1 Jn 2 - Porciones del Nuevo Testamento en el idioma Letuama

Tuᵽarãka maroꞌsi maimakaka jaiĩjirimaji kime Jesucristo

¹ Yimakarã uᵽakaja wãtaka ñoñurã mija ime. Suᵽa imarĩ, baꞌiaja mija baakoreka, ika mijaroꞌsi yoꞌoyu. Aᵽerikuri baꞌiaja mabaarijayua simamaka, Jesucristo maroꞌsi Maᵽaki Tuᵽarãka jairijayu. Jia oyiaja baaiki imarĩ, iꞌsuᵽaka maroꞌsi kibaayu.

² Iꞌsuᵽaka baaiki imarĩ, baꞌiaja mabaaika waᵽa kireyaeka, saᵽi ãrĩwaꞌri baꞌiaja mabaaika Tuᵽarãre mareka yeꞌkariayu. Mare takamarĩa, ritaja ᵽoꞌimajare tããokoroꞌsi kibaaeka.

³ Tuᵽarãte jãꞌmeika yiꞌriwaꞌri, “Kire õñurã maime”, marĩwãrũyu.

⁴ “Tuᵽarãte ñoñu”, ãñuka imariᵽotojo, kijãꞌmeika yiꞌribeyuka ᵽuri, waᵽuju ᵽakirimaji kime. Iꞌsuᵽaka kime Tuᵽarãoka ãꞌmitiriᵽẽabeyuka.

⁵ Tuᵽarãte jãꞌmeika uᵽakaja baarijayuka ᵽuri, kire yaᵽaiki. Iꞌsuᵽaka imawaꞌri, “Tuᵽarãka ĩꞌrãtiji ᵽuᵽaika maime”, marĩwãrũyu.

⁶ “Tuᵽarãka ĩꞌrãtiji ᵽuᵽakirã maime”, mañaokaroꞌsi Jesucristore imaroyika uᵽakaja imarika sime.

Bikijakaka jãꞌmerika simakoꞌomakaja mamaka uᵽakaja jãꞌmeika

⁷ Yijeyomarã, ika ᵽaᵽera maekakamarĩa mijare yibojayu. Bikija wayuĩabuꞌarika mija ãꞌmitiritika sime.

⁸ Maekakamarĩa simakoꞌomakaja, ᵽoꞌimajare wayuĩabaraka Jesucristore imaeka ᵽuᵽajoatirã, “Mamaka yiꞌrirũkia sime”. Mija sãꞌmitiyurã imarĩ aᵽerãre wayuĩairã mija ime mae. Suᵽa imarĩ, “Baꞌiaja baarika jaꞌatatirã, mamaka jia imarika yijare beairã nime”, ᵽoꞌimajare mijareka ãñu.

⁹ Ĩꞌrĩkaja, “Baꞌiaja baabekaja Tuᵽarãka ĩꞌrãtiji ᵽuᵽajoabaraka ñime”, ãrĩriᵽotojo, Cristore yiꞌyukate ãꞌmijĩaiki ᵽuri Tuᵽarãka jia imabeyukajika.

¹⁰ Cristore yiꞌyurãre wayuĩaiki ᵽuri, Tuᵽarãte ᵽuᵽajoaika uᵽaka jia oyiaja baarijayuka kime. Iꞌsuᵽaka imaki imarĩ, jia oyiaja Tuᵽarãka kimarijayu.

¹¹ Cristore yiꞌyurãre ãꞌmijĩaiki ᵽuri Tuᵽarãka ĩꞌrãtiji ᵽuᵽajoabeyuka kime. Iꞌsuᵽaka baarijari, Tuᵽarãte yiꞌribeyuka imarĩ, baꞌiaja kibaarijarirãñu. Neirõꞌõrã mawejaᵽayu uᵽaka imaki kime.

¹² Yimakarã uᵽakaja wãtaka ñoñurã, “Jesucristore reyaekaᵽi ãrĩwaꞌri baꞌiaja mabaaika Tuᵽarãte mare wayuĩaeka”, ãñurã mija imamaka, ika ᵽaᵽera mijaroꞌsi yoꞌoyu.

¹³ Ᵽakiarimarã, jia Cristore yiꞌyurã imarĩ, mija ãꞌmitiᵽe mijaoka. Wejea ᵽoꞌijirirã baaeka ruᵽubajirã imaũꞌmuekakire õñurã mija imamaka, ika ᵽaᵽera mijaroꞌsi yoꞌoyu. Mija ãꞌmitiᵽe bikirimaja, kire yiꞌririjayurã, Satanás, baꞌiaja baarimajire ĩꞌrãᵽẽꞌrõtorãja taairã mija ime. Iꞌsuᵽaka imarã mija imamaka, ika ᵽaᵽera mijaroꞌsi yoꞌoyu.

¹⁴ Yimakarã uᵽaka wãtaka ñoñurãroꞌsi yoꞌoyu ika, Maᵽaki Tuᵽarãte õñurã mija imamaka. Mija ᵽakiarimarã, wejea ᵽoꞌijirirã baaeka ruᵽubajirã imaũꞌmuekakite õñurã mija imamaka, ika ᵽaᵽera mijaroꞌsi yoꞌoᵽũayu. Mija bikirimaja, okajãjirã imawaꞌri, Tuᵽarãrika bojariroka jia yiꞌririjayurã mija ime. Suᵽa imarĩ, Baꞌiaja baarimajire ĩꞌrãᵽẽꞌrõtorãja taairã mija ime. Iꞌsuᵽaka mija imamaka, ika ᵽaᵽera mijaroꞌsi yoꞌoᵽũayu.

¹⁵ Ika wejeareka baꞌiaja baarika ᵽuᵽaribekaja mija imabe. Suᵽabaatirãoka baꞌirĩjia mija yaᵽatiyaika mija ᵽuᵽariaꞌsi. Wejeareka baꞌiaja imakoᵽeika yaᵽatiyaiki ᵽuri, Maᵽaki Tuᵽarãte yaᵽabeyuka.

¹⁶ Ika wejeareka baꞌiaja baarimajare ᵽuᵽajoaika mija ᵽuᵽajoaꞌsi. Ãꞌmitirikõrĩ, ikuᵽaka ᵽuᵽajoairã nime: Baꞌiaja baaritaka yaᵽawaꞌri, naᵽuᵽaka nare ãñu uᵽaka baꞌiaja nabaarijayu. Suᵽabaatirã ritaja ima jiyurika ĩawaꞌri, ritaja nareka imarika nayaᵽayu. “Mia. Dakoareka wayuoka baabeyuka ñime”, ãrĩwaꞌri jĩjimaka nare simaᵽakirũjeyu. Iꞌsuᵽaka baꞌiaja nabaarijayua ika wejeakarã ᵽoꞌimajaᵽiji ᵽoꞌijiyua imarĩ, Maᵽakirikamarĩa sime.

¹⁷ Ika wejeareka Tuᵽarãte yiꞌribeyurã, suᵽabaatirã baꞌiaja nabaariyaᵽaika ᵽurirãñu. Tuᵽarãte yaᵽaika uᵽaka oyiaja baairã ᵽuri õñia imajiᵽarãñurã.

Rĩkimarãja Cristore yaᵽabeyurã imarã

¹⁸ Mija ãꞌmitiᵽe yijeyomarã. Kũᵽajĩji sajariwaꞌyu wejetiyiarã seyarũkia. Iꞌsuᵽaka simaerã baarũka ruᵽu, “Cristore Táꞌterimajire iꞌtarãñu”, ãrĩwãrũtikarã mija ime. Iꞌsuᵽaka simarũka simakoꞌomakaja, aᵽerã rĩkimarã Cristore táꞌterimaja imatiirã maekaka. Iꞌsuᵽaka simamaka, “Koyiaja sajariwaꞌyu wejetiyiarã maeyarũkia”, marĩwãrũyu.

¹⁹ “Maka imakoᵽeraᵽarã Jesucristore mayiꞌyu uᵽakamarĩa yiꞌyurã nimaraᵽe”, nareka ãrĩwãrũirã maime. Iꞌsuᵽaka imawaꞌri mareka nakõrõraᵽe. Jesucristore mayiꞌyu uᵽakaja nimarikareka mareka nakõrõberijããeka. Suᵽa nabaamaka, “Jesucristorirãmarirã nime”, marĩwãrũrijayu.

²⁰ Mija ᵽuri jia rita Tuᵽarãrika õñurã imarã. Mija ime Esᵽíritu Santore mijareka Jesúre ñaꞌajããeka imamaka. Iꞌsuᵽaka mijare kibaaeka imamaka, “Ika nawãrõika rita sime, ika ᵽuri ᵽakirika ime”, ãrĩwãrũirã mija ime.

²¹ Rita ima õrĩbeyurã mija imamakamarĩa ikuᵽaka mijaroꞌsi yoꞌoyu. Rita ima mija õñu. Iꞌsuᵽakajaoka ᵽakirika ĩꞌrãrimarãre wãrõraᵽaka ãꞌmitiritirã, “Ᵽakirimaja nime”, ãrĩwãrũirã mija imamaka, ika ᵽaᵽeraᵽi mijare yibojayu.

²² Ikuᵽaka nañu ᵽakirimaja: “Jãꞌmerã Tuᵽarãte wãꞌmaekakimarĩka kime Jesús”. Ᵽakirimaja Cristore táꞌteirã nime. Suᵽa imawaꞌri, “Jesús Ᵽakimarĩka Tuᵽarãte ime, suᵽabaatirã Kimakimarĩka kime Jesús”, ãñurã nime ᵽakirimaja.

²³ “Tuᵽarã Makimarĩka kime Jesús”, ãñuka ᵽuri, Tuᵽarãrikimarĩka kime. “Tuᵽarã Makitaki Jesúre ime”, ãñuka ᵽuri Jesús Ᵽakika ĩꞌrãtijiji ᵽuᵽaiki kime.

²⁴ Cristorika bojariroka mija ãꞌmitiritika ãꞌmitiriᵽẽabaraka mija imabe. Iꞌsuᵽaka mija baarijarirũkareka Jesús, Kiᵽakika ĩꞌrãtiji ᵽuᵽarijaribaraka mija imarijarirãñu.

²⁵ Ika simarãñu, “Yire ãꞌmitiriᵽẽairã õñia imajiᵽarãñurã”, Jesucristore mare ãrĩtika simamaka.

²⁶ Ĩꞌrãrimarã naᵽuᵽajoaika uᵽakaja waᵽuju ᵽakirika mijare wãrõriyaᵽairã. Suᵽa imarĩ, rakajekaja mija imaokaroꞌsi ika ᵽaᵽera mijaroꞌsi yoꞌoᵽũayu.

²⁷ Jesucristore mijare Esᵽíritu Santo ñaꞌajããekarã imarã mija. Mijaka imaki imarĩ, mijare wãrõrimaji Esᵽíritu Santore imarijayu. Iꞌsuᵽaka imarã imarĩ, aᵽerãre mijare wãrõrika yaᵽabeyurã mija ime. Ᵽakibekaja Esᵽíritu Santore rita ima mijare kiwãrõrijayu uᵽakaja mija imabe. Iꞌsuᵽaka imawaꞌri Jesucristoka ĩꞌrãtiji ᵽuᵽaribaraka jia mija imabe.

²⁸ Yimakarã uᵽakaja wãtaka ñoñurã, ika jia mija ãꞌmitiᵽe. Jesúka ĩꞌrãtiji ᵽuᵽajoabaraka, kiyaᵽaika uᵽakaja jia mija imabe. Suᵽa mija baarijarirũkareka, ate ketarãñurĩmi kiñakoareka iꞌyoᵽiꞌribekaja mija imarãñu.

²⁹ “Tuᵽarãre jiyuika uᵽaka baaiki kime Jesús”, mija ãrĩwãrũika simamaka, “Jia oyiaja baarijayurã nime Tuᵽarã makarã”, ãrĩwãrũirã mija ime.