YEHEZKIEL 28 - Tanou Moonsoi Timugon

Bala' intor ra ukuman ra tayar ru Raja' Tirus

¹ Indagu Tuhan raki',

² “Okou ulun mapandai matoi, posoboyo' atan ondo' paraguon Kuno, Tuhan Raja' ra raja' ru Tirus, ‘Malilimbau kou am mangkara' ra inan muno dewa ondo' nanturung giu' ra tatanga' ru raat. Tumilu kou koson ra dewa, ondo' sotopot no ulun kou ayuk ondo' mapandai matoi!

³ Indoson mu ra mapintar kou poyo intor ri Danil, saboi mapandayan mu ngaangai' ondo' inopot.

⁴ Kapintaran am kapandayan muno mampalangkaya' rirun ra mas am pirok.

⁵ Mapandai kou mantalan am magail maulian. Lumimbau kou sabap ra kalangkayaan muno!’

⁶ Ginio ra, rongogo' atan ondo' paraguon Kuno, Tuhan Raja', ‘Sabap ra indoson muno mapintar kou koson ra dewa,

⁷ Mangator Aku ra pantula' ondo' malaat koson mamulunsar rirun. Pusoon nilo ngaangai' rapu' ondo' noowot muno ra kinapandai am kapintaran muno.

⁸ Mamatoi ilo rirun am mompolobong rirun giu' ra raat.

⁹ Paat raginio, lakat kou kia poyo mindagu ra dewa kou? Paat ra okou muma' ra ulun mamatoi rirun, makito ra ulun kou ayuk ondo' mapandai matoi am sala' ka dewa.

¹⁰ Matoi kou koson ra ulun asabin, pinatoi ru ulun bansa' ra bokon ondo' kalo makaulig ri Aki Kapuuno'. Aku, Tuhan Raja' minindagu noyo.’ ”

Karatuan ru Raja' Tirus

¹¹ Indagu poyo Tuhan raki',

¹² “Okou ulun mapandai matoi, panulaboi no ra tayar ru raja' Tirus. Posoboyo' atan ondo' paraguon Kuno, Tuhan Raja' riso, ‘Igondo' kou nasauk ra tiluan moonsoi kaga'. Ragili totopot kou mapintar am maindon!

¹³ Minayan kou giu' ra taman Idin, taman ri Aki Kapuuno'. Bayang muno binungaan ra ngaangai' salinut ru batu mologo: dalima', intan, topaj, biril, sardis, jaspir, nilam, jamrud am garnit. Mokoondo' kou niayuk ra limpor mas ondo' binaal ra tayar muno paat ra okou inangun.

¹⁴ Pinaayan Ku kirub ondo' makalalaa' ra giu' no koson magalung rirun. Minayan kou giu' ra rasawat ru gunung Kuno ondo' matulai am mugar giu' ra tatanga' ru batu mologo ondo' manguliat.

¹⁵ Paliso muno kalo majamol intor ra okou inangun saboi ra okou tumalimpuun mambaal ra malaat.

¹⁶ Kumantisuk kou ra talanon muno; baal raginio noyo ondo' nangkinibit rirun liminaat am makatula. Ginio ra pinagiru' Tokou intor ra gunung Kuno ondo' matulai am kirub ondo' magalung rirun nampagiru' rirun intor ra tatanga' ru batu mologo ondo' manguliat no.

¹⁷ Malilimbau kou sabap ra bulos muno maindon, am mambaal kou ra sasambungon sabap ra nauligan kou kaga'. Ginio noyo sabap ra pinampasan Tokou ra tana', am nampasauk rirun koson ra pampakaraan ra raja'-raja' ra bokon.

¹⁸ Talanon muno nososok ra ondo' kalo mabanis saboi intok-intok sambayangan muno najamalan. Ginio ra solobon ku bandar muno saboi mapuso. Ngaangai' ulun ondo' magilong rirun raino makakito ra kaau ayuk.

¹⁹ Naliom kono, alii ra raja' ru Tirus! Naliom kono ra sabubuoi no! Ngaangai' bansa' ondo' makaulig rirun malaa' amon ru ilo niayuk makatilu koson rirun.’ ”

Bala' intor ra ukuman ra tayar ru Sidon

²⁰ Indagu Tuhan raki',

²¹ “Okou ulun mapandai matoi, ulaso' bandar Sidon.

²² Balai' mamagun ra giu' no atan ondo' paraguon Kuno, Tuhan Raja': Aku pantula' muno Sidon. Ulun mongompor Raki' sabap ra atan ondo' binaal Kuno rirun. Makapandai ilo ra Aku noyo Tuhan ondo' matulai, paat ra Aku mangukum ra mamagun muno.

²³ Porotongon Kuno maruol tumapik rirun am mompoloso ra raraa' tumilis ra ralan-ralan muno. Bulunsaron kou ru pantula' intor ra ngaangai' intok am mamagun muno potoyon. Okou pana makapandai boo ra Aku noyo Tuhan.”

Israil barakaton

²⁴ Indagu Tuhan, “Ngaangai' pagun ra paginggaar ondo' igondo' nagasab ra Israil kalo boo nasauk ra ruui kapoam bulungkut makaruui ondo' mampakaruol ra Israil. Makapandai ilo boo ra Aku noyo Tuhan Raja'.”

²⁵ Indagu Tuhan Raja', “Ibiton Ku ulun ru Israil muli' intor ra pagun-pagun intok nampatuliaran Kuno risilo, am ngaangai' bansa' makapandai boo ra Aku ti matulai. Ulun ru Israil mayan poyo ra pagun nilo galama', tana' ondo' tinaakan Kuno ri Jakub, ulipon Kuno.

²⁶ Mayan ilo ra giu' ra moonsoi. Manambaloi ilo am manangumo ra anggur. Ukumin Ku ngaangai' pasambalayan nilo ondo' igondo' nagasab risilo, am Israil maayag ra moonsoi. Makapandai ilo boo ra Aku noyo Tuhan, i Aki Kapuuno' nilo.”