YEHEZKIEL 6 - Tanou Moonsoi Timugon

Magulas Tuhan ra sumamba ra sinungkalalaing

¹ Indagu Tuhan raki',

² “Okou ulun mapandai matoi, ilai' gunung-gunung ru Israil, am posoboyo' tanou Kuno ra gunung-gunung no.

³ Susubo' gunung-gunung ru Israil rumongog ra ragu ru Tuhan am magilong ra baal ondo' paraguon Kuno, Tuhan Raja' ra gunung, bulur, tana' marata' ra lolot ru gunung-gunung am limayak. Atarin Ku ilang koson mamuso ra intok-intok sumamba ra sinungkalalaing.

⁴ Altar puuton, am intok panalaban ra kaminyan popolon. Ngaangai' ulun ra giu' no potoyon ra saang ru sinungkalalaing nilo.

⁵ Baalon ku baangkai ru ulun ru Israil makabanta' ra ati-ati; am bungul nilo makabanta' ra liput ru altar-altar no.

⁶ Ngaangai' bandar giu' ra Israil pusoon maa' raginio altar am sinungkalalaing nilo mopopol toojo, intok panalaban ra kaminyan nilo matutuk, am ngaangai' ondo' binaal nilo lumiot.

⁷ Ulun ondo' potoyon giu' ra ati pana intok, am ilo ondo' maayag mangiou ra Aku noyo Tuhan.

⁸ Polosoon Ku santayaran intor risilo makalabus intor ra pamatayan no, am pantutuliaron giu' ra pagun-pagun ra bokon.

⁹ Giu' no maayag ilo ralalom ru pamatiran. Makakara' ilo boo Raki' am makaliman ra Aku nangukum am nanuyu' risilo sabap ra kalo gumagaya' ilo Raki'. Nangiruan ilo Raki' am nampili' ra sinungkalalaing, am sala' ka Aku. Majamalan ilo ra inan nilo galama' sabap ra binaal ondo' malaat am makauyuyu' ondo' binaal nilo.

¹⁰ Bagu no makapandai ilo ra Aku noyo Tuhan am ra pampakaraan Kuno sala' ka lolob magabau.”

¹¹ Indagu Tuhan Raja', “Palaso' kalindu'! Kariboko' kinjang ru kalayam! Panulaboi no sabap ra ngaangai' binaal ondo' malaat am makauyuyu' ondo' binaal ru bansa' ru Israil. Matoi ilo sabap ra pangayawan, bitilan kapoam maruol tumapik.

¹² Ilo ondo' maalur matiu' ru maruol am matoi; ilo ondo' mamaar matoi ralalom pangayawan; osoi ayuk ondo' lakat poyo maayag am mamimio matoi ra bitilan. Makaliman ilo ra ruol ru sangit Kuno.

¹³ Baangkai nilo makabanta' ra lolot ru sinungkalalaing am giu' ra liliut ru altar-altar, giu' ra rasawat ru moonong bulur ondo' masawat, giu' ra saau ru moonong puun tataun masansam am moonong puun tataun oak ondo' maayo, giu' ra moonong intok papataakan nilo ra taak simbalui ondo' sinolob ra sinungkalalaing nilo. Bagu no moonong ulun makapandai ra Aku noyo Tuhan.

¹⁴ Iou, paakangon Ku kalindu' Kuno am tutukon ku pagun nilo saboi masauk ra kolondo' tutuu' am masiluk, intor ra tana' kaagisan giu' ra rabugus saboi ra bandar Ribla giu' ra ralayo. Ngaangai' intok ondo' inayanan ru ulun ru Israil, pusoon. Bagu no moonong ulun makapandai ra Aku noyo Tuhan.”