YEHEZKIEL 22 - Tanou Moonsoi Timugon

Kalaatan Jirusalim

¹ Indagu Tuhan raki',

² “Okou ulun mapandai matoi, nakatampos kono kia mangukum ra bandar ondo' napapak ra ulun mamatoi? Pakitono' ngaangai' binaal nano ondo' makauyuyu' no riso.

³ Balai' bandar no ra atan ondo' paraguon Kuno, Tuhan Raja': Sabap ra namatoi kau ra masuang ulun mino galama', am nampajamol ra inan ra siminamba ra sinungkalalaing, raino jam ra ukuman mino mamaar noyo.

⁴ Makasala kau sabap nambaal noyo ra pampatayan, am jinamalan kau ru sinungkalalaing ondo' binaal mino. Ukuman pupus ra tayar min mamaar noyo. Polosoon Ku bansa'-bansa' am ngaangai' pagun mangingiis am manuyu' ramuyun.

⁵ Pagun-pagun ondo' mamaar am ondo' maalur mangiis ramuyun sabap ra inanggal min ukum am aturan.

⁶ Ngaangai' tingganai ru Israil lumansan ra kaikangan nilo galama' am namatoi.

⁷ Kolondo' osoi pana giu' ra bandar no mangurumat ra ina' am ama' nano. Ruungon min ulun bansa' ru bokon, am niayuk namparuung ra ruandu' napuor am anak nailusan ra matuo.

⁸ Kalo urumaton min intok-intok ondo' matulai am kalo iantakon min orou Sabat.

⁹ Sampiruo ra ulun muno magabau maa' raginio ulun ra bokon ukumin ra matoi. Mokoondo' poyo boo ondo' mangakan ra akanon ondo' pataakon ra sinungkalalaing. Mokoondo' ulun ondo' masalok mapagagaya' ra kasagaan galama' nilo.

¹⁰ Mokoondo' ulun ondo' marulug ra andu' ru ama' nilo. Mokoondo' ulun ondo' mampajajal ra ruandu' tatanga' liuran koson marulug risilo.

¹¹ Mokoondo' ulun ondo' mansawa'; ondo' bokon no poyo marulug ra anak mangiwan ruandu' kapoam pabukat ruandu' nilo ondo' rondo' ama' mansuai ra ina'.

¹² Mokoondo' ulun ondo' masauk ra ulun mamatoi ra bayarin. Mokoondo' ulun makatimung ra bunga' ru ruit intor ra gino ngai' ru ulun ru Israil. Masauk ilo ra langkaya' ra mamparuung ra ulun. Nakalilian ilo noyo Raki'.” Tuhan Raja' nakaindagu noyo.

¹³ “Popotoyon Ku ulun mantakou am ulun mamatoi min.

¹⁴ Lakat poyo kia baani kau kapoam lakat poyo kia maikang kau mangakat ra kalindu' min malupus ra Aku mangukum ramuyun? Aku, Tuhan minindagu noyo am mambaal Aku ra atan ondo' rinagu Ku noyo.

¹⁵ Pantutuliaron Ku mamagun muno ra ngaangai' pagun am bansa'. Langgain Ku binaal muno ra malaat no.

¹⁶ Bansa'-bansa' ra bokon magasab ramuyun, kaa' makapandai kau ra Aku noyo Tuhan.”

Rapuan ondo' mampapasau

¹⁷ Indagu Tuhan raki',

¹⁸ “Okou ulun mapandai matoi, ulun ru Israil kolondo' onong Raki'. Ilo koson ra ginsamol ru basi' – tambaga', timah mapulak, basi', am timah maitom – ondo' soroi malupus pirok kinapasau giu' ra ralalom ru rapuan.

^19-20 Ginio ra Aku, Tuhan Raja' nambala' risilo raino, ra kolondo' onong nilo koson ra ginsamol ru basi' no. Koson ra ulun mampasubol ra unor ru pirok, tambaga', basi', am timah maitom ra ralalom ru rapuan, koon raginio niayuk ra Aku manimung am magibit risilo ra Jirusalim. Koson ra apui mampaliou ra unor ru logam, koon raginio niayuk ra sangit Kuno mampaliou risilo.

²¹ Sotopot no timungon Ku ilo giu' ra Jirusalim, mampaang ra apui ru sangit Kuno giu' ra saau nilo, am mampaliou risilo.

²² Koson ra pirok liniou giu' ra ralalom ru rapuan, koon raginio noyo Israil liowon giu' ra Jirusalim. Bagu no makapandai ilo ra makaliman ilo ra sangit ru Tuhan.”

Tula ru tingganai-tingganai ru Israil

²³ Indagu poyo Tuhan raki',

²⁴ “Okou ulun matulai, balai' ulun ru Israil ra pagun nilo kalo mapasau. Ginio ra Aku sumangit am mangukum risilo.

²⁵ Tingganai-tingganai nilo koson ra singa' ondo' mansangal malupus nansaam ra akanon. Namatoi ilo ra ulun, nampagaau ra ngaangai' ruit am rapu', am niayuk nangkinibit ra masuang ruandu' nasauk ra napuor.

²⁶ Minanggal imam-imam ra ukum Kuno am kalo mangurumat ra atan ondo' mapasau ra tayar Kuno. Kalo pansalaan nilo atan ondo' mapasau am atan ondo' kalo mapasau. Kalo nangila' ilo ra nansala' ondo' iowon am ondo' inggalarin. Kalo lioon nilo orou Sabat. Kinibit ru ginio ulun ru Israil kalo mangurumat Raki'.

²⁷ Pagawai ru pamarintaan nogondo' koson ra taani ondo' naminsang ra sinaam nilo. Namatoi ilo koson masauk ra langkaya'.

²⁸ Nabi-nabi nambuni ra tula-tula raginio koson ra ulun nangapur ra timbok. Nakakito ilo ra pinaintalang ondo' magabau, am nambaal ilo ra ragu inala' ondo' magabau niayuk. Minindagu ilo ra nampasaboi ilo ra ragu intor ra Tuhan, Raja', kaa' Aku, Tuhan kalo minindagu risilo.

²⁹ Ulun langkaya' namparuung am nampagaau. Inimbolo' nilo ulun musikin am namparuung ra ulun bansa' ru bokon.

³⁰ Maguyum aku ra sangulun ondo' makabaal ra timbok, ondo' makabigor giu' ra tampilon ra timbok ondo' nalunsai noyo koson mangampin ra pagun paat ra Aku masaga' mamuso raginio sabap ra sumangit Aku, kaa' kolondo' sangulun pana natuum Ku.

³¹ Ginio ra pinaabus Ku sangit Kuno risilo. Koson ra apui, mamuso Aku risilo sabap ra binaal nilo.” Tuhan Raja' nakaindagu noyo.