YEHEZKIEL 8 - Tanou Moonsoi Timugon

YEHEZKIEL NAKAALAP RA PINAINTALANG KARUO INTOR RI AKI KAPUUNO' ( 8:1—10:22 ) Sambaan sinungkalalaing giu' ra Jirusalim

¹ Paat ra orou kalimo, sila' koonom ralalom ru bilor koonom paat ra akai ralalom ru pamatiran, tingganai-tingganai ru ulun pinatiran intor ra Jiuda soroi giu' ra baloi kuno. Pulali' ru kuasa' ru Tuhan Raja' nanguasa' raki'.

² Nantingaa' aku am nakakito ra rondo' ondo' natilu ra ulun. Intor ra awak nano am mongoi ra ragana', inan nano koson ra apui bibilak; intor ra awak nano am mongoi ra rasawat, mapaang io koson ra gangsa' inisasan.

³ Pinatutui No rondo' ondo' natilu ra kalindu' am takupo' abuk kuno. Ralalom ru pinaintalang no Ambiluo ri Aki Kapuuno' nangkayang raki' ra masawat am nagibit raki' ra Baloi ru Tuhan giu' ra Jirusalim, giu' ra kulobon subalan giu' ra liliut ra ralalom ondo' tampilon ra ralayo. Giu' no soroi sinungkalalaing ondo' napasingkual ra sangit ri Aki Kapuuno'.

⁴ Giu' no nakakito aku ra sinda ondo' manguliat, ondo' tatandu' ratangan ri Aki Kapuuno' ru Israil, koson ra ondo' nakito ku paat ra aku soroi giu' ra kiing ru Sungoi Kibar.

⁵ Indagu i Aki Kapuuno' raki', “Okou ulun mapandai matoi, ilai' tampilon ra ralayo.” Aku pana nagilong, am nakito ku sinungkalalaing ondo' napasingkual ra sangit ri Aki Kapuuno' no mamaar ra altar giu' ra ralan sumubol ra kulobon garabang.

⁶ Indagu i Aki Kapuuno' raki', “Okou ulun mapandai matoi, nakito mu kia atan tatanga' masauk? Ilai' binaal makauyuyu' ondo' binaal ru ulun ru Israil, ondo' napainggalur poyo boo Raki' intor ra intok Kuno ra mapasau. Makakito kou poyo ra baal-baal ondo' makauyuyu' poyo kaga'.”

⁷ Nagibit Io raki' ra kulobon sumubol giu' ra liliut ra liwar am nanulu' raki' ra rondo' luang giu' ra timbok.

⁸ Indagu Io, “Okou ulun mapandai matoi, kaayoo' luang ti.” Aku pana nambaal raginio, am kakito rondo' kulobon.

⁹ Indagu Io raki', “Subol no am ilai' binaal ondo' malaat am makauyuyu' ondo' binaal nilo ra giu' no.”

¹⁰ Aku pana siminubol am nagilong. Rinding ra giu' no linukisan ra ngaangai' salinut ru bibiag mamuntana' am bibiag majamol ra bokon, am niayuk gambar ru sinungkalalaing ondo' sambaan ru ulun ru Israil.

¹¹ Tulu' ngoopor ngaulun tingganai ru Israil soroi ra giu', nakaaya' i Jaajanya anak ri Sapan. Moonong ulun nampaguut ra rondo' pambulian ra baa ondo' malisun kaga'.

¹² Pangkuot boo i Aki Kapuuno' raki', “Okou ulun mapandai matoi, nakito mu kia atan ondo' tatanga' baalon ru tingganai ru Israil ra sininok? Ilo ngaangai' sumambayang giu' ra ralalom ru lamin ondo' nososok ra sinungkalalaing am sasaban ra kalo makito Ku ilo am nangiruan Aku noyo ra pagun ti.”

¹³ Indagu boo Tuhan raki', “Makakito kou risilo mambaal ra baal-baal ondo' makauyuyu' poyo intor raginio.”

¹⁴ Io pana nagibit boo raki' giu' ra kulobon garabang ralayo ra Baloi ru Tuhan. Giu' no pinakito No aku ra ruandu'-ruandu' tatanga' mantangi' ra pinatayan ru Dewa Tamus.

¹⁵ Pangkuot Io, “Okou ulun mapandai matoi, nakakito kou kia raginio? Makakito kou poyo ra baal-baal ondo' makauyuyu' poyo.”

¹⁶ Ginio ra ibito' No aku ra liliut ralalom giu' ra Baloi ru Tuhan. Giu' no, mamaar ra kulobon subalan mongoi ra intok matulai, lolot ru altar am langgar, mokoondo' olo'-olo' ruo ngoopor am limo ngaulun ungkuyon. Tinalikuran nilo intok matulai no am kiminuku' ra tampilon sirangon koson sumamba ra mato ru orou ondo' sumirang.

¹⁷ Indagu Tuhan raki', “Okou ulun mapandai matoi, nakakito kou kia raginio? Mamagun ru Jiuda kalo poyo najala' ra binaal nilo ondo' makauyuyu' kapoam kalaatan ondo' binaal nilo ra titikop ru pagun ti. Inambai nilo nambaal ra ngaangai' no ragiti niayuk, ralalom ru Baloi Kuno am nampasangit poyo boo Raki'. Ilai' ati kulaan ilo magasab Raki' ra ralan ondo' makauyuyu' kaga'!

¹⁸ Makaliman ilo ra kinoporos ru sangit Kuno. Kalo palabuson Ku ilo kapoam makaasi' risilo. Gumolok ilo toojo makiasi' Raki', kaa' kalo rongogon Ku ilo.”