YEHEZKIEL 30 - Tanou Moonsoi Timugon

Ukumin ru Tuhan Misir

¹ Indagu Tuhan raki',

² “Okou ulun mapandai matoi, panala' no am potonowo' atan ondo' raguon Kuno, Tuhan Raja'. Golok no am panulaboi no koson ragitio: Orou ru Tuhan mamaar noyo!

³ Orou no mamaar noyo, paat Tuhan mimbuor. Orou raginio molondom am mapagon ra tayar ru bansa'-bansa'.

⁴ Pangayawan masauk giu' ra Misir, am kaimbalaan makalumpa' ra Itiopia. Masuang ulun giu' ra Misir matoi; pagun no talingaawon, am polosoon masauk ra malunsai.

⁵ Saujor-saujor ondo' ginajian intor ra Itiopia, Lidia, Libia, Arab, Kub am poyo intor ra ulun Kuno galama', matoi ralalom ru pangayawan no.”

⁶ Indagu Tuhan, “Intor ra Migdol giu' ra tampilon ralayo saboi ra Aswan giu' ra tampilon rabugus, ngaangai' ulun manungka' ra Misir minatoi ralalom pangayawan. Saujor ru Misir ondo' malilimbau no mapuso. Aku, Tuhan Raja' nakaindagu noyo.

⁷ Pagun no masauk ra pagun ondo' kolondo' tutuu' am masiluk kaga' ra tana' ti. Bandar-bandar no malunsai kalingon.

⁸ Mopongo Aku monolob ra Misir am mamatoi ra ngaangai' ulun manungka' riso, bagu no makapandai ilo ra Aku noyo Tuhan.

⁹ “Paat ra orou raginio, paat ra Misir napuso, atarin Ku ulun ra kapal-kapal koson mampatigog ra Itiopia ondo' kalo manantam no saboi ilo malaa'. Orou raginio mamaar noyo!”

¹⁰ Indagu Tuhan Raja', “Pakayon Ku Raja' Nibukadnijar intor ra Babilonia koson manutuk ra kalangkayaan ru Misir.

¹¹ Io am saujor nano ondo' malaat mamuso ra pagun no. Mamulunsar ilo ra Misir ra ilang, saboi pagun no mososok ra baangkai.

¹² Lasakin Ku Sungoi Nil am pataakon Misir ra ralalom kuasa' ru ulun malaat. Ulun bansa' ru bokon mamuso ra titikop pagun no. Aku, Tuhan nakaindagu noyo.”

¹³ Indagu Tuhan Raja', “Pusoon Ku sinungkalalaing no am dewa-dewa giu' ra Mimpis. Kolondo' boo raja' ondo' mamarinta giu' ra Misir am baalon Ku ngaangai' ulun malaa'.

¹⁴ Saukon Ku tampilon rabugus ru Misir kolondo' tutuu' am masiluk, am solobon Ku bandar Soan giu' ra tampilon ralayo. Ukumin Ku Tibi, pusor bandar no,

¹⁵ am mamuso ra kalangkayaan nano. Paabuson Ku sangit Kuno ra Pilusium, bandar kaikangan ru Misir.

¹⁶ Solobon Ku Misir, am Pilusium pana maimbolo'. Timbok ru bandar Tibi lunsayon am bandar no malumpa' ru liur.

¹⁷ Ungkuyon-ungkuyon mamulok ru bandar Giliopolis am Bubastis matoi ralalom ru pangayawan, am mamagun ra bokon rokopon.

¹⁸ Bandar Tapanis lumondom paat ra orou Aku manguasa' ra Misir am mamuso ra kuasa' nano ondo' limbawan nano. Misir libungin ru gaun, am ngaangai' mamagun ru bandar no rokopon.

¹⁹ Paat ra Aku mangukum ra Misir koson raginio, bagu no makapandai ilo ra Aku noyo Tuhan.”

Kuasa' ru Raja' Misir pinandak

²⁰ Paat ra orou katulu', sila' kasaa', bilor koopor am rondo' paat akai ralalom pamatiran, indagu Tuhan raki',

²¹ “Okou ulun mapandai matoi, pinandak Ku kalindu' ru raja' ru Misir. Kolondo' osoi pana ondo' mamangkos ra kalindu' nano maa' raginio mapuna' am maikang saguli' koson mampaguut ra ilang.

²² Ginio ra Aku, Tuhan Raja' mindagu: Aku ti pantula' ru raja' ru Misir. Pandakon Ku karuo-ruo kalindu' nano, ondo' lakat poyo maikang am niayuk ondo' napandak noyo. Ilang pana maratu' intor ra kalindu' nano.

²³ Pantutuliaron Ku ulun ru Misir ra titikop ru tana' ti.

²⁴ Aku pana mampaikang boo ra kalindu' ru raja' ru Babilonia am ilang Kuno pabantaan ra kalindu' nano. Kaa' pandakon Ku kalindu' ru raja' ru Misir saboi io mampalaa marualan am matoi giu' ra saang ru raja' ru Babilonia.

²⁵ Mampalawo Aku ra raja' ru Misir, kaa' mampaikang Aku ra raja' ru Babilonia. Paat ra Aku mampabanta' ilang Kuno ra kalindu' ru raja' ru Babilonia, paakangon no ilang no ra tampilon Misir, ngaangai' ulun makapandai ra Aku noyo Tuhan.

²⁶ Pantutuliaron Ku ulun ru Misir ra titikop ru tana' ti. Makapandai ilo ra Aku noyo Tuhan.”