YEHEZKIEL 47 - Tanou Moonsoi Timugon

Timug ondo' tumilis intor ra Baloi ru Tuhan

¹ Nagibit ungkuyon no raki' sumaguli' ra kulobon subalan ra Baloi ru Tuhan. Nakito ku timug tumilis intor ra ragana' ru kulobon mongoi ra tampilon sirangon, koson ra Baloi ru Tuhan niayuk tumingkuang ra tampilon ra sirangon. Timug no tumilis intor ra ragana' ru guang ru kulobon Baloi ru Tuhan ra tampilon rabugus, mansail ra kiing ru rabugus ru altar.

² Ungkuyon no pana nagibit boo raki' mingkual intor ra libung Baloi ru Tuhan mansail ra kulobon garabang ralayo, am nangitang raki' mongoi ra kulobon garabang sirangon. Sungoi boborok no tumilis intor ra kiing ru rabugus ru kulobon garabang no.

³ Namakai ra tataun tutuku' nano nanuku' ungkuyon no 500 ngamito mongoi ra tampilon sirangon, maya' ra aug ru sungoi no, am nanusub raki' maya' raginio. Timug no polos ra buntingol ru kalayam kuno.

⁴ Nanuku' io 500 ngamito poyo, am timug nano nakasaboi ra atur kuno. Nanuku' io 500 ngamito poyo, am timug no nakasaboi ra awak kuno.

⁵ Nanuku' io 500 ngamito poyo, am giu' no timug no nasauk noyo ra sungoi malandom saboi kalo makalaup aku ondo' ayuk am mansarui.

⁶ Indagu ungkuyon no raki', “Okou ulun mapandai matoi, ilai' toojo ngaangai' ti.” Nagibit io boo raki' ra tobo ru sungoi.

⁷ Paat ra aku nakasaboi ra giu' no, nakito ku masuang kaga' puun tataun giu' ra karuruo tobo ru sungoi no.

⁸ Indagu io raki', “Timug ondo' tumilis mongoi ra tampilon sirangon mansail ra pagun ti, am tumuun mongoi ra Limayak Sungoi Jordan am mongoi ra Raat Matoi. Paat ra timug no makasaboi ra ralalom ru Raat Matoi, timug ru raat ondo' maasin no pana aligin ra timug mapalo.

⁹ Ati ayuk tilisan ru timug no, giu' no niayuk mokoondo' ra ngaangai' salinut ru bibiag am papait. Timug no mampasauk ra timug giu' ra Raat Matoi mapalo, am ati ayuk tilisan ru timug no, giu' no mokoondo' ra kaayagan.

¹⁰ Intor ra Taur ru Timug In-Gidi saboi ra Taur ru Timug In-Iglaim, mokoondo' ra masuang ulun mangimpait manuug ra ralo giu' ra nagas no. Giu' ra ralalom ru timug no mokoondo' ngaangai' salinut ru papait koson ondo' soroi giu' ra Raat Tanga'.

¹¹ Kaa' timug giu' ra luogon am tana' natimugan giu' ra gawar ru nagas no kalo mapalo, kaa' magulayun masauk ra puun ru usi'.

¹² Giu' ra karuruo tobo ru sungoi no tumuu' mansalinut puun kinawa'. Raun ru puun-puun tataun no kalo lumonot, am puun-puun tataun no kalo lumonggo' mangkawa'. Moonong sila' puun-puun tataun no mangkawa' ra ondo' bagu, sabap ra puun-puun tataun no tinimugan ru timug ondo' tumilis intor ra Baloi ru Tuhan. Kawa'-kawa' no masauk ra akanon am raun-raun no alapon ra tatapis.”

Balitan ru pagun ru Israil

¹³ Indagu Tuhan Raja', “Ondo' sumunu' ti iono balitan ru tana' ondo' tinayar ra mopor am ruo bansa' ru Israil. Bansa' ri Jusup musiti' makaalap ruo tayar.

¹⁴ Magibot Aku ra kinamatuaan min ra Aku nangani' risilo ra tana' ragitio. Ginio ra, tayaro' noyo tana' ti ra pogondoon ra akau po ngai'.

¹⁵ Balitan giu' ra ralayo tumalimpuun intor ra Raat Tanga', am mongoi ra tampilon sirangon saboi ra bandar Gitlon, mongoi ra Ginting Gamat, mongoi ra bandar Jidad,

¹⁶ mongoi ra Birota am Sibraim (bandar-bandar ondo' intok no lolot ru libung ru pamarintaan Damsyik am pamarintaan Gamat), am Tikon (bandar ondo' intok no giu' ra balitan ru pamarintaan Gauran).

¹⁷ Ginio ra balitan giu' ra ralayo tumalimpuun intor ra Raat Tanga' mongoi ra tampilon sirangon saboi ra bandar Inon; Damsyik am Gamat intok no giu' ra tampilon ralayo ru balitan no.

¹⁸ Balitan giu' ra sirangon mongoi ra rabugus, intor ra rondo' intok lolot ru pamarintaan Damsyik am pamarintaan Gauran. Sungoi Jordan noyo balitan ru tana' Israil tampilon ra kalasaan, am Giliad tampilon ra sirangon, saboi ra bandar Tamar giu' ra nagas ru Raat Matoi.

¹⁹ Balitan rabugus mongoi ra tampilon kalasaan rabugus, intor ra Tamar mongoi ra Taur ru Timug Kadis-Miriba, am mongoi ra kalasaan ralayo ra galur ru balitan ra pagun ru Misir, saboi ra Raat Tanga'.

²⁰ Balitan ralayo binaal ru Raat Tanga', am mongoi ra ralayo saboi ra rondo' intok giu' ra tampilon kalasaan ru Ginting Gamat.

²¹ Tayaro' tana' no ra bansa'-bansa' mino.

²² Tana' no longgom min ra sabubuoi no. Ulun bansa' ru bokon ondo' minayan ra gino ngai' min, ondo' naganak ra anak-anak giti ra pagun ti niayuk musiti' mangapu ra tayar paat tayaron min tana' no. Pamakuan risilo musiti' koson ra ulun mamagun ra pagun ru Israil, am musiti' mangundi' koson makaalap ra tayar ru tana' nilo mababaya' ra bansa' ru Israil ra bokon.

²³ Moonong ulun bansa' ru bokon ondo' nasauk ra mamagun ru pagun ti musiti' aniin ra tayar ru tana' mababaya' ra bansa' giu' ra intok inayanan nilo. Aku, Tuhan Raja', nakaindagu noyo.”