1 Co 10 - Porciones del Nuevo Testamento en el idioma Letuama

Bikija judíotatarãre baaeka majaroka õñurã imarĩ, nuᵽakamarĩa maimayeꞌe Tuᵽarãre yiꞌriwaꞌri

¹ Mija ãꞌmitiᵽe yija jeyomarã. Bikija judíotatarã ñekiarã imaekarã majaroka mija yeꞌkaririaꞌsi. Oko ũmakakarokaᵽi nimauᵽatire kiruᵽutarwaꞌrika Tuᵽarã. Suᵽabaatirã Egiᵽtokaꞌiakarãre ruꞌribaraka Okojũaka wãmeika riaᵽakiaka ũꞌᵽuaᵽi natẽrĩwaataꞌyaokoroꞌsi nare kijeyobaaeka.

² Riaᵽakiaka Okojũaka wãmeika tẽrĩwaataꞌritirã, oko ũmakakarokaᵽi turitaᵽawaꞌri Moisére bojaeka ãꞌmitiriᵽẽairã najarika. Cristore yiꞌriwaꞌri ruᵽukoꞌa majũjerũjeika uᵽakaja naroꞌsi simaeka.

³ Suᵽabaatirã ĩmiᵽi Tuᵽarãre maná ñaꞌajiyeka nimarakamakiji nabaꞌaimaeka.

⁴ Sabeꞌerõꞌõ okoa ukurika nare jitomaka, ãta watoᵽekaᵽi Tuᵽarãre okoa jururũjeka sanukuokaroꞌsi. Sukutirã, natãrĩka. Ãta watoᵽekaᵽi okoa juruika takajamarĩa nare tããeka. Kire jẽrãkoꞌabeyurã nimakoꞌomakaja naꞌyu uᵽakaja Cristore nare ĩarĩrĩrijarika imarĩ, ikiji iꞌsuᵽaka naroꞌsi baaĩjikaki. Iꞌsia ãta uᵽaka kime Cristo.

⁵ Tuᵽarã ĩꞌrĩkaja kibaawãrũikaᵽi baꞌarika, okoa nare ĩjikaki imakoꞌomakaja rĩkimarãja Tuᵽarãre yaᵽaeka uᵽaka nabaaberika. Baꞌiaja nabaaeka simamaka, jĩjimaka Tuᵽarãre naka imaberika. Suᵽa imarĩ kire nayiꞌriberika ᵽareaja ᵽoꞌimajamatorã nareyaeka.

⁶ “Iꞌsuᵽaka yija ñekiarãre jũaeka”, ãrĩwãrũwaꞌri nuᵽaka baabekaja maimayeꞌe.

⁷ Suᵽa imarĩ waᵽuju ima jẽrãka ĩꞌrãrimarã yija ñekiarãre jiyiᵽuᵽayeeka uᵽaka mija baaꞌsi. Ritaja nimaeka mirãkakaka Tuᵽarã majaroᵽũñurã ikuᵽaka sabojayu: “Waᵽuju ima jiyiᵽuᵽayeebaraka, ukurũkia ukuwejabiribaraka, baꞌabaraka nimaeka. Suᵽabaatirã baꞌiaja baawãꞌimaᵽaraka nabayatããeka”, ãrĩwaꞌri sabojayu.

⁸ Ĩmirĩja rõmijãka baꞌiaja baawãꞌimaribaraka nimaeka. Suᵽa imarĩ 23,000 rakamarã nareyaeka ĩꞌrãrĩmireka. Ika najũaeka õñurã imarĩ nabaaeka uᵽaka baabekaja maimayeꞌe.

⁹ Ika ruᵽubaji, baꞌiaja nabaaeka simakoꞌomakaja, “Maĩᵽamakire baꞌiaja mare baabesarãñu”, ãrĩwaꞌri ĩꞌrãrimarã yija ñekiarãre baaeka uᵽaka mabaaberiyeꞌe. Baꞌiaja nabaaeka ĩawaꞌri ãñaka naᵽõꞌirã kiᵽũataeka saᵽi ĩꞌrãrimarãre jĩñaokaroꞌsi.

¹⁰ Ikuᵽaka sime aᵽea: Niᵽamaki kimaerã Tuᵽarãre wãꞌmaekakire nakẽrãjaika ĩꞌrãrimarã. “Moisére kiwãꞌmaberiri imakoᵽeraᵽe Tuᵽarã”, ãrĩwaꞌri baꞌiaja nabaariᵽareaja ĩꞌrĩka ángelre kiᵽũataeka Tuᵽarã nare kiriataokaroꞌsi. Iꞌsuᵽaka najũaeka simamaka nabaaeka uᵽaka baabekaja mija imabe.

¹¹ Ritaja yija ñekiarãroꞌsi simaeka uᵽakaja oꞌoeka sime Tuᵽarã oka ᵽũñurã. Wejetiyia eyaerã baawaꞌri iꞌsuᵽakaja maroꞌsi sime ika majaroka. Iꞌsuᵽaka najũaeka õrĩtirã, nabaaeka uᵽaka baꞌiaja mabaakoreka kiriᵽũñurã oꞌoeka sime.

¹² Suᵽa imarĩ, “Tuᵽarãre yiꞌririkakaka jia õrĩtirã imarĩ, baꞌiaja mabaabeyu”, ãrĩkoꞌomakaja baꞌiaja baarika marakajejĩñu.

¹³ “Baꞌiaja baarika yijare jitoika uᵽaka jũabeyurã jeꞌe aᵽerã”, mija ãrĩᵽuᵽajoaika, ritamarĩa sime. Iꞌsuᵽakajaoka sime aᵽerãroꞌsioka. Mijare kẽrĩka uᵽakaja jeyobaarũkika kime Tuᵽarã. Suᵽa imarĩ, “Baꞌiaja baarika yijare jitoika”, ãrĩᵽuᵽajoakoꞌomakaja, mija ᵽuᵽaka mijare ãñu uᵽaka baabekaja mija imawãrũrijayu. Baꞌiaja baarika mijare jitorãka ᵽoto kirika Tuᵽarãre mijare jaꞌatarãñu. Suᵽa imarĩ samija rakajeᵽããrãñu.

¹⁴ Suᵽa imarĩ ikuᵽaka mijare ñañu yijeyomarã. Baꞌiaja ima jẽrãka ᵽoꞌimajare jiyiᵽuᵽaka õñua ĩaᵽẽabekaja mija imabe.

¹⁵ Jia õrĩᵽuᵽakirã imarĩ, “Rita Ᵽablore mare bojayu”, ãrĩᵽuᵽajoawãrũirã mija ime.

¹⁶ Ᵽiyia Jesúre baꞌaekakaka ᵽuᵽajoabaraka mabaꞌarãka ᵽoto, “Yiriwea sime iyaokoa”, ãrĩtirã maroꞌsi sakijaꞌataeka simamaka iyaokoa maᵽibaukurijayu. Suᵽa imarĩ sukuerã baaeka, “Jia mibaayu Jesús. Baꞌiaja yija baaika waᵽaĩjirã yijaroꞌsi mireyaeka”, ãñaokoroꞌsi marẽrĩrijayu. Suᵽa imarĩ kirirã maime. Suᵽabaatirã, “Yiᵽoꞌia sime ᵽan”, ãrĩwaꞌri maroꞌsi sakijaꞌataeka simamaka, saᵽibabaꞌaerã baaeka, “Yaᵽua tetaekarã Jesúre maroꞌsi reyaĩjikarã maime”, mañu.

¹⁷ Jesúrirã maima simamaka ĩꞌrãtojo ᵽan maᵽibabaꞌayu. Suᵽa imarĩ, rĩkimarã imakoꞌomakaja Tuᵽarãka ĩꞌrĩka taꞌiarãja maime.

¹⁸ Israel kaꞌiakarãre baaika ᵽuᵽajoaikõrĩ jeꞌe. Waꞌiroꞌsi riꞌia Tuᵽarãre najoeĩjikakaka kũᵽajĩ nabaꞌarijayu. Suᵽa imarĩ ĩꞌrĩka uᵽakaja Tuᵽarãre jiyiᵽuᵽayeeirã nime.

¹⁹ Iꞌsuᵽaka simakoꞌomakaja, “Waᵽuju ima jẽrãka ᵽoꞌimajare baaeka simamaka, waꞌiroꞌsi riꞌitakaja sanijirijayua, imatiyabeyua sime”, ãrĩwaꞌri iꞌsuᵽaka mijare ñañu.

²⁰ Ikuᵽaka simatiyayu mijare yibojaika: Tuᵽarãre õrĩbeyurã imarĩ waᵽuju imaroꞌsi riꞌia naᵽããika ᵽoto Satanárika ima jiyiᵽuᵽayeewaꞌri suᵽa nabaayu. Iꞌsuᵽaka baairãka jeyoaribaraka mija baꞌaika ᵽoto Tuᵽarãre jiyiᵽuᵽayeerikoᵽakaja, Satanárika ima mija jiyiᵽuᵽayeeyu. Iꞌsuᵽaka mija baarika yiyaᵽabeyu.

²¹ Maĩᵽamaki Cristore reyaekakaka ᵽuᵽajoawaꞌri iyaokoa ᵽibaukubaraka, ᵽan ᵽibabaꞌabaraka maime kirirã imarĩ. Waᵽuju ima jiyiᵽuᵽayeeriwiꞌirã baꞌarika naᵽããikakaka baꞌabekaja, ukubekajaoka mija imabe Satanárika imaᵽitiyika mija jeyoarikoreka.

²² “Yirirã imakoꞌomakaja baꞌirãka najeyoayu”, ãrĩwaꞌri Maĩᵽamakire boebarirũjebekaja maimayeꞌe. Kire tẽrĩwaꞌribaji baawãrũbeyurã imarĩ baꞌiaja mijare kibaarãka tãrĩwãrũbesarãñurã mija ime.

Aᵽerãoka jia nimaokaroꞌsi maroꞌsi wãjitãji takaja ᵽuᵽajoabekaja maimayeꞌe

²³ Mia jeꞌe, ikuᵽaka ima mija yiꞌyu: “Marã imabeyua Tuᵽarãre yija yaᵽaika uᵽakaja baajĩrã yija”, ãrĩwaꞌri mija bojayu. Iꞌsuᵽaka maᵽuᵽaka mare ãñua imakoꞌomakaja ritaja mabaariyaᵽaika mare jeyobaabeyua sime. Iꞌsuᵽakajaoka Tuᵽarãre yaᵽaika baairã majayaokoroꞌsi ritaja mabaariyaᵽaika mabaajĩka ᵽoto mare jeyobaabeyua sime.

²⁴ Suᵽa imarĩ jia maimarũkitakaja ᵽuᵽajoabekaja aᵽerãre jia imaokoroꞌsi nare jeyobaarika ᵽariji maᵽuᵽajoayeꞌe.

^25-26 Mia, ika kaꞌiareka ima ritaja Tuᵽarãre ᵽoꞌijiaeka imarĩ dika jariwaꞌririmarĩaja kirika oyiaja sime. Saᵽi ãrĩwaꞌri ritaja mabaꞌaika jia oyiaja sime. Waꞌiroꞌsi riꞌia aᵽea ritaja nawaruayu rõꞌõrã, “¿Waᵽuju ima jiyiᵽuᵽayeeriwiꞌikakamarĩa bai sime?”, jẽrĩabekaja sawaruaritirã, mija yoꞌabaꞌabe.

²⁷ Jesúre yiꞌribeyuka, “Yiᵽõꞌirã mija baꞌaraᵽe”, ãrĩwaꞌri, mijare kioꞌyibojarãka ᵽoto, mija aꞌrirãka, kiruᵽutabaꞌarãka uᵽakaja kire yiꞌribiꞌabekaja mija baꞌabe. “¿Noꞌokaka sime ika riꞌia?”, ãrĩbekaja samija baꞌabe.

²⁸ Imakoꞌomakaja, “Waᵽuju imaroꞌsi naᵽããika mirãka simamaka; baꞌiaja sime jeꞌe aᵽeyari”, ĩꞌrĩkare mijare ãrĩrãkareka, kire wayuĩawaꞌri, samija baꞌaꞌsi. Iꞌsuᵽaka mija baarãka kiwayuᵽiꞌribesarãñu.

^29-30 “Ritajakaka baꞌarika baꞌarioyiaja sime”, mija ãñua imakoꞌomakaja, “ ‘Samija baꞌaꞌsi’, ãñukare baꞌiaja ᵽuᵽariaꞌsi”, ãrĩwaꞌri iꞌsuᵽaka mijare ñañu. “Ritaja mabaꞌaika marã imabeyua”, ãñuka imarĩ, aᵽerãre baꞌiaja baawaꞌrimarĩa sayibaꞌaika imarĩ, ¿dako baaerã ĩꞌrãrimarã jaijairiᵽareaja sayibaꞌarijaꞌatajĩñu jeꞌe? Suᵽabaatirã baꞌaerã baaeka, “Jia mibaayu Tuᵽarã”, ñarĩrijayua simamaka baꞌiaja yireka jairika imabeyua.

³¹ Ikuᵽaka simatiyayu. Ritaja mabaꞌaika rakakaja, mabaꞌabeyu ᵽotooka, mukuika rakakaja, ritaja mabaarijayu rakakaja, Tuᵽarãre yaᵽaika uᵽaka oyiaja mabaarijariyeꞌe ᵽoꞌimajare jiyiᵽuᵽaka kire õñaokaroꞌsi.

³² Suᵽa imarĩ, “Jia Jesucristore nayiꞌrirũ”, ãrĩwaꞌri judíotatarã, judíotatamarĩrãoka, aᵽerã Jesúre yiꞌyurãre baꞌiaja mija baaruᵽutakoreka, jia mija ᵽuᵽajoabe.

³³ Yiꞌi ᵽuri ikuᵽaka ᵽuᵽajoaiki: Ritaja yibaaika jĩjimakaᵽi ᵽoꞌimajare ĩarika yiyaᵽayu. Suᵽa imarĩ ñimarũki takaja ᵽuᵽaribeyuka yiꞌi. “Jesúre ãꞌmitiriᵽẽawaꞌri jia ᵽoꞌimajare imarũ”, ãrĩwaꞌri, baꞌiaja imarika tiyibeyurõꞌõrã naꞌrirũkia imakoᵽeikareka Tuᵽarãre nare tããrika yiyaᵽayu.