1 Co 7 - Porciones del Nuevo Testamento en el idioma Letuama

Rõmieꞌerika

¹ Õrĩriyaᵽawaꞌri ᵽaᵽeraᵽi yire mija jẽrĩᵽũaika mijare yibojaerã baayu mae. “Tuᵽarãre yaᵽaika uᵽakaja imawaꞌri kirũmuka baabekaja ĩꞌrĩkare imajĩka ¿yaje jia simajĩñu ruku?”, ãrĩka yire mija jẽrĩaᵽũaika.

² Mijare yibojaerã baayu mae: Rĩkimarãja aᵽerãka baꞌiaja baabaraka imarika jia marĩa simamaka, rõmieꞌekaki ᵽuri kirũmuka kimarãñu. Tĩmiaiko kotĩmikaja koimarãñu.

³ Rõmiki ᵽuri rõmore yaᵽaika uᵽakaja kiyiꞌririjarirãkareka jia simarãñu. Iꞌsuᵽakajaoka koimarãñu kiroꞌsi.

⁴ “Yiᵽuᵽajoaika uᵽakaja yibaayeꞌe”, kotĩmite kõrĩberijĩñu. Iꞌsuᵽakajaoka sime ĩmirĩjiroꞌsi.

⁵ Suᵽa imarĩ tĩmiaiko kotĩmire baarika yaᵽaika ᵽoto, “Jẽnoꞌo, baabekaja imarimajaja maimayeꞌe”, mija ãrĩrijayua mija jaꞌatabe. Iꞌsuᵽakajaoka sime ĩmirĩji rõmika imakiroꞌsi. “Tuᵽarãka jaiokaroꞌsitakaja makoꞌaᵽiribuꞌarijayua majaꞌataerã ruᵽu”, ãrĩwaꞌri ĩꞌᵽarã wãꞌtaja sanayiꞌribuꞌajĩkareka jia sime. Sabeꞌerõꞌõ ᵽuri nima uᵽakaja nimarijarijĩñu, Satanáre yaᵽaika uᵽaka baꞌiaja aᵽerãka mija baawãꞌimarĩbuꞌaaꞌsi.

⁶ Mija koꞌaᵽiribuꞌarijayua jaꞌatarũkimarĩa simakoꞌomakaja, Tuᵽarãka jairã baaeka kũᵽajĩ jaꞌatatirã iꞌsuᵽaka mija imarijarijĩñu. “Iꞌsuᵽaka oyiaja mija baarijaᵽe”, ãrĩwaꞌri mijare jãꞌmerimajimarĩka ñime.

⁷ Rõmimarĩka ñimakoꞌomakaja joꞌribekaja ñima uᵽaka oyiaja ritaja ᵽoꞌimajare imarikareka jia simajããeka yireka ᵽuri. Iꞌsuᵽaka simakoᵽekoꞌomakaja ĩꞌrĩka taꞌiarãja imabeyurã maime. Rakakaja maimarũkia Tuᵽarãre mare jaꞌataeka. Suᵽabaatirã rõmikirã, rõmimarĩkaoka jia maimaokoroꞌsi mare kijeyobaayu.

Rõmijã natĩmirãre reyataᵽaekamarã, ĩmirĩja narõmia reyataᵽaekarãka Ᵽablore jaika

⁸ Natĩmirãre reyataᵽaekarã rõmijã, ĩmirĩja narõmia reyataᵽaekarãre ikuᵽaka ñañu: “Rõmimarĩa maekaka ñima uᵽaka, ĩmirĩja rõmimarĩa imarã, iꞌsuᵽakajaoka rõmijã tĩmiamarĩaja mija imarijarijĩka jia sime.

⁹ Suᵽa simakoꞌomakaja rakajeᵽããwãrũbeyurã ᵽuri neꞌebuꞌajĩka marã imabeyua, dako okamirãmarĩaja nimaokoroꞌsi”.

“Tĩmiairã, rõmikirãkaoka, mija jaꞌatabuꞌaꞌsi”, Ᵽablore ãrĩka

¹⁰ Mae, “Ikuᵽaka Maĩᵽamakire jãꞌmeka”, ãrĩwaꞌri tĩmiakirãre, rõmikirãre yibojaerã baayu ate: Tĩmiakirã mija jaꞌatabuꞌaꞌsi. Ñoñu uᵽakaja yiᵽuᵽajoaikaᵽimarĩa ikuᵽaka mijare yibojayu, Maĩᵽamakire jãꞌmeka simamaka suᵽa ñañu.

¹¹ Ĩꞌrãko kotĩmire jaꞌatatirã aᵽika ĩmirĩjika tĩmiaririka imabeyua. Aᵽikaka tĩmiaribekaja kotĩmi imatikakikaja ate imaᵽeꞌrirã oka kika kojiejĩka jia sime. Iꞌsuᵽakajaoka sime ĩmirĩjiroꞌsi.

Jesúre yiꞌyurã kire yiꞌribeyurãka eꞌebuꞌarikakaka, “Ikuᵽaka sime”, Ᵽablore ãrĩka

¹² Jesúre yiꞌyukaka Jesúre yiꞌribeyuko neꞌebuꞌaekakaka mijare yibojaerã baayu ate. Maĩᵽamakire bojaekamarĩa sime ika. Yiᵽuᵽajoaika uᵽakaja ikuᵽaka mijare yibojayu: Ikuᵽaka simarijayu ĩꞌrãrimarãroꞌsi: Jesúre yiꞌribeyurã oyiaja imabuꞌatirã, beꞌerõꞌõᵽi ᵽuri ĩꞌrĩka kire yiꞌyuka. Mija rõmia mijare jaꞌatarika yaᵽabesarãka reka nare mija jaꞌataꞌsi.

¹³ Iꞌsuᵽakajaoka sime Jesúre yiꞌribeyurãka tĩmiarikarãroꞌsi. Jesúre yiꞌribeyurã imakoꞌomakaja mijaka nimariyaᵽamaka nare mija jaꞌataꞌsi.

¹⁴ Mija tĩmiarã Jesucristore yiꞌribeyurã nimakoꞌomakaja, ĩꞌrĩka uᵽakaja mija ime Tuᵽarãre ĩamaka, kirirã uᵽaka mijare kĩarĩrĩrijayu. Iꞌsuᵽakajaoka ĩmirĩja Jesúre yiꞌyurãroꞌsi sime. Suᵽamarĩa simarikareka, kirirãmarĩrã mija makarãre imajããeka. Kirirã uᵽaka mijare kĩaika imarĩ jiaᵽi mija makarãre kĩarĩrĩrijayu.

¹⁵ Jesúre yiꞌyuka rũmu, Jesúre yiꞌribeyuko imarĩ, kire kojaꞌatariyaᵽajĩka, koyaᵽayu uᵽakaja koꞌrijĩka marã imabeyua. Iꞌsuᵽakajaoka ĩmirĩji Jesúre yiꞌribeyuka kirũmu Jesúre yiꞌyukote kijaꞌatariyaᵽarãka kiyaᵽayu uᵽakaja kibaajĩñu. Nayaᵽayu uᵽakaja, “Naꞌriᵽarũ”, ñañua simakoꞌomakaja jaꞌatabuꞌabekaja mija imajĩkareka jiibaji simajĩñu. Ᵽoꞌimajaka okamirãmarĩaja maimarika Tuᵽarãre yaᵽayu.

¹⁶ “Jia natĩmiarãka imawaꞌri Jesucristore nayiꞌrirãñu jeꞌe aᵽeyari”, ãrĩwaꞌri ñañu rõmijãroꞌsi. Iꞌsuᵽakajaoka sime ĩmirĩjaroꞌsi.

¹⁷ Rakakaja maimaokoroꞌsi Tuᵽarãre mare jaꞌataeka. Suᵽa imarĩ mare kiwãꞌmaeka ᵽoto maimaraꞌaeka uᵽakaja maimarijarijĩkareka jia sime. Jesúre yiꞌyurãre rẽñurõꞌõrã yeyaika rakakaja iroka nare yibojarijayu.

¹⁸ Ĩꞌrãrimarã Jesúre nayiꞌrirã baaeka ruᵽubajirã judíotatarã imarĩ, circuncisión baatikarã imarã. “Mae Jesúre yiꞌyuka imarĩ circuncisión kurare yire baakoᵽeka yoꞌarãñu”, ãrĩrika imabeyua. Ĩꞌrãrimarã Jesúre yiꞌrirã nabaaeka ruᵽubajirã judíorãkamarĩrã imarĩ, circuncisión baaberikarã imarã. “Jesúre yiꞌriwaꞌri circuncisión yibaaerã judíotatarãkaki yijayaokaroꞌsi”, ãrĩrika imabeyua.

¹⁹ Circuncisión baaekarã, circuncisión baaberikarã maimajĩka marã imabeyua. Tuᵽarãre mare jãꞌmeika uᵽakaja baarika sime imatiyaika.

²⁰ Suᵽa imarĩ Tuᵽarãre mare wãꞌmaeka ᵽoto maimaraꞌaeka uᵽaka maimarijariyeꞌe.

²¹ Mia, Jesúre yiꞌyurã imakoꞌomakaja aᵽerãre baꞌirabejĩkareka, “Baꞌitaka naᵽoyarã yija ime”, mija ãrĩaꞌsi. Mijare najaꞌatarãkareka ᵽuri wãjia mija ᵽoᵽe.

²² Ikuᵽaka sime: Aᵽerãroꞌsi baꞌirabeĩjirimaja mija imakoᵽejĩka marã imabeyua. Jesúre yiꞌyurã mija jarirũki ruᵽubaji baꞌiaja baariroka yiꞌyurã mija imaeka. Maekaka ᵽuri Jesúrirã mija imamaka, iꞌsuᵽaka mija imakoᵽekareka kijaꞌataekarã mija ime kiyaᵽaika uᵽaka baaokaroꞌsi. Aᵽerãre baꞌirabeĩjirimaja marĩrãre, kire yiꞌyaokoroꞌsi mijare kiwãꞌmaeka kiroꞌsi baꞌirabeĩjirimaja uᵽaka mija ime mae.

²³ Baꞌiaja Jesúre jũaeka waᵽa kirirã maimaerã Tuᵽarãre mare wãꞌmaeka. Suᵽa imarĩ Tuᵽarã ĩꞌrĩkaja kime Maĩᵽamaki imatiyaiki. Suᵽa imarĩ, “Jia Tuᵽarãka mija imarijitoyeꞌe yija ãñu uᵽakaja mija imabe”, ãñurãre mija yiꞌriaꞌsi.

²⁴ Mija ãꞌmitiᵽe yijeyomarã. Tuᵽarãre mare wãꞌmaeka ᵽoto maimaeka uᵽakaja maimajĩkareka jia sime. Suᵽa imarĩ jĩjimaka Tuᵽarãre maka imarijarirãñu.

²⁵ Mae ᵽaᵽeraᵽi yire mija jẽrĩaraᵽakakaka mijare yibojaerã baayu ate. “Ikuᵽaka tĩmiamarĩrãre, rõmimarĩrãreoka kijãꞌmeyu Maĩᵽamaki”, ãrĩwãrũbeyuka yiꞌi. Iꞌsuᵽaka simakoꞌomakaja Jesúre yire jeyobaarijayuaᵽi yiᵽuᵽajoaikakaka wãjiroka mijare yibojaerã baayu. Suᵽa imarĩ yire mija ãꞌmitiriᵽẽarika yiyaᵽayu.

²⁶ “Cristore mija yiꞌyuaᵽi ãrĩwaꞌri baꞌitakaja mijare nabaataꞌarijayua simamaka rõmimarĩa mija ima uᵽakaja mija imarijarijĩkareka jia sime”, ñarĩᵽuᵽajoayu.

²⁷ “Rõmieꞌetika imarã, mija rõmia mija jaꞌataꞌsi. Rõmimarĩa imarã rõmieꞌerika ᵽakataᵽekaja mija imabe”, mijare ñañu.

²⁸ Iꞌsuᵽaka ñañua simakoꞌomakaja ĩꞌrĩka ĩmirĩji rõmieꞌerika yaᵽajĩkire rõmieꞌejĩka marã imabeyua. Iꞌsuᵽakajaoka tĩmiaririyaᵽaiko, baꞌiaja baawaꞌrimarĩa kotĩmiarirãñu. Kaꞌwisika jũarijayurã maime maekaka. Rõmika jaritikarã, tĩmiaika jaritikarãroꞌsi kaꞌwisibaji simarãñu. Suᵽa mijaroꞌsi simaꞌsi ãrĩwaꞌri, “Rõmimarĩaja mija imajĩkareka jia sime”, mijare ñañu.

²⁹ Mija ãꞌmitiᵽe yijeyomarã. “Noꞌojĩrãmarĩaja sajariwaꞌyu õꞌõrã maima ᵽurirũkia. Suᵽa imarĩ aᵽeakaka ᵽuᵽajoatiyabekaja Cristorikatakaja mabaꞌiraberijariyeꞌe”, ãrĩwaꞌri ikuᵽaka mijare yibojayu: Rõmika imarã rõmimarĩa uᵽakaja kirika mija baꞌiraberijaᵽe.

³⁰ Baꞌiaja ᵽuᵽayurã, baꞌiaja mija ᵽuᵽayu takaja ᵽuᵽajoabekaja mija imabe. Jĩjimaka imarãoka, jĩjimaka imarikatakaja ᵽuᵽaribekaja mija imabe. Waruaka rĩkimaka waᵽaĩjirijayurã, sarekaja ᵽuᵽaribekaja mija imabe, “Õꞌõrã wejejẽꞌrãkaja õñia imarũkimarĩrã maime”, ãrĩwãrũirã mija imabe.

³¹ “Maekaka ritaja mabaarijayua, maikaoka imajiᵽarũkimarĩa sime”, ãñurã imarĩ, sarãtakaja ᵽuᵽajoabekaja maimayeꞌe.

³² Baꞌiaja mija ᵽuᵽaririka yiyaᵽabeyu. Maĩᵽamakirika baꞌirabeiki ᵽuri rõmimarĩka imarĩ, Jesúre yaᵽaika takaja ᵽuᵽayuka.

³³ Rõmika imaki ᵽuri kirũmure jia jĩjimaka kika imaerã jia koka imarikaja ᵽuᵽajoarijayuka.

³⁴ Ikuᵽaka sime kiroꞌsi: Tuᵽarãre yaᵽaika uᵽaka, kirũmure yaᵽaika uᵽakajaoka ᵽuᵽajoarijayuka kime. Iꞌsuᵽakajaoka sime rõmijãroꞌsi. Tĩmiamarĩrã maĩᵽamaki Jesucristorika baꞌiraberika ᵽuᵽajoairã, “Ritaja kiroꞌsi yija baarijayua ĩatirã jĩjimaka Cristore imarãñu”, ãrĩrika ᵽuᵽajoarijayurã nime. Tĩmiairã ᵽuri natĩmiarãre jia jĩjimaka imaerã nimarũkiakaka ᵽuᵽajoarijayurã.

³⁵ “Mija tĩmiariaꞌsi rõmijã, mija rõmieꞌeaꞌsi ĩmirĩja”, mijare ãrĩbeyuki yiꞌi. Tuᵽarãre yaᵽaika uᵽakaja jia mija imarika yaᵽawaꞌri suᵽa mijare ñañu, aᵽerõꞌõrã mija ᵽuᵽajoakoreka.

³⁶ Bikijaja kirũmuroꞌsi kijaikakore ĩꞌrĩkare eꞌebeyua simamaka, “Koᵽakaja ᵽakiako kojayu mae, kore yeꞌeᵽayeꞌe”, ãrĩᵽuᵽajoawaꞌri kore keꞌejĩka marã imabeyua.

³⁷ Aᵽika ᵽuri kiᵽuᵽaka kire ãñu uᵽakaja rõmimarĩaja kimajĩka marã imabeyua. Maki jãjiaᵽi kire jãꞌmeberijĩki, kiyaᵽaika uᵽakaja joꞌribekaja kimarũ ãrĩwaꞌri. Suᵽabaatirãoka rõmimarĩaja imarika rakajeᵽããwãrũiki iꞌsuᵽaka kimajĩka jia sime.

³⁸ Suᵽa imarĩ kirũmuroꞌsi imatikakore eꞌeiki ᵽuri jia baaiki. Imakoꞌomakaja rõmimarĩaja imarika ᵽuᵽajoaiki ᵽuri satẽrĩwaꞌribaji jia kiᵽuᵽajoayu.

³⁹ Tĩmiaika jaritikako kotĩmire õñia imañujukãꞌãja aᵽikaka imaberijĩko. Kotĩmire reyajĩka beꞌerõꞌõᵽi ᵽuri, aᵽika Jesúre yiꞌyukakajaoka kotĩmiarijĩkareka jia sime.

⁴⁰ Iꞌsuᵽaka simakoꞌomakaja aᵽikaka tĩmiaririka ᵽuᵽajoabekaja koimajĩka jiibaji koimajĩñu yireka. Yiꞌioka Esᵽíritu Santore yire jeyobaaikaᵽi iꞌsuᵽaka ãrĩrijiyuka.