YEHEZKIEL 38 - Tanou Moonsoi Timugon

Namulunsar i Gog ra Israil

¹ Indagu Tuhan raki',

² “Okou ulun mapandai matoi, ulaso' i Gog, ulun manguasa' ra maatang kaga' ra pagun-pagun Misik am Tubal giu' ra tana' Magog. Ulaso' io

³ am balai' io ra Aku, Tuhan Raja' noyo pantula' nano.

⁴ Saukon Ku io kalo maikang, paatangon kakait ra bungul ru salura nano, am ralaaton io mababaya' ra ngaangai' pulalai nano. Pulalai mangkuda nano ondo' bayang ra sarampun no masuang kaga' ilo. Moonong saujor mokoondo' ra perisai am ilang.

⁵ Saujor nano intor ra saujor ru Pirsia, Itiopia, am Libia, am sigagama' mokoondo' ra perisai am tupi' basi'.

⁶ Ngaangai' tutumula' intor ra pagun-pagun Gomir am Bit-Togarma giu' ra ralayo pana nakaaya' saujor nano. Saujor-saujor intor ra masuang bansa' ra bokon minaya' niayuk.

⁷ Susubo' i Gog tumampos, am musiti' ngaangai' pulalai nano pana tumampos manugut ra susuban nano.

⁸ Kopongo kukula' ngambilor, Susubon Ku io mamulunsar ra Israil, pagun ondo' tinirong noyo saguli' kalupus nalunsai sabap ra pangayawan. Pagun no lair noyo nokoloso nasauk ra kolondo' tutuu' am masiluk, am saguli' boo ulun ru Israil intor ra pagun-pagun ra bokon ra kagunungan ru pagun nilo. Raino ilo ngaangai' naayag ra kaansayan.

⁹ I Gog am saujor nano, am niayuk masuang bansa' ondo' namaya' riso mamulunsar koson ra bagiu' mapuor am rasam maawas am mampalibung ra titikop ru pagun no koson ra gaun.”

¹⁰ Indagu Tuhan ra Raja' ri Gog, “Paat raginio, baalon muno inatangan malaat.

¹¹ Namatas kono koson mamulunsar ra rondo' pagun ondo' kolondo' pinarinding ra batu, pagun ondo' mamagun nano maayag ra moonsoi am mamimio giu' ra bandar-bandar ondo' kolondo' timbok am kolondo' kuliamos mantula'.

¹² Takawin am gaawon mu rapu' ru mamagun ru bandar-bandar ondo' nalunsai ragili. Tinimung ilo intor ra pagun-pagun ra bokon am raino mokoondo' ilo ra rapu' am bibiag ra masuang. Minayan ilo giu' ra pusor ru tana' ti.

¹³ Ulun ru Syiba, ulun ru Didan, am ulun mantalan intor ra bandar-bandar ru Sipanyol mangkuot rirun, ‘Timungon mu kia saujor muno am mamulunsar koson mampagaau am niayuk mantakou? Makaguang kou kia koson mampagaau ra ngaangai' pirok am mas, bibiag tinambiag am rapu' no?’ ”

¹⁴ Nanusub boo Tuhan Raja' raki' koson mambala' ri Gog intor ra ragu Nano, “Raino, tatanga' ru Israil, ulun Kuno maayag ra kaansayan, mintor kou

¹⁵ intor ra intok muno ondo' maalur giu' ra ralayo. Magibit kou ra pulalai mangkuda ondo' maayo am maikang intor ra pagun-pagun ra bokon,

¹⁶ am mamulunsar ra Israil, ulun Kuno, koson ra bagiu' mapuor am rasam maawas lumumpa' ra tana' ti. Paat raginio, manusub Aku rirun koson mamulunsar ra pagun Kuno. Ra binaal Kuno pinabala' galing rirun, makapandai boo bansa'-bansa' ra Aku ti matulai.

¹⁷ Okou noyo ondo' sinabit Kuno ragili, paat ra Aku minindagu pinabala' galing ra nabi-nabi Kuno giu' ra Israil, ra paat tauli no manusub Aku ra sangulun koson mamulunsar ra Israil.” Tuhan Raja' minindagu noyo.

Ukumin ri Aki Kapuuno' i Gog

¹⁸ Indagu Tuhan Raja', “Paat ra orou ri Gog mamulunsar ra Israil, sumangit Aku.

¹⁹ Ra totopot sumangit mindagu Aku ra orou raginio tana' mogonggon ondo' makalalaa' masauk giu' ra pagun ru Israil.

²⁰ Ngaangai' papait am susuit, ngaangai' bibiag maayo am boborok, am ngaangai' ulun ra tana' ti monontol sabap ra malaa' Raki'. Gunung maluyu', tobo matuan am moonong timbok malunsai.

²¹ Ilaanon Ku i Gog ra ngaangai' salinut ru karaat. Aku, Tuhan Raja' nakaindagu noyo. Ulun-ulun nano mamulunsar ra rondo' am bokon ra ilang.

²² Ukumin Ku boo io ra maruol tumapik am pasasaron raraa'. Rasam maawas, rasam batu, apui am bilirang makalumpa' riso am saujor nano, am niayuk bansa'-bansa' ondo' maya' riso.

²³ Koson noyo raginio ra Aku mampakito ra kinaayo am kinatulai Kuno ra ngaangai' bansa'. Makapandai ilo boo ra Aku noyo Tuhan.”