1 Ts 3 - Porciones del Nuevo Testamento en el idioma Letuama

^1-2 Iꞌsuᵽaka simamaka mija majaroka ãꞌmitiriyaᵽatiyawaꞌri, yija jeyomaki Timoteore mija ᵽõꞌirã yija ᵽũataraᵽe. Yuᵽakajaoka Tuᵽarãte baꞌirabeĩjirimaji imarĩ, Jesucristorika bojariroka bojataᵽarimaji kima mija õñu. Suᵽa imarĩ, baꞌiaja jũakoꞌomakaja rakajẽᵽããirã mija imaokoroꞌsi mija ᵽõꞌirã kire yija ᵽũataraᵽe, jiibaji Jesucristore mija yiꞌyaokaroꞌsi. Yija ĩꞌᵽarã ᵽuri Atenas wejearã tuiraᵽarã.

³ Baꞌiaja jũawaꞌri, nawayuᵽiꞌriaꞌsi ãrĩwaꞌri Jesucristorika bojariroka mija jaꞌatakoreka mija ᵽõꞌirã kire yija ᵽũataraᵽe. Jesúre yiꞌyurã maimamaka, aᵽerãte baꞌiaja mare baayu. “Iꞌsuᵽakaja yire yiꞌyurãroꞌsi simarãñu”, Tuᵽarãte ãrĩtika simamaka, kire yiꞌᵽaraka rakajeᵽããrũkirã maime.

⁴ Iꞌsuᵽakajaoka mijaka yija imaraᵽaka ᵽoto, “Jesúre yiꞌyurã mija imamaka, baꞌiaja aᵽerãte mijare baarãñu”, ãrĩwaꞌri mijare yija bojatiraᵽe. Mijare yija bojaraᵽaka uᵽakaja sima, õñurã mija ime.

⁵ “Jesucristore najaꞌataokaroꞌsi Satanáre nare ᵽakitiraᵽe jeꞌe”, ãrĩwaꞌri baꞌiaja mijareka yiᵽuᵽaraᵽe. Iꞌsuᵽakajaoka, “Nare kitẽrĩtajĩkareka ᵽuri yija wãrõkoᵽeraᵽaka waᵽuju ririrãka jeꞌe aᵽeyari”, mijareka ñarĩᵽuᵽajoaraᵽe. Baꞌiaja jũairã mija imamaka, mija majaroka õrĩtiyaerã Timoteore mija ᵽõꞌirã yiᵽũataraᵽe.

⁶ Mija ᵽõꞌirã turaᵽaki Timoteore õꞌõrã ᵽeꞌrietayu mae. Suᵽa imarĩ mijamajaroka yijare kibojayu. Ikuᵽaka kẽñu: “Jesucristore jia yiꞌririjayurã nime. Wayuĩabuꞌairã oka. ‘Jia mijare yija ᵽuᵽajoarijayu’. Suᵽabaatirãoka ‘Yijare mija ĩariyaᵽarijayu uᵽakajaoka mijare ĩarika yija yaᵽakoᵽeroyi’, nañu”, ãrĩwaꞌri kibojaetayu.

⁷ Iꞌsuᵽaka mijareka kẽñua ãꞌmitiritirã, “Jesúre yiꞌririjaꞌatabeyukajirã”, ãrĩwaꞌri baꞌiaja jũarijayurã imakoꞌomakaja jĩjimaka yija ime.

⁸ “Jia Cristore yiꞌriñujurã nime ruᵽu”, kẽᵽakãꞌã ãꞌmitiritirã jia yija ᵽuᵽayu mae.

⁹ Mijare ᵽuᵽajoabaraka, “Jia mibaayu Tuᵽarã”, yija ãrĩrijaꞌatabeyu. Iꞌsuᵽakajaoka Tuᵽarãte yija jaika ᵽoto, “Jesucristore jia yiꞌyurã nime jiitaka mibaayu”, yija ãrĩrijayu jia jĩjimaka mijare õrĩwaꞌri.

¹⁰ Ĩmiareka, ñamiareka, mija ᵽõꞌirã yija eyaokaroꞌsi yijare kijeyobaaerã ᵽariji Tuᵽarãte yija jẽñerijayu. Mija ᵽõꞌirã yija aꞌririyaᵽayu, jiibaji Jesucristore mija ãꞌmitiyaokoroꞌsi, suᵽabaatirã mija õrĩbeyua ate mijare wãrõerã.

¹¹ Mija ᵽõꞌirã turitaᵽarĩ yija aꞌrirã Maᵽaki Tuᵽarã, suᵽabaatirã maĩᵽamaki Jesucristore jia yijare jeyobaarũ.

¹² Jiibaji wayuĩabuꞌabaraka mija imarijarirã, aᵽerãte mija wayuĩaerã ᵽariji Maĩᵽamakire mijare jeyobaarũ. Mijare yija wayuĩarikatuyu uᵽakaja mija imaokaroꞌsi.

¹³ Iꞌsuᵽaka maĩᵽamaki Jesúre yija jẽñeyu, jia oyiaja mija baaokaroꞌsi. Mijare kijeyobaamaka, jimiji ᵽuᵽajoairã mija imarãñu. Suᵽa imarĩ, maĩᵽamaki Jesúre, kirirãka ᵽeꞌrietarãñurĩmi, Maᵽaki Tuᵽarãte ĩarãka wãjitãji, dakoa okamirãmarĩaja mija imarãñu. Ikuᵽaka oyiaja simarijarirũ.