YEHEZKIEL 41 - Tanou Moonsoi Timugon

¹ Ungkuyon no pana nagibit poyo boo raki' ra lamin kasaa', iono Lamin Matulai. Nanuku' io ra babayaan mongoi ra giu': gawar nano 3 ngamito

² am pila' no 5 ngamito. Timbok ra kait am pamiris no ra kapal no 2.5 ngamito. Kopongo raginio nanuku' io ra Lamin Matulai no; gawar no 20 ngamito am pila' no 10 ngamito.

³ Subol io boo ra lamin ondo' ralalom toojo. Nanuku' io ra babayaan ondo' mongoi ra giu': gawar no samito am pila' no 3 ngamito. Timbok giu' ra kait am pamiris no ra kapal no 3.5 ngamito.

⁴ Nanuku' io ra lamin no niayuk; gayo nano 10 ngamito. Kopongo raginio indagu io raki', “Gitio noyo Lamin Matulai Kaga'.”

Lamin-lamin ra timbok ra Baloi ru Tuhan

⁵ Nanuku' ungkuyon no ra timbok tampilon ralalom Baloi ru Tuhan; kapal nano 3 ngamito. Giu' ra timbok ra liliut ra Baloi ru Tuhan mokoondo' lamin-lamin boborok, ondo' kapal no 2 ngamito.

⁶ Lamin-lamin no mokoondo' talu ngatampas am moonong satampas mokoondo' talu ngoopor ngalamin. Timbok ra liwar ru moonong satampas malilis poyo intor ra timbok ru satampas giu' ra ragana' no, saboi lamin no naalap kabaal ra kalo pinatunggul ginio ra timbok Baloi ru Tuhan.

⁷ Intor ra liwar, timbok Baloi ru Tuhan makito nogondo' kapal no intor ra ragana' saboi ra rasawat. Giu' ra timbok ra liwar Baloi ru Tuhan no, giu' ra tampilon ra liwar ru lamin-lamin no, mokoondo' ruo tukar ondo' maayo koson pagalayan ru ulun intor ra tampas ragana' mongoi ra tampas karuo am katalu.

^8-11 Timbok ra liwar ru lamin-lamin no ra 2.5 ngamito kapal no. Lamin-lamin giu' ra tampilon ralayo mokoondo' rondo' kulobon subalan, am lamin-lamin tampilon ra rabugus niayuk mokoondo' rondo' kulobon subalan. Makito ku niayuk baloi maawar giu' ra liput ru Baloi ru Tuhan: pila' no 2.5 ngamito; 3 ngamito masawat poyo intor ra tana', am nogondo' sawat ra lugu' maatang ru lamin-lamin giu' ra timbok Baloi ru Tuhan. Giu' ra tulus no am lamin ru imam-imam no mokoondo' intok naukab ondo' pila' no 10 ngamito, giu' ra tampilon ra kait am pamiris Baloi ru Tuhan.

Baloi maayo tampilon ra kalasaan

¹² Giu' ra pompor ru liliut tampilon ra kalasaan Baloi ru Tuhan, mokoondo' rondo' baloi maayo ondo' gawar no 45 ngamito am pila' no 35 ngamito. Kapal ru rinding nano 2.5 ngamito.

Suang ngaangai' ru gayo ru Baloi ru Tuhan

¹³ Nanuku' ungkuyon no ra Baloi ru Tuhan, am gawar nano 50 ngamito. Intor ra talikuron ra Baloi ru Tuhan saboi ra talikuron ru baloi maayo tampilon ra kalasaan no, galur no 50 ngamito.

¹⁴ Tampilon ra saang Baloi ru Tuhan nakaaya' liliut tampilon ra kait am pamiris, pila' no 50 ngamito.

¹⁵ Nanuku' io niayuk ra baloi maayo tampilon ra kalasaan, nakaaya' rinding tampilon ra kait am pamiris; gawar no 50 ngamito. Lamin ra tingganai ru Baloi ru Tuhan, Lamin Matulai am Lamin Matulai Kaga'

Tayar-tayar intor ra Baloi ru Tuhan

¹⁶ binungaan ra tataun pangiing ra rinding no, intor ra sulig saboi ra gigimpalan. Gigimpalan no maalap siliin.

¹⁷ Ngaangai' rinding tampilon ralalom Baloi ru Tuhan, binungaan ra inukir ra

¹⁸ puun palma am kirub, sampuun palma ra lolot ru ruo kirub. Kirub no mokoondo' ruo bulos:

¹⁹ bulos ru ulun ondo' tumingkuang ra puun palma tampilon ra kait, am bulos ru singa' ondo' tumingkuang ra puun palma tampilon ra pamiris. Inukir no mokoondo' ra ngaangai' rinding,

²⁰ intor ra sulig saboi ra tampilon rasawat ru kulobon.

²¹ Lugu'-lugu' giu' ra Lamin Matulai no baal nano apat persegi. Giu' ra saang ru Kulobon Lamin Matulai Kaga', mokoondo' rondo' ondo' makito koson ra

Altar tataun

²² altar tataun: sawat nano 1.5 ngamito, am pila' nano 1 ngamito. Pisuk, apin am kiing ru altar, ngaangai' binaal intor ra tataun. Indagu ungkuyon no raki', “Gitio noyo mija' ondo' pabantaan ra saang ru Tuhan.”

Kulobon-kulobon

²³ Giu' ra pompor ru babayaan ondo' mongoi ra Lamin Matulai mokoondo' rondo' kulobon, koson raginio niayuk giu' ra pompor ru babayaan ondo' mongoi ra Lamin Matulai Kaga'.

²⁴ Kulobon-kulobon no mokoondo' ruo angob ondo' maukab giu' ra tatanga' no.

²⁵ Giu' ra kulobon ru Lamin Matulai mokoondo' inukir ra puun palma am kirub, koson giu' ra rinding no. Giu' ra kulobon tampilon ra saang, tampilon ra liwar no mokoondo' panili intor ra tataun.

²⁶ Intok raginio niayuk mokoondo' ra gigimpalan, am rinding no binungaan ra inukir ra puun palma.