YEHEZKIEL 21 - Tanou Moonsoi Timugon

Ilang ru Tuhan

¹ Indagu Tuhan raki',

² “Okou ulun mapandai matoi, ulaso' Jirusalim! Ulaso' intok-intok sambayangan ru mamagun nano! Pakaraa' moonong ulun giu' ra Israil,

³ ra Aku, Tuhan mindagu: Aku pantula' min. Butuson Ku ilang am mamatoi ramuyun ngaangai', ondo' malaat am niayuk ondo' moonsoi.

⁴ Pakayon Ku ilang koson manggal ra ngaangai' ulun intor ra ralayo saboi ra rabugus.

⁵ Ngaangai' ulun makapandai ra Aku, Tuhan nambutus noyo ra ilang am kalo boo pasagulion ra angkap nano.

⁶ Okou ulun mapandai matoi, pampalaa no ra saang ru ulun ilain koson nangkaus guang am mangiluk kaga'.

⁷ Paat ra ilo mangkuot kua pampalaa kou, raguo' ra mangiluk guang muno sabap ra tanou ra matong no. Tanou no mambaal ra guang nilo malaa', kalindu' nilo malawo, mansiab ambiluo nilo am atur nilo monontol. Paat nano masaboi, am ngaangai' no masauk!” Tuhan Raja' nakaindagu noyo.

⁸ Indagu Tuhan raki',

⁹ “Okou ulun mapandai matoi, indagu no ra ragu manala'. Balai' noyo ulun ra Aku, Tuhan minindagu, ‘Mokoondo' rondo' ilang, ilang ondo' inasa' am inisasan.

¹⁰ Ilang no inasa' koson mamatoi, inisasan maa' raginio manguliat. Tayar ru ulun Kuno kolondo' boo kaansukan, sabap ra inimpayan nilo moonong pampakaraan am ukuman.

¹¹ Ilang no inisasan saboi manguliat maa' raginio pinatampos ra pakayon, inasa' am inisasan saboi manguliat, koson pataakon ra sangulun mamatoi.

¹² Okou ulun mapandai matoi, panulaboi no am pampiau, sabap ra ilang muno pakayon koson manggal ra ulun Kuno. Ngaangai' tingganai ru Israil potoyon mababaya' ra ngaangai' ulun Kuno. Luntugo' kubab sabap ra nangkaus guang.

¹³ Tatanga' Aku mangkinam ra ulun Kuno, am amon marara' ilo tumalikur intor ra tula, ngaangai' baal ragitio lumumpa' risilo.’

¹⁴ Raino, okou ulun mapandai matoi, indagu no ra ragu manala'. Tapapo' longon muno, am ilang pana manimbalui ra ruruli'. Ilang no ilang ondo' mamatoi, mampalalaa' am manimbalui ra ulun.

¹⁵ Ulun Kuno mansiab ambiluo am maratu' ra makasaru. Tatanga' aku mangakang ra bandar nilo ra ilang ondo' manguliat koson ra ganit, am ondo' nakatampos koson mampatoi.

¹⁶ Okou ilang malarom, toboko' pamiris am kait am ati-ati kasagaan muno.

¹⁷ Aku niayuk magilakup, am sangit Kuno lumonggo'. Aku, Tuhan nakaindagu noyo.”

Ilang ru Raja' ru Babilonia

¹⁸ Indagu Tuhan raki',

¹⁹ “Okou ulun mapandai matoi, lukiso' ruo ralan ondo' bayaan ru raja' ru Babilonia ondo' magibit ra ilang nano. Karuo-ruo ralan no tumalimpuun intor ra pagun ondo' nogondo'. Paatango' papan tatandu' giu' ra intok ru ralan no tumalimpuun mampango.

²⁰ Papan tatandu' ondo' rondo' no manulu' ra raja' ru Babilonia ra ralan mongoi ra bandar ru ulun ru Amon giu' ra Raba, am ondo' rondo' poyo ralan mongoi ra Jirusalim, bandar ondo' mokoondo' ra kubu giu' ra Jiuda.

²¹ Minigor raja' ru Babilonia giu' ra sapapa' ru papan tatandu' no, lilisangon ru ralan. Koson mangaru' ra ralan ra ati bayaan nano, inunggung no anak panah nano, nangkuot ra sinungkalalaing nano am nagilong ra angkayau ru bibiag ondo' pinataak koson ra taak simbalui.

²² Panah ondo' makatatandu' ra ‘Jirusalim’ butuson ru kalindu' pamiris nano. Baal ragitio makaarati' ra raja' musiti' manuntur ra tataun-tataun panukul giu' ra kulobon garabang, mambaal ra rinding masawat ru pagawangan am mangkali ra parit-parit.

²³ Mamagun ru Jirusalim marara' mangintopot ra baal raginio, sabap ra nambaal ilo ra nabantuan ra Babilonia. Kaa' ragu inala' ragitio koson mampakara' risilo ra makatula ilo am rokopon.

²⁴ Aku, Tuhan Raja' minindagu risilo, ‘Tula min napandayan noyo ru ulun. Ngaangai' ulun nakapandai ra mapara' gayo ru tula min. Tula min makito ralalom ru moonong baalon min. Raino nasaboi paat ra akau ukumin am pataakon kau ra pantula'.

²⁵ ‘Akau ngai' tingganai ru Israil, tingganai ondo' malaat am gugumuor, orou pangukuman ondo' pupus ramuyun mamaar noyo.

²⁶ Aku, Tuhan Raja' minindagu noyo. Iruo' karaun am serban min. Raino ngaangai' no makulau. Kasawato' intok ru ulun musikin. Paingganaa' intok ru ulun makakuasa'.

²⁷ Malunsai! Malunsai! Totopot lunsayon Ku bandar ti! Kaa' baal ragitio kalo masauk ra kalo poyo ulun pilion Kuno koson mangukum ra bandar ti matong. Paat raginio pataakon Ku bandar ti riso.’ ”

Ilang am ulun ru Amon

²⁸ “Okou ulun mapandai matoi, indagu ra ragu manala'. Balai' noyo ulun ru Amon ondo' magasab ra Israil ra Aku, Tuhan Raja' minindagu, ‘Ilang binutus noyo koson mamuso; inasa' koson mampatoi am manguliat koson ra ganit.

²⁹ Pinaintalang ondo' nakito mino kalo motopot. Inala' mino pana totopot magabau. Gugumuor kau am malaat. Orou pangukuman pupus ramuyun mamaar noyo. Ilang manginggulu' ra liog min.

³⁰ “ ‘Pasulungo' ra angkap ilang no! Mangukum Aku ramuyun giu' ra intok akau inanak.

³¹ Makaliman kau ra sangit Kuno koson ra apui ondo' bibilak paat ra Aku mapaabus raginio ramuyun. Pataakon Takamin ra ulun mapuka', ondo' nakaigila' mamuso ra ulun.

³² Mapuso kau akanon ru apui. Raraa' min malayak giu' ra pagun min galama'. Kolondo' osoi pana boo makakara' ramuyun.’ ” Tuhan nakaindagu noyo.