YEHEZKIEL 35 - Tanou Moonsoi Timugon

Ukuman ri Aki Kapuuno' ra Idom

¹ Indagu Tuhan raki',

² “Okou ulun mapandai matoi, ulaso' pagun ru Idom.

³ Posoboyo' atan ondo' paraguon Kuno, Tuhan Raja' ra mamagun nano: Aku pantula' min, alii ra mamagun kau ru kabuluran Idom! Tana' min saukon Ku ra kolondo' tutuu' am masiluk.

⁴ Bandar-bandar min saukon Ku ra malunsai-lunsai, am pagun min saukon ra tana' kaagisan. Bagu no makapandai kau ra Aku noyo Tuhan.

⁵ Magail kau mantula' ra ulun ru Israil. Polosoon min ilo potoyon paat ra ilo malumpa' ru karaat koson ra ukuman pupus toojo tayar ru tula nilo.

⁶ Ginio ra Aku, i Aki Kapuuno' ondo' maayag, Tuhan Raja', magibot ra matoi kau am kalo makalabus kau intor raginio. Makasala kau sabap ra namatoi, ginio ra namatayan no pana mangilou ramuyun.

⁷ Saukon Ku kabuluran ru Idom ra masiluk, am mamatoi ra osoi ayuk mansail ra giu' no.

⁸ Bulur-bulur nano taubin Ku ra baangkai, am limayak-limayak no papakon Ku ra baangkai ru ulun ondo' minatoi ra pangayawan.

⁹ Saukon Ku pagun min ra kolondo' tutuu' am masiluk ra sabubuoi no. Kolondo' boo osoi pana mayan ra bandar-bandar min. Bagu no makapandai kau ra Aku noyo Tuhan.

¹⁰ Kamin karuruo bansa' no, Jiuda am Israil longgom min, am namagun kau ra tana' nilo, kabalu' pana Aku, Tuhan iono i Aki Kapuuno' nilo.

¹¹ Ginio ra sabap Aku, i Aki Kapuuno' ondo' maayag, Tuhan Raja', mansuli' Aku ramuyun sabap ra akau sumangit, maingot am masisang ra ulun-ulun Kuno. Makapandai ilo boo ra mangukum Aku ramuyun sabap ra binaal min risilo.

¹² Bagu no makapandai kau ra Aku, Tuhan mokorongog ra pagasaban min paat ra akau mindagu, ‘Gunung-gunung ru Israil nasauk ra masiluk am pataakin ra akanon takau.’

¹³ Nokorongog Aku ra ngaangai' pagasaban min Raki'.”

¹⁴ Indagu Tuhan Raja', “Saukon Ku pagun min kolondo' tutuu' am masiluk saboi titikop ru tana' ti maansayan ra akau maratu',

¹⁵ koson akau ragili maansayan magilong ra pagun ru Israil, longgom Kuno nasauk ra kolondo' tutuu' am masiluk. Sotopot no kabuluran ru Siir, am niayuk titikop ru pagun Idom masauk ra kolondo' tutuu' am masiluk. Paat raginio makapandai boo moonong ulun ra Aku noyo Tuhan.”