1 Co 11 - Porciones del Nuevo Testamento en el idioma Letuama

¹ Jesúre wãꞌmaekaki imarĩ kire ãꞌmitiriᵽẽawaꞌri kimaeka uᵽakaja yibaayu yiꞌioka. Suᵽa imarĩ yibaaika uᵽakaja mija baabe mijaoka.

“Marẽrĩrijayu ᵽoto ikuᵽaka rõmijãre baajĩka jia sime”, ãñua

² Mija ãꞌmitiᵽe yijeyomarã. Mijare yiwãrõraᵽaka uᵽakaja baairã mija. Suᵽa imarĩ samija yeꞌkariribeyua simamaka jĩjimaka ñime.

³ Ikuᵽaka aᵽea ima mija õrĩrika yiyaᵽayu. Ĩmirĩja ruᵽukoꞌamaki kime Jesús. Rõmijã ruᵽukoꞌamarã nime natĩmiarã. Jesús ruᵽukoꞌamaki kime Tuᵽarã.

⁴ Rẽrĩriwiꞌiarã Tuᵽarãka najaika ᵽoto, kirika bojariroka bojaĩjibaraka sayaᵽãiaᵽi naruᵽukoꞌa jaꞌaᵽeabekaja ĩmirĩjare jairijayu. Ĩꞌrĩka ᵽuri kiruᵽukoꞌa kijaꞌaᵽeajĩka, “Yiruᵽukoꞌamakimarĩka kime Cristo”, ãñu uᵽaka, kire jiyiᵽuᵽayeebeyuka uᵽaka kibaayu.

⁵ Rõmijã ᵽuri, Tuᵽarãre jaibaraka, kirika bojariroka kiroꞌsi bojaĩjibaraka, naruᵽukoꞌarã sayaᵽãiaᵽi jaꞌaᵽeaeka imarũkirã nime. Rõmo ruᵽukoꞌarã jaꞌaᵽeabeyuko ᵽuri kotĩmire jiyiᵽuᵽaka õrĩbeyuko uᵽaka kobaayu. Koruᵽua wiꞌeᵽatekako uᵽaka iꞌyoa koime.

⁶ Koruᵽukoꞌarã jaꞌaᵽearika yaᵽabeyuko ᵽuri, sarekaja koruᵽua kowiꞌeᵽataᵽarũ. “Jiamarĩa yiroꞌsi sime”, ãñuko imarĩ, koruᵽukoꞌarã kojaꞌaᵽearũ.

⁷ Iꞌsuᵽaka simakoꞌomakaja narẽrĩriwiꞌiarã Tuᵽarãre najaika ᵽoto ĩmirĩja ᵽuri naruᵽukoꞌarã jaꞌaᵽearũkimarĩrã nime kiuᵽakaja ĩora Tuᵽarãre ᵽoꞌijiaekarã maima imarĩ. “Ritaja jia baaiki Tuᵽarã”, mañu. Iꞌsuᵽakajaoka rõmo ĩmirĩji rũmu imarĩ, koruᵽukoꞌarã jaꞌaᵽeaiko koime, “Kore imaruᵽutarimaji kotĩmire ime”, mañaokaroꞌsi.

^8-9 Ikuᵽaka sime: Ĩmirĩjire Tuᵽarãre ᵽoꞌijiaeka ᵽoto rõmo yatawiꞌiũꞌaᵽimarĩa kire kiᵽoꞌijiaeka. Rõmore ᵽuri ĩmirĩji yatawiꞌiũꞌa eꞌetatirã kiᵽoꞌijiaeka. Suᵽa imarĩ, ĩmirĩjite jeyomarĩa imamaka, ĩawaꞌri rõmore kiᵽoꞌijiaeka Tuᵽarã. Rõmore, jeyomarĩa imamaka, ĩawaꞌrimarĩa.

¹⁰ “Yijare imaruᵽutarimaja imarĩ, yija ruᵽukoꞌamarã nime yija jeyomarã”, ãrĩwaꞌri naruᵽukoꞌarã jaꞌaᵽeatirã, narẽrĩriwiꞌiarã najaika ᵽoto jia sime rõmijãroꞌsi. Iꞌsuᵽaka nabaaika ĩawaꞌri, “Jia sime”, ángelrãkare ãñaokaroꞌsi, naruᵽukoꞌarã rõmijãre jaꞌaᵽearũ.

¹¹ Iꞌsuᵽaka simakoꞌomakaja, maĩᵽamaki Jesucristore yiꞌyurã imarĩ, rõmijã naroꞌsiji, ĩmirĩja naroꞌsijioka imaberijĩrã. Ĩꞌrãtiji ᵽuᵽariwaꞌri jeyoaᵽaraka imarũkirã maime.

¹² Ĩmirĩji yatawiꞌiũꞌaᵽi rõmore kiᵽoꞌijiaeka Tuᵽarã. Imakoꞌomakaja rõmijãᵽi ᵽoꞌijiyurã maime. Ĩꞌᵽarãwãꞌtaja Tuᵽarãre ᵽoꞌijiaekarã oyiaja maime.

¹³ Jia ᵽuᵽajoaekaja mija imabe. Rẽrĩriwiꞌiarã sayaᵽãia ruᵽukoꞌarã jaꞌaᵽeabekaja Tuᵽarãre kojaijĩka ¿yaje jia simajĩñu jeꞌe mijareka? Jẽnoꞌo jiamarĩa simajĩñu.

¹⁴ Suᵽabaatirãoka, “Ruᵽua jĩꞌĩbeyurã watoᵽekarã ĩꞌrĩka ĩmirĩjire ruᵽua jĩꞌĩjĩka iꞌyoa kiroꞌsi simajĩñu”, ãrĩᵽuᵽajoaᵽatairã maime.

¹⁵ Rõmore ᵽuri ruᵽua ñoaka kojĩꞌĩmaka jiyuriko kore maiyu. Suᵽa imarĩ ruᵽua ñoaka jĩꞌĩwaꞌri koruᵽukoꞌarã jaꞌaᵽeaiko koime.

¹⁶ Ika mijare yibojaika ãꞌmitiririyaᵽaberiwaꞌri, “Iꞌsuᵽakamarĩa sime”, ĩꞌrãrimarãre ãrĩrãkareka mae ikuᵽaka nare ñañu: Yija uᵽaka aᵽea wejeareka Jesúre ãꞌmitiriᵽẽabaraka imarã, “Nare yija bojaika yiꞌriwaꞌri ĩꞌrãtiji oyiaja simauᵽakaja baairã”, ãrĩwaꞌri nare yibojayu.

“Jesúre ᵽiyia baꞌaeka uᵽaka baꞌabaraka baꞌiaja mija baabuꞌarijayu”, Ᵽablore nare ãrĩka

¹⁷ Mae ate ika mijaroꞌsi yoꞌoyu: Tuᵽarãre jiyiᵽuᵽayeeokoroꞌsi rẽrĩtirã jia imarikoᵽakaja baꞌiaja mija baabuꞌaika simamaka, “Jia oyiaja baairã nime”, mijareka ñarĩbeyu.

¹⁸ “Narẽñu ᵽoto ĩꞌrãtiji ᵽuᵽajoaberiwaꞌri baꞌiaja naroꞌsi sime”, nañua mija majaroka ñaꞌmitiyu. “Rita sime jeꞌe aᵽeyari”, ñarĩᵽuᵽajoayu.

¹⁹ Jia ĩꞌrãtiji imabuꞌaberiwaꞌri mija ᵽibikoᵽejĩka marã imabeyua jeꞌe. Rakakaja mija ᵽuᵽajoairoka õrĩwãrũtirã, “Ĩꞌrã nime jia ᵽuᵽajoatirã Tuᵽarãre yaᵽaika uᵽakaja baairã”, marĩwãrũyu.

²⁰ Jesúre ᵽiyia baꞌaeka uᵽaka rẽrĩtirã mija baꞌaika ᵽoto, Maĩᵽamakire jiyiᵽuᵽayeebeyurã uᵽaka mija baayu.

²¹ Mia. Mija baꞌaika ᵽoto wayuoka baairãre ᵽibabekaja mija baꞌayu, “Yijarikaja sime”, ãrĩwaꞌri, iꞌsuᵽaka mija baamaka, baꞌarimarĩa imarãre kẽsirabayu. Aᵽerã ᵽuri jia rĩkimaka baꞌatirã, jĩjimakaᵽi ukuwejabiyurã.

²² Mijaroꞌsiji baꞌarika mija yaᵽayeꞌe mija wiꞌiarã aꞌritirã mija baꞌabe. Aᵽerã jia ñaꞌᵽirika baꞌabeyurãre ĩaika wãjitãji mija baꞌaika iꞌyoa nare mija jũarũjeyu. Suᵽabaatirã Jesúre ãꞌmitiriᵽẽairã nimakoꞌomakaja nare ĩariᵽeꞌyoirã uᵽaka mija baayu. Iꞌsia õrĩwaꞌri, “Jia baairã mija ime”, ¿mijare ñarĩrãñu bai jeꞌe? Jẽnoꞌo, jiamarĩa sime.

Ikuᵽaka sime ᵽiyia Jesúre baꞌaekakaka

²³ Maĩᵽamakire yire wãrõekakaka, mijare yiwãrõtiraᵽe. Imakoꞌomakaja mijare sayibojaerã baayu ate. Maĩᵽamaki Jesúre nañiꞌaerã Judare bojajããeka ñami, ᵽan Jesúre eꞌerikaeka.

²⁴ Seꞌerikatirã, “Jia mibaayu Tuᵽarã”, kẽrĩka beꞌerõꞌõ, sañakatarutirã ikuᵽaka kika wãrũrimajare kẽrĩka: “Ãjaꞌa, mija baꞌabe. Ika sime yiᵽoꞌia. Mijaroꞌsi yireyarãñu. Yireyarãka beꞌerõꞌõ mijaroꞌsi yibaaeka mirãka mija ᵽuᵽajoabe. Yire yeꞌkaririberiwaꞌri ikuᵽakaja rẽrĩbaraka samija baꞌarijaᵽe”, nare kẽrĩka.

²⁵ Nabaꞌaeka beꞌerõꞌõ, iyaokokoꞌa Jesúre eꞌerikaeka ate. Torãjĩrã ikuᵽaka nare kẽrĩka: “Ãjaꞌa, mija ukube. Mijaroꞌsi riwejurubaraka yireyarãñu. ‘Ᵽoꞌimajare yitããrãñu’, Tuᵽarãre ãrĩka uᵽakaja yiriweaᵽi simarãñu mae. Yireyarãka beꞌerõꞌõ mijaroꞌsi yibaaeka mirãka ᵽuᵽajoabaraka yire yeꞌkariribekaja ikuᵽaka rẽrĩtirã samija ukurijaᵽe”, nare kẽrĩka.

²⁶ Ᵽan mija baꞌaika ᵽoto, iyaokoa mija ukuika ᵽoto ikuᵽaka Jesúre maroꞌsi reyaeka ãrĩwaꞌri. Ketarãkarõꞌõjĩrã jẽrãika, maroꞌsi kireyaekakaka ᵽoꞌimajare mija baabearãñu.

Ikuᵽaka baatirã ᵽiyia Maĩᵽamakire baꞌaekakaka mabaꞌayeꞌe

²⁷ Ikuᵽaka simatiyayu: Jesúre ãꞌmitiriᵽẽairãre wayuĩabeyuka imakoꞌomakaja Maĩᵽamakire ᵽiyia baꞌaeka uᵽaka kibaajĩka, jiamarĩa baaiki kime. Iꞌsuᵽaka baaiki ᵽuri maroꞌsi Maĩᵽamakire riwejurubaraka reyaeka õrĩwãrũberiwaꞌri, baꞌiaja kibaayu.

²⁸ Baꞌaerã baaeka, ukuerã baaeka Maĩᵽamakire ᵽiyia baꞌaekakaka jia maᵽuᵽajoayeꞌe. “Cristorirãre wayuĩabeyuka yiꞌi baꞌitakaja nare yibaayu”, marĩᵽuᵽajoajĩkareka, baꞌiaja nare mabaaika majaꞌatajĩñu.

²⁹ Jesúrirãre wayuĩabeyurã imakoꞌomakaja ᵽan waᵽuju mabaꞌarãka, iyaokoa waᵽuju mukurãka baꞌiaja mare kijũarũjerãñu Tuᵽarã.

³⁰ Iꞌsuᵽaka simamaka waᵽuju sabaꞌaekarã imarĩ rĩkimarãja mija rũetaayu. Suᵽa imarĩ ĩꞌrãrimarãre reyarijayu.

³¹ Mabaꞌaerã baarãka ruᵽu maimakaka ᵽuᵽajoatirã aᵽerãre mawayuĩabeyua majaꞌatayeꞌe. Iꞌsuᵽaka mabaarãka waᵽa Tuᵽarãre mare waᵽajẽñebesarãñu.

³² Maĩᵽamakire baꞌiaja mare jũarũjeyu ĩꞌᵽarikuri baꞌiaja mabaaᵽeꞌakoreka. Suᵽa imarĩ kire yiꞌribeyurãre baꞌiaja baarũkirĩmi seyarãka ᵽoto naka baꞌiaja mare kijũarũjebesarãñu.

³³ Yijeyomarã, Jesúre ᵽiyia baꞌaeka uᵽaka baꞌaerã mija rẽrĩrãka ᵽoto, ĩꞌrĩka jariwaꞌririmarĩa jajumarĩaja ĩꞌrãtiji mija baꞌabe.

³⁴ Rẽrĩriwiꞌiarã kẽsia mijare baakoreka mija wiꞌiaᵽi baꞌañaꞌᵽitirã mijaꞌᵽe. Rẽrĩriwiꞌiarã mija baꞌaika ᵽuri jia mija ñaꞌᵽiokoroꞌsimarĩa sime. Ĩꞌrãtiji jia jajumarĩa mija baꞌarãkareka baꞌiaja Tuᵽarãre mijare baabesarãñu. Mija ᵽõꞌirã eyatirã aᵽeakaka mijare yibojarãñu ruᵽu.