YEHEZKIEL 31 - Tanou Moonsoi Timugon

Misir pinogondo' ra puun tataun sidar

¹ Paat ra orou kasaa', sila' katalu, bilor koopor am rondo' paat akai ralalom pamatiran, indagu Tuhan raki',

² “Okou ulun mapandai matoi, posoboyo' ragu Kuno ra raja' ru Misir am ngaangai' ru mamagun nano: Maikang kau kaga'! Kolondo' makagula' rirun.

³ Okou koson ra puun tataun sidar giu' ra Libanon, nososok ra pango ondo' masuang am moonsoi, puun tataun ondo' masawat saboi untu nano makasaboi ra gaun.

⁴ Sumawat puun tataun no sabap ra naukop ra timug. Sungoi giu' ra ragana' ru tana' nangani' riso ra akanon moonsoi, am nanimug ra bakat-bakat nano am niayuk mamasa' ra puun tataun ra bokon giu' ra kataunan.

⁵ Sabap ra naukop timug nano intor ra puun tataun ra bokon. Raan nano giminayo am maawar.

⁶ Ngaangai' salinut ru susuit nanabunsut ra raan nano, bibiag masigo naganak ra saau ra raan nano. Bansa'-bansa' sumindung ra saau nano.

⁷ Mapara' kia bonsoi ru puun tataun no, ondo' masawat kaga' am makaraan ra maawar. Bakat nano minongoi maalur ra ragana', siminuku' ra puun ru timug giu' ra ralalom ru tana'.

⁸ Kolondo' puun tataun sidar giu' ra taman ri Aki Kapuuno', ondo' mokogondo' ra puun tataun no. Kolondo' puun tataun fir ondo' makaraan koson ra raan nano. Kolondo' puun tataun berangan ondo' makapango koson ra pango nano. Kolondo' puun giu' ra taman ri Aki Kapuuno' ondo' koson ra bonsoi ru puun raginio.

⁹ Aku noyo nampasauk riso moonsoi, am raan ondo' masuang. Moonong puun tataun giu' ra Idin, taman ri Aki Kapuuno', moogot masauk koson riso.

¹⁰ “Ginio ra Aku, Tuhan Raja' mambala' ramuyun atan ondo' masauk ra puun tataun ondo' untu nano nakasaboi ra gaun. Gumaai sawat nano, gumaai limbau ru puun tataun no.

¹¹ Ginio ra inimpayan Ku io, am nampataak riso ra ulun manguasa' ra bansa' ra bokon. Pinamakuan ru bansa' no riso nogondo' ra kalaatan nano.

¹² Bansa' ra bokon ondo' malaat mantagar riso am mompoloso riso. Pango am raan nano ondo' napandak mantabulias giu' ra moonong gunung am niayuk limayak giu' ra pagun no. Bansa'-bansa' ondo' siminindung ra saau nano mangiruan ra puun tataun no.

¹³ Susuit matong am morop ra puun tataun ondo' naaba' noyo, am bibiag masigo manginjang-nginjang ra raan nano.

¹⁴ Ginio ra intor raino, kolondo' boo puun tataun ondo' tumuu' koson ra sawat raginio kapoam mokoondo' ra untu ondo' makasaboi ra gaun kabalu' pana mokoowot ra timug masuang. Ngaangai' no musiti' matoi koson ra ulun mapandai matoi am tumimung mabaya' ra ulun ondo' timinuun ra intok ru ulun minatoi.”

¹⁵ Koon raginio noyo ragu ru Tuhan Raja', “Paat ra orou tuunan ru puun tataun no ra intok ru ulun minatoi, mangkinibit Aku ra timug giu' ra ragana' ru tana' manimug riso koson ra tatandu' mangulir. Ompongon Ku aug ru timug ru sungoi am sonsongon sungoi-sungoi boborok. Sabap ra puun tataun no minatoi noyo, porotongon Ku kalandaman giu' ra Kagunungan Libanon am mampasauk ra ngaangai' puun tataun giu' ra kataunan lumonot.

¹⁶ Paat ra Aku mampatuun ra puun tataun no ra intok ru ulun minatoi, bolos ru karatuan nano manguyog ra bansa'-bansa'. Ngaangai' puun tataun giu' ra Idin am ngaangai' puun tataun moonsoi kaga' giu' ra Libanon ondo' mokoowot ra timug ra masuang kaga', ondo' timinuun noyo ra intok giu' ra ragana' maansukan sabap ra karatuan nano.

¹⁷ Ngaangai' puun tataun mangator riso ra intok ru ulun minatoi koson maya' ra puun tataun ondo' nakapagulu noyo naratu' ragili. Ngaangai' ondo' siminindung ra saau ru puun tataun no mantutuliar ra gino ngai' ru bansa'.

¹⁸ “Puun tataun no tatandu' ru raja' ru Misir am mamagun nano. Kolondo' puun tataun giu' ra Idin ondo' totopot masawat am matulai. Kaa' raino, koson ra puun tataun giu' ra Idin, puun tataun no timinuun ra intok ru ulun minatoi am minayan risilo ondo' kalo makaulig ri Aki Kapuuno' am niayuk ilo ondo' minatoi ralalom ru pangayawan. Aku, Tuhan Raja' nakaindagu noyo.”