YEHEZKIEL 46 - Tanou Moonsoi Timugon

Ulun manguasa' am aturan ru pangiantakan

¹ Indagu Tuhan Raja', “Kulobon garabang sirangon ondo' tumingkuang ra liliut ralalom musiti' angabin buoi onom ngoorou mangandoi. Kaa' paat ra orou Sabat am Pangiantakan Sila' Bagu, kulobon garabang no musiti' ukabin.

² Ulun manguasa' sumubol intor ra liliut ra liwar mongoi ra intok maayo am migor ra sapapa' ru lugu' kulobon garabang no. Liliwa' raginio imam-imam no mampataak ra taak simbalui koson mapabansuk ra Tuhan am taak simbalui koson makibarakat ra Tuhan; iono taak-taak simbalui ondo' pataakin ru ulun manguasa'. Ulun manguasa' no musiti' migulatur am sumamba ra Tuhan giu' ra guang ru kulobon garabang no, am mingkual saguli'. Kulobon garabang no kalo angabin saboi ra rondom.

³ Paat ra orou Sabat am Pangiantakan ra Sila' Bagu, ngaangai' mamagun niayuk musiti' migulatur am sumamba ra Tuhan giu' ra saang guang ru kulobon garabang no.

⁴ Paat ra orou Sabat, ulun manguasa' musiti' mampataak ra taak simbalui ra Tuhan, iono taak simbalui koson mapabansuk ra guang ru Tuhan ondo' ginilo intor ra onom ngainan anak domba am sanginan domba gawayan. Ngaangai' no kalo najamaran.

⁵ Tayar ru moonong sanginan domba gawayan, ulun manguasa' musiti' mampataak ra 17.5 ngalito unor-unor; am tayar ru moonong sanginan domba, musiti' io mampataak ra unor-unor ra suang ru kasagaan nano. Moonong 17.5 ngalito unor-unor musiti' pabayaan ra 3 ngalito umau jaitun.

⁶ Paat ra Pangiantakan ra Sila' Bagu, musiti' io mampataak ra sanginan anak sapi' gawayan, onom ngainan anak domba, am sanginan domba gawayan. Ngaangai' no kalo najamaran.

⁷ Tayar ru moonong sanginan sapi' gawayan am moonong sanginan domba gawayan, musiti' io mampataak ra unor-unor ra suang ru kasagaan nano. Moonong 17.5 ngalito unor-unor musiti' pabayaan ra 3 ngalito umau jaitun.

⁸ Ulun manguasa' musiti' sumubol mansail ra intok maayo no am mingkual mansail ra ralan ra nogondo'.

⁹ Paat ra mamagun ru bandar matong koson sumambayang ra Tuhan paat ra orou pangiantakan, sumubol ilo mansail ra kulobon garabang ralayo, musiti' mingkual mansail ra kulobon garabang rabugus. Ilo ondo' sumubol mansail ra kulobon garabang rabugus, musiti' mingkual mansail ra kulobon garabang ralayo. Kolondo' osoi pana iowon mingkual mansail ra kulobon ondo' subalan nano, kaa' musiti' io mingkual mansail ra kulobon giu' ra sandaup no.

¹⁰ Ulun manguasa' musiti' sumubol ra Baloi ru Tuhan mababaya' ra mamagun, am mingkual mababaya' ra mamagun.

¹¹ Paat ra orou-orou bunsagan am pangiantakan, unor-unor suang 17.5 ngalito musiti' pataakon pabayaan ra moonong sapi' gawayan kapoam domba gawayan. Ulun ondo' sumambayang iowon mampataak ra unor-unor ra suang ru kasagaan nano mabaya' ra moonong sanginan anak domba. Moonong 17.5 ngalito unor-unor musiti' pabayaan ra 3 ngalito umau jaitun.

¹² Amon ru ulun manguasa' moogot mangani' ra taak toojo ayuk ra Tuhan, ondo' taak simbalui koson mapabansuk ra guang ru Tuhan, kapoam taak simbalui koson makibarakat ra Tuhan, kulobon garabang sirangon ondo' mongoi ra liliut ralalom musiti' ukabon riso. Musiti' io mampataak ra taak simbalui no nogondo' koson ra binaal no paat ra orou Sabat, am kulobon garabang musiti' angabin saguli' malupus io mingkual.”

Taak moonong orou

¹³ Indagu Tuhan, “Moonong orou ra susuab ti, sanginan anak domba ondo' umur sambilor am kalo najamaran musiti' pataakon koson ra taak simbalui koson mapabansuk ra guang ru Tuhan.

¹⁴ Moonong susuab ti musiti' pataakon niayuk 2 ngakilogram unor-unor am 1 ngalito umau jaitun koson polotokon ra unor-unor no. Aturan ti musiti' gagayaan ra sabubuoi no.

¹⁵ Anak domba, unor-unor am umau jaitun no musiti' pataakon ra Tuhan ra moonong susuab ti koson ra sabubuoi no.”

Tana' longgom ru ulun manguasa'

¹⁶ Tuhan Raja' nangani' ra susuban, “Amon ru ulun manguasa' mangani' ra santayaran ra tana' tungkuson nano ra sangulun ra anak ungkuyon nano koson ra tangguang, tana' no masauk ra longgom ru anak no am ginio rapu' ru sasambaloi nano.

¹⁷ Kaa' amon ru ulun manguasa' mangani' ra santayaran ra tana' tungkuson nano ra sangulun pagawai nano, tana' no masauk ra longgom ru ulun manguasa' no poyo paat ra Bilor Papasagulian. Tana' no longgom ru ulun manguasa', am io am anak-anak ungkuyon nano ayuk magulayun mompolonggom ra tana' no.

¹⁸ Ulun manguasa' no kalo iowon mampagaau ra tana' tungkuson ru mamagun nano. Tana' ondo' pataakin no ra anak-anak ungkuyon nano musiti' tana' nano galama' ondo' inaru' noyo riso, maa' raginio kalo mangimbolo' io ra osoi pana ulun Kuno ra mampagaau ra tana' nilo.”

Rapuan-rapuan giu' ra Baloi ru Tuhan

¹⁹ Ungkuyon no nagibit boo raki' ra kulobon ondo' mamaar ra kulobon garabang, giu' ra tampilon rabugus ru liliut ralalom, mongoi ra lamin-lamin matulai ondo' tumingkuang ra ralayo. Imam-imam no ra lamin-lamin no. Nanulu' ungkuyon no ra rondo' intok giu' ra tampilon kalasaan ru lamin-lamin no

²⁰ am indagu raki', “Gitio noyo intok tayar ru imam-imam no mantanok ra kual intor ra taak simbalui koson mamuso ra tula am taak simbalui koson mambayar ra kalubatan. Panggangon niayuk ru imam taak simbalui ra unor-unor ra rapuan-rapuan ragitio. Koson raginio noyo taak-taak simbalui ondo' mapasau no kalo ibiton ra liliut ra liwar saboi makajamar ra mamagun.”

^21-22 Kopongo raginio nagibit io raki' mongoi ra liliut ra liwar, am nampakito io raki' ra giu' ra moonong pisuk mokoondo' poyo liliut ondo' boborok: gawar no 20 ngamito am pila' no 15 ngamito.

²³ Moonong liliut no mokoondo' ra timbok batu giu' ra liput nano, am giu' ra timbok no mokoondo' intok pampaangan ra apui.

²⁴ Indagu ungkuyon no raki', “Gitio noyo rapuan-rapuan intok pantanakan ru ulun mangandoi ra Baloi ru Tuhan ra taak simbalui ondo' pataakon ru mamagun.”