1 Co 14 - Porciones del Nuevo Testamento en el idioma Letuama

Tuᵽarãre mare jeyobaamaka ikuᵽaka mabaabuꞌayeꞌe

¹ Suᵽa imarĩ ᵽoꞌimajare mawayuĩarijariyeꞌe. “Ᵽoꞌimajare miroꞌsi yija bojaĩjiwãrũerã miõrĩrũjeika yijare mijaꞌatabe”, ãrĩka Tuᵽarãre mija jẽñebe.

² Ikuᵽaka sime: Narẽñurõꞌõrã oka kiõrĩbeyuaᵽi jaikire naꞌmitiriwãrũbeyu ᵽoꞌimaja. Kiᵽuᵽakaᵽi kijaika imarĩ Tuᵽarã ĩꞌrĩkaja kire ãꞌmitiyuka.

³ Aᵽika ᵽuri Tuᵽarãre kire bojarũjeika ᵽoꞌimajare bojaiki. Kire ãꞌmitiritirã, jiibaji Tuᵽarãre nayiꞌrirãñu. Iꞌsuᵽakaoka jia okajãjia imatirã Tuᵽarãre yaᵽaika uᵽaka nabaaokaroꞌsi, jiiᵽuᵽarã nimaerã suᵽa kibaajayu.

⁴ Oka kiõrĩbeyuaᵽi Tuᵽarãre jaiki, kiroꞌsi takaja jia sime. Naꞌmitiyuaᵽi Tuᵽarãrika aᵽerãre bojaikire ᵽuri, sãꞌmitiritirã jia ᵽoꞌimajare sõrĩwaᵽuꞌatayu. Iꞌsuᵽaka kibaaika simamaka jia Jesúre yiꞌyurãre kiwãrõrijayu.

⁵ Ĩꞌrĩka jariwaꞌririmarĩa aᵽetatarã oka mija õrĩbeyua mija jaiwãrũrikareka, jia simajããeka yiroꞌsi. Jia simakoꞌomakaja aᵽerã oka kiõrĩbeyua kijaika tẽrĩwaꞌribaji imatiyaika sime Tuᵽarãroꞌsi bojaĩjirika. Aᵽerã oka kijaika ᵽoꞌimajare ãꞌmitiriwãrũbeyua bojarikatarimaji ĩꞌrĩkare imajĩka jia sime.

⁶ Mija ãꞌmitiᵽe yijeyomarã. Mija ᵽõꞌirã eyatirã mija ãꞌmitiribeyua yijaijĩka, dako waᵽamarĩa simajĩñu. Tuᵽarãre yire õrĩrũjeika mijare yibojajĩka jia mijaroꞌsi simajĩñu. Iꞌsuᵽakajaoka sime Tuᵽarãrika mija ãꞌmitiyuaᵽi yiwãrõika.

⁷ Ñamaũꞌa ĩꞌrĩkare ᵽuᵽuwãrũbeyua ãꞌmitiritirã, “Iꞌsiroka kiᵽuᵽuyu”, ãrĩwãrũbeyurã maime. Arᵽa wãmeika jia kibirewãrũbeᵽakãꞌã, “Iꞌsiroka kibireyu”, marĩwãrũberijĩñu.

⁸ Aᵽea. Surararãkare akarimajire tromᵽeta wãmeika jia ᵽuᵽuwãrũberijĩka, namajamarãka jĩrĩrã imatikaja nimawãrũberijĩñu.

⁹ Ikuᵽaka sime, aᵽetatarã oka mija õrĩbeyua mija jaika ãꞌmitiriwãrũberiwaꞌri, “Ikuᵽaka ãrĩrika nañu”, aᵽerãre ãrĩwãrũberijĩñu. Suᵽa imarĩ, waᵽuju koꞌtorõꞌõrãja jairã uᵽakaja mija baajĩñu.

¹⁰ Rita sime, ika ritatojo wejeareka ᵽoꞌimajatatarã rakaka oyiaja noka najaiyu. Imakoꞌomakaja ĩꞌrãtataja imarã najaika ãꞌmitiribuꞌawãrũirã.

¹¹ Iꞌsuᵽaka simakoꞌomakaja majeyomarãkaki ñaꞌmitiribeyuaᵽi yika kijaijĩka ĩꞌrãtiji yija ãꞌmitiribuꞌabeᵽakãꞌã, “Aᵽetomaji uᵽaka kime”, ñarĩrãñu. Iꞌsuᵽakajaoka yireka kiᵽuᵽajoarãñu ikioka.

¹² Esᵽíritu Santore õñua yaᵽairã imarĩ, “Jesúre yiꞌyurãre jia jeyobaarũkia yijare mijaꞌatarika yija yaᵽayu”, kire mija ãrĩrijaᵽe.

¹³ Aᵽerãre jeyobaarika ᵽuᵽajoairã imarĩ, “Esᵽíritu Santo yire jeyobaaikaᵽi aᵽerã oka ñorĩbeyua yijaikoꞌomakaja aᵽerãre jia sayibojarikataokoroꞌsi mirikakaka yire mijaꞌatabe”, ãrĩka Tuᵽarãre mija jẽñerijaᵽe.

¹⁴ Ikuᵽaka sime: Tuᵽarãre jiyiᵽuᵽayeebaraka aᵽerã oka ñorĩbeyua yiᵽuᵽakarã yire ñaꞌrĩjãikaᵽi kire jaikoꞌomakaja, “Iꞌsuᵽaka yijaiyu”, ñarĩwãrũbeyu.

¹⁵ Iꞌsuᵽaka simamaka ikuᵽaka mabaayeꞌe: Aᵽerikuri aᵽerã oka morĩbeyua maᵽuᵽakarã mare ñaꞌrĩjãika uᵽakaja Tuᵽarãre majairijariyeꞌe, suᵽabaatirã mabayakoyayeꞌe. Aᵽerikuri morĩwaᵽuꞌataikaᵽi kika majairijariyeꞌe, suᵽabaatirã kiroꞌsi mabayakoyarijarirãñu.

¹⁶ Mijare yibojaika uᵽakaja mija baabe. Ikuᵽaka mija baaberijĩkareka, sãꞌmitiriberiwaꞌri, “Jia mibaayu Tuᵽarã”, mijare ãꞌmitiririmajare ãrĩwãrũberijĩñu.

¹⁷ Kire jiyiᵽuᵽayeebaraka, “Jia mibaayu Tuᵽarã”, jia mañua imakoꞌomakaja, majaika ãꞌmitiriberiwaꞌri jiibaji kire nayiꞌriwãrũbeyu.

¹⁸ Mija tẽrĩwaꞌribaji ñorĩbeyua aᵽerã okaᵽi jaiki ñime. Suᵽa imarĩ, “Jia mibaayu Tuᵽarã”, kire ñañu.

¹⁹ Imakoꞌomakaja Jesúre yiꞌyurãka rẽrĩtirã diez mil rakaroka naꞌmitiribeyua nare yijaijĩka dakowaᵽamarĩa simajĩñu. Naꞌmitiriwãrũikaᵽi ᵽuri ĩꞌrãᵽitarakarokatakaja nare yibojaika norĩwãrũjĩka jiibaji yiroꞌsi simajĩñu.

²⁰ Meꞌrãrĩjaka jia õrĩᵽũabeyukajia uᵽaka mija ᵽuᵽajoaꞌsi yijeyomarã. Meꞌrãrĩjaka baꞌiaja baakoribeyurã uᵽaka Tuᵽarãre yaᵽaika ᵽuᵽajoabaraka ᵽakiayurã uᵽaka jia mija imabe.

²¹ Mija ĩabe, ikuᵽaka Tuᵽarã majaroᵽũñurã sabojayu: “Judíotatarã ᵽõꞌirã aᵽetomajare yiᵽũatarãñu aᵽea okaᵽi nare najaiokoroꞌsi yire ãꞌmitiriwãrũbeyurã nimamaka. Suᵽa nare yibaakoꞌomakaja, yire nayiꞌribesarãñu ruᵽu”, ãrĩwaꞌri sabojayu Tuᵽarã oka ᵽũñurã.

²² Suᵽa imarĩ aᵽeuᵽaka Tuᵽarãre mare jairũjeka, “Wẽkomaka yijare baarãki Tuᵽarã”, kire ãꞌmitiririᵽeꞌyoirãre ãrĩwãrũokaroꞌsi. Mare ᵽuri kirika Tuᵽarãre õrĩrũjeika mabojamaka, “Maka kime”, marĩwãrũyu.

²³ Ikuᵽaka sime: Mija rẽñurõꞌõrã aᵽerã oka mija õrĩbeyua ĩꞌrĩka uᵽakaja mija jaika ᵽoto, Jesúre yiꞌribeyurãre mija ᵽõꞌirã eyajĩñu. Mija jaika ãꞌmitirikoribeyurã imarĩ, “Wejabisimajatata ĩꞌrãre ime”, mijareka narĩrãñu.

^24-25 Suᵽa baabekaja Tuᵽarãroꞌsi mija bojaĩjirõꞌõrã ĩꞌrĩka Jesúre yiꞌribeyuka kãkatirã, Tuᵽarãre mijare õrĩrũjeikarõꞌõjĩrãja mija bojarãka jia sakiõrĩwãrũᵽatarãñu. Suᵽa imarĩ, “Baꞌiaja baaiki ñime. Kareaja yiᵽuᵽajoakoᵽeika Tuᵽarãre õñu”, kẽrĩrãñu. Suᵽabaatirã Tuᵽarãre jiyiᵽuᵽayeewaꞌri ñukuruᵽatirã, “¡Mijaka Tuᵽarãre ime mirãkiyu!”, kẽrĩrãñu.

Jesúre yiꞌyurãka rẽrĩtirã, ikuᵽaka Tuᵽarãre majiyiᵽuᵽayeeyeꞌe

²⁶ Mija ãꞌmitiᵽe yijeyomarã. Ikuᵽaka mija baarijaᵽe mija rẽrĩrãka rakakaja: Ĩꞌrãrimarã imarã bayakoyariyaᵽairã. Aᵽerã imarã wãrõrika yaᵽairã. Tuᵽarãre nare õrĩrũjeika bojariyaᵽairã aᵽerã. Aᵽerimarã imarã norĩbeyua simakoꞌomakaja aᵽea okaᵽi jairika yaᵽairã. Aᵽerã imarã sabojarikatarika yaᵽairã. Ritaja mija baaika Jesúre yiꞌyurãre jiibaji kire yiꞌyaokaroꞌsi nare mija jeyobaajĩka jia sime.

²⁷ Aᵽerã oka mija õrĩbeyua mija jairiyaᵽayeꞌe, ĩꞌᵽarã, maekarakamaki rõꞌõjĩrãja mija jaibe. Mamarĩ ĩꞌrĩka, kirokajĩrã aᵽika mija jairijaᵽe. Maꞌmitiribeyurokaᵽi jaikire jairãka beꞌerõꞌõ aᵽika sabojarikatarãki, aᵽerãre sãꞌmitiyaokaroꞌsi.

²⁸ Bojarikatarimajire imabesarãkareka, mija rẽñurõꞌõrã aᵽerokaᵽi jaibekaja mija imabe. Ĩꞌrãrimarãja aᵽerõꞌõrã aᵽerokaᵽi Tuᵽarãka mija jairijaᵽe.

²⁹ Iꞌsuᵽakajaoka, Tuᵽarãre mijare õrĩrũjeika mija bojariyaᵽarãka, ĩꞌᵽarã, maekarakamaki rõꞌõjĩrã mija jaibe. Ĩꞌrĩka mamarĩ, aᵽika kirokajĩrã mija jairijaᵽe. Iꞌsuᵽaka mija baamaka aᵽerã Jesúre yiꞌyurã jia sãꞌmitirirãñurã, “Rita, Esᵽíritu Santore kire õrĩrũjeikaᵽi kijaiyu”, narĩwãrũrãñu.

³⁰ Ĩꞌrĩkare jaika ᵽoto aᵽika ãꞌmitiriruᵽakire kijairũkia Tuᵽarãre õrĩrũjejĩkareka, mamarĩji jaiũꞌmuikire okataꞌrijĩka ᵽoto kijaiũꞌmujĩñu kiroꞌsi.

³¹ Ĩꞌrĩka jaiũꞌmutirã kirokajĩrã aᵽika Tuᵽarãroꞌsi bojaĩjirimajare jaimaka ĩꞌrĩka jariwaꞌririmarĩaja mija jaiwãrũrijarirãñu. Iꞌsuᵽaka mija baarãka, jiibaji Tuᵽarãrika õrĩwaꞌri okajãjia ᵽuᵽaᵽaraka jia mija imarãñu.

³² Tuᵽarãroꞌsi bojaĩjirimaji ᵽuri, kibojarũkirõꞌõjite seyarika taꞌaiki. Aᵽerãre jairãka ᵽoto okamarĩaja kiruᵽe ruᵽu.

³³ Rukubaka baarika yaᵽabeyuka kime Tuᵽarã. Suᵽa imarĩ ritaja jiyiᵽuᵽaka õrĩbuꞌabaraka mija rẽrĩrijarirãka jia simarãñu. Iꞌsuᵽaka oyiaja aᵽerã Jesúre yiꞌyurãre baayu narẽñu rakakaja.

³⁴ Mija rẽrĩrãka ᵽoto, jairĩ wiriwaꞌribekaja ĩmirĩjare jaikatakaja ãꞌmitirirũkirã nime rõmijã. Kotĩmire ãꞌmitirirũkiko koime, iꞌsuᵽakaja Moisére oꞌoeka simamaka.

³⁵ Kojẽrĩariyaᵽajĩka, nawiꞌiarã ᵽeꞌrieyatirã kotĩmire sakojẽrĩarũ. Rẽrĩriwiꞌiarã ĩꞌrãko rõmore jairãka, “¿Dako baaerã iꞌyoᵽiribekaja kojaiyu?”, aᵽerãre ãrĩᵽuᵽajoarãñu.

³⁶ ¿Marãkãꞌã mija ᵽuᵽajoayu jeꞌe? Mamarĩ Tuᵽarãrika bojaũꞌmuekamarĩrã mija ime. Mija takaja marĩa kirika bojariroka yiꞌrikarã. Iꞌsuᵽaka simakoꞌomakaja ¿aᵽerã Jesúre yiꞌyurãre baarũki uᵽaka baarũkimarĩrã mija ime bai jeꞌe? Jẽnoꞌo iꞌsuᵽakamarĩa sime.

³⁷ “Tuᵽarãre yijare õrĩrũjeika bojaĩjirimaja yija ime”, ãñurã imarã jeꞌe torã. Iꞌsuᵽakaoka, “Kirikaᵽi baꞌirabeokoroꞌsi Esᵽíritu Santore yijare jaꞌatayu”, ãñurã aᵽerã mijakarã. “Kijeyobaairã yija ime”, ãñurã nimayeꞌe, “Maĩᵽamakire jãꞌmeika uᵽakaja Ᵽablore maroꞌsi oꞌoyu”, narĩrũ.

³⁸ “Maĩᵽamakire jãꞌmeka uᵽakamarĩa Ᵽablore bojayu”, ãñukare, “Kiᵽuᵽajoaika uᵽakaja kijaiyu”, Tuᵽarãre kireka ãrĩrãñu.

³⁹ Mija ãꞌmitiᵽe yijeyomarã. Ikuᵽaka simatiyayu maimarũkia: “Tuᵽarãre yire ãñua bojawãrũiki ñimaerã yire kijeyobaarika yiyaᵽayu”, ãrĩka kire mija jẽñebe. Imakoꞌomakaja, aᵽerã oka naꞌmitiribeyua jairãre jãjibaarũkimarĩa sime.

⁴⁰ Mija rẽñu rakakaja, jia oyiaja mija imabe rukubaka baabekaja.