1 Jn 1 - Porciones del Nuevo Testamento en el idioma Letuama

Jesucristore yiꞌyurãroꞌsi Juanre oꞌoeka

¹ Yijeyomarã, “Ikuᵽaka Jesucristore ime”, ãrĩwaꞌri mijaroꞌsi yoꞌoerã baayu mae. “Ikuᵽaka Tuᵽarãte ime”, ãrĩwaꞌri mare imajiᵽarũjerimaji kime. Wejea ᵽoꞌijirirã baaeka ruᵽubajirã imatikaki kime. Yija kire ãꞌmitirikarã, kire yija ĩaeka, kire oka yija rabeka imarĩ, mijare sayija bojayu.

² Kika yija imaeka ᵽoto kire yija ĩaeka imamaka, “Rita sime”, ãrĩwaꞌri mijare sayibojaerã baayu. Iki Jesucristojo kime mareyarãka ᵽoto kika õñia mare imajiᵽarũjerimaji. Kiᵽaki Tuᵽarãka imajiᵽaroyikaki kimaeka. Iꞌsuᵽaka simamaka, Tuᵽarãte yija ᵽõꞌirã kire ᵽũataeka kire yija ĩaokaroꞌsi.

³ Yija ĩaeka, yija ãꞌmitirika mirãka mijare yibojayu yijaka ĩꞌrãtiji uᵽaka mija ᵽuᵽajoaokoroꞌsi. Maᵽaki Tuᵽarã, Kimaki Jesucristo oka ĩꞌrĩka uᵽakaja naᵽuᵽaka uᵽakaja ᵽuᵽajoairã yija ime yijaroꞌsi. Suᵽa imarĩ, ikuᵽaka mija imarika yaᵽawaꞌri mijaroꞌsi yoꞌoyu.

⁴ Mijare sayibojayu ĩꞌrĩka uᵽaka ᵽuᵽajoatirã jĩjimaka maimaerã.

Jia Tuᵽarãka maimarijarirã, baꞌiaja baabekaja maimayeꞌe

^5-6 “Baꞌiaja baarika imabeyu Tuᵽarãreka”, ãrĩwaꞌri Jesúre yijare bojaeka. Ikuᵽaka sime: Baꞌiaja baarijayurã imakoꞌomakaja, “Tuᵽarãte ᵽuᵽajoaika uᵽakajaoka ᵽuᵽakirã yija ime yijaroꞌsi”, ãñurã ᵽuri ᵽakirimaja nime. Iꞌsuᵽaka imawaꞌri, rita yiꞌribeyurã nime.

⁷ Baabekaja Tuᵽarãte ᵽuᵽajoaika uᵽaka jia oyiaja baabaraka maimarũka ᵽuri, ĩꞌrĩka uᵽakaja maimarijarirãñu. Iꞌsuᵽaka simamaka Kimaki Jesucristore maroꞌsi kiriwetabaraka reyaekaᵽi ãrĩwaꞌri ritaja baꞌiaja mabaaika mareka kiyeꞌkariarijayu.

⁸ “Baꞌiaja baabeyurã yija ime”, ãñurã ᵽuri, waᵽuju ima yiꞌyurã. Suᵽa imarĩ naᵽoꞌia naᵽarebaayu. Ĩꞌrãjaoka nime rita yiꞌribeyurã.

⁹ “Ikuᵽaka baꞌiaja yibaayu”, Tuᵽarãte marĩjĩka, mare kiwayuĩarãñu. Suᵽa mare baatirã, “Baꞌiaja baabeyurã nime mae”, mare kẽrĩrãñu. Rita mare kẽñu uᵽaka oyiaja baaiki imarĩ.

¹⁰ “Baꞌiaja baairã oyiaja ᵽoꞌimajare ime”, Tuᵽarãte ãrĩka. “Baꞌiaja baabeyurã yija ime”, ãñurã ᵽuri waᵽuju ᵽakirika sime nañu, Tuᵽarãte õrĩberiwaꞌri. Tuᵽarã ᵽuri pakirimajimarĩka.