YEHEZKIEL 5 - Tanou Moonsoi Timugon

Linompor ri Yehezkiel abuk

¹ Indagu Tuhan, “Okou ulun mapandai matoi, alapo' rondo' ilang ondo' malarom am lomporo' jangut am abuk muno. Kopongo raginio timbango' abuk no, am pitaluo'.

² Solobo' sampitalu ra abuk no giu' ra ralalom ru bandar mopongo' pagawangan maampus. Ondo' sampitalu poyo musiti' totokon mu ra ilang muno liliwa' lumiput ra bandar no. Sampitalu ondo' pupus musiti' pasiabon mu, am ilowon Ku ginio ra ilang Kuno.

³ Alapo' kukula' ngantiis abuk am polopoto' ra liningkom ra sukub muno.

⁴ Alapo' boo kukula' ngantiis abuk no am pasuboo' ra ralalom ru apui saboi makai' kosolob. Apui no rumalat ra ngaangai' bansa' ru Israil.”

⁵ Indagu Tuhan Raja', “Ilai' Jirusalim no! Paayanon Ku bandar no giu' ra pusor ru tana' ti, am pagun-pagun ra bokon giu' ra libung nano.

⁶ Kaa' Jirusalim giminuor ra susuban Kuno, am nasingkual ra malaat poyo intor ra bansa'-bansa' ra bokon, mulu' poyo kalo gumagaya' intor ra pagun-pagun ra libung nano. Minanggal Jirusalim ra susuban Kuno am kalo gumagaya' ra ukum Kuno.

⁷ Okou Jirusalim, rongogo' atan ondo' paraguon Kuno, Tuhan Raja'. Sabap ra kalo giminagaya' kou ra ukum Kuno am kalo siminugut ra susuban Kuno, namparatong kou ra masuang poyo kapaganan intor ra bansa'-bansa' ra liput muno. Minaya' kou ra kaulayan ru bansa'-bansa' ra bokon.

⁸ Ginio ra Aku, Tuhan Raja' mindagu rirun raino ra makimantula' Aku rirun. Ukumin Tokou giu' ra saang ru ngaangai' bansa'.

⁹ Sabap ra ngaangai' binaal muno ondo' kasisangin Kuno, mangukum Aku ra Jirusalim koson ondo' kalo igondo' Kuno baalo' am kalo boo baalon Ku.

¹⁰ Kinibit nano, giu' ra Jirusalim, matuo mangakan ra anak nilo, am anak mangakan ra matuo nilo. Mangukum Aku rirun am mampatutuliar ra osoi ayuk ondo' lakat poyo maayag ra ngaangai' intok.

¹¹ “Aku noyo i Aki Kapuuno' ondo' maayag, Tuhan Raja', am gitio no ragu Kutu: Sabap ra jinamalan mu Baloi Kuno ra baal malaat am makauyuyu', umokon Tokou ra kalo makaasi'.

¹² Sampitalu ra mamagun muno matoi sabap ra maruol am bitilan giu' ra ralalom ru bandar, sampitalu matoi motobok ru ilang giu' ra liwar bandar, am sampitalu poyo pantutuliaron Ku ra ngaangai' intok am ilowon Ku ra ilang.

¹³ “Mailian mu kinoporos ru sangit am lasu' ru guang Kuno saboi Aku majala'. Paat ra ngaangai' no masauk, bagu no mangintopot kou ra Aku, Tuhan, nakaindagu rirun nabaya' ra sangit sabap ra kalo gumagaya' kou Raki'.

¹⁴ Moonong ulun intor ra pagun-pagun ra paginggaar ondo' mansail rirun magasab am minggalur rirun.

¹⁵ “Paat ra Aku sumangit am lumasu' guang, ukumin Tokou, saboi ra ngaangai' bansa' ra liput muno malaa'. Magasab am mangiis ilo rirun.

¹⁶ Langgain Ku mampalutu' ra akanon rirun am polosoon mamagun muno mangaitilan. Makaliman kou ra mapari' ra maitilan koson ra anak panah malarom ondo' mamuso rirun.

¹⁷ Porotongon Ku maruol tumapik, pampatayan am pangayawan koson mamatoi ra mamagun muno. Porotongon Ku bitilan am niayuk bibiag masigo koson mamatoi ra anak-anak nilo. Aku, Tuhan nakaindagu noyo.”