YEHEZKIEL 33 - Tanou Moonsoi Timugon

Linantik ri Aki Kapuuno' i Yehezkiel koson ra magagalung

¹ Indagu Tuhan raki',

² “Okou ulun mapandai matoi, balai' bansa' muno ra atan ondo' masauk paat ra Aku mamparatong ra pangayawan ra rorondo' pagun. Mamagun ru pagun no mampili' ra sangulun intor risilo koson ra magagalung.

³ Paat ra magagalung no makakito ra pantula' matong, samputin no bujung koson ra tatandu' makalalaa' maa' raginio ngaangai' ru ulun pagilalain.

⁴ Osoi ayuk mokorongog ra bolos tatandu' makalalaa' no kaa' kalo mampalio raginio, am pantula' matong am mamatoi ra ulun no, io pana matoi sabap ra kasalaan nano galama'.

⁵ Pinatayan nano kinibit ru kasalaan nano galama', sabap ra kalo nampalio io ra tatandu' makalalaa' no. Amon nampalio io ra tatandu' makalalaa' no, maaru' bayagon io.

⁶ Kaa' amon ru ulun magagalung no nakakito ra pantula' matong am kalo mampagia' ra tatandu' makalalaa', matong boo pantula' am mamatoi ra ulun makatula, karaan Ku ulun magagalung no mansaan ra pinatayan nilo.

⁷ Raino, okou ulun mapandai matoi, lantikon Tokou masauk ra magagalung ru bansa' ru Israil. Musiti' mu posoboyon pampakaraan Kuno risilo.

⁸ Amon ru mambala' Aku ra ulun malaat matoi, kaa' kalo nangani' kou risilo ra pampakaraan maa' raginio kulawon nilo paliso am mamayag ra inan, ilo pana matoi koson ra ulun makatula. Karaan Tokou mansaan ra pinatayan nilo.

⁹ Amon ru mangani' kou ra pampakaraan ra ulun malaat, am kalo lumonggo' ilo mambaal ra tula, matoi ilo koson ra ulun makatula, kaa' okou mamayag ra inan galama'.”

Pinalansan ra sasangulun

¹⁰ Indagu Tuhan raki', “Okou ulun mapandai matoi, rulio' noyo ragu-ragu ru ulun ru Israil risilo, ‘Nangkagas akai sabap ra nansaan akai ra bagat ru tula am kasalaan mai. Ati kulaan akai maayag?’

¹¹ Balai' ilo ra sabap ra Aku, Tuhan Raja', i Aki Kapuuno' ondo' maayag, kalo masaga' Aku magilong ra ulun makatula matoi. Masaga' Aku poyo magilong ra ilo tumalikur intor ra tula am maayag. Akau Israil, langgai' noyo mambaal ra tula! Kua kasaga' kau matoi?

¹² “Okou ulun mapandai matoi, pambala' no ra ulun ru Israil ra paat ulun moonsoi makatula, kinoonsoi nilo ragili kalo makapamayag risilo. Amon ru ulun malaat lumonggo' mambaal ra tula, kalo ukumin ilo. Kaa' amon ru ulun moonsoi tumalimpuun makatula, kalo mabayag ilo.

¹³ Maaru' lair nambantu' Aku ra kaayagan ra ulun moonsoi, kaa' amon ru indoson nilo ra kinoonsoi nilo ragili makapamayag risilo, am ilo pana tumalimpuun makatula, kalo karaan Ku kinoonsoi nilo ragili. Matoi ilo sabap ra tula nilo.

¹⁴ Maaru' lair nampakara' Aku ra ulun malaat ra matoi ilo. Kaa' amon ru lumonggo' ilo mambaal ra tula am mambaal ra atan ondo' moonsoi am motopot –

¹⁵ koson pasagulion nilo kuliamos ru ulun bokon kapoam pasagulion kuliamos ondo' tinakou nilo – amon ru lumonggo' ilo mambaal ra tula am gumagaya' ra ukum ondo' mangani' ra bayag, kalo matoi ilo kaa' maayag.

¹⁶ Ampunon Ku tula-tula ondo' binaal nilo, am maayag ilo sabap ra nambaal ra atan ondo' moonsoi am motopot.

¹⁷ Kaa' bansa' muno mindagu ra binaal Kuno kalo matimpok! Binaal nilono ondo' kalo matimpok!

¹⁸ Paat ra ulun moonsoi tumalimpuun mambaal ra malaat, matoi ilo sabap ra binaal malaat no.

¹⁹ Paat ra ulun malaat lumonggo' mambaal ra tula am mambaal ra atan ondo' moonsoi am motopot, maayag ilo.

²⁰ Kabalu' pana raginio Israil lakat poyo mindagu ra binaal Kuno kalo matimpok. Ginio ra akimin Ku ilo sumugut ra binaal nilo.”

Tanou intor ra karatuan ru Jirusalim

²¹ Paat ra orou kalimo, sila' koopor, bilor koopor am ruo paat ra akai ralalom pamatiran, sangulun ondo' nagiru' intor ra Jirusalim minatong nambala' raki' ra bandar no naratu' noyo.

²² Paat ra rondom ra io kalo poyo nakaratong, nakaliman aku ra kuasa' ru Tuhan. Paat ra ulun no nakasaboi ra suabon no, nambaal Tuhan raki' makaindagu saguli'.

Tula ru ulun ru Israil

²³ Indagu Tuhan raki',

²⁴ “Okou ulun mapandai matoi, ulun ondo' minayan giu' ra intok nalunsai ra bandar-bandar ru Israil mindagu, ‘I Abragam sangulun ayuk, am nakaalap ra titikop ru tana' ti; kaa' itakau ti masuang, am maaru' no tana' ti masauk ra longgom takau.’

²⁵ “Posoboyo' atan ondo' paraguon Kuno, Tuhan Raja' risilo: Nanginta' kau ra kual ondo' lakat poyo makararaa'. Sinamba min sinungkalalaing am namatoi. Ati kulaan kau mangkara' ra tana' ti longgom min?

²⁶ Malansan kau ra ilang min. Binaal mino makauyuyu'. Akau ngaangai' nansawa'. Ati kulaan kau mangkara' ra tana' no longgom min?

²⁷ “Posoboyo' ragu pampakaraan intor Raki', Tuhan Raja' risilo. Sabap ra Aku, i Aki Kapuuno' ondo' naayag, ulun ondo' minayan giu' ra intok nalunsai ra bandar-bandar no potoyon. Ilo ondo' minayan giu' ra kampung akanon ru bibiag masigo. Ilo ondo' nansibuni giu' ra gunung am giu' ra luang batu matoi sabap ra maruol tumapik.

²⁸ Saukon Ku pagun ti ra tana' kaagisan ondo' kolondo' tutuu' am masiluk, am kinaayo ondo' lilimbawan min pupusin. Gunung-gunung giu' ra Israil saukon ra masiluk saboi kolondo' sangulun pana mansail ra giu' no.

²⁹ Paat ra Aku mangukum ra ulun no sabap ra tula nilo, am mampasauk ra pagun no kolondo' tutuu' am masiluk, bagu no makapandai ilo ra Aku noyo Tuhan.”

Israil kalo nampalio ra pinatanou ru nabi

³⁰ Indagu Tuhan, “Okou ulun mapandai matoi, bansa' muno mansunur rirun paat ilo naguma' mamaar ra timbok ru bandar kapoam giu' ra talupak ru kulobon ru baloi nilo. Ilo galama' nagindagu, ‘Ibok rongog takau ra atan ragu ru Tuhan ra orou raiti'.’

³¹ Ilo ngaangai' pana matong tumimung am koson ra ulun Kuno rumongog ilo rirun, kaa' kalo binaal nilo atan ondo' nanusuban muno. Ragu nilo maamis, kaa' guang nilo mangkara' ayuk ra maulian.

³² Karaan nilo okou sangulun maririmbai ra rimbai togom ondo' maamis bolos am mapandai mangkuli ra jitor. Rongogon nilo ngaangai' ragu muno, kaa' kalo gagayaan.

³³ Kaa' paat ra ragu-ragu muno masauk ra tauli no – am maaru' ngaangai' no masauk – bagu no makapandai ilo ra sangulun nabi igondo' soroi ra tatanga' nilo.”