1 Jn 3 - Porciones del Nuevo Testamento en el idioma Letuama

Tuᵽarãrirã maimakaka

¹ Mija ãꞌmitiᵽe. Maᵽaki Tuᵽarã imaki mare wayuĩatiyaiki. Iꞌsuᵽaka maka imawaꞌri, “Yimakarã mija ime”, mare kẽñu. Rita sime iꞌsuᵽaka mare kẽñua, kimakarã takajaoka maime. Imakoꞌomakaja, rĩkimarãja nime ᵽoꞌimaja iꞌsuᵽaka maima ĩawãrũbeyurã. Tuᵽarãte õrĩbeyurã imawaꞌri, kimakarã maima niawãrũbeyu.

² Yijeyomarã. Tuᵽarã makarã maime mae. Suᵽa imawaꞌri kimakarã maimamaka, ñamajĩ aᵽeuᵽaka mare kimarũjerãka, mõrĩbeyua sime ruᵽu. Maekaka sõrĩbeyurã imakoꞌomakaja, “Jesúre etarãñurĩmi ᵽuri, kire ĩawaꞌri kima uᵽakaja maimarãñu”, ãrĩwãrũirã maime.

³ “Rita kima yija ĩarãñu”, ãñurã baꞌiaja baabekaja nimarijayu, “Cristore baꞌiaja baamarĩka uᵽaka yija imariyaᵽayu”, ãrĩwaꞌri.

⁴ Baꞌiaja baarijayurã Tuᵽarãre jãꞌmeika yiꞌribeyurã imarã. Mia, kijãꞌmeika yiꞌriberika sime baꞌiaja baarika.

⁵ Baꞌiaja baamarĩka Jesucristore ima õñurã mija ime. Iꞌsuᵽaka imaki imawaꞌri, “ ‘Baꞌiaja nabaaika yiwaᵽakoyimaka, baꞌiaja baaᵽeꞌabekaja nimarũ’, ãrĩwaꞌri, ika kaꞌiarã ketaeka”, ãrĩwãrũirã mija ime.

⁶ Jesúka jia imarijayurã imarã, baꞌiaja baabekaja nime. Baꞌiaja baarijayurã ᵽuri Jesucristore ima õrĩbeyurã, ĩꞌrãtiji kika ᵽuᵽaribeyurã nime.

⁷ Yimakarã uᵽakaja wãtaka ñoñurã, “Baꞌiaja mabaajĩka marã imabeyua”, mijare ᵽakirãre mija ãꞌmitiriᵽẽaꞌsi. Tuᵽarãre yaᵽaika uᵽakaja baarijayurã mija imajĩkareka, jia Cristo uᵽaka mija ime.

⁸ Baꞌiaja oyiaja baarijayuka ᵽuri Satanáre kire jãꞌmeika uᵽakaja baarijayuka. Suᵽa ñañu, wejea ᵽoꞌijirirã baaeka ruᵽubajirã baꞌiaja baarimaji imaraꞌaekaki Satanáre imatikaki simamaka. Iꞌsuᵽaka imaraꞌaekaki imarĩ baꞌiaja ᵽoꞌimajare kibaarũjerijayua riataokaroꞌsi õꞌõrã Tuᵽarã Makire etaeka.

⁹ Baꞌiaja baabeyuka Tuᵽarãte imamaka, iꞌsuᵽakajaoka nime kimakarã naroꞌsi. Jia oyiaja imarũkirã Tuᵽarãte nare jarirũjeika simamaka baꞌiaja baarijaribeyurã nime.

¹⁰ Ikuᵽaka nime Tuᵽarãrirã, suᵽabaatirã Satanárirã. “Jesucristore yiꞌyurã yija ime”, ãrĩriᵽotojo, Tuᵽarãte jiyubeyua baairã kirirãmarĩrã nime, suᵽabaatirã Tuᵽarãte yiꞌyurãte baꞌiuᵽakaja õñurãoka.

Ĩꞌrãtiji wayuĩabuꞌabaraka maimarijariyeꞌe

¹¹ Bikija Cristore mija yiꞌriũꞌmuekarõꞌõjĩte, “Matiyiaja jia mawayuĩabuꞌarijarirã”, ãñua õrĩtirã mija ime.

¹² Caínre baaeka uᵽaka mabaaberijĩñu. Satanáre yiꞌriwaꞌri jiiᵽuᵽaki kibeꞌerõꞌõkakire kijããeka. Ikuᵽaka ãrĩwaꞌri kire kijããeka. Baꞌika imarĩ, “Jiika kime yirĩꞌĩ”, ãrĩwaꞌri kire ãꞌmijĩawaꞌri iꞌsuᵽaka kire kibaaeka.

¹³ Mija ãꞌmitiᵽe yijeyomarã. Ika wejeareka baꞌiaja baarimajare mijare ãꞌmijĩamaka, “¿Dako baaerã yijare naꞌmijĩayu?”, ãrĩᵽuᵽajoabekaja mija imabe.

¹⁴ Cristore yiꞌribeyukajirã maimaeka ᵽoto, reyatika uᵽaka maimaeka Tuᵽarã ñakoareka. Maekaka ᵽuri õñia imajiᵽarũkirã imarĩ, maᵽuᵽaka oꞌaekarã maime. Iꞌsuᵽaka maima õñurã aᵽerã kire yiꞌyurãte mawayuĩarijayua simamaka. Nare wayuĩabeyurã ᵽuri reyatika uᵽaka nime.

¹⁵ Iꞌsuᵽaka simamaka Cristore yiꞌyukate ãꞌmijĩaiki ᵽuri kire jããrimaji uᵽaka kime, Tuᵽarãte ĩamaka. Suᵽabaatirã, “Ᵽoꞌimajare jããrimaji õñia imajiᵽarũkimarĩka kime”, ãrĩwãrũirã mija ime.

¹⁶ Jesucristore maroꞌsi reyaeka õñurã imarĩ, “Mare wayuĩaiki kime”, ãrĩwãrũirã maime. Sõñurã imarĩ, iꞌsuᵽakajaoka aᵽerã kire yiꞌyurãte wayuĩawaꞌri mareyarãka rõꞌõjĩrã jẽrãika nare jeyobaabaraka maimarijarirãñu.

¹⁷ Aᵽeroka, baꞌirĩjia rikaiki, “Tuᵽarãka jia ñime”, ãrĩriᵽotojo Jesúre yiꞌyurã wayuoka baairãre jeyobaabeyuka kima simamaka iꞌsuᵽaka kẽrĩkoᵽeika ᵽakirika sime.

¹⁸ Wãtaka ñoñurã, rita jia aᵽerãre wayuĩariᵽuᵽakirã imawaꞌri nare majeyobaarijarirãñu. Moka mirãkaᵽi takaja nare mawayuĩakoᵽejĩka ᵽuri jiamarĩa sime.

Jesúre yiꞌyurã imarĩ Tuᵽarãte kĩkibekaja imarika

¹⁹ Nare wayuĩariᵽuᵽakirã imarĩ, nare jeyobaarijayurã nime. Suᵽa imarĩ, “Tuᵽarãte rita bojaika yiꞌririjayurã maime”, marĩwãrũrijayu. Iꞌsuᵽaka simamaka Tuᵽarãte ĩaika kĩkirimarĩaja maimarijayu.

²⁰ “Tuᵽarãrika bojariroka jia yiꞌribeyurã yija ime jeꞌe”, maᵽuᵽaka ãñuaja baꞌiaja maᵽuᵽarirãkareka, “Jia Tuᵽarãka maimabesarãñu jeꞌe”, marĩᵽuᵽajoarijayu. Baꞌiaja maᵽuᵽayua simakoꞌomakaja, saᵽemawaꞌribaji mare wayuĩaiki Tuᵽarãte ime. Suᵽabaatirãoka maimarijayuakaka ritaja õñuka kime. Iꞌsuᵽaka imaki imarĩ, baꞌiaja maᵽuᵽayuareka mare jeyobaawãrũiki kime.

²¹ Yijeyomarã, moñu uᵽakaja baꞌiaja maᵽuᵽaribesarãkareka, kĩkibekaja maimarijarirãñu Tuᵽarãka majairũka ᵽotoji.

²² Tuᵽarãte ãñua yiꞌriwaꞌri kiyaᵽaika uᵽaka baairã maimamaka, majẽñeika ᵽoto mayaᵽaika uᵽaka mare kĩjirãñu.

²³ Ikuᵽaka Tuᵽarãte mare jãꞌmeka: “Yimaki Jesucristore yiꞌribaraka mija imarijaᵽe. Suᵽabaatirã mijare kijãꞌmeka uᵽaka wayuĩabuꞌabaraka mija imabe”.

²⁴ Iꞌsuᵽaka kẽrĩka yiꞌririjayurã ᵽuri Tuᵽarãte yaᵽaika uᵽaka kika ĩꞌrãtiji ᵽuᵽajoairã imarĩ jia kika nimarijayu. Esᵽíritu Santore mare kiñaꞌajããeka imamaka, iꞌsuᵽaka maima moñu.