YEHEZKIEL 34 - Tanou Moonsoi Timugon

Magagalung-magagalung ru Israil

¹ Indagu Tuhan raki',

² “Okou ulun mapandai matoi, ulaso' raja'-raja' ru Israil. Panala' no am posoboyo' atan ondo' paraguon Kuno, Tuhan Raja' risilo, ‘Aibui boo ramuyun, akau magagalung ru Israil. Alungin min ayuk kaatangan min galama' am sala' ka kaatangan ru domba-domba.

³ Inumon min gatas ru domba, mambayang ra bulu domba, manimbalui am mangakan ra domba ondo' moonsoi kaga', kaa' kalo igondo' kau pagalung ra domba-domba no.

⁴ Kalo babason min ondo' malawo, kapoam mamabas ra ondo' marualan, kapoam mamangkos ra ondo' napilat, kapoam magibit muli' ondo' nakalayau kapoam maguyum ra ondo' natatak. Kaa' malaat boo pamakuan min ra ngaangai' domba no.

⁵ Sabap ra kolondo' magagalung, nantutuliar domba-domba no am saamon ru bibiag masigo.

⁶ Domba-domba Kuno pana timinanggau boo ra bulur am gunung, nantutuliar ra tana' ti. Kolondo' sangulun pana naguyum kapoam minirot koson mokoowot ra domba-domba no.

⁷ ‘Magagalung kau ngai', rongogo' atan ondo' paraguon Kuno, Tuhan.

⁸ Sabap ra Aku, i Aki Kapuuno' ondo' maayag, rongogo' ragu Kuno. Domba-domba Kuno sinaam am pinatoi, am niayuk inakan ru bibiag masigo sabap ra kolondo' magagalung ondo' magalung ra domba-domba no. Akau magagalung Ku kalo mirot maguyum ra domba-domba no. Alungin min kaatangan galama', sala' ka kaatangan ru domba-domba Kuno.

⁹ Ginio ra rongog kano Raki', magagalung kau ngai'.

¹⁰ Aku, Tuhan Raja', mampatanou ra Aku pantula' min. Alapon Ku domba-domba Kuno intor ramuyun, am domba-domba kalo boo palansanin ramuyun. Kalo boo mangiou Aku ramuyun magalung ra kaatangan min galama' ayuk. Bayagon Ku domba-domba maa' raginio kalo masauk ra akanon min.’ ”

Magagalung ondo' moonsoi

¹¹ Indagu Tuhan Raja', “Aku galama' maguyum ra ulun ru Israil, domba-domba Kuno, am magalung risilo,

¹² koson ra sangulun magagalung maguyum am manimung ra domba-domba nano ondo' nantutuliar. Timungon Ku ilo intor ra intok ilo pinatutuliar paat ra rondom ondo' molondom am karaat no.

¹³ Paingkualon Ku ilo intor ra pagun-pagun ra bokon am manimung risilo, am magibit risilo muli' ra pagun galama' nilo. Ibiton Ku ilo saguli' ra gunung-gunung am limayak-limayak giu' ra Israil. Aniin Ku ilo ra akanon giu' ra padang-padang sakot ondo' malabung.

¹⁴ Polosoon Ku ilo mongkotop ra maansukan giu' ra padang masansam. Mangiou Aku risilo mangakan giu' ra padang sakot giu' ra gunung, giu' ra limayak, am giu' ra padang sakot ondo' masansam giu' ra Israil.

¹⁵ Aku galama' magalung ra domba-domba Kuno. Maguyum Aku ra intok tangusan risilo. Aku, Tuhan Raja' nakaindagu noyo.

¹⁶ “Uyumon Ku ilo ondo' natatak, ibiton muli' ilo ondo' nakalayau, am babason ilo ondo' marualan; kaa' ilo ondo' molomok am maikang pusoon Ku, sabap ra Aku magagalung ondo' mambaal ra matimpok.

¹⁷ “Rongogo', akau domba Kuno. Aku, Tuhan Raja', nambala' ramuyun ra mangakim Aku ramuyun sigagama', am mampatuliar ra moonsoi intor ra malaat, domba intor ra kambing.

¹⁸ Ra akau ngai' no mokoondo' ondo' manguang ra mangakan ayuk ra sakot ondo' moonsoi kaga', kaa' niayuk manginjang-nginjang ra sakot ondo' inakan nilo! Manginum ilo ra timug maniol, kaa' mampalutok ra timug ondo' kalo inumon nilo.

¹⁹ Domba-domba Kuno ra bokon mangakan kalalaat ra sakot ondo' kininjangan am nanginum ra timug ondo' linutok.

²⁰ “Ginio ra Aku, Tuhan Raja', nambala' ramuyun ra Aku masauk ra akim ru domba ondo' maikang am domba ondo' malawo.

²¹ Sangawon min am anjungon min domba ondo' marualan saboi maanjung ilo intor ra sampanon ru domba.

²² Kaa' bayagon Ku domba-domba Kuno am kalo boo polosoon ilo malaat pamakuan. Mangakim Aku ra moonong domba Kuno am mampatuliar ra ondo' moonsoi intor ra ondo' malaat.

²³ Pasaukon Ku sangulun ra raja' koson ri Daut, ulipon Kuno, koson masauk ra rorondo' magagalung risilo, am magalung io risilo.

²⁴ Aku, Tuhan masauk ri Aki Kapuuno' nilo; am sangulun raja' koson ri Daut, ulipon Kuno masauk ra ulun manguasa' risilo. Aku, Tuhan nakaindagu noyo.

²⁵ Makimabantu' Aku risilo ondo' makapamayag risilo. Unjawon Ku ngaangai' bibiag masigo intor ra pagun no, maa' raginio domba-domba Kuno maayag ra matanda' giu' ra padang am mombolong giu' ra kataunan.

²⁶ Mambarakat Aku risilo am mangiou risilo maayag ra libung ru bulur Kuno ondo' matulai. Giu' no mambarakat Aku risilo ra rasam bulintok ra ilo makapakuan no.

²⁷ Puun ru tataun mangkawa', umo mangingkual ra ampos, am moonong ulun mayan ra moonsoi giu' ra tana' nano galama'. Paat ra Aku mangukat ra nakabangkil ra ulun Kuno am mampalabus risilo intor ra bansa' ondo' nangulipon risilo, bagu no makapandai ilo ra Aku noyo Tuhan.

²⁸ Bansa'-bansa' ondo' kalo nakaulig Raki' kalo boo mongoi pantakou ra ulun Kuno, am bibiag masigo pana kalo mamatoi am mangakan risilo. Moonsoi kaayagan nilo, am kolondo' osoi pana mampalalaa' risilo.

²⁹ Aniin Ku ilo ra tana' ondo' malabung am niayuk mamuso ra bitilan giu' ra pagun no. Bansa' ra bokon kalo boo magagasab risilo.

³⁰ Ngaangai' ulun makapandai boo ra Aku nanindung ra Israil, am ilo ulun Kuno. Aku, Tuhan Raja' nakaindagu noyo.

³¹ Totopot akau no sampanon ru domba ondo' pinakan Kuno. Akau noyo ulun Kuno am Aku noyo i Aki Kapuuno' min.” Ginio noyo ragu ru Tuhan Raja'.