YEHEZKIEL 25 - Tanou Moonsoi Timugon

Bala' intor ra ukuman ra tayar ru Amon

¹ Indagu Tuhan raki',

² “Okou ulun mapandai matoi, ulaso' pagun ru Amon.

³ Susubo' bansa' no rumongog ra atan ondo' paraguon Kuno, Tuhan Raja' risilo, ‘Maansukan kau paat magilong ra Baloi Kuno jamalin, pagun ru Israil pusoon am mamagun ru Jiuda patirin ra pagun.

⁴ Ginio ra polosoon Ku akau kalaan ru bansa'-bansa' intor ra tana' kaagisan tampilon ra sirangon. Mampabigor ra kim giu' ra pagun min am mamagun ra giu' no. Akanon nilo kikinawa' am manginum ra gatas ru bibiag tinambiag min.

⁵ Saukon Ku bandar Raba intok manambiag ra unta, am titikop ru pagun Amon intok manambiag ra domba, maa' raginio makapandai kau ra Aku noyo Tuhan.’ ”

⁶ Indagu Tuhan Raja', “Masisang kau kaga' ra Israil saboi magilakup kau am mansasayau ra maansukan ra napusaan ru pagun Israil.

⁷ Ginio ra pataakon Takamin ra bansa'-bansa' ondo' mantakou am manalingaau ra ngaangai' longgom min. Pusoon Takamin koyoo' saboi akau sala' ka boo bansa' ondo' mokoondo' ra pagun galama'. Makapandai kau boo ra Aku noyo Tuhan.”

Bala' intor ra ukuman ra tayar ru Moab

⁸ Indagu Tuhan Raja', “Sabap ra Moab mindagu ra Jiuda nogondo' ra bansa'-bansa' ra bokon,

⁹ polosoon Ku pantula' mamulunsar ra bandar-bandar ondo' mangampin ra balitan ru Moab, nakaaya' bandar-bandar ra moonsoi kaga' iono Bit-Jisimot, Baal-Mion am Kiryataim.

¹⁰ Polosoon Ku Moab mabaya' ra Amon kalaan ru bansa'-bansa' intor ra tana' kaagisan tampilon ra sirangon, saboi Moab sala' ka boo rondo' bansa'.

¹¹ Ukumin Ku Moab, am mamagun nano pana makapandai ra Aku noyo Tuhan.”

Bala' intor ra ukuman ra tayar ru Idom

¹² Indagu Tuhan Raja', “Mamagun ru Idom nambalos noyo ra Jiuda ra malaat. Binaal ru Idom no kasalaan maayo.

¹³ Raino potonowon Ku ra ukumin Ku Idom. Potoyon Ku ngaangai' ulun am bibiag ondo' minayan ra giu' no. Pusoon Ku pagun no, intor ra bandar Timan saboi ra Bandar Didan. Mamagun nano matoi ralalom pangayawan.

¹⁴ Ulun Kuno Israil susubon Ku mansuli' ra Idom. Polosoon nilo Idom makaliman ra sangit Kuno ondo' moporos. Makapandai boo Idom ra ati kulaan malimanan masauk intok papaabusan ra sangit Kuno.” Tuhan Raja' nakaindagu noyo.

Bala' intor ra ukuman ra tayar ru Palistin

¹⁵ Indagu Tuhan Raja', “Ulun ru Palistin nansuli' noyo ra malaat ra pantula' nilo intor ragili, am namuso risilo ra masisang kaga'.

¹⁶ Raino potonowon Ku ra mamulunsar Aku ra ulun ru Palistin am mamuso risilo. Pusoon Ku moonong ulun ondo' lakat poyo maayag giu' ra tampilon ra nagas ru raat ra pagun no.

¹⁷ Ukumin Ku ilo ra maagat am paabuson guang mansuli' risilo. Paat ra ilo makaliman ra sangit Kuno, makapandai ilo ra Aku noyo Tuhan.”