1 Jn 5 - Porciones del Nuevo Testamento en el idioma Letuama

Tuᵽarã makarã imarĩ, kiyaᵽaika uᵽakaja baarijarirũkirã maime

¹ “Mare kitããerã Tuᵽarãte wãꞌmaekaki kime Jesús”, ãrĩwaꞌri sayiꞌyurã ᵽuri Tuᵽarã makarã nime. Maᵽaki Tuᵽarãte yaᵽatiyarĩji yaᵽairã imarĩ, kire yiꞌyurãreoka nawayuĩayu.

² Iꞌsuᵽaka simamaka Tuᵽarãte yaᵽawaꞌri iꞌsuᵽakajaoka kijãꞌmeika ãñu uᵽakaja yiꞌriwaꞌri, “Kire yiꞌyurãte wayuĩarũkirã maime”, marĩwãrũrijayu.

³ Tuᵽarãte jãꞌmeika yiꞌyurã imarĩ, “Tuᵽarãte yaᵽatiyarĩji yaᵽarijayurã maime”, marĩwãrũyu. Suᵽabaatirãoka, “Kijãꞌmeika kaꞌwisitakamarĩa sime”.

⁴ Iꞌsuᵽaka mañu Tuᵽarã makarã imawaꞌri, wejearitatorã ima baꞌiaja baarika ĩꞌrãᵽẽꞌrõtorã mataarijayu. Baꞌiaja baarimijikaka nabaaika uᵽakaja mabaabeyu Jesucristore yiꞌriwaꞌri.

⁵ Suᵽabaatirã, “Tuᵽarã Maki kime Jesús”, ãrĩrijayurã imarã, wejeareka ima baꞌiaja baabeyurã.

“Yimaki Jesúre ime”, Tuᵽarãte ãrĩka

^6-8 Õꞌõrã kimaeka ᵽoto maekarabaꞌikaka kireka õrĩwaꞌri, “Tuᵽarãte ᵽũataekaki kime Jesucristo”. Mamarĩji, okoaᵽi Jesucristore kiruᵽukoꞌa jũjerũjeka. Suᵽabaatirãoka sabeꞌerõꞌõ yaᵽua tetaekarã kiriwetabaraka kireyaeka. Iꞌsuᵽakajaoka rita ãñuka imarĩ, “Tuᵽarã Maki kime Jesucristo”, Esᵽíritu Santore mare ãrĩrijayu. Ika maekarakabaꞌi õñurã imawaꞌri, “Tuᵽarã Maki kime Jesucristo”, marĩwãrũyu. Jesucristore kiruᵽukoꞌa jũjerũjeka, suᵽabaatirã yaᵽua tetaekareka kiriwetabaraka, Esᵽíritu Santore mare bojarijayua maekarakaroka imariᵽotojo ĩꞌrãtiji oyiaja sabojayu.

⁹ Ᵽoꞌimajare mare ãñua yiꞌrirũkia oyiaja sime. Iꞌsuᵽaka simakoꞌomakaja, “Yimaki kime ĩꞌĩ”, Tuᵽarãte ãrĩkaroka takaja ima saᵽemawaꞌribaji mayiꞌrirũkia.

¹⁰ Tuᵽarã Makire yiꞌyurã ᵽuri, “Kimakireka Tuᵽarãte bojaeka rita sime”, ãrĩwaꞌri naᵽuᵽakarã sõñurã nime. “Tuᵽarã Makimarĩka Jesúre ime”, ãñurã ᵽuri Tuᵽarãte kireka bojaeka yiꞌribeyurã. Iꞌsuᵽaka ãñurã imarĩ, “Waᵽuju ᵽakirika sime ‘Yimaki Jesúre ime’, Tuᵽarãte ãñua”, narĩrijayu.

¹¹ Ikuᵽaka sime Tuᵽarãte kireka bojaekakaka: Kimakiᵽi ãrĩwaꞌri õñia mare kimajiᵽarũjeka.

¹² Tuᵽarã Makika ĩꞌrãtiji ᵽuᵽakirã, õñia kika imajiᵽatiirã imarã. Kika ĩꞌrãtiji ᵽuᵽamarĩrã ᵽuri kika õñia imajiᵽabeyurã.

Bojajiibaraka ᵽiyia Juanre naroꞌsi oꞌoeka

¹³ Tuᵽarã Makire yiꞌyurã imarĩ, kika õñia imajiᵽarã mija ime. Iꞌsia jia mija õñaokaroꞌsi ika ᵽaᵽera oꞌotirã mijaroꞌsi yiᵽũatayu.

¹⁴ Iꞌsuᵽaka simamaka jia kika ĩꞌrãtiji ᵽuᵽakirã imarĩ, “Tuᵽarãte yaᵽairokaᵽi kire majẽñerijarãka, mare kiãꞌmitiriᵽẽarãñu”, ãñurã maime.

¹⁵ “Mare ãꞌmitiriᵽẽaiki kime Tuᵽarã”, ãñurã imarĩ, “Kireka majẽñeika uᵽakaja mare ĩjiiki kime”, ãrĩᵽuᵽajoairãoka maime.

¹⁶ Ikuᵽaka sime aᵽea: Ĩꞌrĩka Jesúre yiꞌyuka, mija watoᵽekakaki imaki baꞌiaja kibaaika mija ĩarãkareka, Tuᵽarãte kiroꞌsi mija jẽñebe. Baꞌiaja jũarũkiwaᵽa imakoᵽeika Tuᵽarãte yeꞌkariarikaka simarijarirũ iꞌsuᵽaka kiroꞌsi mija baabe. Iꞌsuᵽaka kiroꞌsi mija baamaka baꞌiaja kibaaikareka Tuᵽarãte kire wayuĩarãñu ate jia kika kimaokaroꞌsi. Aᵽebaꞌi baꞌiaja baarika ima, sawaᵽa baꞌiaja imarika tiyibeyurõꞌõrã aꞌrirũkia. Suᵽa ĩꞌrĩkate baarũkareka, “Kiroꞌsi Tuᵽarãte mija jẽñebe”, mijare ãrĩbeyuka yiꞌi.

¹⁷ Ritaja baꞌiaja mabaaika jiamarĩa oyiaja sime Tuᵽarã ñakoareka. Suᵽa imakoꞌomakaja, baꞌiaja mabaaika simauᵽatimarĩa sime mare taꞌterũkia Maĩᵽamakire imarõꞌõrã.

¹⁸ Ikuᵽaka moñu: Tuᵽarãmakarã imarĩ baꞌiaja baarijaribeyurã maime, Tuᵽarã Makire mare ĩarĩñua imamaka. Suᵽa imarĩ Satanáre baꞌiaja mare baarũjewãrũbeyu.

¹⁹ “Tuᵽarã makarã maime”, marĩwãrũyu. Kire yiꞌribeyurã ika wejearitatojoreka imarãre ᵽuri baꞌiaja Satanáre baarũjerijayu.

²⁰ Mia jeꞌe, ikuᵽakaoka moñua sime: Ika maima kaꞌiarã Tuᵽarã Makire ᵽoꞌijirika. Tuᵽarã imatiyaikire moñaokaroꞌsi mare kiõrĩwãrũrũjeka. Kimaki Jesucristoka ĩꞌrãtiji uᵽakaja ᵽuᵽakirã imarijayurã imarĩ, Tuᵽarãrirãoka maime. Iki Tuᵽarã kime, suᵽabaatirã ikijioka kime mare õñia imajiᵽarũjeiki.

²¹ Yijeyomarã, iꞌsuᵽaka kima õñurã imarĩ, waᵽuju ᵽoꞌimajare baaᵽoꞌijiaeka mija yiꞌririjariaꞌsi. Iꞌtojĩrãja sime.