YEHEZKIEL 32 - Tanou Moonsoi Timugon

Raja' ru Misir pinogondo' ra buayo

¹ Paat ra orou kasaa', sila' koopor am ruo, bilor koopor am ruo paat ra akai ralalom ru pamatiran, indagu Tuhan raki',

² “Okou ulun mapandai matoi, anii' ra pampakaraan moporos ra raja' ru Misir. Posoboyo' ragu Kuno riso, ‘Giu' ra saang ru bansa'-bansa' ra bokon ilai' kou ayuk koson ra singa', kaa' baal muno koson poyo ra buayo ondo' minabol giu' ralalom ru sungoi. Kalayam muno nampalutok am nampajamol ra sungoi-sungoi.

³ Paat ra bansa'-bansa' tumimung, rokopon Tokou ra ralo Kuno am mopoloso ra bansa'-bansa' mamparalaat ra ralo no ra lantur.

⁴ Pampasin Tokou ra tana' am manusub ra ngaangai' susuit am bibiag ra tana' ti mangakan rirun.

⁵ Patabulon Ku baangkai muno ondo' mootong no giu' ra titikop bulur am limayak.

⁶ Pasasaron Ku raraa' muno saboi mamasa' ra bulur-bulur am mototop sungoi-sungoi boborok.

⁷ Paat ra Aku mamuso rirun, siliin Ku limbowon am mampalasa' ra ngaangai' butitin. Mato ru orou libungin ru gaun, am bulan pana kolondo' boo sinda.

⁸ Lasain Ku ngaangai' sinda giu' ra limbowon, am mampasauk ra pagun muno molondom kaga'. Aku, Tuhan Raja' nakaindagu noyo.

⁹ Masuang bansa' malaa' paat potonowon Ku tanou intor ra kapusaan muno ra pagun-pagun ondo' kalo nauligan muno.

¹⁰ Binaal Kuno rirun mampatigog ra masuang bansa'. Paat ra Aku mampaakang ra ilang Kuno, mangalaa' raja'-raja'. Paat ra orou okou maratu', ilo ngaangai' monontol sabap ra malaa' matoi.’ ”

¹¹ Indagu Tuhan Raja' ra raja' ru Misir, “Manguma' kou ra ilang ru raja' ru Babilonia.

¹² Saujor-saujor intor ra bansa'-bansa' ondo' malaat mamutus ra ilang am mamatoi ra ngaangai' mamagun muno. Mamagun muno am ngaangai' ondo' limbawan muno mapuso.

¹³ Potoyon Ku bibiag tinambiag muno giu' ra kiing ru sungoi-sungoi. Ulun pana am niayuk bibiag kalo boo mampalutok ra timug ru sungoi.

¹⁴ Kaniolon Ku timug ru sungoi muno am tumilis ra moonsoi. Aku, Tuhan Raja' nakaindagu noyo.

¹⁵ Paat ra pasaukon Ku Misir ra tana' kaagisan ondo' kolondo' tutuu' am masiluk, am niayuk mamuso ra ngaangai' mamagun ra giu' no, bagu no makapandai ilo ra Aku noyo Tuhan.

¹⁶ Pampakaraan ragitio masauk ra rimbai sulaboi, am ruandu' ru bansa'-bansa' ra bokon marimbai raginio koson manulaboi ra Misir am ngaangai' mamagun nano. Aku, Tuhan Raja', nakaindagu noyo.”

Intok ru ulun minatoi

¹⁷ Paat ra orou koopor am limo, sila' kasaa', bilor koopor am ruo paat ra akai ralalom ru pamatiran, indagu Tuhan raki',

¹⁸ “Okou ulun mapandai matoi, panulaboi no ra tayar ru mamagun Misir ondo' masuang no. Atari' noyo ilo mababaya' ra bansa' ra bokon ondo' maikang ra intok ru ulun minatoi.

¹⁹ Raguo' noyo risilo, ‘Mangkara' kau kia ra mantalur kau poyo intor ra ulun ra bokon? Tumuun kau ra intok ru ulun minatoi, am lumangan ra giu' mababaya' ra ulun ondo' kalo makaulig ri Aki Kapuuno'.’

²⁰ “Mamagun ru Misir matoi mababaya' risilo ondo' matoi ralalom pangayawan. Rondo' ilang nakatampos noyo koson mamatoi risilo ngaangai'.

²¹ Ulun-ulun tutumula' am ulun ondo' manaung ra Misir manguma' ra ratangan ru ulun ru Misir mongoi ra intok ru ulun minatoi. Nagilakup ilo, ‘Ilai', ulun ondo' kalo makaulig ri Aki Kapuuno' minatoi ralalom pangayawan. Raino matong ilo ragiti, am lumangan ragiti!’

²² “Soroi Asyur ra giu', liniputan ru lobong-lobong ru saujor-saujor nano. Ilo ngaangai' minatoi ralalom pangayawan,

²³ am lobong nilo tampilon ra ralalom toojo giu' ra intok ru ulun minatoi. Ngaangai' saujor nano minatoi ralalom pangayawan am Asyur liniputan ru lobong nilo. Kaa' rondo' paat ragili, nampatabual ilo ra mampalalaa' giu' ra intok ru ulun minatoi.

²⁴ “Soroi i Ilam ra giu', liniputan ru lobong-lobong ru saujor nano. Ilo ngaangai' minatoi ralalom pangayawan, am timinuun ra intok ru ulun minatoi ra kalo nakaulig ri Aki Kapuuno'. Bulintok naayag, nampatabual ilo mampalalaa' ra gino ngai' ru ulun, kaa' raino minatoi ilo am nansaan ra uyu'.

²⁵ Liminangan i Ilam nabaya' risilo ondo' minatoi ralalom pangayawan, liniputan ru lobong-lobong ru saujor nano. Ngaangai' no minatoi ralalom pangayawan. Bulintok naayag, nampatabual ilo mampalalaa' ra gino ngai' ru ulun, kaa' raino minatoi ilo am nansaan ra uyu' nababaya' ra ulun ondo' minatoi ralalom pangayawan.

²⁶ “I Misik am i Tubal soroi ra giu', liniputan ru lobong-lobong ru saujor nilo. Ilo ngaangai' kalo nakaulig ri Aki Kapuuno', am ilo ngaangai' minatoi ralalom pangayawan. Kaa' rondo' paat ragili nampalalaa' ilo ra ulun naayag.

²⁷ Kalo linobong ilo ra urumat koson ra ulun tutumula' paat ra galing i ondo' lobongon inukapan ra perisai ra tampak ru kubab. Bulintok maayag, ulun-ulun tutumula' maikang kaga' saboi mampalalaa' ra ulun naayag.

²⁸ “Koon raginio noyo ulun ru Misir matutuk am palanganon mababaya' ra ulun ondo' kalo makaulig ri Aki Kapuuno', ondo' minatoi ralalom pangayawan.

²⁹ “Soroi i Idom ra giu' nababaya' ra ngaangai' raja' am ulun manguasa' nano. Ragili ilo saujor ondo' maikang, kaa' raino nakalangan ilo giu' ra intok ru ulun minatoi nababaya' ra ulun ondo' kalo makaulig ri Aki Kapuuno', ondo' minatoi ralalom pangayawan.

³⁰ “Ngaangai' ulun manguasa' ru pagun-pagun ralayo soroi ra giu', koon raginio niayuk ra ulun ru Sidon. Rondo' paat ragili kuasa' nilo nampatabual ra mampalalaa', kaa' raino minatoi ilo am tinauyu' nababaya' risilo ondo' minatoi ralalom pangayawan. Linobong ilo nababaya' ra ulun ondo' kalo makaulig ri Aki Kapuuno'. Nansaan ilo ra pagasaban ru ulun ondo' timinuun ra intok ru ulun minatoi.

³¹ “Raja' ru Misir am saujor-saujor nano maansayan magilong ra ngaangai' ulun ondo' minatoi ralalom pangayawan.” Koon raginio noyo Tuhan Raja' minindagu.

³² “Aku noyo ondo' nangkinibit ra raja' ru Misir nampalalaa' ra ulun naayag, kaa' raino io am saujor-saujor nano potoyon. Lobongon ilo mababaya' ra ngaangai' ulun ondo' minatoi ralalom pangayawan, am ondo' kalo makaulig ri Aki Kapuuno'.” Koon raginio noyo ragu ru Tuhan Raja'.