YEHEZKIEL 3 - Tanou Moonsoi Timugon

¹ Indagu i Aki Kapuuno', “Okou ulun mapandai matoi, akano' naskhah rinulun ti, am ugar no am indagu ra ulun ru Israil.”

² Ginio ra gaalo' ku kabang am pataako' No naskhah rinulun no raki' maa' raginio akanon.

³ Indagu Io, “Okou ulun ondo' mapandai matoi, akano' naskhah rinulun ondo' pataakon Kutu am suangi' tinai' muno raginio.” Akano' ku am malimanan ginio matamis koson ra ruu' ru maningot.

⁴ Indagu boo i Aki Kapuuno', “Okou ulun mapandai matoi, ongoi no ra ulun ru Israil am posoboyo' ngaangai' ragu Kutu risilo.

⁵ Kalo manusub Aku rirun mongoi ra rondo' bansa' ondo' ragu nano suai am mapagon rirun kaa' manusub Aku rirun mongoi ra ulun ru Israil.

⁶ Amon ru manusub Aku rirun mongoi ra bansa'-bansa' ondo' ragu nano suai am kalo maratian muno, rumongog ilo rirun.

⁷ Kaa' kolondo' sangulun pana ra gino ngai' ru ulun ru Israil rumongog rirun sabap ra marara' ilo rumongog raki'. Ngaangai' nilo bambalingatan am masaga' manggal.

⁸ Kaa' raino baalon Tokou ra bambalingatan am mokotog ulu koson risilo.

⁹ Baalon Tokou koson ra kinaikang ru bulur batu am koson ra kinokotog ru intan. Pai' kalaa' ra ulun-ulun gumuor no.”

¹⁰ Rinayus ri Aki Kapuuno' ragu Nano, “Okou ulun mapandai matoi, ilai' toojo, am karaa' noyo ngaangai' ondo' raguon Kuno rirun.

¹¹ Kopongo raginio ongoi no ra bansa' muno ondo' ralalom ru pamatiran, am posoboyo' atan ondo' raguon Kuno, Tuhan Raja' risilo, ru rumongog ilo rirun kapoam kalo.”

¹² Kayango' aku boo ru Ambiluo ri Aki Kapuuno', am norongog ku bolos mosongou intor ra talikuron ondo' mindagu, “Omporo' noyo katulayan ru Tuhan giu' ra suruga'!”

¹³ Morongog ku bolos ru kawo ondo' pakabulon ru ilo ondo' maayag no, am bolos ru luda'-luda' ondo' mosongou koson ra bolos ru tana' mogonggon.

¹⁴ Kuasa' ru Tuhan rumatong raki' ra mapuor, am paat ra aku kinayang am inibit ru Ambiluo Nano, malimanan ku maruol guang am sumangit.

¹⁵ Pakasaboi aku boo giu' ra Til-Abib giu' ra kiing ru Sungoi Kibar, intok inayanan ru ulun pinatiran. Buoi tulu' ngoorou aku minayan ra giu' no, am nakasioro' sabap ra ngaangai' ondo' nakito ku noyo am norongog ku noyo.

Nampalantik Tuhan ri Yehezkiel nasauk ra Magagalung ru Israil

¹⁶ Kopongo tulu' ngoorou, indagu Tuhan raki',

¹⁷ “Okou ulun mapandai matoi, lantikon Tokou masauk ra magagalung ra bansa' ru Israil. Musiti' kou mampasaboi ra pampakaraan ondo' pataakon Kutu rirun ra tayar nilo.

¹⁸ Amon ru mambala' Aku ra sangulun ondo' malaat matoi, kaa' kalo pinasaboi mu pampakaraan Kuno riso maa' raginio mangulau ra paliso saboi maayag io, am io pana matoi koson sangulun makatula, am karaan Tokou ra mosonsol ra pinatayan nano.

¹⁹ Kaa' amon ru posoboyon mu pampakaraan no ra sangulun ondo' malaat kaa' kalo langgain no mambaal ra malaat, io pana matoi koson ra sangulun ondo' makatula, kaa' okou maayag.

²⁰ Amon ru sangulun ondo' moonsoi tumalimpuun mambaal ra malaat, am aku nampauma' riso ra makalalaa', am io pana matoi amon kalo aniin mu io ra pampakaraan. Matoi io sabap ra tula nano, am kalo karaan Ku binaal nali ondo' moonsoi ragili. Kaa' karaan Tokou ra mosonsol ra pinatayan nano.

²¹ Amon ru mampakara' kou ra sasangulun ondo' moonsoi maa' raginio kalo mambaal ra tula, am io pana sumugut ra bilin muno am kalo makatula, am io pana maayag am okou pana maayag.”

Masauk i Yehezkiel ra bobou

²² Makaliman aku ra kuasa' ru ratangan ru Tuhan am mokorongog Riso mindagu raki', “Ingkakat no am ongoi no ra limayak. Mindagu Aku rirun ra giu' no.”

²³ Ginio ra minongoi aku ra limayak am giu' no makakito aku ra katulayan ru Tuhan koson ondo' nakito kuno giu' ra kiing ru Sungoi Kibar. Naratu' aku pakakubu ra tana',

²⁴ kaa' Ambiluo ri Aki Kapuuno' nanguasa' raki' am nampabigor raki'. Indagu Tuhan raki', “Uli' no am pagaput ra ralalom ru baloi.

²⁵ Bangkilon kou ra kalat, okou ulun ondo' mapandai matoi, am kalo makaingkual kou koson tumuum ra ulun masuang.

²⁶ Baalon Ku rila' muno kumotog saboi kalo makapangani' kou ra pampakaraan ra ulun-ulun gumuor ti.

²⁷ Paat ra Aku mindagu poyo rirun, am niayuk mangiou rirun mindagu saguli', musiti' kou mambala' risilo ra atan ondo' rinagu Kuno, Tuhan Raja'. Santayaran ulun rumongog, kaa' santayaran poyo kalo, sabap ilo totopot bansa' ra gugumuor.”