1 Co 1 - Porciones del Nuevo Testamento en el idioma Letuama

Ᵽablore ᵽaᵽera ᵽũataeka Corintoreka Jesúre yiꞌyurã imaekarãroꞌsi

¹ ¿Yaje mija ime Corintokarã? Yiꞌi Ᵽablo, suᵽabaatirã majeyomaki Sóstenes ika ᵽaᵽera mijaroꞌsi yija ᵽũatayu. Jia mija imabe. Kiyaᵽaeka uᵽakaja aᵽóstol ñimaokoroꞌsi Tuᵽarãre yire wãꞌmaeka. Suᵽa imarĩ Jesucristorika bojariroka wãrõtaᵽaki ñime.

² Mija Corintokarãoka Tuᵽarãre jiyiᵽuᵽaka õñurã imarĩ, jia kire baawaꞌri mija rẽrĩrijayu. Jesucristorirã mija imamaka Tuᵽarãre mijare wãꞌmaeka kirirã mija imaokoroꞌsi, “Baꞌiaja baabekaja nimarũ”, ãrĩwaꞌri. Iꞌsuᵽaka oyiaja sime ritaja wejeareka Jesucristore ãꞌmitiriᵽẽairãroꞌsi. Maĩᵽamaki kima uᵽakaoka ritaja ĩᵽamaki kime Jesucristo.

³ Maᵽaki Tuᵽarã, suᵽabaatirã maĩᵽamaki Jesucristo, “Jia nare mija baabe”, ãrĩwaꞌri mijaroꞌsi nare yija jẽñerijayu. Jĩjimaka ᵽuᵽaᵽaraka mija imaerã suᵽa yija baayu.

^4-5 Jesucristorirã mija imamaka jia Tuᵽarãre mijare jeyobaarijayu. Suᵽa imarĩ, “Jia mibaayu Tuᵽarã”, kire ñarĩrijayu. Kioka jia mija jaiokoroꞌsi, kirikakaka jia mija õrĩwaᵽuꞌaokoroꞌsi mijare kijeyobaayu. Ritaja kiyaᵽaika uᵽakaja mija baawãrũokoroꞌsi kirika Tuᵽarãre mijare jaꞌatayu Jesúrirã mija imamaka.

⁶ Suᵽa mijaroꞌsi kibaaeka imarĩ, “Jesucristorika bojariroka yijare nabojaeka rita sime”, mija ãrĩwãrũeka.

⁷ Suᵽa imarĩ maĩᵽamaki Jesucristore etarũkirĩmi taꞌabaraka mija ima ᵽoto Esᵽíritu Santore mijare jeyobaayu. Suᵽa imarĩ dakoa jariwaꞌribeyua mijaroꞌsi.

⁸ Iꞌsuᵽakaoka Jesucristore mija ãꞌmitiriᵽẽarijaꞌataꞌsi ãrĩwaꞌri Tuᵽarãre mijaka imajiᵽarãñu. Suᵽa imarĩ maĩᵽamaki Jesucristore ᵽeꞌrietarãrĩmi, “Oka nareka ima”, maki mijareka ãrĩwãrũbesarãki.

⁹ Suᵽa imarĩ, “ ‘Ikuᵽaka yibaarãñu’, kẽrĩka uᵽakaja Tuᵽarãre mare baarãñu”, ãrĩwãrũirã mija ime. Suᵽabaatirã Tuᵽarãja kime Kimaki Maĩᵽamaki Jesucristoka jia jĩjimaka maimabuꞌarijarirã mare wãꞌmaekaki.

Corintokarã ĩꞌrĩka taꞌiarãja ᵽuᵽajoarimarĩaja narakakaja naᵽuᵽajoaeka

¹⁰ Mija ãꞌmitiᵽe yijeyomarã. Jesucristore ᵽũataekaki ñime. Suᵽa imarĩ ikuᵽaka mijare ñañu: Ĩꞌrĩkare ᵽuᵽajoairokaᵽiji mija imabe, rakaka ᵽuᵽajoabekaja. Iꞌsuᵽaka mija baarãkareka ĩꞌrĩka taꞌiarãja mija imarãñu.

^11-12 “Ĩꞌrĩka uᵽaka ᵽuᵽajoabeyurã Corintokarãre ime”, Cloe tãꞌomajare yire ãñu. “ ‘Ᵽablore yija ãꞌmitiriᵽẽayu’, nañu ĩꞌrãrimarã. ‘Yija ᵽuri, Aᵽolore ãꞌmitiriᵽẽairã’, aᵽerãre ãñu. ‘Ᵽedrore ãꞌmitiriᵽẽairã yija ime’, nañu aᵽerã, ‘Jesúre yija ãꞌmitiriᵽẽayu’, ãñurã ᵽuri naroꞌsiji imarã”, ãrĩwaꞌri yire nabojayu.

¹³ ¿Dako baaerã iꞌsuᵽaka mija jaiyu jeꞌe? “Cristo ĩꞌrĩkaja kime Maĩᵽamaki”, ãñurã imakoꞌomakaja, “¿Rĩkimarãja maĩᵽarimarãre ime”, ãñurã uᵽaka mija ime bai? ¿Yiꞌi bai yaᵽua tetaekarã mijaroꞌsi reyaĩjiekaki? “¿Ᵽablorirã yija ime”, ãrĩbaraka ruᵽukoꞌa mija jũjerũjeka bai? Jẽnoꞌo Jesúrirã imawaꞌri ruᵽukoꞌa mija jũjerũjeka.

^14-15 Mijakarã, Crisᵽore suᵽabaatirã Gayore ruᵽukoꞌa yijũjeraᵽe. Saᵽi ãrĩwaꞌri, “Kiuᵽaka oyiaja ᵽuᵽajoairã yija imamaka, Ᵽablore yijare ruᵽukoꞌa jũjeka”, mija ãñaokoroꞌsimarĩa suᵽa yibaaraᵽe. Ĩꞌᵽarãre takaja ruᵽukoꞌa yijũjeka simamaka, “Jia sime yiroꞌsi”, ñarĩᵽuᵽajoayu.

¹⁶ (Mae aᵽea ñoñu. Estéfanas rĩrãre ruᵽukoꞌa yijũjeka. Aᵽerã imabeyurã ruᵽukoꞌa yijũjekarã ñoñuareka.)

¹⁷ “Ruᵽukoꞌa mijũjetaᵽaaᵽe”, ãrĩwaꞌrimarĩa Jesúre yire ᵽũataeka. “Ᵽoꞌimajare tããrimaji kime Cristo”, ãrĩka, “Yirika bojariroka mibojataᵽaᵽe”, ãrĩwaꞌri yire kiᵽũataeka. Jiyurika yimajaroka ãꞌmitiriwaꞌri ᵽoꞌimajare yire yiꞌrirũ ãrĩwaꞌrimarĩa Jesúrika bojariroka yiwãrõyu. Yiᵽuᵽaka yire ãñu uᵽakaja naꞌmitirijiyuika takaja nare yiwãrõrikareka, “Mare tããwaꞌri yaᵽua tetaekarã Cristore reyaeka”, ãrĩrika õrĩbeyurã ᵽoꞌimajare imajããeka.

“Maroꞌsi Jesucristore reyaekaᵽi”, ãrĩwaꞌri jia maimarijayu ãñua jairõꞌõ

¹⁸ Suᵽa imarĩ Jesucristore yaᵽua tetaekarã naᵽatakĩaekakaka majaroka ãꞌmitirikoꞌomakaja, “Waᵽuju õrĩᵽũaberiri oka sime”, nañu baꞌiaja imarika tiyibeyurõꞌõrã aꞌrirũkirã. Tuᵽarãre yiꞌriwaꞌri kiᵽõꞌirã aꞌrirũkirã ᵽuri, “Tẽrĩwaꞌribaji imaki kime. Ika majarokaᵽi Tuᵽarãre mare tããrãñu”, ãñurã maime.

¹⁹ Mija ĩabe, ikuᵽaka sabojayu mamarĩji Tuᵽarãroꞌsi bojaĩjirimajire kimajaroᵽũñurã oꞌoeka: “ ‘Jia ᵽuᵽajoarika õñurã imarĩ, jiitaka sime yija wãrõika’, nañua dako waᵽamarĩa ñamajĩ sayibaarãñu naroꞌsi. Jia naᵽuᵽajoakoᵽeika ñiariᵽeꞌyorãñu”, Tuᵽarãre ãrĩka sãñu oꞌoeka ᵽũñurã.

²⁰ Jesúre reyaekaᵽi ãrĩwaꞌri bikija oꞌoeka ᵽũñu bojatika uᵽakaja sajarika. Suᵽa imarĩ jia ᵽuᵽajoarika õñurã, noñuaᵽi Tuᵽarãre õrĩwãrũbeyurã. Iꞌsuᵽakaoka Moisés imaekakire jãꞌmeka wãrõrimaja, saᵽi ᵽoꞌimajare natããrũkimarĩa sime. Suᵽabaatirã naᵽuᵽaka nare ãñu uᵽakaja ᵽuᵽajoatirã jia jaiwãrũirãoka, saᵽi Tuᵽarã ᵽõꞌirã eyawãrũbesarãñurã. Iꞌsuᵽaka ᵽuᵽajoairãre dakoa waᵽamarĩa naᵽuᵽajoaika jarirũjeiki Tuᵽarã.

²¹ Ritaja õrĩᵽataiki imarĩ, “Noñuaᵽi yire õrĩbesarãñurã ᵽoꞌimaja”, Tuᵽarãre ãrĩka. Suᵽa imarĩ ikuᵽaka simarika kiyaᵽaeka: Kirika bojariroka yiꞌyurã baꞌiaja jũarũkirã nimakoᵽeka imakoꞌomakaja Tuᵽarãre nare tããeka, “Waᵽuju ᵽakirika sime Jesucristorika bojariroka”, kire ãꞌmitiriᵽẽabeyurãre ãrĩkoꞌomakaja suᵽa kibaaeka.

²² “Karemarĩa rita Ᵽablore yijare bojarikareka, maikoribeyua Tuᵽarãre jeyobaaikaᵽi yijare kibaabeajããeka”, judíotatarãre ãrĩᵽuᵽajoayu. Judíorãkamarĩrã ᵽuri, “Yija ᵽuᵽajoaika uᵽakamarĩa Jesucristorika bojariroka imamaka, sayija yaᵽabeyu”, narĩᵽuᵽajoayu.

²³ Tuᵽarãre yiꞌyurã ᵽuri, “Yaᵽua tetaekarã maroꞌsi Jesúre reyaeka”, ãrĩwaꞌri majarobojarijayurã. Samabojarika ãꞌmitiririyaᵽabeyurã imarĩ, judíotatarãre saᵽeꞌyoyu. Judíotatamarĩrãoka sãꞌmitiritirã, “Waᵽuju õrĩᵽũaberiri oka sime”, nañu.

²⁴ Suᵽa narĩkoꞌomakaja ĩꞌrãrimaki judíorãka, suᵽabaatirã judíorãkamarĩrãoka Tuᵽarãre wãꞌmaekarã imarĩ, Jesúrika bojariroka ãꞌmitiritirã sayiꞌyurã yuᵽaka. “Cristoᵽi ãrĩwaꞌri mare tããekaki imarĩ, ritaja tẽrĩwaꞌribaji imaki kime Tuᵽarã. Suᵽabaatirãoka ritaja õñuka kime”, marĩᵽuᵽajoayu.

²⁵ Tuᵽarãrika õrĩwãrũbeyurã ᵽuri, “Kimakire reyaerã Tuᵽarãre ᵽũatamaka waᵽuju õrĩᵽũabekaja suᵽa kibaaeka”, ãñurã kire ãꞌmitiriᵽẽabeyurã. “Dika jariwaꞌririmarĩa yija õñu”, narĩkoᵽekoꞌomakaja, norĩkoᵽeika tẽrĩwaꞌribaji sime Tuᵽarãre õñua. “Kimakire reyaerã kiᵽũatamaka tẽrĩrimarĩka kimaeka”, nañu. Suᵽa narĩkoꞌomakaja, “Tẽrĩribaji yija ime”, narĩkoᵽeyu iꞌsuᵽakamarĩa sime. Kimakire ᵽũatawaꞌri nare tẽrĩribaji kime.

²⁶ Mija ãꞌmitiᵽe yijeyomarã. “Kũᵽajĩji õrĩᵽũairã nime”, ᵽoꞌimajare mijareka ãrĩkoꞌomakaja Tuᵽarãre mijare wãꞌmaeka. Suᵽabaatirã kũᵽajĩji nimaeka mijakarã ᵽoꞌimajare jãꞌmerimaja. Kũᵽajĩjioka nimaeka imatiyarimaja makarã mija watoᵽekarã.

^27-28 Tuᵽarãre mijare wãꞌmaeka, “Jia õrĩᵽũabeyurã nime”, kire õrĩbeyurãre mijareka ãrĩkoꞌomakaja. “Jia õñurã yija ime”, ãñurãre ᵽuᵽaᵽeꞌrirũ, “¿Baꞌiaja maᵽuᵽajoayu bai?”, narĩwãrũrũ ãrĩwaꞌri, iꞌsuᵽaka kibaaeka. Suᵽabaatirã, “Imatiyabeyurã nime”, narĩkarãre Tuᵽarãre wãꞌmaeka, kirirã nimaokoroꞌsi. “Tẽrĩrã yija ime”, ãrĩkoᵽekarãre wayuᵽiꞌrirũ ãrĩwaꞌri. Ᵽoꞌimaja jiyiᵽuᵽaka õrĩbeyurãre kiwãꞌmaeka, Tuᵽarãre yiꞌribeyurãre jiyiᵽuᵽayeeikakaka, “Dako waᵽamarĩa sime”, ᵽoꞌimajare ãrĩwãrũokaroꞌsi, suᵽa kibaaeka.

²⁹ Iꞌsuᵽaka baaiki Tuᵽarãre imamaka, kĩaika wãjitãji, “Imatiyaiki ñimamaka, yire miwãꞌmaeka”, ãrĩᵽuᵽajoarika imabeyua.

³⁰ Suᵽa simamaka Tuᵽarãᵽi ãrĩwaꞌritakaja Jesúre yiꞌyurã majayu. Kimakiᵽi ãrĩwaꞌri mare kitããeka õñurã imarĩ, “Ritaja ᵽuᵽaiki kime”, marĩwãrũyu. Cristore reyaekaᵽi ãrĩwaꞌri baꞌiaja mabaakoᵽeka waᵽakoyika. Suᵽa imarĩ jiirã maime kiñakoareka. Kirirã mare jarirũjekaki imarĩ, baꞌiaja mabaakoꞌomakaja jiaᵽi Tuᵽarãre mare imarũjeyu.

³¹ Iꞌsuᵽaka maroꞌsi kibaaeka simamaka, ikuᵽaka sabojayu kioka oꞌoeka ᵽũñurã: “Maᵽuᵽayariji maimakaka jĩjimaka bojabekaja Tuᵽarãre maroꞌsi baaika takaja jĩjimakaᵽi mabojarijariyeꞌe”, ãrĩwaꞌri sabojayu.