1 Co 2 - Porciones del Nuevo Testamento en el idioma Letuama

“Yaᵽua tetaekarã Jesúre reyaeka”, ãrĩwaꞌri samajaroka Ᵽablore bojaeka

¹ Mija ᵽõꞌirã yeyaraᵽaka ᵽoto Tuᵽarãrika bojariroka, ᵽoꞌimajare ãꞌmitirikoribeyua mijare yiwãrõũꞌmuraᵽe, jia samija õᵽe yijeyomarã. “ ‘Jiitaka õñuka kime’, yireka narĩrũ”, ãrĩwaꞌrimarĩa, jia mija õrĩwaᵽuꞌairokaᵽi mijare yiwãrõraᵽe.

² Mija ᵽõꞌirã ñimaraᵽaka ᵽoto, “Yaᵽua tetaekarã Jesúre reyaeka takaja nare yibojayeꞌe”, ãrĩwaꞌri mijare sayibojaraᵽe.

³ Mija ᵽõꞌirã yeyaraᵽaka ᵽoto wãjiaja yitararaᵽe, “Nare bojawaᵽuꞌataberijĩki ñime”, ãrĩwaꞌri.

⁴ Cristore reyaekakaka mijare yibojaraᵽaka ᵽoto, “Jia õñurã yija ime”, ãñurãre jaika uᵽaka marĩa mijare yijairaᵽe. “ ‘Ᵽablore jia bojaika imarĩ Cristore yija ãꞌmitiriᵽẽayu’, narĩrũ”, ãrĩwaꞌrimarĩa mijare sayibojaraᵽe. Esᵽíritu Santorikaᵽi maikoribeyua mijare yibaabearaᵽaka ĩawaꞌri yibojaraᵽaka mija ãꞌmitiriᵽẽaraᵽe.

⁵ Suᵽa imarĩ õrĩtiyairã uᵽaka jia yijaiberaᵽe mijare. Tuᵽarãrika ĩawaꞌri Jesucristore mija yiꞌririka yiyaᵽaraᵽe yiꞌi ᵽuri.

Jia Tuᵽarãre mare baaeka morĩwãrũerã Esᵽíritu Santore mare wãrõyu

⁶ Imakoꞌomakaja jírokaᵽi yija wãrõyu Jesucristorika jia õñurãre. Kire ãꞌmitiriᵽẽabeyurã ᵽuri, ritaja wejeareka imarãre ᵽuᵽajoaika uᵽaka, suᵽabaatirã ĩᵽarimarãre wãrõika tĩᵽika uᵽaka yija wãrõbeyu. Niᵽarimarãre reyarãrĩmi nakaja saririrãñu norĩkoᵽeika.

⁷ Suᵽa imarĩ Tuᵽarãrikaᵽi mijare yija wãrõyu. Ika wejea kiᵽoꞌijiaerã baaeka ruᵽubaji, “Ᵽoꞌimajare yitããrãñu, jiitakaja nare baawaꞌri”, kẽrĩtika. Iꞌroka ᵽoꞌimajare kiõrĩrũjeberika ruᵽu Tuᵽarã, imakoꞌomakaja nare sayija wãrõyu.

^8-9 Iroka iꞌsia ĩꞌrĩkaoka ĩᵽarimarãkaki õrĩwaᵽuꞌabeyua. Norĩwaᵽuꞌarikareka Maĩᵽamaki tẽrĩrikire yaᵽua tetaekarã najããberijããeka. Iroka norĩwaᵽuꞌaberikoꞌomakaja, kiroꞌsi bojaĩjirimajire oꞌoekakaka morĩyeꞌe: “Jĩjimaka kire õñurãre jia imarũkia Tuᵽarãre jieweitika makioka ĩakoribeyuakaka. Suᵽabaatirã naᵽuᵽajoabeyua, naꞌmitirikoribeyua”, sabojayu Tuᵽarã majaroka oꞌoeka ᵽũñurã.

¹⁰ Ᵽoꞌimajare õrĩberika imakoꞌomakaja, maekaka ᵽuri sayija õñu, Esᵽíritu Santore yijare sõrĩrũjemaka. Ika Esᵽíritu Santore baayu dakoa jariwaꞌririmarĩa õñuka imarĩ. Ritaja Tuᵽarãre ᵽuᵽajoaika ᵽariji õrĩᵽataiki kime.

¹¹ Maa ᵽoꞌimaja ᵽuri matiyiaja, “Iki iꞌsuᵽaka ᵽuᵽajoaiki”, marĩwãrũbeyu. Suᵽa imarĩ ĩꞌrĩka ᵽoꞌimajire ᵽuᵽajoaika, kiõñuᵽakaja kiõrĩrũkia sime. Tuᵽarãre ᵽuᵽajoaika ᵽuri Esᵽíritu Santo ĩꞌrĩkaja sõñuka.

¹² Jesúre ãꞌmitiriᵽẽabeyurã ᵽuᵽaka tĩᵽika uᵽaka nabojakoᵽeika ãꞌmitiriᵽẽabeyurã yija. Esᵽíritu Santore wãrõika takaja yija ãꞌmitiriᵽẽayu. Jía Tuᵽarãre mare jaꞌataekakaka morĩwãrũerã Esᵽíritu Santore kiᵽũataeka maroꞌsi.

¹³ Suᵽa imarĩ Esᵽíritu Santore yijare wãrõikaᵽi yija jaiyu. Iꞌsuᵽakajaoka aᵽerã kire ãꞌmitiriᵽẽairãre yija wãrõrijayu yijare kijeyobaaikaᵽi. Yija ᵽuᵽajoaika uᵽaka marĩa wãrõrimaja yija ime.

¹⁴ Tuᵽarãre nayiꞌribeᵽakãꞌã Esᵽíritu Santore nare ñaꞌrĩjãiberikarã ᵽuri, kijeyobaaikaᵽi yija bojaika ãꞌmitiriwãrũbeyurã. “Waᵽuju õrĩberiri oka sime”, narĩᵽuᵽajoayu.

¹⁵ Esᵽíritu Santore nare ñaꞌrĩjãikarã ᵽuri ᵽoꞌimajare ima ĩatirã, “Ikuᵽaka sime jia baarika, ika ᵽuri baꞌiaja baarika ima”, ãrĩᵽuᵽajoawãrũirã. Jesúre yiꞌribeyurã ᵽuri Esᵽíritu Santore ñaꞌrĩjãiberikarã imarĩ, “Baꞌiaja nabaayu”, yijareka ĩꞌrĩkaoka ãrĩberijĩki.

¹⁶ Ikuᵽaka mijare yoꞌoᵽũayu Tuᵽarã oka ᵽũñu oꞌoekarã sabojaika simamaka: “Maĩᵽamaki Tuᵽarãre ᵽuᵽajoaika maki õrĩbeyuka, maki kire wãrõberijĩkioka”, ãrĩwaꞌri sabojayu. Esᵽíritu Santore mare ñaꞌrĩjãika imarĩ, Cristore ᵽuᵽajoaika uᵽaka maᵽuᵽajoarijayu.