YEHEZKIEL 43 - Tanou Moonsoi Timugon

Siminaguli' Tuhan ra Baloi ru

¹ Nagibit ungkuyon no raki' ra kulobon garabang ondo' tumingkuang tampilon ra sirangon.

² Giu' no nakakito aku ra sinda manguliat minatong intor ra sirangon, ondo' tatandu' ratangan ri Aki Kapuuno' ru Israil. Bolos ri Aki Kapuuno' matangil koson ra ngoos ru kinulun ru raat, am tana' ti matawang sabap ra sinda ru ratangan ri Aki Kapuuno'.

³ Pinaintalang ragitio nogondo' koson ondo' nakito ku paat i Aki Kapuuno' namuso ra Jirusalim, am koson ondo' nakito ku giu' ra kiing ru Sungoi Kibar. Aku pana igulatur boo nokopolos ra tana'.

⁴ Sinda ondo' kukuliat no mugar mansail ra kulobon garabang sirangon am sumubol ra ralalom Baloi ru Tuhan.

⁵ Nangkayang Ambiluo ru Tuhan raki' am nagibit raki' ra liliut ralalom. Giu' no nakakito aku ra Baloi ru Tuhan natikop ra sinda katulayan ru Tuhan.

⁶ Bigor ungkuyon no ra sapapa' kuno, am nokorongog aku ra Tuhan mindagu raki' intor ra ralalom Baloi ru Tuhan,

⁷ “Okou ulun mapandai matoi, gitio noyo kurisi' turungan Kuno. Mayan Aku ragiti, tatanga' ru ulun ru Israil, am mamarinta Aku risilo ra sabubuoi no. Ulun ru Israil am raja'-raja' nilo kalo boo mampajamol ra inggalan Kuno ondo' matulai am sumamba ra sinungkalalaing, kapoam mompolobong ra baangkai ru raja' nilo ra intok ragitio.

⁸ Raja'-raja' nilo nambaal ra tataun pangiing am lugu' ru kulobon ra istana nilo giu' ra kiing ru kulobon am lugu' ru kulobon ra Baloi Kuno, saboi rondo' ayuk timbok nokololot risilo intor Raki'. Jinamalan nilo inggalan Kuno ondo' matulai ra ngaangai' binaal nilo ondo' makauyuyu'. Ginio ra namuso Aku risilo sabap ra siminangit Aku kaga'.

⁹ Raino musiti' ilo lumonggo' sumamba ra sinungkalalaing am mapabanding ra baangkai ru raja'-raja' nilo. Amon ru baalon nilo ginio, mayan Aku ra tatanga' nilo ra sabuoi-buoi no.”

¹⁰ Indagu poyo Tuhan raki', “Okou ulun mapandai matoi, balai' ulun ru Israil intor ra Baloi Kuno am susubo' ilo mangimansa' ra baal nano. Tauyuo' ilo sabap ra tula nilo.

¹¹ Amon ru mauyu' ilo boo ra binaal nilo, pambala' toojo risilo ra inatangan ru Baloi Kuno: model nano, kulobon-kulobon, kinaindon, tampos ru baloi maayo, am ngaangai' aturan am niayuk ukum nano. Tulisi' ngaangai' no maa' raginio makakito ilo am makailong toojo ra ralan manampos ra ngaangai' no, am gumagaya' ra ngaangai' ru aturan nano.

¹² Gitio noyo ukum kasaa' intor ra Baloi ru Tuhan: Titikop intok giu' ra libung nano giu' ra tampak ru gunung no matulai kaga'.”

Altar

¹³ Gitio noyo tuku' ru altar sumugut ra tuku' ondo' pinakai koson manuku' ra Baloi ru Tuhan. Giu' ra liliut tampilon ra ragana' ru altar no mokoondo' rondo' parit ondo' landom no 50 ngasintimito am pila' no 50 ngasintimito niayuk, am pompor ra kiing ra liwar no sawat no 25 ngasintimito.

¹⁴ Intor ra parit mongoi ra tataun pinangiing ru altar ondo' ragana' kaga', sawat no 1 ngamito. Tatanga' ru altar no 2 ngamito sawat no, am 50 ngasintimito mapisok poyo intor ra liput ru tampilon ragana' ru altar. Tayar katalu, iono tampak ru altar, niayuk 50 ngasintimito mapisok poyo intor ra liput tampilon ra tatanga' no.

¹⁵ Tayar katalu ti intok panalaban ra taak simbalui, am sawat no 2 ngamito. Giu' ra kaapat-apat pisuk ru altar mokoondo' minujak koson ra sangau.

¹⁶ Tampak ru altar no binaal apat persegi, moonong kiing pinantutuku' 6 ngamito.

¹⁷ Tampilon ra tatanga' no niayuk binaal apat persegi, moonong kiing no pinantutuku' no 7 ngamito, am ondo' kiing no ra sawat 25 ngasintimito giu' ra pompor ra liwar no. (Pila' ru parit no 50 ngasintimito.) Tukar ru altar no giu' ra kiing tampilon ra sirangon.

Altar patimpokon ra Tuhan ayuk

¹⁸ Indagu Tuhan Raja' raki', “Okou ulun mapandai matoi, rongogo' atan ondo' paraguon Kuno rirun. Mopongo baalon altar no, musiti' mu patimpokon ra monolob ra taak simbalui ra rasawat no am takisin ra raraa' ru bibiag ondo' sinimbalui.

¹⁹ Imam-imam papag ri Jadok intor ra bansa' ru Liwi ayuk iowon matong ra saang Kuno koson mangandoi Raki'. Aku, Tuhan Raja', nanusub ragitio. Mangani' kou risilo sanginan anak sapi' gawayan maa' raginio pataakon koson ra taak simbalui koson mangampun ra tula.

²⁰ Mangalap kou kasanganu raraa' ru sinimbalui no am papiiro' ginio ra kaapat-apat sangau pisuk ru altar, am niayuk giu' ra pisuk-pisuk ra tatanga' no, am niayuk giu' ra liput ra kiing ru altar no. Koson raginio noyo okou namasau am patimpokon altar no.

²¹ Alapo' anak ru sapi' gawayan ondo' pataakon koson ra taak simbalui koson mangampun ra tula, am solobo' taak simbalui no giu' ra intok ondo' inaru', iono giu' ra liwar ru intok mapasau ra Baloi ru Tuhan.

²² Susuab no, musiti' kou mangalap sanginan kambing gawayan ondo' kalo najamaran, am pataakon ginio koson ra taak simbalui koson mangampun ra tula. Kapasawo' altar no ra raraa' ru kambing gawayan no koson ra ondo' binaal muno ra raraa' ru anak sapi' gawayan no.

²³ Mopongo raginio alapo' sanginan anak sapi' gawayan am sanginan domba gawayan ondo' kalo najamaran,

²⁴ am ibito' karuruo no Raki'. Imam-imam no musiti' mampatauk ra usi' ra rasawat ru karuruo bibiag no am pataakon ginio koson ra taak simbalui koson mapabansuk ra guang Kuno.

²⁵ Moonong orou buoi tulu' ngoorou, musiti' kou mampataak sanginan kambing, sanginan sapi' gawayan, am sanginan domba gawayan koson ra taak simbalui koson mangampun ra tula. Ngaangai' bibiag no kalo najamaran.

²⁶ Imam-imam no musiti' mamasau am manampos ra altar no buoi tulu' ngoorou.

²⁷ Mopongo saminggu', imam-imam no musiti' tumalimpuun mampataak ra taak simbalui koson mapabansuk ra guang Kuno am taak simbalui koson makibarakat Raki', giu' ra rasawat ru altar ra tayar ru ulun. Bagu no iowon Ku akau ngaangai'. Aku, Tuhan Raja' nakaindagu noyo.”