YEHEZKIEL 9 - Tanou Moonsoi Timugon

Jirusalim inukuman

¹ Kopongo raginio norongog Ku i Aki Kapuuno' nampiau, “Ibok no, akau ondo' mangukum ra bandar ti. Ibito' kinandoi min.”

² Pulusat ru onom ngaulun ungkuyon minatong intor ra tampilon ra liwar ru kulobon garabang Baloi ru Tuhan, am sigagama' nagibit ra kinandoi. Minaya' risilo sangulun ondo' nambayang ra linon am nagibit ra kuliamos koson manulis. Ilo ngaangai' minatong am minigor mamaar ra altar gangsa'.

³ Sinda ondo' manguliat, tatandu' ru ratangan ri Aki Kapuuno' ru Israil, mininsawat boo intor ra kirub-kirub am mininsir intor ra intok nano am mongoi ra kulobon subalan ra Baloi ru Tuhan. Nampiau Tuhan ra ulun ondo' nambayang ra linon no, am indagu,

⁴ “Ongoyo' titikop ru bandar Jirusalim am tatandui' rabas ru ngaangai' ulun ondo' mangiluk guang am mapagon sabap ra binaal ondo' makauyuyu' ondo' binaal giu' ra bandar no.”

⁵ Norongog ku i Aki Kapuuno' minindagu ra ungkuyon-ungkuyon ra bokon, “Baya' kano riso mongoi ra titikop ru bandar am potoyo' moonong ulun. Pai' labusi' sangulun pana. Pai' pakaasi' ra osoi pana.

⁶ Potoyo' ulun matutuo, buayoi, ralaa, ina' am lalaing-lalaing. Kaa' pai' guuto' sangulun pana ondo' makatatandu' ra rabas. Intarin ra giti, intor ra Baloi Kutu.” Ginio ra tinalimpuunan nilo kandoi am namatoi ra tingganai-tingganai ondo' minigor giu' ra Baloi ru Tuhan.

⁷ Indagu i Aki Kapuuno' risilo, “Jamali' noyo Baloi ru Tuhan. Sosoko' liliut-liliut nano ra baangkai. Talimpuun kano mangandoi!” Ilo pana tumalimpuun mamatoi ra ulun giu' ra bandar no.

⁸ Tatanga' pamatayan no masauk, soroi aku ra giu' misangulun. Igulatur aku liliwa' nampiau, “Iou Tuhan Raja', siminangit kou kia kaga' ra Jirusalim saboi masaga' Kou mamatoi ra moonong ulun ondo' lakat poyo naayag giu' ra Israil?”

⁹ Taam i Aki Kapuuno', “Mamagun ru Israil am Jiuda nambaal ra tula ondo' maayo kaga'. Namatoi ilo giu' ra titikop ru pagun, am sinosok Jirusalim ra kalaatan. Minindagu ilo ra Aku, Tuhan, nangiruan noyo ra pagun nilo, am kalo makakito Aku risilo.

¹⁰ Kaa' kalo makaasi' Aku risilo. Mogondo' pamakuan Kuno risilo koson ra pinamakuan nilo ra ulun bokon.”

¹¹ Kopongo raginio ulun ondo' nambayang ra linon no siminaguli' am nambala' ra Tuhan, “Binaal ku noyo susuban Muno.”