YEHEZKIEL 42 - Tanou Moonsoi Timugon

Ruo baloi maayo mamaar ra Baloi ru Tuhan

¹ Ungkuyon no pana nagibit boo raki' ra liliut ra liwar, am nangitang raki' mongoi ra rondo' baloi maayo tampilon ralayo Baloi ru Tuhan, kalo maalur intor ra baloi maayo tampilon ra kalasaan Baloi ru Tuhan.

² Gawar ru baloi no 50 ngamito am pila' no 25 ngamito.

³ Rondo' kiing ru baloi maayo no tumingkuang ra intok ondo' naukab, ondo' pila' no 10 ngamito, giu' ra kiing ra Baloi ru Tuhan. Kiing ra bokon ru baloi maayo no tumingkuang ra intok makasulig batu giu' ra liliut ra liwar. Baloi maayo no talu ngatampas; moonong satampas binaal nakaralalom poyo intor ra tampas ra ragana' no.

⁴ Giu' ra tampilon ralayo ru baloi maayo no mokoondo' rondo' babayaan; pila' no 5 ngamito am gawar nano 50 ngamito. Kulobon-kulobon ru baloi maayo no tumingkuang ra tampilon ralayo.

⁵ Lamin-lamin giu' ra tampas rasawat boborok poyo intor ra tampas ra tatanga' am tampas ragana', sabap ra babayaan-babayaan no mapila' poyo intor ra ondo' ragana' no.

⁶ Lamin-lamin no talu ngatampas am kalo linuguan koson ra baloi maayo ra bokon giu' ra liliut no.

^7-8 Sampiruo intor ra tampas ragana', gawar no 25 ngamito rondo' timbok ayuk, kaa' sampiruo poyo, gawar no 25 ngamito niayuk, binaalan ra lamin-lamin. Tampas ra rasawat toojo no mokoondo' lamin-lamin giu' ra gawar ru baloi maayo no.

^9-10 Giu' ragana' ru lamin-lamin ra pompor tampilon ra sirangon ru baloi no, iono giu' ra puun ru timbok, mokoondo' kulobon ondo' mongoi ra liliut ra liwar. Giu' ra tampilon rabugus Baloi ru Tuhan mokoondo' rondo' baloi maayo ondo' nogondo' niayuk am intok no kalo maalur intor ra baloi maayo tampilon ra kalasaan.

¹¹ Giu' ra saang ru lamin-lamin no mokoondo' niayuk babayaan koson ra tampilon ralayo. Gayo no nogondo', model no nogondo', am kulobon-kulobon subalan no pana nogondo'.

¹² Giu' ra ragana' ru lamin-lamin tampilon rabugus ru baloi maayo no, iono giu' ra pompor tampilon sirangon ra puun ru timbok no, mokoondo' niayuk rondo' kulobon.

¹³ Indagu ungkuyon no raki', “Karuruo baloi maayo no mapasau. Giti noyo intok ru imam-imam tumingkuang ra Tuhan mangakan ra taak ondo' matulai kaga'. Ginio sabap ra lamin-lamin no matulai, pabantaan ru imam-imam taak ondo' matulai kaga' ra giu' no: taak simbalui koson paringkuanangan ra Tuhan, taak simbalui koson makiampun ra tula, am taak simbalui koson mambayar ra kalubatan.

¹⁴ Paat ra imam-imam no ondo' giu' ra ralalom Baloi ru Tuhan mingkual mongoi ra liliut ra liwar, musiti' nilo patatangon bayang mapasau giu' ra ralalom ru lamin-lamin no. Bayang no bayangon nilo paat mangandoi ra Tuhan. Musiti' ilo mambayang ra bokon ra kalo poyo mingkual mongoi ra intok tinimungan ru ulun masuang.”

Nanuku' ra Gayo ru libung Baloi ru Tuhan

¹⁵ Kakai' nanuku' ra ralalom Baloi ru Tuhan, nagibit ungkuyon no raki' mingkual mansail ra kulobon garabang sirangon, am nanuku' ra intok tampilon ra liwar.

¹⁶ Namakai io ra tataun panuku', nanuku' io ra kiing tampilon ra sirangon; gawar no 250 ngamito.

^17-19 Panuku' io boo ra kiing tampilon ralayo, rabugus am kalasaan; moonong kiing nogondo' gawar, iono 250 ngamito.

²⁰ Libung Baloi ru Tuhan no apat persegi; gawar ru timbok ra moonong kiing iono 250 ngamito. Timbok no nampatuliar ra atan ondo' matulai intor ra atan ondo' kalo matulai.