1 Jn 4 - Porciones del Nuevo Testamento en el idioma Letuama

“¿Yaje rita Esᵽíritu Santore jeyobaaikaᵽitaka nawãrõtiyayu jeꞌe?”, ãrĩwaꞌri jia mija ãꞌmitiririjaᵽe

¹ Mija ãꞌmitiᵽe yijeyomarã. “Tuᵽarã oka bojarimaja yija ime Esᵽíritu Santore yijare jeyobaamaka”, ãñurãre mija ᵽõꞌirã etarãñu. Iꞌsuᵽaka naᵽakãꞌã, “¿Yaje rita oka Esᵽíritu Santore nare jeyobaaikaᵽi nawãrõtiyayu jeꞌe?”, ãrĩwaꞌri jia nare mija ãꞌmitiᵽe. “Ᵽakirimaja nimarũkareka nare mayiꞌririaꞌsi”, ãrĩwaꞌri iꞌsuᵽaka mijare ñañu. Ika wejea sareka maima ritatojoreka rĩkimarãja ᵽakirimajare ime.

² “Maᵽoꞌia uᵽaka kiᵽoꞌijirirã ika wejearã Tuᵽarãte Jesucristore ᵽũataeka”, ãñua wãrõrimaja ᵽuri, “Rita oka, Esᵽíritu Santore jeyobaaikaᵽi jairã nime”, nareka mija ãrĩwãrũrãñu.

³ Aᵽerimarã ᵽuri iꞌsirokaᵽi wãrõbeyurã imarĩ, Esᵽíritu Santore jeyobaaikaᵽimarĩa wãrõirã nime. Iꞌsuᵽaka nabaayu, Cristore Táꞌterimajire wãrõika uᵽaka imarĩ. “Iꞌsuᵽaka ima wãrõrimajare etarãñu”, ãñua õrĩtiirã mija ime. Maekakaoka, “Ika wejea ritatorekaja nimatiyu iꞌsuᵽaka ima wãrõrimaja”, ãrĩwaꞌri mijare yibojayu.

⁴ Wãtaka ñoñurã, Tuᵽarãrirã mija ime. Suᵽabaatirã ᵽakirimajaroka wãrõika mija ãꞌmitiriaꞌsi. Satanáre ᵽakirika wãrõrimajare jeyobaakoꞌomakaja ĩꞌrãᵽẽꞌrõtorãja nare mija baayu Satanáre tẽrĩwaꞌribaji õñuka Tuᵽarãte imamaka.

⁵ Tuᵽarãte yaᵽabeyua wãrõrimaja ᵽuri ᵽoꞌimajare waᵽuju ᵽuᵽajoairokaᵽiji wãrõirã. Iꞌsuᵽaka nawãrõmaka, ika ritatojo wejeareka imarãre nare ãꞌmitiriᵽẽayu Tuᵽarãte õrĩberiwaꞌri.

⁶ Maa ᵽuri, Tuᵽarãrirã maime. Iꞌsuᵽaka simamaka mawãrõrijayua ãꞌmitiriᵽẽairã nime Tuᵽarãte yiꞌyurã. Tuᵽarãte yiꞌribeyurã, mawãrõrijayua ãꞌmitiribeyurã. Suᵽa imarĩ nawãrõika ãꞌmitiritirã, “Ika rita bojariroka sime. Iꞌsia ᵽuri waᵽuju ᵽakirimajaroka sime”, ãrĩwãrũirã maime.

Mare wayuĩarimaji Tuᵽarãte ime

⁷ Yijeyomarã, mawayuĩabuꞌarijarirã, aᵽerãre mare wayuĩarũjeki Tuᵽarãte ima simamaka. Suᵽa imarĩ wayuĩabuꞌarijayurã nime Tuᵽarã makarã, suᵽabaatirã jia kire õñurã nime.

⁸ Ᵽoꞌimajare wayuĩarimaji Tuᵽarãte imamaka, wayuĩabuꞌabeyurã ᵽuri kire õrĩbeyurã nime.

⁹ Ikuᵽaka Tuᵽarãte maroꞌsi baaeka mare wayuĩawaꞌri: Kimaki ĩꞌrĩkaja imaekakire maroꞌsi kiᵽũataeka õñia maimajiᵽaokoroꞌsi.

¹⁰ Ika sime aᵽerãre wayuĩarika: Tuᵽarãte mayaᵽaika uᵽakamarĩa sime. Tẽrĩrikaja mare wayuĩawaꞌri Kimakire maroꞌsi Tuᵽarãte ᵽũataeka kireyaekaᵽi ãrĩwaꞌri baꞌiaja mabaaika yeꞌkariaokaroꞌsi.

¹¹ Yijeyomarã, iꞌsuᵽaka Tuᵽarãte mare wayuĩatiyaeka simamaka, mawayuĩabuꞌajĩñu marãoka.

¹² Maki imabeyuka Tuᵽarãte ĩaiki. Iꞌsuᵽaka simakoꞌomakaja mawayuĩabuꞌajĩkareka kika ĩꞌrãtiji ᵽuᵽakirã maime. Suᵽabaatirã kiuᵽakaja mare kijarirũjeyu. Suᵽa imarĩ kiyaᵽaika uᵽakaja aᵽerãre wayuĩairã majayu.

¹³ Tuᵽarãte Esᵽíritu Santore mare ñaꞌajããeka simamaka, “Kika ĩꞌrãtiji ᵽuᵽakirã maime, suᵽabaatirã kiuᵽakaja mare kijarirũjeyu”, ãrĩwãrũirã maime.

¹⁴ Yija ĩaeka mirãka mijare yija bojaerã baayu. Ritatojo wejeareka imarãre tããrimaji imarũkiroꞌsi Kimakire maroꞌsi Maᵽakire ᵽũataeka.

¹⁵ “Tuᵽarã Maki kime Jesús”, ãñurã ᵽuri, Tuᵽarãka ĩꞌrãtiji ᵽuᵽakirã nime. Iꞌsuᵽakajaoka naka kime kiroꞌsi.

¹⁶ Tuᵽarãte mare wãtaika koritiirã imarĩ, mare kiwayuĩaika yiꞌririjayurã maime. Mija ĩabe: Ᵽoꞌimajare wayuĩarijayuka kime Tuᵽarã. Suᵽa imarĩ, kiuᵽakaja aᵽerãre wayuĩarijayurã ᵽuri, Tuᵽarãka ĩꞌrãtiji ᵽuᵽakirã nime, suᵽabaatirã kiuᵽakaja nare kijarirũjeyu.

¹⁷ Iꞌsuᵽaka imarã imarĩ, Tuᵽarãte yaᵽaika uᵽakaja ᵽoꞌimajare wayuĩairã majayu. Suᵽa imamaka ᵽoꞌimaja jia, baꞌiaja baaekarãre kiwãꞌwarãñu. Ikarĩmi seyamaka, “Baꞌiaja mare kibaarãñu jeꞌe”, ãrĩbekaja, kĩkibekaja maimarãñu, Jesucristore imarijarika uᵽakaja õꞌõrã maimarijayua simamaka.

¹⁸ Tuᵽarãte yaᵽatiyarĩ yaᵽairã imarĩ makĩkibesarãñu. Iꞌsuᵽaka imawaꞌri makĩkirũkia imakoᵽeika ĩꞌrãᵽẽꞌrõtorã mataayu. “Baꞌiaja yibaaika waᵽa baꞌiaja Tuᵽarãte yire baarãñu jeꞌe”, ᵽuᵽajoairã ᵽuri saruᵽu kĩkibaraka baꞌiaja ᵽuᵽayurã. “Nimamaka jia kire yaᵽatiyarĩ yaᵽabeyukajirã nime ruᵽu”, nareka mañu.

¹⁹ Mamarĩji Tuᵽarãte mare wayuĩaũꞌmutika simamaka, kire, suᵽabaatirã ᵽoꞌimajareoka yaᵽatiyarĩji yaᵽarijayurã maime marãoka.

²⁰ Jesúre yiꞌyukate ãꞌmijĩaika, “Tuᵽarãte yaᵽatiyarĩ yaᵽaiki ñime”, ãñuka ᵽuri, ᵽakirimaji kime. Kĩarijayukate kiãꞌmijĩajĩka reka, marãkãꞌã Tuᵽarãte kiyaᵽajĩñu jeꞌe ĩꞌrãkuri kire ĩabeyukajika imakoꞌomakaja.

²¹ Ikuᵽaka Tuᵽarãte mare jãꞌmeka: “Yire mija yaᵽarũkareka Jesúre yiꞌyurãteoka mija wayuĩabe”.