YEHEZKIEL 40 - Tanou Moonsoi Timugon

PINAINTALANG INTOR RU BALOI RU TUHAN PAAT RA OROU TAULI ( 40:1—48:35 ) Inibit i Yehezkiel giu' ra Jirusalim

¹ Paat ra orou koopor, sila' kasaa' ralalom ru bilor karuo ngoopor am limo paat akai ralalom pamatiran, am bilor koopor am apat kalupus Jirusalim kinala, makaliman aku ra kuasa' ru Tuhan, am nagibit Io raki' minugar.

² Ralalom ru rondo' pinaintalang, nagibit i Aki Kapuuno' raki' ra pagun ru Israil am napaayan raki' ra rasawat ru gunung ondo' masawat. Giu' ra saang kuno, makito baloi-baloi masawat ondo' natilu ra rondo' bandar.

³ Nagibit Io raki' ra giu' no am makito ku sangulun ungkuyon ondo' makasinda koson ra gangsa', minigor ra kulobon garabang. Ulun no tatanga' mampaguut ra kalat panuku' intor ra linon am niayuk rondo' tataun panuku'.

⁴ Indagu ungkuyon no raki', “Okou ulun mapandai matoi, rongogo' toojo am urioo' ngaangai' no ondo' panuluan ku rirun, sabap ra koson kuayan raginio noyo okou inibit ragiti. Balai' ulun ru Israil ra ngaangai' ondo' nakito muno.”

Kulobon Garabang Sirangon

⁵ Nakakito aku ra Baloi ru Tuhan ondo' liniputan ru timbok. Tinuku' ru ungkuyon no timbok no ra tataun panuku' ondo' gawar nano 3 ngamito. Sawat nano 3 ngamito, am kapal nano pana 3 ngamito.

⁶ Kopongo raginio minongoi io ra kulobon garabang tumingkuang ra sirangon. Nagaloi io ra tukar ru kulobon garabang, am giu' ra rasawat ru tukar no nanuku' io ra tataun ru kulobon, pila' nano 3 ngamito.

⁷ Giu' ra talikuron ru kulobon garabang no mokoondo' rondo' babayaan am talu lamin ru ulun magalung ra moonong kiing nano. Moonong lamin binaal apat persegi, moonong kiing gayo nano 3 ngamito am timbok pangkilolot ru lamin 2.5 ngamito kapal nano. Kopongo lamin-lamin ru ulun magalung no, babayaan ra gawar nano 3 ngamito poyo am sumuku' ra intok ra tingganai ondo' tumingkuang ra Baloi ru Tuhan.

^8-9 Nanuku' ungkuyon no ra intok raginio am 4 ngamito pila' nano. Ginio noyo tayar ru kulobon garabang ondo' mamaar kaga' ra Baloi ru Tuhan, am timbok ra tayar raginio samito kapal nano.

¹⁰ Gayo ru lamin-lamin ru ulun magalung giu' ra kiing ru babayaan no nogogondo' ngaangai', am kapal ru timbok ru lamin pana mogondo'.

¹¹ Ungkuyon no pana nanuku' boo ra babayaan giu' ra kulobon garabang. Pila' ru babayaan no 6.5 ngamito, am pila' ru kulobon garabang no 5 ngamito.

¹² Giu' ra saang ru moonong lamin ru ulun magalung no mokoondo' ra timbok ondo' magana'; sawat no 0.5 ngamito, am kapal no 0.5 ngamito niayuk. Ngaangai' ru lamin no 3 ngamito gayo no.

¹³ Nanuku' boo ungkuyon no ra galur intor ra timbok ra talikuron ru rondo' lamin saboi ra timbok ra talikuron ru lamin ra sandaup no; galur no 12.5 ngamito.

¹⁴ Tingganai ru saang giu' ra pompor toojo tumingkuang ra liliut ra liwar Baloi ru Tuhan. Nanuku' io ra tingganai no; pila' no 10 ngamito.

¹⁵ Galur intor ra timbok ru kulobon garabang tampilon ra liwar saboi ra timbok ra tingganai ra tayar ondo' tumingkuang ra Baloi ru Tuhan iono 25 ngamito.

¹⁶ Giu' ra timbok tampilon ra liwar am timbok pangkilolot ru ngaangai' lamin no mokoondo' ra gigimpalan ondo' boborok. Giu' ra timbok tampilon ra ralalom ondo' tumingkuang ra babayaan no mokoondo' inukir ra puun palma.

Liliut ra liwar ra Baloi ru Tuhan

¹⁷ Nagibit ungkuyon no raki' nansail ra kulobon garabang minongoi ra liliut ra Baloi ru Tuhan. Giu' ra igig ru timbok ra liwar giu' ra liput ra Baloi ru Tuhan no binaal talu ngoopor ngalamin. Giu' ra saang ru lamin-lamin no mokoondo' intok inanian ra batu,

¹⁸ ondo' lumiput ra liliut no. Liliut ra liwar ti intok no magana' intor ra liliut ralalom.

¹⁹ Giu' no mokoondo' rondo' kulobon garabang ondo' intok no masawat poyo am ondo' tumingkuang ra liliut ralalom. Nanuku' ungkuyon no ra galur ru ruo kulobon garabang no; galur no 50 ngamito.

Kulobon garabang ralayo

²⁰ Ungkuyon no pana nanuku' boo ra kulobon garabang giu' ra tampilon ralayo ondo' tumingkuang ra liliut ra liwar.

²¹ Talu lamin ru ulun magalung ondo' intok no kiing ru babayaan ru kulobon garabang no, timbok pangkilolot ra lamin, am tingganai no, ngaangai' no nantutuku' ra ondo' giu' ra kulobon garabang sirangon. Titikop ru babayaan ra kulobon garabang no ra gawar no 25 ngamito am pila' no 12.5 ngamito.

²² Tingganai ru lamin, gigimpalan, am inukir ra puun palma nogondo' ra ondo' giu' ra kulobon garabang sirangon. Tulu' tukar mongoi ra kulobon garabang ralayo no am pompor no mokoondo' tingganai ru lamin ondo' tumingkuang ra liliut ra liwar ra Baloi ru Tuhan.

²³ Nantaluma' ra kulobon garabang ralayo, mokoondo' rondo' kulobon garabang ra bokon ondo' mongoi ra liliut ralalom, ondo' koson giu' ra tampilon sirangon. Nanuku' ungkuyon no ra galur ru ruo kulobon garabang no; galur no 50 ngamito.

Kulobon garabang rabugus

²⁴ Ungkuyon no pana nagibit boo raki' ra tampilon rabugus. Giu' no nakakito akai ra rondo' poyo kulobon garabang. Nanuku' io ra timbok am tingganai ru lamin ra giu' no, ngaangai' no nogondo' gayo koson ra ondo' giu' ra kulobon garabang ra bokon.

²⁵ Lamin-lamin ra giu' no mokoondo' ra gigimpalan ondo' nogondo' koson ra ondo' giu' ra kulobon garabang ra bokon. Gawar ru babayaan ra kulobon garabang no 25 ngamito, am pila' no 12.5 ngamito.

²⁶ Tulu' tukar mongoi ra kulobon garabang rabugus no am mokoondo' niayuk tingganai ru lamin giu' ra pompor no ondo' tumingkuang ra liliut ra liwar Baloi ru Tuhan. Giu' ra timbok tampilon ralalom ondo' tumingkuang ra babayaan no mokoondo' inukir ra puun palma.

²⁷ Giu' no niayuk mokoondo' rondo' kulobon garabang ondo' mongoi ra liliut ralalom. Nanuku' ungkuyon no ra galur ru ruo kulobon garabang no; galur no 50 ngamito.

Kulobon garabang rabugus ondo' tumingkuang ra liliut ralalom

²⁸ Kopongo raginio, nagibit ungkuyon no raki' siminubol ra liliut ralalom nansail ra kulobon garabang rabugus. Nanuku' io ra kulobon garabang no, am gayo no nogondo' ra gayo ru kulobon-kulobon garabang giu' ra tampilon ra liwar.

^29-30 Lamin-lamin ru ulun magalung, tingganai ru lamin, am timbok-timbok tampilon ra ralalom, nantutuku' ra ondo' giu' ra kulobon garabang ra bokon. Lamin-lamin ra kulobon garabang ti mokoondo' niayuk ra gigimpalan. Gawar ru babayaan no 25 ngamito, am pila' no 12.5 ngamito.

³¹ Tampilon ra tingganai no tumingkuang ra liliut ra liwar, am inukir ra puun palma mokoondo' ra timbok-timbok ondo' tumingkuang ra babayaan. Balu' tukar mongoi ra kulobon garabang no.

Kulobon garabang sirangon giu' ra liliut ralalom

³² Ungkuyon no pana nagibit boo raki' siminubol ra liliut ralalom nansail ra kulobon garabang sirangon. Nanuku' io ra kulobon garabang no, am nantutuku' ra kulobon-kulobon garabang ra bokon.

³³ Lamin-lamin ru ulun magalung am tampilon ra tingganai no mokoondo' ra gigimpalan. Gawar ru babayaan ra kulobon garabang no 25 ngamito, am pila' no 12.5 ngamito.

³⁴ Tampilon ra tingganai no tumingkuang ra liliut ra liwar. Inukir ra puun palma mokoondo' ra timbok ondo' tumingkuang ra babayaan. Balu' tukar mongoi ra kulobon garabang no.

Kulobon garabang ralayo giu' ra liliut ralalom

³⁵ Pupus no nagibit ungkuyon no raki' ra kulobon garabang ralayo. Nanuku' io ra kulobon garabang no am nantutuku' ra kulobon-kulobon garabang ra bokon.

³⁶ Koson ra bokon no, kulobon garabang ti niayuk mokoondo' ra lamin-lamin ru ulun magalung, timbok-timbok tampilon ralalom, tampilon ra tingganai, am gigimpalan. Gawar ru babayaan ra kulobon garabang no 25 ngamito, am pila' nano 12.5 ngamito.

³⁷ Tampilon ra tingganai ra giu' no tumingkuang ra liliut ra liwar, am inukir ra puun palma no mokoondo' ra timbok ondo' tumingkuang ra babayaan. Balu' tukar mongoi ra kulobon garabang no.

Baloi masawat ondo' mamaar ra kulobon garabang ralayo

³⁸ Giu' ra liliut ra liwar mokoondo' rondo' lamin pinatambil giu' ra tampilon ralalom ru kulobon garabang ralayo. Lamin ra pinatambil no mokoondo' rondo' kulobon ondo' mongoi ra tampilon ra tingganai ondo' tumingkuang ra liliut ra liwar. Giu' no pambaguan ru ulun ra bibiag ondo' sinimbalui koson ra taak simbalui mapabansuk ra guang ru Tuhan.

³⁹ Giu' ra tampilon ra tingganai no mokoondo' apat mija', ruo tampilon ra pamiris am ruo tampilon ra kait. Giu' ra rasawat ru mija'-mija' no panimbaluyan ru ulun ra bibiag ondo' pataakon koson ra taak simbalui koson mapabansuk ra guang ru Tuhan, kapoam taak simbalui koson mangampun ra tula, kapoam taak simbalui koson mambayar ra kalubatan.

⁴⁰ Giu' ra liwar ru tampilon ra tingganai no mokoondo' poyo apat mija' ondo' nogondo', ruo tampilon ra pamiris am ruo tampilon ra kait ru kulobon garabang ralayo.

⁴¹ Ngaangai' no mokoondo' balu' mija' ondo' intok panimbaluyan ra bibiag ondo' pataakon koson ra taak simbalui: apat giu' ra ralalom ru lamin am apat poyo giu' ra liliut ra liwar.

⁴² Apat mija' giu' ra ralalom ru lamin no, ondo' pakayon koson momongo kalalair ra taak simbalui koson mapabansuk ra guang ru Tuhan, binaal intor ra batu ondo' pinaat. Sawat no 50 ngasintimito, am tampilon ra rasawat no 75 ngasintimito gayo no. Ngaangai' kuliamos ondo' pakayon koson manimbalui ra bibiag pabantaan ra rasawat ru mija'-mija' no.

⁴³ Kiing ru mija'-mija' no mokoondo' pinakiing ra pila' no 75 ngamilimito. Ngaangai' kual ondo' pataakon pabantaan ra rasawat ru mija'-mija' no.

⁴⁴ Ungkuyon no pana nagibit boo raki' ra liliut ralalom. Giu' no mokoondo' ruo lamin, rondo' ra kiing ru kulobon garabang ralayo am tumingkuang ra rabugus, am rondo' poyo giu' ra kiing ru kulobon garabang rabugus am tumingkuang ra ralayo.

⁴⁵ Nambala' io raki' ra lamin ondo' tumingkuang ra rabugus tinampos ra tayar ru imam-imam ondo' mangandoi giu' ra Baloi ru Tuhan,

⁴⁶ am lamin ondo' tumingkuang ra ralayo tinampos ra tayar ru imam-imam ondo' mangandoi giu' ra altar. Ngaangai' ru imam no papag ri Jadok. Intor ilo ra bansa' ru Liwi am ilo ayuk ondo' iowon muma' ra Tuhan koson mangandoi Riso.

Liliut ralalom am Baloi ru Tuhan

⁴⁷ Nanuku' ungkuyon no ra liliut ralalom am gayo no 50 ngamito. Baloi ru Tuhan tampilon ra kalasaan intok no, am giu' ra saang nano mokoondo' rondo' altar.

⁴⁸ Ungkuyon no pana nagibit boo raki' ra tampilon ra tingganai ru Baloi ru Tuhan. Nanuku' io ra kulobon subalan; langka' no 2.5 ngamito am pila' no 7 ngamito. Timbok ra kait am pamiris no ra kapal no 1.5 ngamito.

⁴⁹ Tampilon ra tingganai no ra gawar nano 10 ngamito am pila' nano 6 ngamito. Ulun makasubol ra giu' no ra magaloi ra kukula' tukar. Giu' ra kulobon subalan mokoondo' ruo lugu', rondo' ra tampilon pamiris am rondo' ra tampilon kait.