YEHEZKIEL 29 - Tanou Moonsoi Timugon

Bala' intor ra ukuman ra tayar ru Misir

¹ Paat ra orou koopor am ruo, sila' koopor, bilor koopor paat akai ralalom pamatiran, indagu Tuhan raki',

² “Okou ulun mapandai matoi, ulaso' raja' ru Misir. Balai' io ra io am ngaangai' mamagun nano ukumin.

³ Balai' io ra gitio noyo ragu ru Tuhan Raja' ra raja' ru Misir, ‘Aku pantula' muno, okou buayo maayo ondo' liminuya' giu' ra sungoi! Kamu ra Sungoi Nil no longgom muno, am okou nambaal no.

⁴ Paatangon kuno kakait ra bungul ru salura muno, am mangkinibit ra papait-papait giu' ra sungoi sumokot rirun. Kakaton Tokou am ngaangai' papait ondo' siminokot rirun, mingkual intor ra Sungoi Nil.

⁵ Kopongo raginio papatiron Tokou mabaya' ra ngaangai' papait no ra tana' kaagisan. Inan muno makabanta' ra tana' am kalo lobongon. Polosoon Ku inan muno akanon ru susuit am bibiag.

⁶ Ngaangai' mamagun ru Misir makapandai boo ra Aku noyo Tuhan.’ ” Indagu Tuhan, “Ulun ru Israil lumansan ramuyun ulun ru Misir koson mangindangan risilo, kaa' akau koson ayuk ra jujuga' ondo' matapu.

⁷ Paat ra ilo sumandig ramuyun, mapandak kau am manujok ra pakilok nilo saboi bakulung nilo masilik.

⁸ Ginio ra Aku, Tuhan Raja' mindagu ramuyun, ra porotongon Ku ulun koson mamulunsar ramuyun ra ilang. Mamatoi ilo ra mamagun am bibiag tinambiag min.

⁹ Masauk Misir ra intok kolondo' tutuu' am masiluk. Makapandai kau boo ra Aku noyo Tuhan. “Okou raja' ru Misir! Sabap ra minindagu kou ra Sungoi Nil longgom muno, am okou nambaal no,

¹⁰ Aku masauk boo ra pantula' muno am pantula' ru sungoi muno. Saukon Ku titikop ru Misir ra intok kolondo' tutuu' am masiluk, intor ra bandar Migdol giu' ra tampilon ralayo saboi ra bandar Aswan giu' ra tampilon rabugus, am makasaboi poyo ra balitan ru Itiopia.

¹¹ Kolondo' ulun kapoam bibiag mansail riso. Buoi apat ngambilor intok no kalo inayanan.

¹² Saukon Ku Misir ra pagun ondo' kolondo' tutuu' am masiluk kaga' ra titikop ru tana'. Buoi apat ngoopor ngambilor bandar-bandar giu' ra Misir intok nalunsai ondo' maaja' intor ra ati-ati bandar. Saukon Ku ulun ru Misir ra ulun nagiru'. Magiru' ilo mongoi ra ngaangai' pagun am mayan ra gino ngai' ru bansa' ra bokon.”

¹³ Indagu Tuhan Raja', “Makasail apat ngoopor ngambilor ibiton Ku ulun ru Misir muli' intor ra pagun-pagun nampatuliaran Kuno risilo.

¹⁴ Polosoon Ku ilo mayan giu' ra tampilon rabugus ru Misir, pagun intor nilo. Mayan ilo ra giu' am manirong rondo' pamarintaan ondo' malawo,

¹⁵ iono pamarintaan ondo' malawo kaga' am kalo makapanguasa' ra bansa'-bansa' ra bokon. Saukon Ku ilo ra malawo toojo saboi ilo kalo makapamarinta ra ati-ati bansa'.

¹⁶ Israil kalo boo makiindangan risilo. Paat ra ulun ru Israil mangkara' ra atan ondo' nasauk ra ulun ru Misir, ulun ru Israil makaliman ra mapara' boo sala no lumansan ra indangan ru ulun ru Misir. Ulun ru Israil pana makapandai ra Aku noyo Tuhan Raja'.”

Raja' Nibukadnijar manguasa' ra Misir

¹⁷ Paat ra orou kasaa', sila' kasaa', bilor karuo ngoopor am tulu' paat ra akai ralalom ru pamatiran, indagu Tuhan raki',

¹⁸ “Okou ulun mapandai matoi, Raja' Nibukadnijar intor ra Babilonia namulunsar noyo ra Tirus. Nanusub io ra saujor nano mansaan ra maagat kaga' saboi ulu nilo naampakan am limbawo nilo nalandaran. Kaa' raja' am niayuk saujor nano kalo nakasugut nampagaau ra bandar no.

¹⁹ Ginio ra Aku, Tuhan Raja' mindagu, ‘Pataakon Ku pagun ru Misir ra Raja' Nibukadnijar. Talingaawon no pagun no am mampagaau ra ngaangai' rapu' ru pagun no koson ra gaji' ru saujor nano.

²⁰ Pataakon Ku Misir riso koson mambalos ra binaal moonsoi nano, sabap ra saujor nano nangandoi Raki'. Aku, Tuhan Raja' nakaindagu noyo.’

²¹ Paat ra masauk baal raginio, saukon Ku ulun ru Israil ra bansa' ondo' maikang. Baalon Tokou Yehezkiel, mindagu risilo, maa' raginio makapandai ilo ra Aku noyo Tuhan.”