽakajaoka Tuᵽarã tromᵽeta okaarirãka. Sokaarirãka watoᵽekaᵽi maĩᵽamaki Jesucristore ruiraꞌarãñu. Ũmakakurirã kimarãka ᵽoto kire yiꞌrika mirãrã reyaekarãte ᵽuᵽatũrũrãñu.

¹⁷ Suᵽa imarĩ Jesúre yiꞌriñujurã, reyaekarã ᵽuᵽatũrũrãñurã ᵽitiyika ũmakakukurã Tuᵽarãte mare akamiarãñu. Torã Maĩᵽamakire mare eꞌetorirãñu, kika imajiᵽaokaroꞌsi.

¹⁸ Iꞌsuᵽaka imarũkia õñurã imarĩ, jia rikitubakaᵽi sakaka jaibuꞌabaraka mija imabe. “Iꞌsia ᵽoto reyaeka mirãrãte maka imarãñu ate”, ãñurã imarĩ baꞌiaja ᵽuᵽaritiyabekaja mija imabe.