1 Co 15 - Porciones del Nuevo Testamento en el idioma Letuama

Jesúre reyakoꞌomakaja, õñia kijariᵽeꞌrikakaka jiibaji Ᵽablore nare bojajiika ate

¹ Yijeyomarã, Jesúrikakaka mijare yiwãrõraᵽaka jia mija õrĩrika yiyaᵽayu. Ika majaroka bikija mija yiꞌriũꞌmutika sime. Sayiꞌrikarã imarĩ, jia Jesúre yiꞌririjayurã mija ime.

² Mijare yiwãrõraᵽaka ãꞌmitiriᵽẽawaꞌri Cristore mija yiꞌririjaꞌatabesarãkareka baꞌiaja mija jũarũkia imakoᵽeikareka Tuᵽarãre mijare wayuĩarãñu. Iꞌsuᵽaka mija baabesarãkareka, dakowaᵽamarĩa kire mija yiꞌrikoᵽeika jarirãka.

³ Imatiyairoka mijare yiwãrõraᵽe mamarĩ Cristore yire wãrõraᵽaka uᵽakaja. Ikuᵽaka sime: Baꞌiaja mabaaika waᵽa Cristore reyaekakaka mijare yibojaraᵽe. Suᵽa imarĩ Tuᵽarã majaroᵽũñurã bojatika uᵽakaja sajarika mijare ñarãᵽe.

⁴ “Ãta wiꞌiarã kire nataakoꞌomakaja, maekarakarĩmi beꞌerõꞌõ Tuᵽarãre kire ᵽuᵽatõrõeka”, ãrĩwaꞌri bikija sabojatika Tuᵽarãrika oꞌoeka ᵽũñurã.

⁵ Iꞌsuᵽaka simamaka kiᵽuᵽatũrũeka beꞌrõ Ᵽedrore kire ĩaeka. Iꞌsia beꞌrõ kika wãrũeka mirãrã ᵽõꞌirã kiᵽemakotowirika.

⁶ Iꞌsia beꞌrõ 500 rĩkimabaji kire yiꞌrikarã ᵽõꞌirã keyaeka. Iꞌsia ĩaeka mirãrã, rĩkimarãja õñia imañujurã ruᵽu. Ĩꞌrãrimarã reyaekarã.

⁷ Santiago ᵽõꞌirãoka keyaeka. Sabeꞌerõꞌõ kirika bojariroka nabojataᵽaerã kijãꞌmekarã nimauᵽati ᵽõꞌirã keyaeka.

⁸ Yireoka ᵽiyia kiᵽemakotowiraᵽe. Suᵽabaatirã aᵽerã aᵽóstolrãkare kiwãꞌmaeka uᵽakamarĩa aᵽóstol yire kimarũjeraᵽe.

⁹ “Yire tẽrĩwaꞌribaji imatiyairã aᵽerã aᵽóstolrãkare ime”, ñarĩᵽuᵽajoayu. Mia, Jesúre yiꞌyurãre baꞌiaja baaiki ñimaeka ruᵽu. Imakoꞌomakaja aᵽóstol ñimaokoroꞌsi Tuᵽarãre yire wãꞌmaeka.

¹⁰ Yire wayuĩawaꞌri, kirika baꞌiraberimaji ñimaokoroꞌsi Tuᵽarãre yire jãꞌmeka. Jiitaka yire kibaaeka imarĩ kirika jia yibaꞌirabeyu. Saᵽi ãrĩwaꞌri, “Yirika bojataᵽarimaji kimarũ ãrĩwaꞌri kire yiᵽũatakoᵽeka”, yireka ãrĩbeyuka Tuᵽarã. Aᵽerã aᵽóstolrãka ᵽemawaꞌribaji Tuᵽarãrika baꞌirabeiki ñime jia Tuᵽarãre yire jeyobaaikaᵽi.

¹¹ Aᵽóstolrãkare Tuᵽarãrika mijare wãrõeka, mijare yiwãrõraᵽakaoka. Ĩꞌrãtiji sime, sãꞌmitiritirã samija yiꞌraᵽe.

Mareyarãka simakoꞌomakaja õñia Tuᵽarãre mare jariᵽeꞌrirũjerãñu

¹² Yija aᵽóstolrãka ĩꞌrãtiji oyiaja bojairã yija ime. “Kireyaeka imakoꞌomakaja Cristore ᵽuᵽatũrũeka”, ãrĩwaꞌri yija bojarijayu. Suᵽa simakoꞌomakaja ¿dako baaerã, “Ᵽuᵽatũrũrũkimarĩrã maime mareyarãka beꞌerõꞌõ”, tokarã ĩꞌrãrimarãre ãñu jeꞌe?

¹³ Mia: Reyakoꞌomakaja ᵽuᵽatũrũrũkimarĩrã maimarikareka karemarĩa Cristore ᵽuᵽatũrũᵽeꞌaberijããeka.

¹⁴ Cristore ᵽuᵽatũrũberirikareka kirika bojariroka yija wãrõika jiamarĩa imajããeka. Suᵽabaatirãoka waᵽamarĩaja Cristore mija yiꞌrijããeka.

¹⁵ Reyakoꞌomakaja ᵽuᵽatũrũrika imaberirikareka Cristore kiᵽuᵽatõrõeka ãrĩwaꞌri Tuᵽarã majaroka mijare ᵽakirimaja yija imajããeka.

¹⁶ Reyairãre ᵽuᵽatũrũrika imaberirikareka, Cristooka ᵽuᵽatũrũberijããekaki.

¹⁷ Iꞌsuᵽaka Jesúroꞌsi simaberirikareka waᵽuju kire mija yiꞌrijããeka. Suᵽa marĩa simarikarekaoka baꞌiaja mabaaikareka Tuᵽarãre mare wayuĩaberijããeka.

¹⁸ Cristore ᵽuᵽatũrũberirikareka, kire yiꞌrika mirãrã reyaekarã baꞌiaja imarika tiyibeyurõꞌõrã naꞌrijããeka.

¹⁹ Õñia maimatiyikuri Cristore yiꞌrijaꞌatabeyurã maime, “Mareyarãka ᵽoto Tuᵽarãre mare ᵽuᵽatõrõrãñu” ãrĩwaꞌri yiꞌyurã imarĩ. Imakoꞌomakaja ᵽuᵽatũrũrũkimarĩrã maimarikareka, “Aᵽerãre ᵽemawaꞌribaji wayuoka jũairã nime”, ᵽoꞌimajare mareka ãrĩrũkirã maimajããeka.

²⁰ Suᵽa marĩa sime. Cristore reyaeka imakoꞌomakaja Tuᵽarãre kire ᵽuᵽatõrõeka. Suᵽa imarĩ iki kime mamarĩ ᵽuᵽatũrũũꞌmuekaki. Suᵽa imarĩ kire yiꞌyurã uᵽatiji ᵽuᵽatũrũrãñurã.

²¹ Mamarĩ imaũꞌmuekakire baꞌiaja baaekaᵽi ãrĩwaꞌri reyarika ũꞌmueka ᵽoꞌimajaroꞌsi. Suᵽa simakoꞌomakaja Jesúre maroꞌsi reyaekaᵽi ãrĩwaꞌri ᵽuᵽatũrũrika maroꞌsi ᵽoꞌijirika.

²² Adán imaekaki riᵽarãmerã imarĩ, reyarũkirãroꞌsi oyiaja maime. Imakoꞌomakaja Cristore yiꞌriwaꞌri kirirã majarika simamaka Tuᵽarãre mare ᵽuᵽatõrõrãñu ate.

²³ Sõrĩtikaja maime. Cristo kime reyakoꞌomakaja wããrõꞌõrãja mamarĩ ᵽuᵽatũrũekaki. Ñamajĩ ketarãka ᵽoto kire yiꞌrika mirãrãroꞌsi iꞌsuᵽakajaoka simarãñu.

^24-25 Ritaja Tuᵽarãre yaᵽabeyu uᵽaka jãꞌmeirãre kitẽrĩrãka beꞌrõ wejetiyia seyarãñu. Suᵽa nare baatirã, “Koᵽakaja yimajãmarãre yitẽrĩtiyu. Mae miyaᵽaika uᵽakaja ritaja mijãꞌmebe”, Kiᵽaki Tuᵽarãre kẽrĩrãñu. “Nare mitẽrĩtiyarãrĩmi rõꞌõjĩrã ritajare jãꞌmerimaji mire ñimarũjerãñu”, Tuᵽarãre kire ãrĩtika simamaka, suᵽa simarãñu.

²⁶ Iꞌsuᵽaka simarãka ᵽoto reyarika ᵽariji Cristore tiyetarãñu. Saᵽi ãrĩwaꞌri ritaja majamarãika maimaoka tiyiᵽatarãka.

²⁷ Mia jeꞌe, ikuᵽaka sabojayu Tuᵽarãrika oꞌoeka ᵽũñurã: “Ritaja ĩᵽamaki imarũkikaroꞌsi Tuᵽarãre kire ᵽũataeka”, ãrĩwaꞌri sabojayu. Imakoꞌomakaja Tuᵽarãre jãꞌmebeyuka kime Cristo, “Ritajare yiroꞌsi mijãꞌmebe”, kire kẽrĩka imarĩ.

²⁸ Kimajamarãre Cristore tẽrĩrãka beꞌerõꞌõ nimauᵽatireje jãꞌmerimaji kijarirãñu. Suᵽabaatirã, “Mae ñiᵽamaki mime”, Tuᵽarãre kẽrĩrãñu. Torãjite ritaja ĩᵽamaki Tuᵽarãre jarirãñu.

²⁹ “Reyakoꞌomakaja ᵽuᵽatũrũrika imabeyua”, aᵽerãre ãrĩkoᵽeikakaka mijare yibojaerã baayu mae. Ikuᵽaka ᵽuᵽajoakoꞌomakaja ¿dako baaerã aᵽerãreje reyaekarãroꞌsi ruᵽukoꞌa najũjerũjeyu ĩꞌrãrimarã jeꞌe? Reyaekarã ᵽuᵽatũrũrika imaberirikareka ᵽuri, waᵽuju waᵽamarĩaja ruᵽukoꞌa naroꞌsi najũjerũjejĩñu.

³⁰ Yijaroꞌsi ᵽuri, Tuᵽarãrika yija wãrõika ᵽoto werika sime, rĩkimarãja yijare jããrika riꞌkairãre imamaka. ¿Marãkãꞌã ãrĩwaꞌri werika yijaroꞌsi simakoꞌomakaja sayija wãrõrijaꞌatabeyu jeꞌe?

³¹ Rita mijare ñañu yijeyomarã. Ĩꞌrãrĩmi jariwaꞌririmarĩa yire nariꞌkayu. Imakoꞌomakaja mijare yiwãrõikaᵽi ãrĩwaꞌri Jesucristore mija yiꞌyua simamaka jĩjimaka ñima rita sime.

³² Éfesowejearã yiwãrõraᵽaka ᵽoto, yaiwẽkoa boebaitaka ima uᵽaka imawaꞌri yire riꞌkakoᵽeraᵽarã yire yiꞌririyaᵽaberaᵽarã. Iꞌsuᵽaka yire nabaamaka, “Reyakoꞌomakaja ᵽuᵽatũrũrika imabeyua”, ãñuka ñimarikareka dako baaerã baꞌiaja jũakoꞌomakaja nare wãrõkaꞌwisijũaberijããekaki yiꞌi. Reyakoꞌomakaja maᵽuᵽatũrũrũkia imaberirikareka ᵽuri, “Ñoaka õñia imarũkimarĩrã maime. Suᵽa imarĩ õñia maimatiyikuriji mayaᵽaika uᵽakaja ukubaraka, baꞌabaraka maimaerã”, ãrĩka Jesúre yiꞌribeyurãre baaika uᵽakaja baairã maimajããeka.

³³ Iꞌsuᵽaka simamaka waᵽuju bojaᵽakirimajare mija ãꞌmitiriᵽẽaꞌsi. Ikuᵽaka sime: Baꞌiaja baairãka mija jeyoarirãka, jia baairã imakoꞌomakaja nuᵽaka baꞌiaja baairã mija jarirãñu mijaoka.

³⁴ Jiirokaᵽi ᵽuᵽajoaᵽeꞌawaꞌri baꞌiaja baarika mija jaꞌatabe. Mija ᵽõꞌirã ĩꞌrãrimarã Tuᵽarãre õrĩbeyurã imarã jeꞌe. Mija iꞌyoᵽiꞌyaokoroꞌsi iꞌsuᵽaka mijare ñañu.

Ikuᵽaka simarãñu maᵽoꞌia õñia majariᵽeꞌrirãka beꞌerõꞌõ

³⁵ “Reyakoꞌomakaja reyaekarãre ᵽuᵽatũrũrãñu”, ñañua imakoꞌomakaja, ikuᵽaka ĩꞌrãrimarãte ãñu jeꞌe aᵽeyari: “¿Marãkãꞌã simamaka reyaekarã imakoꞌomakaja naᵽoꞌia ᵽuᵽatũrũrãñu? ¿Marãkãꞌã ĩoirã nimarãñu ruku rabaeka mirãrã?”, nañu.

³⁶ Iꞌsuᵽaka yire jẽrĩairã ᵽuri jia ᵽuᵽajoabeyurã. Ikuᵽaka sime: Õterikiyaᵽea moteika sajetakaja rabaika. Imakoꞌomakaja satõsirõꞌõᵽi imaᵽi saᵽuꞌyu. Sajea rababerijĩkareka, marãkãꞌã baatirã saᵽuꞌriwãrũberijĩñu.

³⁷ Mia: Trigo wãmeika õterikia, sayaᵽeaᵽi samotemaka, samoteika uᵽakamarĩa saᵽuꞌyu.

³⁸ Samoterãka beꞌerõꞌõ ᵽuꞌritirã Tuᵽarãre yaᵽaika uᵽakaja sajayu. Suᵽa imarĩ õterikia uᵽakaja saᵽuꞌririjayu.

³⁹ Suᵽabaatirã waꞌia, waꞌiroꞌsia, wĩꞌñaka, ᵽoꞌimajaoka ĩꞌrĩka uᵽaka marĩa ᵽoꞌikirã maime.

⁴⁰ Iꞌsuᵽakajaoka maboꞌikakurirã imarũkirãre torãja Tuᵽarãre ᵽoꞌijiaeka. Õꞌõrã imarũkirãreoka õꞌõrãja kibaaeka. Ĩꞌrãtijitakamarĩa imakoꞌomakaja ĩꞌᵽabaꞌiwãꞌtaja jiyurika sime.

⁴¹ Aiya ĩmikakire yaaika uᵽakamarĩa kiyaaboayu ñamikaki aiya. Iꞌsuᵽakajaoka sime tãꞌᵽia. Tãꞌᵽirãka rakaka oyiaja yaꞌtairã nime.

⁴² Ᵽoꞌimaja ᵽuri, reyaekakire mayayerãka beꞌerõꞌõ kiᵽoꞌia rabarãka. Imakoꞌomakaja Tuᵽarãre kire ᵽuᵽatõrõrãka beꞌerõꞌõ ᵽuri, imajiᵽarũkika, aᵽekurioka reyarũkimarĩka kimarãñu.

⁴³ Reyaekakire mayayeika, kiᵽoꞌia jiamarĩa ima mayayeyu. Kiᵽuᵽatũrũrãka ᵽoto ᵽuri jia jiyurika, rikitubaka kiᵽoꞌia jarirãka.

⁴⁴ “Jia nimarũ ika kaꞌiareka”, ãrĩwaꞌri Tuᵽarãre mare ᵽoꞌijiaeka. Imakoꞌomakaja mareyarãka beꞌerõꞌõ, mare kiᵽuᵽatõrõrãñu. Iꞌsia ᵽoto jiibaji kika maimarãñu. Õꞌõrã õñia maime maᵽoꞌiaᵽi. Tuᵽarã ᵽõꞌirã maeyarãka aᵽeuᵽakakaka ᵽoꞌiaᵽi torã jia imarũkiaᵽi maeyarãñu.

⁴⁵ Ikuᵽaka sabojayu Tuᵽarã majaroᵽũñurã: “Mamarĩtaka Adán wãmeiki ᵽoꞌimajire kiᵽoꞌijiaeka Tuᵽarã. Suᵽabaatirã õñia kire kimarũjeka”. Cristo ᵽuri, Adán uᵽakamarĩa imarĩ, mareyarãka ᵽoto Tuᵽarã ᵽõꞌirã õñia mare imajiᵽarũjerimaji kime.

⁴⁶ Iꞌsuᵽaka simakoꞌomakaja õꞌõrã maᵽoꞌia ima, saᵽiji õñia maboꞌikakurirã kika maimajiᵽarũkimarĩa sime. Mareyarãka beꞌerõꞌõ mare kijaꞌatarãñu ᵽoꞌia maboꞌikakurirã kika maimajiᵽarũkia.

⁴⁷ Mamarĩ imaũꞌmuekakire kaꞌiaᵽi Tuᵽarãre ᵽoꞌijiaeka. Suᵽa imarĩ õꞌõrãja imarũkikaroꞌsi kimaeka. Cristo ᵽuri maboꞌikakurikaki kime.

^48-49 Ika kaꞌiareka imarã maimamaka, Adán ᵽoꞌia imaeka uᵽakaja sime maᵽoꞌia. Ĩmirã, Tuᵽarã ᵽõꞌirã imarã ᵽuri Cristo, ᵽoꞌia uᵽaka ᵽoꞌikirã nime. Ika wejearã maima ᵽoto ᵽuri Adán ᵽoꞌia imaeka uᵽaka Tuᵽarãre mare baaeka. Maboꞌikakurirã maimarãka ᵽoto ᵽuri, Jesúᵽoꞌia uᵽaka maᵽoꞌia imarãka.

⁵⁰ Ikuᵽaka mijare yibojaerã baayu yijeyomarã: Maekaka ima maᵽoꞌia wejejẽꞌrãkaja imarũkimarĩa imarĩ, Tuᵽarãre ritaja jãꞌmerõꞌõrã imabesarãka.

⁵¹ Mija ãꞌmitiᵽe. Ᵽoꞌimajare õrĩberika mijare yibojaerã baayu. Cristore ᵽeꞌrietaerã baarãka ruᵽu ritaja reyaᵽataekarãmarĩa maimarãñu. Imakoꞌomakaja ĩꞌrĩka uᵽakaja Tuᵽarãre maᵽoꞌia oꞌaᵽatarãñu.

⁵² Ikuᵽarõꞌõᵽiji maᵽĩꞌrũtaika uᵽaka maᵽoꞌia Tuᵽarãre oꞌarãñu. Tromᵽeta wãmeika okaarirãka ᵽoto, “Wejetiyia seyayu mirãkiyu”, marĩwãrũrãñu. Sokaarirãka ᵽoto reyaekarãre mamaka naᵽoꞌiaᵽi ᵽuᵽatũrũrãñu. Iꞌsirĩmi õñia imarãñurãreoka naᵽoꞌia Tuᵽarãre oꞌarãñu.

⁵³ Maekaka ima maᵽoꞌia rabarũkia simamaka kika õñia maimajiᵽarũkiaᵽi Tuᵽarãre maroꞌsi soꞌarãñu. Suᵽa imarĩ aᵽekurioka reyarũkimarĩrã maimarãñu.

^54-55 Suᵽa Tuᵽarãre mare baarãñu kimajaroᵽũñurã sabojaeka uᵽakaja simamaka. Mia jeꞌe: “Maᵽoꞌia oꞌawaꞌri ᵽoꞌimajare reyaika Tuᵽarãre tiyetamaka, reyarika imabesarãka. Suᵽa simamaka ‘Yija reyarãñu’, ãrĩwaꞌri kĩkirika imabesarãka maroꞌsi”, ãrĩwaꞌri sabojayu.

⁵⁶ Baꞌiaja baawaꞌri mareyarãñu, Tuᵽarãre jãꞌmeika yiꞌribeyurãre reyarika simamaka.

⁵⁷ Imakoꞌomakaja maĩᵽamaki Jesucristoᵽi baꞌiaja imarika tiyibeyurõꞌõrã maꞌrirũkia imakoᵽekareka mare kitããmaka, “Jiitaka mibaayu Tuᵽarã”, jĩjimakaᵽi kire marĩrijayu.

⁵⁸ Iꞌsuᵽaka simamaka ᵽuᵽarukubekaja, jia Jesucristore yiꞌribaraka mija imabe yijeyomarã. Suᵽabaatirã, “Waᵽuju Tuᵽarãroꞌsi yija baꞌirabekoᵽeyu”, ãrĩᵽuᵽajoabekaja, jiaᵽi kirika mija baꞌirabebe.